Apoclipsis 5:6 - Mixteco del suroeste de Tlaxiaco Oaxaca

⁶ Saájee [nne̱ꞌyá ni̱ꞌ jee] niniꞌ ni̱ꞌ ya̱ ma̱ꞌñú teyuꞌ nu̱u̱nꞌ nééꞌ tátúníꞌ vá jín ma̱ꞌñú ni kúmíꞌ rá tékúꞌ vá jín rá te̱e kúñáꞌnú vá, jee yukuán íñɨ́ maáréꞌ ya̱ kúvi re̱ꞌ Lanchi Lúlí, ya̱ túvi ya̱ ñaꞌniꞌ rá ñɨvɨ re̱ꞌ. Jee íyó u̱xa̱ꞌ nikɨ re̱ꞌ jín u̱xa̱ꞌ nchinúún re̱ꞌ. Jee ni uxáꞌ nchinúún re̱ꞌ vá, yukuán kúvi ni uxáꞌ espíritu Ndiosíꞌ ya̱ nchu̱ichí Ndiosíꞌ kua̱íyó iniꞌ ñɨ̱vɨ́.

Apoclipsis 5:6 ပူးပေါင်းရင်းမြစ်များ

Lucas 1:69

Chi nchu̱ichí re̱ꞌ ɨɨn ya̱ níso‑o fuersáꞌ ííꞌ ya̱ sikáku‑u yó, jee kiji‑i kaku‑u nu̱u̱nꞌ tataꞌ ichiyúkúnꞌ va̱ji nu̱u̱nꞌ David, ya̱ nkuvi‑i musúꞌ re̱ꞌ,

Juan 1:29

Jee ki̱vɨ̱ꞌ steñu̱ꞌún jee niniꞌ Juan máá Jesús ya̱ váji‑i nu̱u̱nꞌ re̱ꞌ, jee nkachiꞌ re̱ꞌ nu̱u̱nꞌ rá ñɨvɨ: ―Kune̱ꞌyá rán chi te̱e yaꞌá kúvi kuéntáꞌ ɨɨn lanchi lúlí ya̱ nchu̱ichí Ndiosíꞌ maa, chi kuéntáꞌ jiáꞌníꞌ rá ñɨvɨ Israel lanchi lúlí sókóꞌ ráa maa nu̱u̱nꞌ Ndiosíꞌ jee sukuán sííyo te̱e yaꞌá kua̱chi si̱kɨ̱ꞌ rá ñɨvɨ.

Juan 1:36

Jee sáá niniꞌ Juan ya̱ kua̱jia̱ꞌa Jesús yukuán, jee nkachiꞌ re̱ꞌ: ―Kune̱ꞌyá rán, chi yukuán kua̱ꞌa̱nꞌ te̱e ya̱ kúvi kuéntáꞌ lanchi lúlí Ndiosíꞌ ―nkachiꞌ Juan.

Hechos 8:32

Tu̱ꞌun Ndiosíꞌ nééꞌ nu̱u̱nꞌ Tutuꞌ nu̱u̱nꞌ káꞌvi re̱ꞌ káchíꞌ suꞌva: Ntu jíne re̱ꞌ yuꞌú re̱ꞌ, kuéntáꞌ ɨɨn lanchi ña̱na̱ka ráa nu̱u̱nꞌ jiáꞌníꞌ ráa ti̱ꞌ, jee kuéntáꞌ ɨɨn lanchi lúlí másúꞌ íñɨ́ ichinúúnꞌ te̱e, ya̱ sété‑e ka̱chi̱ꞌ ti̱ꞌ.

Apoclipsis 1:4

Nuꞌuꞌ Juan, tée ni̱ꞌ tutuꞌ yaꞌá kua̱jiaaꞌ nu̱u̱nꞌ ránoꞌó ni uxáꞌ grupo ñɨvɨ ya̱ jínúꞌ iniꞌ rán Jesús, ránoꞌó ya̱ nééꞌ nu̱u̱nꞌ ñuunꞌ Asia. Jee na̱ ka̱ꞌ koo ma̱ni̱ꞌ ka̱ꞌ iniꞌ Ndiosíꞌ, jín ni uxáꞌ espíritu ya̱ ntu túvi nijinꞌ, jín Jesucristo saꞌá ráa ya̱ váꞌa nu̱u̱nꞌ ránoꞌó, jín ya̱ saꞌá ráa ya̱ kuva̱ꞌa iniꞌ ánímaꞌ rán. Chi máá Ndiosíꞌ vá íyó vitan, jee suni maáréꞌ vá íyó nɨ́ɨ́nkání tiempúꞌ ya̱ta̱ꞌ, jee suni maáréꞌ vá koo nɨ́ɨ́nkání. Jee ni uxáꞌ espíritu ya̱ ntu túvi nijinꞌ, jee íñɨ́ ráa ichinúúnꞌ teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ.

Apoclipsis 12:11

Soo nku̱neí ráa nu̱u̱nꞌ Satanás vá jie̱ꞌe̱ꞌ ya̱ nñatɨ Cristo ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ nso̱ko̱ꞌ re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ ráa, ya̱ kúvi re̱ꞌ Lanchi Lúlí Ndiosíꞌ, jee suni nku̱neí ráa jie̱ꞌe̱ꞌ tu̱ꞌun ya̱ njia̱ꞌa ráa ya̱ naáꞌ jie̱ꞌe̱ꞌ re̱ꞌ, jee nku̱neí ráa jie̱ꞌe̱ꞌ ntu ñúnúunꞌ ráa maáráa ya̱ kutekuꞌ ráa jee ñeꞌneꞌ iniꞌ ráa maáráa súka̱ꞌ ne̱ kuviꞌ ráa jie̱ꞌe̱ꞌ tu̱ꞌun re̱ꞌ.

Apoclipsis 13:8

Jee kuneñu̱ꞌun kua̱íyó rá ñɨvɨ ti̱ꞌ ya̱ kúvi ráa rá ñɨvɨ nééꞌ ráa ñɨ̱vɨ́ ya̱ ntu níso súví ráa nu̱u̱nꞌ tutuꞌ ya̱ níso‑o rá súví rá ñɨvɨ ya̱ kutekuꞌ ráa jín Ndiosíꞌ nɨ́ɨ́nkání. Tutuꞌ vá kúvi tutuꞌ maáréꞌ ya̱ kúvi Lanchi Lúlí ya̱ ñaꞌniꞌ rá ñɨvɨ re̱ꞌ sáni nsa̱náaꞌ Ndiosíꞌ ne̱ ntiáꞌan kiko̱o ñɨ̱vɨ́.

Apoclipsis 14:1

Saájee nuꞌuꞌ, Juan, nna̱kune̱ꞌyá ni̱ꞌ jee niniꞌ ni̱ꞌ maáréꞌ ya̱ kúvi re̱ꞌ Lanchi Ndiosíꞌ íñɨ́ re̱ꞌ xi̱ni̱ꞌ yuku naní Sión. Jee yukuán íñɨ́ re̱ꞌ jín sientúꞌ u̱vi̱xiko ku̱mi̱ꞌ mil (144,000) ñɨvɨ, jee níso súví re̱ꞌ jín súví Tátáꞌ re̱ꞌ te̱e̱nꞌ ráa.

Apoclipsis 17:14

Saájee kantáꞌán ráa jín maáréꞌ ya̱ kúvi Lanchi Lúlí Ndiosíꞌ. Jee Lanchi Lúlí vá kuneí re̱ꞌ si̱kɨ̱ꞌ ráa, chi maáréꞌ kúvi I̱toꞌoꞌ nu̱u̱nꞌ ntáká rá i̱toꞌoꞌ jín nísotíñú re̱ꞌ tátúníꞌ re̱ꞌ nu̱u̱nꞌ ntáká ráa ya tátúníꞌ rá nu̱u̱nꞌ rá ñuunꞌ. Jee rá ñɨvɨ ya̱ íñɨ́ jín re̱ꞌ kúvi ráa ya̱ nkana Ndiosíꞌ ráa, jín ya̱ nka̱ji re̱ꞌ ráa, jín ya̱ íñɨ́ ni̱ꞌin ráa síkúnkuvi na̱a̱ꞌ ráa nu̱u̱nꞌ re̱ꞌ ―nkachiꞌ najiáꞌáꞌ ííꞌ vá.

