Apoclipsis 20:4 - Mixteco del suroeste de Tlaxiaco Oaxaca

⁴ Jee kuíre niniꞌ ni̱ꞌ rá teyuꞌ nu̱u̱nꞌ nééꞌ rá tátúníꞌ, jee yukuán ña̱kuneeꞌ rá ñɨvɨ ya̱ nni̱ꞌi̱nꞌ ráa tiñu ya̱ kuvi sanáaꞌ ráa kua̱chi. Jee nna̱tekuꞌ i̱i̱ꞌ rá ánímaꞌ rá ñɨvɨ ya̱ ntéꞌneꞌ xi̱ni̱ꞌ ráa jie̱ꞌe̱ꞌ ya̱ njia̱ꞌa ráa ya̱ naáꞌ jie̱ꞌe̱ꞌ Jesús jín jie̱ꞌe̱ꞌ ya̱ niñɨ na̱a̱ꞌ ráa jín Tu̱ꞌun Ndiosíꞌ. Jee suviráa ví rá ñɨvɨ ya̱ ntu nnéñu̱ꞌun ráa kitɨ xéénꞌ kákini xíꞌnañúꞌún vá, ni jín santúꞌ ñunéꞌyúꞌ maátíꞌ. Jee ni ntu nníꞌínꞌ ráa seña ti̱ꞌ kuniso te̱e̱nꞌ ráa ni jín naꞌá ráa. Jee nna̱tekuꞌ i̱i̱ꞌ ráa, jee nta̱túníꞌ ráa tiñu jín Cristo ɨɨn mil (1000) kui̱ya̱ꞌ.

Apoclipsis 20:4 ပူးပေါင်းရင်းမြစ်များ

Mateo 19:28

Jee nkachiꞌ Jesús: ―Máá nááꞌ vá káchíꞌ ni̱ꞌ nu̱u̱nꞌ rán, ya̱ sáá kenta tiempúꞌ ya̱ nɨꞌɨ nasama jiáá, sáá kenta nuꞌuꞌ, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ yaꞌá sáva kuvi ni̱ꞌ Se̱ꞌya Ñɨvɨ, jee sáá kuneeꞌ ni̱ꞌ teyuꞌ kúñáꞌnú nu̱u̱nꞌ tatúníꞌ ni̱ꞌ, nu̱u̱nꞌ viiꞌ nasɨ́kuitɨꞌ kúñáꞌnú ni̱ꞌ, jee ránoꞌó ya̱ níkɨ́nꞌ rán nuꞌuꞌ, jee suni sukuán kuneeꞌ rán ni uxúꞌ u̱vi̱ꞌ (12) teyuꞌ ñáꞌnú, sáva sanáaꞌ rán tatúníꞌ rán nu̱u̱nꞌ rá ñɨvɨ ya̱ kúvi ráa rá ni uxúꞌ u̱vi̱ꞌ (12) tataꞌ ichiyúkúnꞌ ya̱ nkene ráa nu̱u̱nꞌ rá ni uxúꞌ u̱vi̱ꞌ (12) rá se̱ꞌya yɨ́ɨ́ Israel.

Mateo 24:10

Saájee tiempúꞌ yukuán kue̱ꞌe̱ꞌ ñɨvɨ ya̱ kúneí iniꞌ ráa nuꞌuꞌ nikó yátá iniꞌ ráa, ni nsáꞌ kuneí ka̱ꞌ iniꞌ ráa nuꞌuꞌ, jee naku̱ꞌva ráa táꞌán ráa nu̱u̱nꞌ rá te̱e nísotíñú ya̱ xínóꞌo, jee ta̱ꞌvi̱ꞌ iniꞌ ɨɨn inka ráa kune̱ꞌyá ráa táꞌán ráa.

Marcos 6:16

Soo sáá nteso̱ꞌo Herodes rá tu̱ꞌun yaꞌá, nkachiꞌ‑i: ―Juan ví yaꞌá, ya̱ nuꞌuꞌ nta̱jí ni̱ꞌ ya̱ ñeꞌneꞌ ráa su̱ku̱nꞌ re̱ꞌ, jee nna̱tekuꞌ i̱i̱ꞌ re̱ꞌ nkene re̱ꞌ nteñu rá níꞌiꞌ.

Marcos 6:27

Kuíntañúꞌún nta̱jí re̱ꞌ ɨɨn najiáꞌáꞌ re̱ꞌ, jee nta̱túníꞌ re̱ꞌ ya̱ kiji‑i jín xi̱ni̱ꞌ Juan iniꞌ nu̱u̱nꞌ yɨ́ꞌɨ́‑ɨ veka̱a.

Marcos 9:11

Jee ni̱ka̱tu̱ꞌún ráa Jesús: ―¿Na̱chi káchíꞌ rá te̱e xínéꞌénꞌ jie̱ꞌe̱ꞌ tu̱ꞌun ley Ndiosíꞌ, ya̱ xíꞌna ka̱ꞌ íyó kiji Elías, jee kuíre kiji maáréꞌ ya̱ kúvi Cristo rúja?

Lucas 1:17

Jee xíꞌna ka̱ꞌ Juan kenta, ne̱ ntiáꞌan kenta I̱toꞌoꞌ‑ó, jee koo Ta̱chi̱ꞌ Ííꞌ Ndiosíꞌ jín re̱ꞌ jee koo fuersáꞌ níꞌin Ndiosíꞌ jín re̱ꞌ, kuéntáꞌ kua̱ꞌ nkuvi jín Elías ne̱ yanaꞌán. Jee kachitu̱ꞌún re̱ꞌ tu̱ꞌun jie̱ꞌe̱ꞌ I̱toꞌoꞌ‑ó sáva nasaꞌá re̱ꞌ nakama̱ni̱ꞌ rá tátáꞌ jín rá se̱ꞌya ráa, jee sáva nachuꞌun re̱ꞌ ichi rá ñɨvɨ ni̱ꞌin iniꞌ ya̱ sama iniꞌ ráa jee naku̱ꞌun kájí iniꞌ ráa sánikua̱ꞌ ñɨvɨ na̱a̱ꞌ. Jee suꞌva nasaꞌá túꞌva re̱ꞌ rá ñɨvɨ sáva koo tu̱ꞌva va̱ꞌa ráa kunikɨnꞌ ráa I̱toꞌoꞌ‑ó sáá kenta‑a ―nkachiꞌ najiáꞌáꞌ ííꞌ vá.

Lucas 14:14

Saájee na̱ ka̱ꞌ netuꞌ ka̱ꞌ kuvi nú, chi ntu̱náꞌ íyó nu̱u̱nꞌ ráa ya̱ nataji ráa nu̱u̱nꞌ nú. Soo nachunáán Ndiosíꞌ nu̱u̱nꞌ noꞌó ya̱ kútaꞌviꞌ nú ki̱vɨ̱ꞌ natekuꞌ i̱i̱ꞌ rá ñɨvɨ na̱a̱ꞌ ya̱ níꞌiꞌ ―nkachiꞌ Jesús.

Lucas 22:30

sáva kajiꞌ rán koꞌo rán jín nuꞌuꞌ kuneeꞌ rán yuꞌú mesa ni̱ꞌ nu̱u̱nꞌ tátúníꞌ ni̱ꞌ nu̱u̱nꞌ nɨꞌɨ. Jee suni yukuán kuneeꞌ rán rá teyuꞌ ñáꞌnú sáva sanáaꞌ rán tatúníꞌ rán nu̱u̱nꞌ rá ñɨvɨ ya̱ kúvi ráa rá ni uxúꞌ u̱vi̱ꞌ tataꞌ ichiyúkúnꞌ ya̱ nkene ráa nu̱u̱nꞌ rá ni uxúꞌ u̱vi̱ꞌ (12) rá se̱ꞌya yɨ́ɨ́ Israel.

