Apoclipsis 22:18 - Mixteco del suroeste de Tlaxiaco Oaxaca

¹⁸ Nuꞌuꞌ, Juan, jiáꞌa ni̱ꞌ ya̱ naáꞌ nu̱u̱nꞌ ntáká rá ñɨvɨ ya̱ teso̱ꞌo ráa rá tu̱ꞌun ya̱ nkene yuꞌú Ndiosíꞌ ya̱ níso nu̱u̱nꞌ tutuꞌ yaꞌá. Retú néni ɨɨn ñɨvɨ ya̱ nachisó‑o ka̱ꞌ tu̱ꞌun nu̱u̱nꞌ rá tu̱ꞌun ya̱ níso nu̱u̱nꞌ tutuꞌ yaꞌá, jee maá Ndiosíꞌ nachisó re̱ꞌ rá tu̱nóꞌó kunoꞌo ñɨvɨ vá ya̱ níso nu̱u̱nꞌ tutuꞌ yaꞌá.

Apoclipsis 22:18 ပူးပေါင်းရင်းမြစ်များ

Mateo 15:13

Soo nna̱xiníkó re̱ꞌ jee nkachiꞌ re̱ꞌ: ―[Kúvi ráa kuéntáꞌ ku̱ꞌu̱ꞌ] jee ntáká ku̱ꞌu̱ꞌ ya̱ ntu̱ví ntée Tátáꞌ ni̱ꞌ Ndiosíꞌ ya̱ nééꞌ antivɨ́ súkún, jee tuꞌun re̱ꞌ maa ne̱ jín yoꞌo‑o.

Efesios 4:17

Saáva káchíꞌ ni̱ꞌ nu̱u̱nꞌ rán jee íchí sánáaꞌ ni̱ꞌ nu̱u̱nꞌ súví I̱toꞌoꞌ‑ó: ya̱ koto jiáꞌnu rán ka̱ꞌ kua̱ꞌ jiáꞌnu rá inka ñɨvɨ ntu kúvi ñɨvɨ Israel, ya̱ jiáꞌnu ráa tiñu jiáni ka̱ꞌá iniꞌ antúníꞌ ráa.

1 Tesalonicenses 4:6

Jee koto jiáꞌa sáꞌá ni ɨɨn ránú nu̱u̱nꞌ ɨɨn ñaniꞌ nú jie̱ꞌe̱ꞌ vá. Jee koto xínáꞌví nú re̱ꞌ jie̱ꞌe̱ꞌ vá. Chi náchunáán I̱toꞌoꞌ‑ó xínóꞌo re̱ꞌ ñɨvɨ jie̱ꞌe̱ꞌ nta̱ká kua̱chi yaꞌá, sánikua̱ꞌ ya nstúꞌva ránꞌ nu̱u̱nꞌ ránoꞌó. Ya nstúvi na̱a̱ꞌ ránꞌ maa nu̱u̱nꞌ ránoꞌó.

Apoclipsis 1:3

Jee na̱ ka̱ꞌ netuꞌ kuvi ɨɨn ñɨvɨ ya̱ káꞌvi rá tu̱ꞌun níso nu̱u̱nꞌ tutuꞌ yaꞌá ya̱ nkene yuꞌú máá maá Ndiosíꞌ, jín rá ñɨvɨ tésóꞌo maa, jee chúꞌun iniꞌ ráa rá tu̱ꞌun níso nu̱u̱nꞌ tutuꞌ yaꞌá. Chi ya̱ kua̱kuyatin tiempúꞌ ya̱ koo ntáká rá tiñu ya̱ nééꞌ nu̱u̱nꞌ tutuꞌ yaꞌá.

Apoclipsis 15:1

Saájee niniꞌ ni̱ꞌ inka ka̱ꞌ seña ne̱ antivɨ́ súkún, ya̱ mánasɨ́ nijia ya̱ tívɨ́ xíniꞌ ni̱ꞌ. Chi íñɨ́ u̱xa̱ꞌ najiáꞌáꞌ ííꞌ Ndiosíꞌ, ya̱ va̱ji ráa jín ni uxáꞌ tu̱nóꞌó ya̱ ku̱ꞌva ráa kunoꞌo rá ñɨvɨ. Jee tu̱nóꞌó nu̱u̱nꞌ nɨ́ꞌɨ kúvi‑i chi sáá nɨꞌɨ rá tu̱nóꞌó yukuán jee stu̱ꞌúꞌ Ndiosíꞌ rá tu̱nóꞌó xéénꞌ jie̱ꞌe̱ꞌ kítɨ́ꞌ iniꞌ re̱ꞌ jie̱ꞌe̱ꞌ rá ñɨvɨ kua̱chi.

Apoclipsis 15:6

Jee iniꞌ veñu̱ꞌun vá nkikene ni uxáꞌ rá najiáꞌáꞌ ííꞌ ya̱ nísotíñú ni uxáꞌ rá tu̱nóꞌó. Jee ñúꞌún ráa saꞌma váꞌa máá ñunkúún nijia ya̱ jiánu̱te̱ꞌ, jee núꞌníꞌ manchíjí oro ni̱ka ráa.