Apoclipsis 21:22

Jee ni ntu̱ví níníꞌ ni̱ꞌ ni ɨɨn veñu̱ꞌun iniꞌ ñuunꞌ vá, chi maá I̱toꞌoꞌ‑ó Ndiosíꞌ ya̱ níso re̱ꞌ fesáꞌ ííꞌ ni̱ꞌin ya̱ kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó, jee maáréꞌ jín Lanchi Lúlí kúvi veñu̱ꞌun íyó iniꞌ ñuunꞌ yukuán.

Apoclipsis 21:23

Jee ñuunꞌ vá ntu̱ví jíniñúꞌún‑u ya̱ kujianu̱te̱ꞌ nka̱niiꞌ ni yo̱o̱ꞌ maa. Chi máá nuva Ndiosíꞌ túúnꞌ nu̱u̱nꞌ‑u. Jee maáréꞌ ya̱ kúvi re̱ꞌ Lanchi Lúlí, suvire̱ꞌ kúvi ñuꞌunꞌ ya̱ túúnꞌ yukuán.

Apoclipsis 22:1

Saájee najiáꞌáꞌ ííꞌ vá nxi̱néꞌénꞌ re̱ꞌ nuꞌuꞌ máá maá ntekáꞌnú jín nute ya̱ sáꞌá‑a ya̱ kutekuꞌ rá ñɨvɨ nɨ́ɨ́nkání. Jee máá nute kuíí xúꞌún nijia ví‑i kuéntáꞌ cristal kéne‑e teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ jín maáréꞌ ya̱ kúvi re̱ꞌ Lanchi Lúlí.

Apoclipsis 22:3

Jee ntu̱náꞌ koo ka̱ꞌ ya̱ kɨꞌɨ chi̱ji tu̱ꞌun chisónínu Ndiosíꞌ. Jee nu̱u̱nꞌ ñuunꞌ vá koo teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ jín maáréꞌ ya̱ kúvi re̱ꞌ Lanchi Lúlí Ndiosíꞌ. Jee rá musúꞌ re̱ꞌ kɨtíñú ráa nu̱u̱nꞌ re̱ꞌ.

Apoclipsis 4:8

Jee ni kúmíꞌ rá tékúꞌ vá, íyó i̱ñu̱ꞌ chi̱yo̱ꞌ ta ɨɨn ɨɨn ráa. Jee kua̱íyó rá ya̱ta̱ꞌ chi̱yo̱ꞌ ráa vá, jín chi̱ji chi̱yo̱ꞌ ráa nchi̱tú nchinúún ráa. Jee nuví niñuꞌ ntu jiákui̱ñɨ̱ꞌ ráa ya̱ káchíꞌ ráa: ¡Na̱ ka̱ꞌ vá i̱i̱ꞌ, i̱i̱ꞌ kúvi I̱toꞌoꞌ‑ó Ndiosíꞌ, i̱i̱ꞌ kúvi re̱ꞌ! Maáréꞌ níso fesáꞌ ííꞌ nasɨ́kuitɨꞌ, chi kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó. Maáréꞌ vá íyó nɨ́ɨ́nkání tiempúꞌ va̱ji ya̱ta̱ꞌ, maáréꞌ vá íyó vitan, jee suni maáréꞌ ví ya̱ koo nɨ́ɨ́nkání.

Apoclipsis 5:11

Jee nne̱ꞌyá ni̱ꞌ jee nteso̱ꞌo ni̱ꞌ nusuyuꞌú kue̱ꞌe̱ꞌ víꞌí rá najiáꞌáꞌ ííꞌ Ndiosíꞌ, ni̱kótíyu ráa xiín teyuꞌ nu̱u̱nꞌ tátúníꞌ vá, jín rá tékúꞌ vá, jín rá te̱e kúñáꞌnú vá. Jee ntántúníꞌ kue̱ꞌe̱ꞌ nasɨ́kuitɨꞌ rá millón rá najiáꞌáꞌ ííꞌ íyó yukuán.