Juan 14:19

Yakuꞌ ni ka̱ꞌ ki̱vɨ̱ꞌ jee nku̱níꞌ ka̱ꞌ rá ñɨvɨ ñɨ̱vɨ́ yaꞌá nuꞌuꞌ, soo ránoꞌó chi kuniꞌ rán nuꞌuꞌ. Chi jie̱ꞌe̱ꞌ tékúꞌ ni̱ꞌ nɨ́ɨ́nkání, jee saáva suni sukuán ránoꞌó ranika̱ꞌ kutekuꞌ rán nɨ́ɨ́nkání jín ni̱ꞌ.

Romanos 11:15

Chi jie̱ꞌe̱ꞌ ya̱ nku̱ichi iniꞌ Ndiosíꞌ rá ñɨvɨ ñuunꞌ Israel jee sukuán jee nkenta nnuma̱ni̱ꞌ re̱ꞌ jín rá inka ñɨvɨ ñɨ̱vɨ́. Jee jie̱ꞌe̱ꞌ sukuán, ¿na̱ja kuvi sáá nakeꞌen tuku re̱ꞌ ráa kuvi ráa ñɨvɨ re̱ꞌ, résa? Chi sukuán kúvi kuéntáꞌ natekuꞌ ráa kene ráa nteñu rá níꞌiꞌ.

Romanos 8:17

Jee ya̱ ya kúvi‑ó se̱ꞌya Ndiosíꞌ, jee suni ni̱ꞌi̱nꞌ‑ó ɨɨn ta̱ꞌvi̱ꞌ. Chi kutaꞌviꞌ‑ó ta̱ꞌvi̱ꞌ taji Ndiosíꞌ nu̱u̱nꞌ‑ó. Jee kutaꞌviꞌ nkáá‑ó ta̱ꞌvi̱ꞌ vá jín Cristo. Retú kuiñɨ ni̱ꞌin‑ó jín Cristo jee íyó ñɨvɨ koto u̱ꞌvi̱ꞌ ráa yó kuéntáꞌ nito u̱ꞌvi̱ꞌ ráa re̱ꞌ. Jee nu̱u̱nꞌ nóꞌo‑órán sukuán jín Cristo, jee suni saꞌá Ndiosíꞌ ya̱ viiꞌ kuñáꞌnú nkáá‑ó jín Cristo.

2 Timoteo 2:12

Jee retú kuni̱ꞌin‑ó kuiñɨ‑ó jín re̱ꞌ sú nóꞌo‑ó jee suni tatúníꞌ‑ó jín re̱ꞌ. Soo retú kúíchi iniꞌ‑ó re̱ꞌ ya̱ nsú I̱toꞌoꞌ‑ó ví re̱ꞌ, jee suni kuichi iniꞌ re̱ꞌ kune̱ꞌyá re̱ꞌ yó ya̱ nsú ñɨvɨ re̱ꞌ kúvi‑ó.

Apoclipsis 1:2

Jee njia̱ꞌa Juan ya̱ naáꞌ jie̱ꞌe̱ꞌ tu̱ꞌun njia̱ꞌa Ndiosíꞌ nu̱u̱nꞌ re̱ꞌ jín jie̱ꞌe̱ꞌ ya̱ naáꞌ ya̱ nstúvi Jesucristo ya̱ niniꞌ jínúunꞌ nijia re̱ꞌ.

Apoclipsis 1:9

Nuꞌuꞌ Juan, ya̱ kúvi ni̱ꞌ ñanitáꞌán‑órán. Jee jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo, ɨɨn nuún ni nkáá nóꞌo ni̱ꞌ jín ránoꞌó tu̱nóꞌó sáꞌá kíni ñɨvɨ yó, jee ɨɨn nuún ni nkáá yɨ́ꞌɨ́ ni̱ꞌ jín rán xi̱ntíín Ndiosíꞌ, jee ɨɨn nuún ni nkáá káꞌnú íyó iniꞌ‑ó kúneí‑ó kúníꞌin‑ó íñɨ́‑ó jín Cristo. Jee jie̱ꞌe̱ꞌ ya̱ stékútu̱ꞌún ni̱ꞌ tu̱ꞌun váꞌa Ndiosíꞌ jín tu̱ꞌun ya̱ kúvi ya̱ naáꞌ ya̱ njiáꞌa Jesús, jee saáva ntɨɨn rá ñɨvɨ nuꞌuꞌ yɨ́ꞌɨ́ ni̱ꞌ xi̱ntíín ráa, jee ña̱na̱ka ráa nuꞌuꞌ ne̱ nu̱u̱nꞌ ɨɨn ñuꞌun naní Patmos ya̱ káá sɨ́ɨ́n ma̱ꞌñú nteñúꞌún.

Apoclipsis 11:11

Saájee sáá njia̱ꞌa u̱ni̱ꞌ ki̱vɨ̱ꞌ sava, yukuán jee saꞌá Ndiosíꞌ ya̱ nastatáchiꞌ ráa, jee natekuꞌ tuku ráa, jee nakui̱ñɨ̱ꞌ nichiꞌ ráa. Jee kuyu̱ꞌví víꞌí rá ñɨvɨ ya̱ kuniꞌ ráa ya̱ nna̱tekuꞌ rá te̱e vá.

Apoclipsis 11:15

Saájee najiáꞌáꞌ ííꞌ uxáꞌ nti̱vɨ̱ꞌ‑ɨ trompeta‑a, jee nkaꞌanꞌ ni̱ꞌin rá nusuyuꞌú ne̱ antivɨ́ súkún, jee káchíꞌ ráa: ―Ntáká nación íyó ñɨ̱vɨ́ ya̱ tátúníꞌ rá ñɨvɨ ya nna̱kɨ̱ꞌɨ ráa naꞌá máá I̱toꞌoꞌ‑ó Ndiosíꞌ jín Cristo re̱ꞌ, jee maáréꞌ ví ya̱ tátúníꞌ re̱ꞌ nu̱u̱nꞌ ráa nɨ́ɨ́nkání ―káchíꞌ ráa.

Apoclipsis 11:3

Jee ku̱ꞌva ni̱ꞌ tiñu kuniso ni uvíꞌ te̱e ni̱ꞌ sáva naku̱ꞌva ráa ya̱ naáꞌ jie̱ꞌe̱ꞌ tu̱ꞌun ni̱ꞌ. Jee ɨɨn mil u̱vi̱ꞌ sientúꞌ u̱ni̱xiko (1,260) ki̱vɨ̱ꞌ kachitu̱ꞌún ráa tu̱ꞌun kene yuꞌú ni̱ꞌ. Jee kuꞌun ráa saꞌma nayɨ́ ya̱ stúvi‑i ya̱ kukúeká iniꞌ ráa jie̱ꞌe̱ꞌ kua̱chi sáꞌá rá ñɨvɨ ―nkachiꞌ Ndiosíꞌ.

Apoclipsis 11:7

Jee sáá kuneí ráa sijínu ráa naku̱ꞌva ráa ya̱ naáꞌ jie̱ꞌe̱ꞌ Tu̱ꞌun Ndiosíꞌ, saájee kene máá kitɨ xéénꞌ kákini ne̱ numaꞌ ya̱ ntu jínu nu̱u̱nꞌ kúnú‑u, jee kantáꞌán‑a jín ni núvíꞌ ráa, jee kuneí‑i jín ráa jee kaꞌniꞌ‑i ráa.

Apoclipsis 12:11

Soo nku̱neí ráa nu̱u̱nꞌ Satanás vá jie̱ꞌe̱ꞌ ya̱ nñatɨ Cristo ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ nso̱ko̱ꞌ re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ ráa, ya̱ kúvi re̱ꞌ Lanchi Lúlí Ndiosíꞌ, jee suni nku̱neí ráa jie̱ꞌe̱ꞌ tu̱ꞌun ya̱ njia̱ꞌa ráa ya̱ naáꞌ jie̱ꞌe̱ꞌ re̱ꞌ, jee nku̱neí ráa jie̱ꞌe̱ꞌ ntu ñúnúunꞌ ráa maáráa ya̱ kutekuꞌ ráa jee ñeꞌneꞌ iniꞌ ráa maáráa súka̱ꞌ ne̱ kuviꞌ ráa jie̱ꞌe̱ꞌ tu̱ꞌun re̱ꞌ.

Apoclipsis 14:11

Jee ñu̱ꞌma̱ꞌ ya̱ káyúꞌ ráa yukuán kɨ̱nkaa‑a nɨ́ɨ́nkání kuitɨꞌ. Jee ni nsáꞌ koo tu̱najia̱ví ráa nuví niñuꞌ nu̱u̱nꞌ tu̱nóꞌó kunoꞌo ráa, jie̱ꞌe̱ꞌ ya̱ néñu̱ꞌun ráa kitɨ xéénꞌ kákini vá, jín santúꞌ ñunéꞌyúꞌ máá maátíꞌ, jín retú néni ɨɨn ni̱ꞌi̱nꞌ‑i kuniso‑o seña súví ti̱ꞌ.

Apoclipsis 15:2

Jee niniꞌ ni̱ꞌ ya̱ kuéntáꞌ íyó nteñúꞌún nute ya̱ túvi ni núvíꞌ ichi kuéntáꞌ vidrio, jee sákánuun nute vá jín ñuꞌunꞌ. Jee rá ñɨvɨ ya̱ nku̱neí ráa si̱kɨ̱ꞌ kitɨ xéénꞌ kákini vá, jín si̱kɨ̱ꞌ santúꞌ ñunéꞌyúꞌ máá maátíꞌ, jín ya̱ ntu níso seña ti̱ꞌ te̱e̱nꞌ ráa, ni jín numero súví ti̱ꞌ, jee íñɨ́ rá ñɨvɨ vá yúnteñúꞌún vá ínaꞌá ráa yaaꞌ arpa ya̱ njiáꞌa Ndiosíꞌ nu̱u̱nꞌ ráa.

Apoclipsis 17:8

Jee kitɨ xéénꞌ kákini ya̱ niniꞌ nú, ni̱yo ti̱ꞌ yanaꞌán, soo ntu íyó ti̱ꞌ vitan, chi íyó kene tuku ti̱ꞌ numaꞌ ya̱ ntu jínu nu̱u̱nꞌ kúnú‑u nu̱u̱nꞌ yɨ́ꞌɨ́ ti̱ꞌ, jee íyó kɨ̱ꞌɨ̱nꞌ ti̱ꞌ nu̱u̱nꞌ ji̱ta ti̱ꞌ kunoꞌo ti̱ꞌ. Jee íyó tutuꞌ ya̱ ne̱ ntiáꞌan kiko̱o ñɨ̱vɨ́ níso rá súví rá ñɨvɨ kutekuꞌ nɨ́ɨ́nkání jín Ndiosíꞌ. Jee rá ñɨvɨ nééꞌ ñɨ̱vɨ́ ya̱ ntu níso súví ráa nu̱u̱nꞌ tutuꞌ vá jee ti̱vɨ́ xíniꞌ ráa kuniꞌ ráa kitɨ vá, ya̱ ni̱yo ti̱ꞌ yanaꞌán, soo ntu íyó ti̱ꞌ vitan, jee koo tuku ti̱ꞌ.

Apoclipsis 2:26

’Ñɨvɨ ya̱ kuneí ráa si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jín ya̱ sikúnkuvi na̱a̱ꞌ va̱ꞌa ráa tiñu ni̱ꞌ sáni kuíni ni̱ꞌ ne̱ nu̱u̱nꞌ nɨ́ꞌɨ, saájee saꞌá ni̱ꞌ ya̱ kúñáꞌnú rá ñɨvɨ vá jee tátúníꞌ ráa nu̱u̱nꞌ rá nación.

Apoclipsis 20:6

Jee na̱ ka̱ꞌ netuꞌ ka̱ꞌ na̱ ka̱ꞌ i̱i̱ꞌ ka̱ꞌ kuvi ɨɨn ñɨvɨ ya̱ kuvi ɨɨn rá ñɨvɨ ya̱ natekuꞌ i̱i̱ꞌ ráa ya̱ xíꞌnañúꞌún, chi ni nsáꞌ yɨ́ꞌɨ́ rá ñɨvɨ vá xi̱ntíín ñuníyɨ nsáꞌ kuviꞌ ráa ka̱ꞌ ya̱ uvíꞌ íchí ya̱ nkúnoꞌo ráa ka̱ꞌ tu̱nóꞌó kiji. Chisaꞌ kuvi ráa su̱tu̱ꞌ nu̱u̱nꞌ Ndiosíꞌ jín nu̱u̱nꞌ Cristo. Jee tatúníꞌ ráa tiñu jín re̱ꞌ ɨɨn mil (1000) kui̱ya̱ꞌ.

Apoclipsis 22:5

Jee ni nsáꞌ koo ka̱ꞌ yakuááꞌ. Jee rá ñɨvɨ ni nsáꞌ kuniñúꞌún ráa ka̱ꞌ ñuꞌunꞌ natee ráa, ni ya̱ kutuunꞌ ka̱ꞌ ñuꞌunꞌ nka̱niiꞌ. Chi maá I̱toꞌoꞌ‑ó Ndiosíꞌ stúúnꞌ re̱ꞌ nuva re̱ꞌ kutuunꞌ‑u nu̱u̱nꞌ ráa. Jee suni tatúníꞌ ráa nɨ́ɨ́nkání.

Apoclipsis 3:21

’Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ku̱ꞌva ni̱ꞌ ya̱ kuneeꞌ ñɨvɨ vá jín nuꞌuꞌ nu̱u̱nꞌ teyuꞌ ni̱ꞌ nu̱u̱nꞌ tátúníꞌ ni̱ꞌ, kuéntáꞌ kua̱ꞌ nku̱neí ni̱ꞌ si̱kɨ̱ꞌ tiñu níváꞌa jee nééꞌ ni̱ꞌ jín Tááꞌ ni̱ꞌ nu̱u̱nꞌ teyuꞌ re̱ꞌ nu̱u̱nꞌ tátúníꞌ re̱ꞌ.

Apoclipsis 4:4

Jee nu̱u̱nꞌ teyuꞌ re̱ꞌ tátúníꞌ re̱ꞌ, yukuán ni̱kótíyu o̱ko̱ꞌ ku̱mi̱ꞌ (24) ka̱ꞌ teyuꞌ nu̱u̱nꞌ tátúníꞌ. Jee yukuán nééꞌ o̱ko̱ꞌ ku̱mi̱ꞌ (24) rá maá te̱e kúñáꞌnú. Jee ñúꞌún ráa máá saꞌma kuíjín, jee ñúxíniꞌ ráa corona oro.

Apoclipsis 6:9

Jee sáá nsine re̱ꞌ ya̱ úꞌúnꞌ seyúꞌ, jee niniꞌ ni̱ꞌ maa nu̱u̱nꞌ chíñúꞌún ráa Ndiosíꞌ nu̱u̱nꞌ naní altar, jee niniꞌ ni̱ꞌ ya̱ chi̱ji yukuán yɨ́ꞌɨ́ rá ánímaꞌ rá ñɨvɨ ya̱ ni̱ꞌi̱ꞌ ráa chi ñaꞌniꞌ ñɨvɨ ráa jie̱ꞌe̱ꞌ ni̱nu̱ꞌ iniꞌ ráa tu̱ꞌun váꞌa Ndiosíꞌ jín ya̱ nstúvi ráa ya̱ naáꞌ jie̱ꞌe̱ꞌ tu̱ꞌun vá.

Apoclipsis 7:3

Jee nkachiꞌ najiáꞌáꞌ ííꞌ vá: ―Koto na̱ sáꞌá kini rán xináánꞌ rán ñuꞌun ni nteñúꞌún ni rá yutun, ne̱kua̱ꞌ xíꞌna ka̱ꞌ tee ránꞌ seyúꞌ te̱e̱nꞌ ntáká rá musúꞌ Ndiosíꞌ ya̱ yɨ́tíñú ráa nu̱u̱nꞌ re̱ꞌ ―nkachiꞌ najiáꞌáꞌ ííꞌ vá.