Apoclipsis 19:20

Soo maáréꞌ jín rá soldado ííꞌ re̱ꞌ ntɨɨn ráa kitɨ xéénꞌ kákini vá jín suni inka ka̱ꞌ kitɨ xéénꞌ kákini ya̱ kúvi te̱e ya̱ nkachitu̱ꞌún tu̱ꞌun túꞌún ya̱ nkene yuꞌú kitɨ xe̱e̱nꞌ xíꞌnañúꞌún, jín suni nsa̱ꞌá‑a rá seña a̱nasɨ́ ichinúúnꞌ kitɨ xéénꞌ kákini xíꞌnañúꞌún. Jee jín rá seña a̱nasɨ́ nsa̱ꞌá‑a nxi̱náꞌví‑i rá ñɨvɨ ya̱ nni̱ꞌi̱nꞌ ráa seña kitɨ xéénꞌ kákini xíꞌnañúꞌún kuniso ráa jee kúvi ráa ya̱ nneñu̱ꞌun ráa santúꞌ ñunéꞌyúꞌ maátíꞌ. Jee ni núvíꞌ ráa kitɨ xéénꞌ kákini vá, ni tékúꞌ rátíꞌ jee nsi̱kéne maáréꞌ ya̱ yósóꞌ kitɨ kuíjín vá rátíꞌ nu̱u̱nꞌ ñúꞌúnꞌ xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ sufríꞌ.

Apoclipsis 20:10

Jee kui̱ꞌna̱ꞌ kúñáꞌnú ya̱ nxi̱náꞌví‑i ráa, jee nsi̱kéne Ndiosíꞌ maa nchuꞌun re̱ꞌ maa nu̱u̱nꞌ ñúꞌún xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ jín sufríꞌ, nu̱u̱nꞌ ya̱ yɨ́ꞌɨ́ kitɨ xéénꞌ kákini vá jín inka ka̱ꞌ kitɨ xéénꞌ kákini ya̱ kúvi te̱e ya̱ káchítu̱ꞌún tu̱ꞌun túꞌún kéne yuꞌú kitɨ xe̱e̱nꞌ xíꞌnañúꞌún. Jee nu̱u̱nꞌ ñúꞌúnꞌ yukuán kuꞌun ráa kunoꞌo ráa nɨ́ɨ́nkání.

Apoclipsis 20:15

Jee nu̱u̱nꞌ ñúꞌún xéénꞌ iniꞌ nteñúꞌún yukuán nu̱u̱nꞌ káyúꞌ núꞌvéꞌ ñuꞌunꞌ nchuꞌun re̱ꞌ ntáká rá ñɨvɨ ya̱ ntu níso rá súví ráa nu̱u̱nꞌ tutuꞌ níso rá súví rá ñɨvɨ ya̱ kutekuꞌ ráa nɨ́ɨ́nkání jín Ndiosíꞌ.

Apoclipsis 22:10

Jee suni nkachiꞌ‑i nu̱u̱nꞌ ni̱ꞌ: ―Koto chíséꞌí nú rá tu̱ꞌun yaꞌá ya̱ nkene yuꞌú Ndiosíꞌ ya̱ nééꞌ nu̱u̱nꞌ tutuꞌ yaꞌá, chi ya̱ kua̱kuyatin tiempúꞌ ya̱ sikúnkuvi re̱ꞌ nɨꞌɨ tiñu yaꞌá.

Apoclipsis 22:16

’Jee nuꞌuꞌ Jesús, nchu̱ichí ni̱ꞌ najiáꞌáꞌ ííꞌ ni̱ꞌ sáva stúvi re̱ꞌ nu̱u̱nꞌ noꞌó rá tu̱ꞌun na̱a̱ꞌ yaꞌá sáva ku̱ꞌva nú maa nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ne̱ nu̱u̱nꞌ David váji ni̱ꞌ ya̱ kúvi ni̱ꞌ Se̱ꞌya ichiyúkúnꞌ ya̱ nkene ni̱ꞌ ne̱ nu̱u̱nꞌ David. Viiꞌ víꞌí kúñáꞌnú ni̱ꞌ kuéntáꞌ kua̱ꞌ viiꞌ jiánu̱te̱ꞌ tiu̱u̱nꞌ xúꞌún ya̱ kenta ntáká ya̱neꞌenꞌ.

Apoclipsis 22:7

―¡Kune̱ꞌyá rán!, chi ñamani niji tuku ni̱ꞌ ―nkachiꞌ Jesús― jee netuꞌ kuvi rá ñɨvɨ ya̱ chúꞌun iniꞌ ráa tu̱ꞌun nkene yuꞌú Ndiosíꞌ ya̱ nééꞌ nu̱u̱nꞌ tutuꞌ yaꞌá.

Apoclipsis 22:9

Soo nkachiꞌ‑i nu̱u̱nꞌ ni̱ꞌ: ―Koto sáꞌá nú sukuán, chi suni táꞌán musúꞌ kúvi ni̱ꞌ jín noꞌó, jín rá ñanitáꞌán nú ya̱ kúvi ráa rá ñɨvɨ ya̱ nákani rá tu̱ꞌun kéne yuꞌú Ndiosíꞌ, jín maáráa ya̱ chúꞌun iniꞌ ráa tu̱ꞌun re̱ꞌ ya̱ nééꞌ nu̱u̱nꞌ tutuꞌ yaꞌá. Saáva kuneñu̱ꞌun nú máá maá Ndiosíꞌ.

Apoclipsis 3:14

’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Laodicea: “Nuꞌuꞌ kúvi ya̱ stúvi ya̱ suꞌva koo sáni káchíꞌ Tu̱ꞌun Ndiosíꞌ, chi síkúnkuvi na̱a̱ꞌ ni̱ꞌ máá tu̱ꞌun na̱a̱ꞌ jee jiáꞌa ni̱ꞌ ya̱ naáꞌ. Jee nuꞌuꞌ nsa̱ꞌá ni̱ꞌ ntáká nantíñú ya̱ nta̱túníꞌ Ndiosíꞌ ya̱ kiko̱o ne̱ tiempúꞌ xíꞌnañúꞌún. Tu̱ꞌun yaꞌá káchíꞌ nuꞌuꞌ: