Apoclipsis 2:26 - Mixteco del suroeste de Tlaxiaco Oaxaca

²⁶ ’Ñɨvɨ ya̱ kuneí ráa si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jín ya̱ sikúnkuvi na̱a̱ꞌ va̱ꞌa ráa tiñu ni̱ꞌ sáni kuíni ni̱ꞌ ne̱ nu̱u̱nꞌ nɨ́ꞌɨ, saájee saꞌá ni̱ꞌ ya̱ kúñáꞌnú rá ñɨvɨ vá jee tátúníꞌ ráa nu̱u̱nꞌ rá nación.

Apoclipsis 2:26 ပူးပေါင်းရင်းမြစ်များ

Mateo 10:22

Taꞌvi iniꞌ kua̱íyó rá ñɨvɨ kune̱ꞌyá ráa ránoꞌó, jie̱ꞌe̱ꞌ yɨ́ꞌɨ́ rán nu̱u̱nꞌ nuꞌuꞌ. Soo rá ñɨvɨ kuni̱ꞌin kuiñɨ kutú ráa jín ni̱ꞌ ne̱ nu̱u̱nꞌ kenta ji̱nu jee suviráa ví ya̱ sikáku Ndiosíꞌ ráa.

Mateo 19:28

Jee nkachiꞌ Jesús: ―Máá nááꞌ vá káchíꞌ ni̱ꞌ nu̱u̱nꞌ rán, ya̱ sáá kenta tiempúꞌ ya̱ nɨꞌɨ nasama jiáá, sáá kenta nuꞌuꞌ, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ yaꞌá sáva kuvi ni̱ꞌ Se̱ꞌya Ñɨvɨ, jee sáá kuneeꞌ ni̱ꞌ teyuꞌ kúñáꞌnú nu̱u̱nꞌ tatúníꞌ ni̱ꞌ, nu̱u̱nꞌ viiꞌ nasɨ́kuitɨꞌ kúñáꞌnú ni̱ꞌ, jee ránoꞌó ya̱ níkɨ́nꞌ rán nuꞌuꞌ, jee suni sukuán kuneeꞌ rán ni uxúꞌ u̱vi̱ꞌ (12) teyuꞌ ñáꞌnú, sáva sanáaꞌ rán tatúníꞌ rán nu̱u̱nꞌ rá ñɨvɨ ya̱ kúvi ráa rá ni uxúꞌ u̱vi̱ꞌ (12) tataꞌ ichiyúkúnꞌ ya̱ nkene ráa nu̱u̱nꞌ rá ni uxúꞌ u̱vi̱ꞌ (12) rá se̱ꞌya yɨ́ɨ́ Israel.

Mateo 24:13

Soo rá ñɨvɨ kuni̱ꞌin kuiñɨ kutú ráa jín ni̱ꞌ ne̱ nu̱u̱nꞌ kenta ji̱nu jee suviráa ví ya̱ sikáku Ndiosíꞌ ráa.

Juan 6:29

Jee nna̱xiníkó Jesús nu̱u̱nꞌ ráa, jee nkachiꞌ re̱ꞌ: ―Tiñu Ndiosíꞌ ví ya̱ kuneí iniꞌ rán nuꞌuꞌ, ya̱ nchu̱ichí re̱ꞌ va̱ji ni̱ꞌ ―nkachiꞌ Jesús.

Romanos 2:7

Jee rá ñɨvɨ níkɨ́nꞌ ni̱ꞌin ráa sáꞌá ráa ya̱ váꞌa chi núkú ráa ya̱ saꞌá Ndiosíꞌ ya̱ nuñáꞌnú ráa, jín ya̱ nakuatáꞌví re̱ꞌ ráa jín ya̱ nku̱víꞌ ráa ka̱ꞌ. Jee nachunáán re̱ꞌ nu̱u̱nꞌ ráa ya̱ kutekuꞌ ráa jín re̱ꞌ nɨ́ɨ́nkání.

Romanos 8:37

Soo súka̱ꞌ nóꞌo‑ó tu̱nóꞌó sukuán, jee Cristo ya̱ ñúnúunꞌ re̱ꞌ yó, maáréꞌ sáꞌá re̱ꞌ ya̱ ntántúníꞌ kuneí‑ó núneí ka̱ꞌ iniꞌ‑ó,

1 Tesalonicenses 3:5

Saájee, sáá ntu nkúvi kuneí ka̱ꞌ iniꞌ ni̱ꞌ kunetu ni̱ꞌ, jee nchu̱ichí ni̱ꞌ Timoteo, sáva kukáꞌnú iniꞌ ni̱ꞌ jie̱ꞌe̱ꞌ na̱ja jiáꞌnu rán ichi ya̱ kúneí iniꞌ rán Cristo. Chi Satanás ya̱ kúñáꞌnú nu̱u̱nꞌ rá ta̱chi̱ꞌ kíni, síkúvi re̱ꞌ iniꞌ ñɨvɨ. Jee nániꞌvɨꞌ iniꞌ ni̱ꞌ ya̱ sa̱naanꞌ nsi̱kúvi re̱ꞌ iniꞌ ránoꞌó. Jee suꞌva nkenta kúvi tiñu ka̱ꞌá, nékúvi, tiñu nsa̱ꞌá ránꞌ nteñu ránoꞌó, ya̱ nkachitu̱ꞌún ráníꞌ tu̱ꞌun Cristo.