Apoclipsis 5:12

Jee ni̱ꞌin nkachiꞌ ráa: Maá Lanchi Lúlí ya̱ nso̱ko̱ꞌ re̱ꞌ maáréꞌ ñaꞌniꞌ ñɨvɨ re̱ꞌ, jee íyó ni̱ꞌi̱nꞌ re̱ꞌ ya̱ nísotíñú re̱ꞌ, ya̱ níꞌínꞌ re̱ꞌ nɨꞌɨ ya̱ yɨ́yáꞌvi, ya̱ saá níchí xá xíniꞌ re̱ꞌ, ya̱ saá níso re̱ꞌ fuersáꞌ ííꞌ, ya̱ nákuatáꞌví nɨꞌɨ ya̱ íyó maáréꞌ, ya̱ káchíꞌ nɨꞌɨ ya̱ íyó ya̱ viiꞌ kúñáꞌnú re̱ꞌ, ya̱ nákuetúꞌún nɨꞌɨ ya̱ netuꞌ kúvi re̱ꞌ. Nkachiꞌ rá najiáꞌáꞌ ííꞌ vá.

Apoclipsis 5:13

Jee nteso̱ꞌo ni̱ꞌ ya̱ nkaꞌanꞌ ntáká rá nsa̱ꞌá Ndiosíꞌ rá íyó súkún, jín rá íyó nu̱u̱nꞌ ñuꞌun, jín rá íyó chi̱ji ñuꞌun, jín rá íyó chi̱ji nteñúꞌún, jee kua̱íyó rá íyó yukuán nkachiꞌ: Maáréꞌ ya̱ nééꞌ re̱ꞌ teyuꞌ tátúníꞌ re̱ꞌ, jín maáréꞌ ya̱ kúvi re̱ꞌ lanchi Ndiosíꞌ, jee nákuetúꞌún‑ó ráa, nákuatáꞌví‑ó ráa, chíñúꞌún‑ó ráa ya̱ viiꞌ víꞌí kúñáꞌnú ráa, na̱ ka̱ꞌ níso ráa fuersáꞌ ííꞌ ya̱ tátúníꞌ ráa nu̱u̱nꞌ kua̱íyó kuitɨꞌ ne̱ vitan jín nɨ́ɨ́nkání. Nkachiꞌ ráa.

Apoclipsis 5:14

Saájee nkachiꞌ ni kúmíꞌ rá tékúꞌ vá: ―Sukuán koo ―nkachiꞌ ráa. Jee ni ókóꞌ ku̱mi̱ꞌ (24) rá te̱e kúñáꞌnú vá nna̱kui̱ñɨ̱ꞌ ítɨ́ ráa jiáxin ráa maáráa ne̱ nu̱u̱nꞌ ñuꞌun, jee nneñu̱ꞌun ráa [maáréꞌ ya̱ nééꞌ re̱ꞌ teyuꞌ nu̱u̱nꞌ tátúníꞌ re̱ꞌ, jín maáréꞌ ya̱ kúvi re̱ꞌ Lanchi Lúlí Ndiosíꞌ].

Apoclipsis 6:16

Jee káchíꞌ ráa nu̱u̱nꞌ rá yuku vá jín rá kava vá: ―Nakuniꞌi rán ya̱ta̱ꞌ ráníꞌ, sáva chiyuꞌuꞌ rán ránuꞌuꞌ nu̱u̱nꞌ maáréꞌ ya̱ nééꞌ re̱ꞌ teyuꞌ nu̱u̱nꞌ tátúníꞌ re̱ꞌ, jín nu̱u̱nꞌ Lanchi Lúlí vá, chi maáréꞌ ví ya̱ taji re̱ꞌ tu̱nóꞌó xéénꞌ nu̱u̱nꞌ ránꞌ jie̱ꞌe̱ꞌ kítɨ́ꞌ iniꞌ re̱ꞌ néꞌyá re̱ꞌ rá kua̱chi ránꞌ.