Apoclipsis 2:10 - Mixteco del suroeste de Tlaxiaco Oaxaca

¹⁰ Soo koto yúꞌví rán jie̱ꞌe̱ꞌ rá tu̱nóꞌó kunoꞌo rán. Chi kui̱ꞌna̱ꞌ kúñáꞌnú, jee saꞌá‑a ya̱ chiꞌi ñɨvɨ sava ránoꞌó veka̱a sáva kototúníꞌ‑i ránoꞌó retú kunikɨnꞌ nijia rán nuꞌuꞌ áxí ntu̱ví, jee kunoꞌo rán tu̱nóꞌó u̱ji̱ꞌ ki̱vɨ̱ꞌ. Soo kuiñɨ ni̱ꞌin rán sikúnkuvi na̱a̱ꞌ rán súka̱ꞌ ne̱ kuviꞌ rán, saájee taji ni̱ꞌ ta̱ꞌvi̱ꞌ nu̱u̱nꞌ rán, ya̱ suvi kuvi ya̱ ni̱ꞌi̱nꞌ rán ya̱ saꞌá Ndiosíꞌ ya̱ kutekuꞌ rán jín ni̱ꞌ nɨ́ɨ́nkání.

Apoclipsis 2:10 ပူးပေါင်းရင်းမြစ်များ

Mateo 10:22

Taꞌvi iniꞌ kua̱íyó rá ñɨvɨ kune̱ꞌyá ráa ránoꞌó, jie̱ꞌe̱ꞌ yɨ́ꞌɨ́ rán nu̱u̱nꞌ nuꞌuꞌ. Soo rá ñɨvɨ kuni̱ꞌin kuiñɨ kutú ráa jín ni̱ꞌ ne̱ nu̱u̱nꞌ kenta ji̱nu jee suviráa ví ya̱ sikáku Ndiosíꞌ ráa.

Mateo 10:28

Jee koto yúꞌví rán rá ñɨvɨ ya̱ jiáꞌníꞌ ráa ñunéꞌyúꞌ, soo ntu kúvi kaꞌniꞌ ráa ánímaꞌ rán. Chisaꞌ íyó kuyu̱ꞌví rán Ndiosíꞌ, ya̱ suvire̱ꞌ ví ya̱ kúvi xínáánꞌ re̱ꞌ ne̱ ánímaꞌ jín ñunéꞌyúꞌ nu̱u̱nꞌ ñuꞌúnꞌ xéénꞌ.

Mateo 24:13

Soo rá ñɨvɨ kuni̱ꞌin kuiñɨ kutú ráa jín ni̱ꞌ ne̱ nu̱u̱nꞌ kenta ji̱nu jee suviráa ví ya̱ sikáku Ndiosíꞌ ráa.

Marcos 13:13

Taꞌvi iniꞌ kua̱íyó rá ñɨvɨ kune̱ꞌyá ráa ránoꞌó, jie̱ꞌe̱ꞌ yɨ́ꞌɨ́ rán nu̱u̱nꞌ nuꞌuꞌ. Soo rá ñɨvɨ kuni̱ꞌin kuiñɨ kutú ráa jín ni̱ꞌ ne̱ nu̱u̱nꞌ kenta ji̱nu jee suviráa ví ya̱ sikáku Ndiosíꞌ ráa.

Marcos 8:35

Chi néni ɨɨn ñɨvɨ ya̱ ntu níkɨ́nꞌ nuꞌuꞌ chi níyo iniꞌ‑i kutekuꞌ va̱ꞌa‑a ñɨ̱vɨ́ yaꞌá jín ya̱ ka̱ku‑u nu̱u̱nꞌ tu̱nóꞌó kiji nu̱u̱nꞌ‑u jie̱ꞌe̱ꞌ níkɨ́nꞌ‑ɨ nuꞌuꞌ, jee sukuíta‑a kutekuꞌ‑u jín Ndiosíꞌ. Soo néni ɨɨn ñɨvɨ ya̱ níkɨ́nꞌ nuꞌuꞌ súka̱ꞌ nóꞌo‑o tu̱nóꞌó ne̱ kuviꞌ‑i jie̱ꞌe̱ꞌ níkɨ́nꞌ‑ɨ nuꞌuꞌ, jee ka̱ku nijia‑a chi ni̱ꞌi̱nꞌ‑i ya̱ kutekuꞌ‑u nɨ́ɨ́nkání jín Ndiosíꞌ saꞌá re̱ꞌ.

Lucas 21:12

’Soo xíꞌna ka̱ꞌ ne̱ ntiáꞌan koo nta̱ká rá yaꞌá, jee tɨɨn rá ñɨvɨ ránoꞌó jee koto u̱ꞌvi̱ꞌ ráa ránoꞌó. Jee kɨ̱na̱ka ráa ránoꞌó nu̱u̱nꞌ rá te̱e kúñáꞌnú iniꞌ rá veꞌi sinagoga nu̱u̱nꞌ kútútú rá ñɨvɨ Israel koto u̱ꞌvi̱ꞌ ráa ránoꞌó, jee kɨ̱chiꞌi ráa ránó iniꞌ rá veka̱a. Jee kɨ̱na̱ka ráa ránó nu̱u̱nꞌ rá te̱e tátúníꞌ nación jín nu̱u̱nꞌ rá te̱e nísotíñú kúvi gobernador, sáva sijíta rává ránoꞌó jie̱ꞌe̱ꞌ ya̱ yɨ́ꞌɨ́ rán nu̱u̱nꞌ nuꞌuꞌ.

Juan 12:25

Jee sukuán koo jín ránoꞌó chi ɨɨn ñɨvɨ ya̱ ñúnúunꞌ‑u maáa ni, jee sukuán kenta sukuíta‑a maáa nu̱u̱nꞌ Ndiosíꞌ. Jee ɨɨn ñɨvɨ ya̱ táꞌvi iniꞌ‑i néꞌyá‑a na̱sa níyo iniꞌ‑i rá nantíñú ñɨ̱vɨ́ yaꞌá, jee ni̱ꞌi̱nꞌ‑i ya̱ kutekuꞌ‑u nɨ́ɨ́nkání jín Ndiosíꞌ.

Juan 13:2

Jee viko Pascua ni kúxíní Jesús jín rá te̱e súkuáꞌa re̱ꞌ ráa, jee ya nchuꞌun kui̱ꞌna̱ꞌ kúñáꞌnú iniꞌ ánímaꞌ Judas ya̱ naku̱ꞌva re̱ꞌ Jesús xi̱ntíín rá te̱e kánéꞌén. Judas kúvi se̱ꞌya Simón Iscariote.

Juan 13:27

Jee sáá nkuvi ntɨɨn Judas i̱xta̱tíláꞌ vá, jee ntañúꞌún kuitɨꞌ nki̱vɨ Satanás, ya̱ kúvi ta̱chi̱ꞌ kíni kúñáꞌnú, iniꞌ Judas. Saájee nkachiꞌ Jesús nu̱u̱nꞌ Judas: ―Tiñu saꞌá nú, jee ñamani saꞌá maa.

Hechos 20:24

Ntu sáꞌá ni̱ꞌ kuéntáꞌ maáníꞌ sú kaꞌniꞌ ráa nuꞌuꞌ. Kua̱chi kuíni ni̱ꞌ sijínu ni̱ꞌ ichi ni̱ꞌ, jee sikúnkuvi ni̱ꞌ tiñu ntaji I̱toꞌoꞌ‑ó, Jesús, nu̱u̱nꞌ ni̱ꞌ. Tiñu vá ví ya̱ istúvi ni̱ꞌ tu̱ꞌun váꞌa jie̱ꞌe̱ꞌ íyó mániꞌ iniꞌ Ndiosíꞌ, sú ntu̱náꞌ íyó ni̱ꞌin‑ó maa.