Hebreos 3:6

Soo Cristo, kúvi re̱ꞌ Se̱ꞌya Ndiosíꞌ, jee síkúnkuvi na̱a̱ꞌ re̱ꞌ ntáká tiñu ya̱ yósóꞌ re̱ꞌ nu̱u̱nꞌ rá ñɨvɨ veꞌi Ndiosíꞌ, ya̱ suvi kúvi maáórán, retú íñɨ́ ni̱ꞌin‑ó níkɨ́nꞌ kutú‑ó kúneí iniꞌ‑ó re̱ꞌ ne̱ kenta nu̱u̱nꞌ nɨ́ꞌɨ tékúꞌ‑ó, jín ya̱ kúsɨ́ɨꞌ víꞌí iniꞌ‑ó jie̱ꞌe̱ꞌ ya̱ íyó tu̱neí iniꞌ‑ó ya̱ kuneeꞌ‑ó jín Ndiosíꞌ.

Santiago 2:20

Te̱e naanꞌ, ¿á kuíni nú ya̱ stúvi kájí ni̱ꞌ nu̱u̱nꞌ nú ya̱ ntu íyótiñu ya̱ jínúꞌ iniꞌ ɨɨn ñɨvɨ soo ntu sáꞌá‑a tiñu váꞌa? Kuéntáꞌ níꞌiꞌ ya̱ jínúꞌ iniꞌ ñɨvɨ vá.

1 Juan 2:19

Jee nteñu maáórán nkene ráa, soo ntu̱ví nkúvi ráa táꞌán‑órán ya̱ yɨ́ꞌɨ́‑órán nu̱u̱nꞌ Jesús. Chi retánꞌ nkuvi ráa táꞌán‑órán, jee nkino̱o ráa jín‑ó, nékúvi. Soo nkene ráa nteñu‑ó kua̱ꞌa̱nꞌ ráa sáva túvi kájí ya̱ nsú táꞌán‑ó kúvi nta̱ká ráa.

1 Juan 3:23

Jee yaꞌá kúvi tiñu ya̱ tátúníꞌ re̱ꞌ: ya̱ kuneí iniꞌ‑ó Se̱ꞌya re̱ꞌ Jesucristo, jín ya̱ kunu̱u̱nꞌ‑ó ɨɨn inka táꞌán‑ó, sánikua̱ꞌ nta̱túníꞌ re̱ꞌ nu̱u̱nꞌ‑ó.

1 Juan 5:5

¿Né ɨɨn ví ya̱ kúneí si̱kɨ̱ꞌ ñujiínꞌ ñɨ̱vɨ́ yaꞌá, ya̱ ntu sáꞌá‑a vá, résa? Suvivá kúvi ñɨvɨ ya̱ jínúꞌ iniꞌ‑i ya̱ Jesús ví máá Se̱ꞌya Ndiosíꞌ.

Apoclipsis 2:11

’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ni nsáꞌ ni̱ꞌi̱nꞌ‑i ka̱ꞌ tu̱nóꞌó xinóꞌo Ndiosíꞌ maa ya̱ nku̱víꞌ tuku‑u ya̱ uvíꞌ íchí nu̱u̱nꞌ Ndiosíꞌ.”

Apoclipsis 2:17

’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ku̱ꞌva ni̱ꞌ kajiꞌ‑i maná ya̱ íyó yuꞌuꞌ. Jee suni ku̱ꞌva ni̱ꞌ ɨɨn yu̱u̱ꞌ kuíjín nu̱u̱nꞌ ñɨvɨ vá, jee nu̱u̱nꞌ yu̱u̱ꞌ yukuán nééꞌ ɨɨn súví jiáá, ya̱ ni ɨɨn ñɨvɨ ntu jíníꞌ maa, chi sáni maá ni ñɨvɨ ya̱ ni̱ꞌi̱nꞌ yu̱u̱ꞌ vá ví ya̱ kukáꞌnú iniꞌ maa.”

Apoclipsis 2:7

’Ñɨvɨ ya̱ íyó so̱ꞌo, jee teso̱ꞌo va̱ꞌa nú rá tu̱ꞌun ya̱ káchíꞌ Ta̱chi̱ꞌ Ííꞌ nu̱u̱nꞌ rá grupo rá ñɨvɨ ya̱ jínúꞌ iniꞌ ráa nuꞌuꞌ. Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, saájee ku̱ꞌva ni̱ꞌ ya̱ kajiꞌ ñɨvɨ vá rá vixíꞌ ya̱ kúun nu̱u̱nꞌ maá yutun ya̱ sáꞌá ya̱ kutekuꞌ ñɨvɨ nɨ́ɨ́nkání jín ni̱ꞌ. Jee yutun vá íñɨ́‑ɨ ne̱ nu̱u̱nꞌ viiꞌ víꞌí íyó nu̱u̱nꞌ nééꞌ Ndiosíꞌ.”

Apoclipsis 20:4

Jee kuíre niniꞌ ni̱ꞌ rá teyuꞌ nu̱u̱nꞌ nééꞌ rá tátúníꞌ, jee yukuán ña̱kuneeꞌ rá ñɨvɨ ya̱ nni̱ꞌi̱nꞌ ráa tiñu ya̱ kuvi sanáaꞌ ráa kua̱chi. Jee nna̱tekuꞌ i̱i̱ꞌ rá ánímaꞌ rá ñɨvɨ ya̱ ntéꞌneꞌ xi̱ni̱ꞌ ráa jie̱ꞌe̱ꞌ ya̱ njia̱ꞌa ráa ya̱ naáꞌ jie̱ꞌe̱ꞌ Jesús jín jie̱ꞌe̱ꞌ ya̱ niñɨ na̱a̱ꞌ ráa jín Tu̱ꞌun Ndiosíꞌ. Jee suviráa ví rá ñɨvɨ ya̱ ntu nnéñu̱ꞌun ráa kitɨ xéénꞌ kákini xíꞌnañúꞌún vá, ni jín santúꞌ ñunéꞌyúꞌ maátíꞌ. Jee ni ntu nníꞌínꞌ ráa seña ti̱ꞌ kuniso te̱e̱nꞌ ráa ni jín naꞌá ráa. Jee nna̱tekuꞌ i̱i̱ꞌ ráa, jee nta̱túníꞌ ráa tiñu jín Cristo ɨɨn mil (1000) kui̱ya̱ꞌ.

Apoclipsis 21:7

Jee ɨɨn ñɨvɨ ya̱ kuneí‑i si̱kɨ̱ꞌ ntáká tiñu níváꞌa, jee ni̱ꞌi̱nꞌ ñɨvɨ vá ntáká rá yaꞌá kuvi ta̱ꞌvi̱ꞌ‑i. Chi nuꞌuꞌ kuvi ni̱ꞌ Ndiosíꞌ ñɨvɨ vá, jee kuvi‑i se̱ꞌya ni̱ꞌ.

Apoclipsis 22:5

Jee ni nsáꞌ koo ka̱ꞌ yakuááꞌ. Jee rá ñɨvɨ ni nsáꞌ kuniñúꞌún ráa ka̱ꞌ ñuꞌunꞌ natee ráa, ni ya̱ kutuunꞌ ka̱ꞌ ñuꞌunꞌ nka̱niiꞌ. Chi maá I̱toꞌoꞌ‑ó Ndiosíꞌ stúúnꞌ re̱ꞌ nuva re̱ꞌ kutuunꞌ‑u nu̱u̱nꞌ ráa. Jee suni tatúníꞌ ráa nɨ́ɨ́nkání.

Apoclipsis 3:12

’Ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee saꞌá ni̱ꞌ ya̱ kuñáꞌnú ñɨvɨ vá kuéntáꞌ kúvi‑i nekaꞌ ya̱ yɨ́tuvi iniꞌ veñu̱ꞌun Ndiosíꞌ ni̱ꞌ. Jee ni nsáꞌ kene‑e nu̱u̱nꞌ nééꞌ Ndiosíꞌ yukuán. Jee tee ni̱ꞌ súví Ndiosíꞌ ni̱ꞌ ñɨvɨ vá, jín súví jiáá nuꞌuꞌ, jín súví ñuunꞌ Ndiosíꞌ ni̱ꞌ. Jee ñuunꞌ yukuán kúvi Jerusalén jiáá, jee va̱kuun ne̱ súkún nu̱u̱nꞌ nééꞌ Ndiosíꞌ maáníꞌ.

Apoclipsis 3:21

’Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ku̱ꞌva ni̱ꞌ ya̱ kuneeꞌ ñɨvɨ vá jín nuꞌuꞌ nu̱u̱nꞌ teyuꞌ ni̱ꞌ nu̱u̱nꞌ tátúníꞌ ni̱ꞌ, kuéntáꞌ kua̱ꞌ nku̱neí ni̱ꞌ si̱kɨ̱ꞌ tiñu níváꞌa jee nééꞌ ni̱ꞌ jín Tááꞌ ni̱ꞌ nu̱u̱nꞌ teyuꞌ re̱ꞌ nu̱u̱nꞌ tátúníꞌ re̱ꞌ.

Apoclipsis 3:5

’Ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, saájee naku̱ꞌun‑u saꞌma kuíjín. Jee ni nsáꞌ xinónoo ni̱ꞌ súví ñɨvɨ vá nu̱u̱nꞌ tutuꞌ ya̱ níso súví rá ñɨvɨ ya̱ kutekuꞌ ráa nɨ́ɨ́nkání jín nuꞌuꞌ. Jee stúvi ni̱ꞌ nu̱u̱nꞌ Tátáꞌ ni̱ꞌ jín nu̱u̱nꞌ rá najiáꞌáꞌ ííꞌ re̱ꞌ, ya̱ yɨ́ꞌɨ́ nijia ñɨvɨ vá nu̱u̱nꞌ nuꞌuꞌ.