Apoclipsis 3:14 - Mixteco del suroeste de Tlaxiaco Oaxaca

¹⁴ ’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Laodicea: “Nuꞌuꞌ kúvi ya̱ stúvi ya̱ suꞌva koo sáni káchíꞌ Tu̱ꞌun Ndiosíꞌ, chi síkúnkuvi na̱a̱ꞌ ni̱ꞌ máá tu̱ꞌun na̱a̱ꞌ jee jiáꞌa ni̱ꞌ ya̱ naáꞌ. Jee nuꞌuꞌ nsa̱ꞌá ni̱ꞌ ntáká nantíñú ya̱ nta̱túníꞌ Ndiosíꞌ ya̱ kiko̱o ne̱ tiempúꞌ xíꞌnañúꞌún. Tu̱ꞌun yaꞌá káchíꞌ nuꞌuꞌ:

Apoclipsis 3:14 ပူးပေါင်းရင်းမြစ်များ

Génesis 49:3

’Noꞌó Rubén, kúvi nú se̱ꞌya yɨ́ɨ́ ni̱ꞌ ya̱ nkaku xíꞌnañúꞌún, jee fuersáꞌ xíꞌnañúꞌún ni̱ꞌ nkene nú ya̱ níyo nu̱u̱nꞌ ni̱ꞌ sáá nijia ni̱ꞌ kúvi ni̱ꞌ te̱e. Jee kéne nú ka̱ꞌ nu̱u̱nꞌ kúñáꞌnú nú jee íyó ka̱ꞌ fuersáꞌ nu̱u̱nꞌ nú.

Juan 1:3

Jee nta̱ká ya̱ íyó, jee maáréꞌ nsa̱ꞌá ya̱ kiko̱o ráa nsa̱ꞌá Ndiosíꞌ. Jee ntu̱náꞌ íyó ni ɨɨn nantíñú ya̱ ña̱ko̱o retánꞌ ntu nsa̱ꞌá re̱ꞌ maa nsa̱ꞌá Ndiosíꞌ.

Juan 8:14

Saájee nna̱xiníkó Jesús nu̱u̱nꞌ ráa, jee nkachiꞌ re̱ꞌ: ―Asúnika̱ꞌ jiáꞌa ni̱ꞌ ya̱ naáꞌ jie̱ꞌe̱ꞌ maáníꞌ, jee ya̱ naáꞌ kúvi nijia tu̱ꞌun jiáꞌa ni̱ꞌ. Chi jíníꞌ ni̱ꞌ né núꞌ kúvi nu̱u̱nꞌ va̱ji ni̱ꞌ, jín né núꞌ kúvi nu̱u̱nꞌ kɨ̱ꞌɨ̱nꞌ ni̱ꞌ. Soo ránoꞌó chi ntu̱ví jíníꞌ ránú né núꞌ kúvi nu̱u̱nꞌ va̱ji ni̱ꞌ, ni né núꞌ kúvi nu̱u̱nꞌ kɨ̱ꞌɨ̱nꞌ ni̱ꞌ.

2 Corintios 1:20

Chi maá Cristo ví ya̱ síkúnkuvi nta̱ká rá tu̱ꞌun ya̱ nchi̱sóyuꞌú Ndiosíꞌ, jee káchíꞌ re̱ꞌ “kuvi”. Saáva jie̱ꞌe̱ꞌ Cristo káchíꞌ‑ó “sukuán koo”, “amén”, sáva nákuetúꞌún‑ó ya̱ viiꞌ nasɨ́kuitɨꞌ kúñáꞌnú Ndiosíꞌ.

Colosenses 1:15

Maá Se̱ꞌya Ndiosíꞌ ɨɨn ni kúvi re̱ꞌ jín Ndiosíꞌ, jee nkiji re̱ꞌ ñɨ̱vɨ́ yaꞌá sáva tu̱vi nijinꞌ sáá íyó Ndiosíꞌ ya̱ ntu̱ví túvi kuniꞌ nijinꞌ‑ó. Jee kúñáꞌnú Se̱ꞌya re̱ꞌ ka̱ꞌ nu̱u̱nꞌ nta̱ká ya̱ nsa̱ꞌá re̱ꞌ kuéntáꞌ ɨɨn se̱ꞌya xíꞌnañúꞌún.

Colosenses 1:18

Jee maáréꞌ kúñáꞌnú yósóꞌ re̱ꞌ nu̱u̱nꞌ maáó ya̱ kúneí iniꞌ‑ó re̱ꞌ, kuéntáꞌ yósóꞌ xi̱ni̱ꞌ nu̱u̱nꞌ yɨkɨkúñu, jee maáó kúvi‑ó kuéntáꞌ yɨkɨkúñu re̱ꞌ, ya̱ kúvi‑ó ñɨvɨ ya̱ nstútú Ndiosíꞌ. Jee Cristo ví ya̱ xitékúꞌ re̱ꞌ yó nɨ́ɨ́nkání jín re̱ꞌ, chi xíꞌnañúꞌún re̱ꞌ ví ya̱ nna̱tekuꞌ i̱i̱ꞌ re̱ꞌ jín yɨkɨkúñu re̱ꞌ nteñu rá níꞌiꞌ, sáva máá kúñáꞌnú nasɨ́kuitɨꞌ kúvi re̱ꞌ nu̱u̱nꞌ kua̱íyó kuitɨꞌ.

