Efesios 2:11 - Mixteco del suroeste de Tlaxiaco Oaxaca

¹¹ Saájee íyó naku̱ꞌun iniꞌ rán sáá ñaꞌnu rán ne̱ sáá ntiáꞌan kúneí iniꞌ rán Cristo. Jee ránoꞌó, jee nsú nu̱u̱nꞌ se̱ꞌya tataꞌ Israel nkaku rán. Jee rá ñɨvɨ Israel ya̱ níso ráa seña nu̱u̱nꞌ yɨkɨkúñu rá te̱e ráa, naní circuncisión, ya̱ sáꞌá ráa jín naꞌá, jee maáráa síkúnání ráa ránoꞌó ñɨvɨ ya̱ ntu íyó circuncidado kúvi rán. Jee saáva íyó naku̱ꞌun iniꞌ rán sáá ni̱yo rán tiempúꞌ yukuán,

Efesios 2:11 ပူးပေါင်းရင်းမြစ်များ

Mateo 20:7

Jee nkachiꞌ ráa nu̱u̱nꞌ re̱ꞌ: “Saáchi ni ɨɨn ntu̱náꞌ kána ránuꞌuꞌ satíñú ránꞌ jín‑i”, nkachiꞌ ráa, saájee nkachiꞌ re̱ꞌ nu̱u̱nꞌ ráa: “Suni kuáꞌán rán nu̱u̱nꞌ káá tataꞌ uva ni̱ꞌ, [jee chunáán ni̱ꞌ nu̱u̱nꞌ ránoꞌó ne̱ ni ɨɨn jie̱ꞌe̱ꞌ ya̱ váꞌa].”

Romanos 11:17

Jee rá ñɨvɨ Israel kúvi ráa kuéntáꞌ naꞌá yutun olivo stíláꞌ. Jee retú nku̱ichi iniꞌ Ndiosíꞌ sava ráa kuéntáꞌ náneeꞌ re̱ꞌ naꞌá yutun vá, jee noꞌó ya̱ ntu kúvi ñɨvɨ Israel, ya̱ kúvi nú kuéntáꞌ naꞌá yutun olivo yúkú, jee retú nna̱tetáꞌán Ndiosíꞌ noꞌó nu̱u̱nꞌ yutun stíláꞌ vá nakuneeꞌ nú nu̱u̱nꞌ nna̱neeꞌ re̱ꞌ ráa, jee nkenta níꞌínꞌ nú ya̱ váꞌa kuéntáꞌ va̱ji ne̱ nu̱u̱nꞌ yoꞌo sáví yutun olivo stíláꞌ vá.

Romanos 2:26

Soo rá ñɨvɨ inka nación, ya̱ ntu níso ráa seña circuncisión jee retú síkúnkuvi ráa ya̱ tátúníꞌ ley Ndiosíꞌ, jee, ¿á ntu tɨ́ɨn kuéntáꞌ Ndiosíꞌ ráa kuéntáꞌ ya̱ níso seña circuncisión kuéntáꞌ kua̱ꞌ rá te̱e Israel rúja?

Romanos 2:27

Jee rá ñɨvɨ, ya̱ ntu níso ráa seña circuncisión nu̱u̱nꞌ yɨkɨkúñu ráa, jee retú síkúnkuvi ráa ya̱ káchíꞌ tu̱ꞌun tátúníꞌ Ndiosíꞌ, jee sanáaꞌ ráa si̱kɨ̱ꞌ noꞌó, ya̱ jiáꞌa nú nu̱u̱nꞌ ya̱ tátúníꞌ ley Ndiosíꞌ, súnika̱ꞌ kúmí nú tu̱ꞌun ley nta̱túníꞌ Ndiosíꞌ níso nu̱u̱nꞌ tutuꞌ jín súnika̱ꞌ níso nú seña circuncisión.

1 Corintios 12:2

Jee jíníꞌ va̱ꞌa rán ya̱ ne̱ sáá nkuvi rán ñɨvɨ ya̱ ntiáꞌan ínúꞌ iniꞌ rán Cristo, jee na̱sa kua̱ꞌ ni nkuvi ni̱xtákaa ñujiínꞌ ránoꞌó sáva kunikɨnꞌ rán kuneñu̱ꞌun rán rá santúꞌ ñɨ́ꞌɨ́nꞌ ya̱ ntu káꞌánꞌ jee nsi̱kújíká‑a ránoꞌó nu̱u̱nꞌ ya̱ nááꞌ.

1 Corintios 6:11

Jee suꞌva ñaꞌnu sava rán nékúvi, soo vitan chi ya̱ ntu̱ví ka̱ꞌ, chi nna̱kete Ndiosíꞌ ránoꞌó jee nno̱noo rán nu̱u̱nꞌ kua̱chi, jee nsa̱ꞌá sɨ́ɨ́n Ndiosíꞌ ránoꞌó nu̱u̱nꞌ kua̱chi rán sáva kɨꞌɨ rán nu̱u̱nꞌ Cristo, jee ya nkino̱o na̱a̱ꞌ rán nsa̱ꞌá Ndiosíꞌ jie̱ꞌe̱ꞌ yɨ́ꞌɨ́ rán nu̱u̱nꞌ I̱toꞌoꞌ‑ó Jesús ya̱ kúvi Cristo, jee ña̱tíñú Ndiosíꞌ‑ó Ta̱chi̱ꞌ Ííꞌ re̱ꞌ nsa̱ꞌá re̱ꞌ maa.

Gálatas 2:15

Ránuꞌuꞌ ví ichiyúkúnꞌ Israel ne̱ nkaku ráníꞌ, jee nsú ñɨvɨ inka nación kúvi ránꞌ ya̱ káchíꞌ ránꞌ ya̱ ñɨvɨ kua̱chi kúvi ráa.

Gálatas 6:12

Rá te̱e ya̱ kuíni kino̱o va̱ꞌa ráa nu̱u̱nꞌ rá inka ñɨvɨ jie̱ꞌe̱ꞌ ya̱ sáꞌá ráa, suviráa ví ya̱ tétuvi ráa ya̱ sikúnkuvi rán costumbre ñuunꞌ Israel ya̱ sáꞌá circuncidar rán maárán. Sáꞌá ráa suꞌva sáva nkóto u̱ꞌvi̱ꞌ rá ñɨvɨ ráa jie̱ꞌe̱ꞌ tu̱ꞌun ya̱ níꞌiꞌ Cristo nu̱u̱nꞌ kurúsiꞌ jie̱ꞌe̱ꞌ‑ó.

Efesios 2:2

Jee sukuán ñaꞌnu rán tiempúꞌ ya̱ta̱ꞌ nékúvi ne̱ sáá ñaꞌnu rán ichi ñujiínꞌ sáni jiáꞌnu rá ñɨvɨ ñɨ̱vɨ́ yaꞌá ya̱ ntu̱ví yɨ́ꞌɨ́ ráa xi̱ntíín Ndiosíꞌ. Sukuán ñaꞌnu rán sánikua̱ꞌ kuíni kui̱ꞌna̱ꞌ kúñáꞌnú ya̱ kúvi i̱toꞌoꞌ rá ta̱chi̱ꞌ kíni ya̱ jíkanuun ráa nu̱u̱nꞌ ta̱chi̱ꞌ víjin ñɨ̱vɨ́ yaꞌá. Jee kúvi re̱ꞌ ta̱chi̱ꞌ kíni ya̱ sátíñú iniꞌ rá ñɨvɨ kújiááꞌ iniꞌ ráa nu̱u̱nꞌ Ndiosíꞌ.

Efesios 5:8

Chi tiempúꞌ ya̱ta̱ꞌ yukuán jee nkuvi rán kuéntáꞌ ñu̱neenꞌ jie̱ꞌe̱ꞌ kua̱chi rán. Soo vitan jee kúvi rán kuéntáꞌ ñuꞌunꞌ ya̱ túúnꞌ, chi yɨ́ꞌɨ́ rán nu̱u̱nꞌ I̱toꞌoꞌ‑ó. Jee íyó kueꞌnu rán nu̱u̱nꞌ túúnꞌ ñuꞌunꞌ re̱ꞌ iniꞌ ánímaꞌ rán kuéntáꞌ íyó kueꞌnu rá se̱ꞌya Ndiosíꞌ.

Filipenses 3:3

Chi suvió kúvi‑ó ñɨvɨ Ndiosíꞌ, jee suꞌva kúvi‑ó ñɨvɨ circuncidado nijia nu̱u̱nꞌ re̱ꞌ, chi suvió ví ya̱ chíneí Ta̱chi̱ꞌ Ííꞌ maáó ya̱ néñu̱ꞌun‑ó Ndiosíꞌ, chi kúsɨ́ɨꞌ téyɨ́ɨ́ iniꞌ‑ó jie̱ꞌe̱ꞌ ya̱ sáꞌá Cristo Jesús, chi ntu kúkáꞌnú iniꞌ‑ó maáó ya̱ kino̱o na̱a̱ꞌ‑ó nu̱u̱nꞌ Ndiosíꞌ jie̱ꞌe̱ꞌ ya̱ sáꞌá‑ó.

Colosenses 1:21

Jee ránoꞌó chi tiempúꞌ ya̱ta̱ꞌ jee nkuvi rán to̱ꞌo̱ꞌ nu̱u̱nꞌ re̱ꞌ nékúvi, chi ne̱ antúníꞌ rán niniꞌ u̱ꞌvi̱ꞌ rán re̱ꞌ, jie̱ꞌe̱ꞌ rá tiñu niva̱ꞌa nsa̱ꞌá rán nékúvi. Soo vitan chi nnuma̱ni̱ꞌ re̱ꞌ jín rán,

Colosenses 2:11

Jee jie̱ꞌe̱ꞌ ya̱ yɨ́ꞌɨ́ rán nu̱u̱nꞌ Cristo, jee saáva níso rán seña Ndiosíꞌ, soo nsáꞌ kúvi ya̱ nsiíyo ñɨvɨ ntíꞌ ñɨɨn kuéntáꞌ sáꞌá rá ñɨvɨ Israel. Chisaꞌ nsiíyo re̱ꞌ ránoꞌó xi̱ntíín kua̱chi ya̱ níyo néꞌén iniꞌ rán saꞌá rán jín ñunéꞌyúꞌ kua̱chi. Suꞌva tée Cristo seña Ndiosíꞌ yó.

Colosenses 2:13

Jee ránoꞌó chi nkuvi rán kuéntáꞌ ñɨvɨ níꞌiꞌ nu̱u̱nꞌ Ndiosíꞌ jie̱ꞌe̱ꞌ kua̱chi sáꞌá rán, jín jie̱ꞌe̱ꞌ chi ntu níso yɨkɨkúñu rán seña Ndiosíꞌ, chi nsú ñɨvɨ Israel ví rán. Soo vitan chi nna̱xtekúꞌ re̱ꞌ ránoꞌó nɨ́ɨ́nkání jín Cristo, sáá nna̱xtekúꞌ re̱ꞌ maa, chi nne̱káꞌnú iniꞌ re̱ꞌ jie̱ꞌe̱ꞌ nta̱ká rá kua̱chi rán.

Colosenses 3:11

Jee saáva ntu̱náꞌ ítú iniꞌ retú ntu kúvi‑ó ñɨvɨ Israel, áxí kúvi‑ó ñɨvɨ Israel, retú níso yɨkɨkúñu‑ó seña ñɨvɨ Israel naní circuncisión, áxí ntu níso‑ó maa, retú kúvi‑ó rá to̱ꞌo̱ꞌ, áxí ñɨvɨ ñuunꞌ láꞌví, retú kúvi‑ó musúꞌ ya̱ kéꞌen ñɨvɨ maa, áxí ñɨvɨ ya̱ yɨ́tíñú nu̱u̱nꞌ tiñu maáa. Chi I̱toꞌoꞌ kua̱íyó kuitɨꞌ‑ó ví Cristo, jee yɨ́ꞌɨ́ re̱ꞌ iniꞌ kua̱íyó kuitɨꞌ‑ó.