Hechos 21:13

Saájee nna̱xiníkó re̱ꞌ: ―¿Na̱kui chi náꞌyúꞌ rán jee jiáxin rán ánímaꞌ ni̱ꞌ? Chi nsáꞌ kua̱chi íyó túꞌva ni̱ꞌ ya̱ kunuꞌniꞌ ni̱ꞌ, chisaꞌ suni íyó túꞌva ni̱ꞌ kuviꞌ ni̱ꞌ ranika̱ꞌ nu̱u̱nꞌ ñuunꞌ Jerusalén jie̱ꞌe̱ꞌ I̱toꞌoꞌ‑ó Jesús.

1 Corintios 9:25

Chi ntáká ñɨvɨ síkɨ́ jee núnasɨ́ ráa sátúꞌva ráa maáráa kúmí ráa ñunéꞌyúꞌ ráa sáva kuneí ráa jee ni̱ꞌi̱nꞌ ráa kutaꞌviꞌ ráa ɨɨn ta̱ꞌvi̱ꞌ, ya̱ ntu̱ví kínóo ntáká tiempúꞌ chi náánꞌ‑á. Soo maáó chi ni̱ꞌi̱nꞌ‑ó ɨɨn ta̱ꞌvi̱ꞌ ya̱ kutaꞌviꞌ‑ó ya̱ koo jín‑ó nɨ́ɨ́nkání ya̱ ntu̱ví náánꞌ‑a.

Efesios 2:2

Jee sukuán ñaꞌnu rán tiempúꞌ ya̱ta̱ꞌ nékúvi ne̱ sáá ñaꞌnu rán ichi ñujiínꞌ sáni jiáꞌnu rá ñɨvɨ ñɨ̱vɨ́ yaꞌá ya̱ ntu̱ví yɨ́ꞌɨ́ ráa xi̱ntíín Ndiosíꞌ. Sukuán ñaꞌnu rán sánikua̱ꞌ kuíni kui̱ꞌna̱ꞌ kúñáꞌnú ya̱ kúvi i̱toꞌoꞌ rá ta̱chi̱ꞌ kíni ya̱ jíkanuun ráa nu̱u̱nꞌ ta̱chi̱ꞌ víjin ñɨ̱vɨ́ yaꞌá. Jee kúvi re̱ꞌ ta̱chi̱ꞌ kíni ya̱ sátíñú iniꞌ rá ñɨvɨ kújiááꞌ iniꞌ ráa nu̱u̱nꞌ Ndiosíꞌ.

Efesios 6:12

Chi ntu kántáꞌán‑ó jín ñɨvɨ ñunéꞌyúꞌ, chisaꞌ kántáꞌán‑ó jín rá ta̱chi̱ꞌ kíni rá kúñáꞌnú, jín rá nísotíñú, jín rá i̱toꞌoꞌ ñáꞌnú ka̱ꞌ ya̱ jíka ráa nu̱u̱nꞌ neenꞌ jee tátúníꞌ ráa nu̱u̱nꞌ ñɨvɨ ñɨ̱vɨ́ yaꞌá. Chi kántáꞌán‑ó jín rá ta̱chi̱ꞌ kíni ya̱ jíkanuun ráa súkún.

Santiago 1:12

Na̱ ka̱ꞌ netuꞌ ka̱ꞌ ví ñɨvɨ kúníꞌin íñɨ́ ni̱ꞌin sáá nóꞌo‑o tu̱nóꞌó ya̱ jítotúníꞌ yó. Chi sáá kuneí kene na̱a̱ꞌ ñɨvɨ vá, jee ni̱ꞌi̱nꞌ‑i ta̱ꞌvi̱ꞌ ya̱ kutekuꞌ‑u nɨ́ɨ́nkání jín Ndiosíꞌ, ya̱ nchi̱sóyuꞌú re̱ꞌ nu̱u̱nꞌ rá ñɨvɨ ya̱ ñúnúunꞌ ráa re̱ꞌ.

1 Pedro 5:4

Saájee sáá nenta nijinꞌ maáréꞌ ya̱ néen kuéntáꞌ re̱ꞌ yó ya̱ kúñáꞌnú re̱ꞌ nu̱u̱nꞌ nɨꞌɨ rá te̱e néen kuéntáꞌ ráa rá ñɨvɨ Ndiosíꞌ, jee ni̱ꞌi̱nꞌ rán ta̱ꞌvi̱ꞌ taji re̱ꞌ nu̱u̱nꞌ rán ya̱ viiꞌ nasɨ́kuitɨꞌ kúñáꞌnú rán ya̱ ntu náánꞌ‑a.

1 Pedro 5:8

Jee kuꞌun ñáꞌnú iniꞌ rán nito koo rán, chi kui̱ꞌna̱ꞌ kúñáꞌnú ya̱ túfíꞌ ta̱ꞌán re̱ꞌ jín ránoꞌó, jíkanuun re̱ꞌ kuéntáꞌ ɨɨn nikaꞌa ya̱ ne̱ nɨ́ꞌɨn sáxéenꞌ ti̱ꞌ núkú ti̱ꞌ kajiꞌ ti̱ꞌ chi núkú re̱ꞌ ɨɨn ñɨvɨ sáva xináánꞌ re̱ꞌ maa.

Apoclipsis 13:14

Jee xínáꞌví ti̱ꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ Cristo, jie̱ꞌe̱ꞌ rá seña a̱nasɨ́ sáꞌá ti̱ꞌ, ya̱ níꞌinꞌ ti̱ꞌ ya̱ kuvi saꞌá ti̱ꞌ maa ichinúúnꞌ kitɨ xéénꞌ kákini xíꞌnañúꞌún vá. Jee nta̱túníꞌ ti̱ꞌ nu̱u̱nꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ saꞌá ráa ɨɨn santúꞌ ñunéꞌyúꞌ máá maá kitɨ xéénꞌ xíꞌnañúꞌún ya̱ ntu̱fi̱ꞌ‑i nsa̱ꞌá yuchiꞌ, jee nna̱tekuꞌ‑u.

Apoclipsis 13:2

Jee kitɨ xéénꞌ kákini vá ya̱ niniꞌ ni̱ꞌ yukuán kúnkunuún íyó ti̱ꞌ jín kui̱ñɨ̱ꞌ leopardo, jee rá jie̱ꞌe̱ꞌ ti̱ꞌ íyó‑o kuéntáꞌ jie̱ꞌe̱ꞌ oso, jee yuꞌú ti̱ꞌ íyó‑o kuéntáꞌ yuꞌú nikaꞌa. Jee nu̱u̱nꞌ ti̱ꞌ njia̱ꞌa ko̱o̱ꞌ mánasɨ́ vá fesáꞌ níꞌin‑i sáva kuniso ti̱ꞌ maa, jee njia̱ꞌa ko̱o̱ꞌ mánasɨ́ vá nu̱u̱nꞌ ti̱ꞌ nu̱u̱nꞌ nééꞌ‑e sáva tátúníꞌ ti̱ꞌ jín‑i, jee njia̱ꞌa‑a ya̱ kunisotíñú nasɨ́kuitɨꞌ ti̱ꞌ.

Apoclipsis 13:7

Jee njia̱ꞌa nu̱u̱nꞌ ti̱ꞌ ya̱ kantáꞌán ti̱ꞌ jín rá ñɨvɨ ya̱ nsa̱ꞌá sɨ́ɨ́n Ndiosíꞌ ya̱ yɨ́ꞌɨ́ ráa nu̱u̱nꞌ re̱ꞌ, jee kuneí ti̱ꞌ jín ráa. Jee suni njia̱ꞌa tiñu ya̱ nísotíñú ti̱ꞌ tátúníꞌ ti̱ꞌ nu̱u̱nꞌ kua̱íyó rá ñɨvɨ ntáká tataꞌ, jín nu̱u̱nꞌ ntáká ñuunꞌ, jín nu̱u̱nꞌ ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, jín nu̱u̱nꞌ ntáká nu̱u̱nꞌ rá ñɨvɨ.

Apoclipsis 17:14

Saájee kantáꞌán ráa jín maáréꞌ ya̱ kúvi Lanchi Lúlí Ndiosíꞌ. Jee Lanchi Lúlí vá kuneí re̱ꞌ si̱kɨ̱ꞌ ráa, chi maáréꞌ kúvi I̱toꞌoꞌ nu̱u̱nꞌ ntáká rá i̱toꞌoꞌ jín nísotíñú re̱ꞌ tátúníꞌ re̱ꞌ nu̱u̱nꞌ ntáká ráa ya tátúníꞌ rá nu̱u̱nꞌ rá ñuunꞌ. Jee rá ñɨvɨ ya̱ íñɨ́ jín re̱ꞌ kúvi ráa ya̱ nkana Ndiosíꞌ ráa, jín ya̱ nka̱ji re̱ꞌ ráa, jín ya̱ íñɨ́ ni̱ꞌin ráa síkúnkuvi na̱a̱ꞌ ráa nu̱u̱nꞌ re̱ꞌ ―nkachiꞌ najiáꞌáꞌ ííꞌ vá.

Apoclipsis 2:13

[Jee jíníꞌ ni̱ꞌ ntáká tiñu váꞌa sáꞌá rán.] Jee jíníꞌ ni̱ꞌ ya̱ nééꞌ rán nu̱u̱nꞌ tátúníꞌ kui̱ꞌna̱ꞌ kúñáꞌnú naní Satanás. Soo súka̱ꞌ sukuán soo íñɨ́ ni̱ꞌin rán níkɨ́nꞌ na̱a̱ꞌ rán nuꞌuꞌ. Jee ni ntu nníkó iniꞌ rán ya̱ jínúꞌ iniꞌ rán nuꞌuꞌ, ni súnika̱ꞌ sáá nkuvi rá ki̱vɨ̱ꞌ nneeꞌ Antipas nteñu rán, ɨɨn te̱e ya̱ nsi̱kúnkuvi na̱a̱ꞌ re̱ꞌ nna̱kani na̱a̱ꞌ re̱ꞌ tu̱ꞌun ni̱ꞌ, jee ñaꞌniꞌ ráa maa nteñu rán yukuán ñuunꞌ nu̱u̱nꞌ nééꞌ Satanás.

Apoclipsis 2:9

[Jee jíníꞌ ni̱ꞌ nta̱ká tiñu váꞌa sáꞌá rán] jee jíníꞌ ni̱ꞌ rá tu̱nóꞌó nóꞌo rán, jín suni jie̱ꞌe̱ꞌ tu̱nláꞌví nóꞌo rán. Soo súka̱ꞌ sukuán kúvi, soo kúká rán jín nɨꞌɨ ya̱ váꞌa níso tu̱ꞌun ni̱ꞌ, chi jínúꞌ iniꞌ rán maa. Jee suni jíníꞌ ni̱ꞌ ya̱ káꞌánꞌ niva̱ꞌa rá ñɨvɨ si̱kɨ̱ꞌ rán. Jee rá ñɨvɨ vá káchíꞌ ráa ya̱ ñɨvɨ ñuunꞌ Israel kúvi ráa ya̱ ñɨvɨ Ndiosíꞌ kúvi ráa, soo nsú ñɨvɨ Ndiosíꞌ kúvi ráa, jee kútútú ráa veꞌi sinagoga nu̱u̱nꞌ kútútú rá ñɨvɨ Israel soo ñɨvɨ ya̱ yɨ́ꞌɨ́ xi̱ntíín kui̱ꞌna̱ꞌ kúñáꞌnú naní Satanás kúvi ráa.