Colosenses 2:1

Chi kuíni ni̱ꞌ ya̱ kukáꞌnú iniꞌ rán ya̱ kue̱ꞌe̱ꞌ víꞌí núnasɨ́ ni̱ꞌ sáꞌá ni̱ꞌ fesáꞌ sáva kuvi ya̱ váꞌa ránoꞌó, jín rá ñɨvɨ ya̱ kúneí iniꞌ ráa Cristo ya̱ nééꞌ ráa nu̱u̱nꞌ ñuunꞌ Laodicea, jín ne̱ nta̱ká ñaniꞌ ya̱ ntu̱ví jíníꞌ ráa máá maáníꞌ.

Colosenses 4:16

Sáá nɨꞌɨ kaꞌvi rán tu̱ꞌun níso nu̱u̱nꞌ tutuꞌ yaꞌá nu̱u̱nꞌ nta̱ká rán, jee suni ku̱ꞌva rán maa nu̱u̱nꞌ rá ñɨvɨ ya̱ kúneí iniꞌ ráa Cristo ya̱ nútútú ráa ñuunꞌ Laodicea, sáva kaꞌvi ráa maa. Jee suni sukuán kaꞌvi rán tutuꞌ nta̱jí ni̱ꞌ nu̱u̱nꞌ ráa.

Apoclipsis 1:11

Jee nkachiꞌ nusuyuꞌú vá nu̱u̱nꞌ ni̱ꞌ: ―[Nuꞌuꞌ kúvi ni̱ꞌ letra A ya̱ kijiéꞌé xíꞌnañúꞌún jín letra Z ya̱ jínu nu̱u̱nꞌ nɨ́ꞌɨ, chi maáníꞌ kúvi ya̱ ya íyó ni̱ꞌ nɨ́ɨ́nkání ne̱ xíꞌnañúꞌún ne̱ sáá ntiáꞌan kijiéꞌé kiko̱o ñɨ̱vɨ́, jee sáá nɨꞌɨ ñɨ̱vɨ́ koo ni̱ꞌ nɨ́ɨ́nkání.] Jee tee nú nu̱u̱nꞌ ɨɨn tutuꞌ ntáká ya̱ kuniꞌ jínúunꞌ nú, jee tají nú maa kɨ̱ꞌɨ̱nꞌ‑ɨ nu̱u̱nꞌ ni uxáꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ kútútú ráa rá ñuunꞌ ya̱ yɨ́ꞌɨ́ xi̱ntíín ñuunꞌ Asia: Éfeso, Esmirna, Pérgamo, Tiatira, Sardis, Filadelfia, Laodicea ―nkachiꞌ‑i nu̱u̱nꞌ ni̱ꞌ.

Apoclipsis 1:5

Jee Jesús ya̱ kúvi Cristo síkúnkuvi na̱a̱ꞌ re̱ꞌ ya̱ jiáꞌa re̱ꞌ ya̱ naáꞌ jie̱ꞌe̱ꞌ Ndiosíꞌ. Jee xíꞌnañúꞌún re̱ꞌ ví ya̱ nna̱tekuꞌ i̱i̱ꞌ re̱ꞌ jee nkene re̱ꞌ nteñu rá níyɨ, kuéntáꞌ se̱ꞌya nkaku xíꞌnañúꞌún ya̱ kúñáꞌnú ka̱ꞌ. Jee kúñáꞌnú re̱ꞌ tátúníꞌ re̱ꞌ nu̱u̱nꞌ ntáká rá te̱e tátúníꞌ iniꞌ ñɨ̱vɨ́ yaꞌá. Jee maáréꞌ ví ya̱ ñúnúunꞌ re̱ꞌ yó, chi ñatɨ re̱ꞌ ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ jie̱ꞌe̱ꞌ kua̱chi yó, jee nna̱kani núne re̱ꞌ yó nu̱u̱nꞌ kua̱chi‑ó.

Apoclipsis 19:11

Saájee niniꞌ ni̱ꞌ ya̱ níne antivɨ́ súkún nu̱u̱nꞌ nééꞌ Ndiosíꞌ. Jee nna̱kune̱ꞌyá ni̱ꞌ jee yukuán nkenta ɨɨn kitɨ kuíjín, jee ɨɨn ya̱ yósóꞌ ya̱ta̱ꞌ ti̱ꞌ vá naní maáréꞌ ya̱ Síkúnkuvi Na̱a̱ꞌ‑a jín Te̱e Na̱a̱ꞌ Ví‑i. Chi na̱a̱ꞌ jiéꞌnéꞌ re̱ꞌ ntáká tiñu, jee na̱a̱ꞌ kántáꞌán re̱ꞌ.

Apoclipsis 2:1

’Jee tee nú tu̱ꞌun yaꞌá kɨ̱ꞌɨ̱nꞌ‑ɨ nu̱u̱nꞌ ya̱ kúñáꞌnú nu̱u̱nꞌ grupo ñɨvɨ ya̱ jínúꞌ iniꞌ ráa nuꞌuꞌ, ya̱ kútútú ráa ñuunꞌ Éfeso, sáva naku̱ꞌva nú maa nu̱u̱nꞌ ráa: “Nuꞌuꞌ kúvi ya̱ ínaꞌá ni̱ꞌ ni uxáꞌ rá tiu̱u̱nꞌ ichi naꞌá kuáꞌá ni̱ꞌ, jee jíkónúun ni̱ꞌ nteñu ni uxáꞌ rá kantilerúꞌ oro. Tu̱ꞌun yaꞌá káchíꞌ nuꞌuꞌ:

Apoclipsis 21:6

Jee suni nkachiꞌ re̱ꞌ nu̱u̱nꞌ ni̱ꞌ: ―Ya ni̱nu ntáká tiñu ya̱ nkachiꞌ ni̱ꞌ. Chi nuꞌuꞌ kúvi kuéntáꞌ letra A ya̱ kajiéꞌé xíꞌnañúꞌún, jín letra Z ya̱ jínu nu̱u̱nꞌ nɨ́ꞌɨ, chi nuꞌuꞌ kúvi ya̱ nka̱jiéꞌé ni̱ꞌ nɨꞌɨ jee suni nuꞌuꞌ sijínu ni̱ꞌ maa. Jee ñɨvɨ ya̱ ñúkúvi iniꞌ‑i Ndiosíꞌ, kuéntáꞌ jíchíꞌ‑i nute, jee sikútaꞌviꞌ saɨn ni̱ꞌ nute koꞌo ñɨvɨ vá ya̱ kéne nu̱u̱nꞌ káku nute ya̱ sáꞌá‑a kutekuꞌ ñɨvɨ nɨ́ɨ́nkání jín re̱ꞌ.

Apoclipsis 22:13

Nuꞌuꞌ kúvi ni̱ꞌ kuéntáꞌ kúvi letra A ya̱ kíjiéꞌé xíꞌnañúꞌún, jín letra Z ya̱ jínu nu̱u̱nꞌ nɨ́ꞌɨ. Nuꞌuꞌ kúvi ya̱ ya íyó ni̱ꞌ nɨ́ɨ́nkání ne̱ xíꞌnañúꞌún ne̱ sáá ntiáꞌan kijiéꞌé kiko̱o ñɨ̱vɨ́, jee sáá nɨꞌɨ ñɨ̱vɨ́ jee koo ni̱ꞌ nɨ́ɨ́nkání, jee nuꞌuꞌ kúvi ya̱ nka̱jiéꞌé ni̱ꞌ nɨꞌɨ jee suni nuꞌuꞌ sijínu ni̱ꞌ maa.

Apoclipsis 22:6

Saájee nkachiꞌ najiáꞌáꞌ ííꞌ vá nu̱u̱nꞌ nuꞌuꞌ: ―Rá tu̱ꞌun yaꞌá sikúnkuvi na̱a̱ꞌ jee máá naáꞌ nijia kúvi‑i. Chi maá I̱toꞌoꞌ‑ó Ndiosíꞌ ví ya̱ chúꞌun re̱ꞌ Ta̱chi̱ꞌ Ííꞌ re̱ꞌ iniꞌ ánímaꞌ rá ñɨvɨ ñani re̱ꞌ sáva nákani ráa rá tu̱ꞌun kéne yuꞌú re̱ꞌ, jee nchu̱ichí re̱ꞌ najiáꞌáꞌ ííꞌ re̱ꞌ, sáva stúvi‑i nu̱u̱nꞌ rá ñɨvɨ kúvi musúꞌ re̱ꞌ rá tiñu ya̱ ya̱chi̱ꞌ ni kuvi‑i ―nkachiꞌ najiáꞌáꞌ ííꞌ vá.

Apoclipsis 3:7

’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Filadelfia: “Nuꞌuꞌ vá i̱i̱ꞌ ni̱ꞌ jín nuꞌuꞌ vá na̱a̱ꞌ ni̱ꞌ. Ínaꞌá ni̱ꞌ nakáa David, ya̱ nísotíñú ni̱ꞌ kuéntáꞌ kua̱ꞌ nta̱túníꞌ re̱ꞌ nu̱u̱nꞌ nación Israel yanaꞌán. Saáva nuꞌuꞌ ví ya̱ jíne ni̱ꞌ nu̱u̱nꞌ ki̱vɨ rá ñɨvɨ nu̱u̱nꞌ tátúníꞌ ni̱ꞌ, jee ni ɨɨn ntu kuvi nakasɨꞌ maa. Jee nuꞌuꞌ nakasɨꞌ maa, jee ni ɨɨn ntu kúvi nakune maa. Suꞌva káchíꞌ nuꞌuꞌ: