Apoclipsis 19:11 - Mixteco del suroeste de Tlaxiaco Oaxaca

¹¹ Saájee niniꞌ ni̱ꞌ ya̱ níne antivɨ́ súkún nu̱u̱nꞌ nééꞌ Ndiosíꞌ. Jee nna̱kune̱ꞌyá ni̱ꞌ jee yukuán nkenta ɨɨn kitɨ kuíjín, jee ɨɨn ya̱ yósóꞌ ya̱ta̱ꞌ ti̱ꞌ vá naní maáréꞌ ya̱ Síkúnkuvi Na̱a̱ꞌ‑a jín Te̱e Na̱a̱ꞌ Ví‑i. Chi na̱a̱ꞌ jiéꞌnéꞌ re̱ꞌ ntáká tiñu, jee na̱a̱ꞌ kántáꞌán re̱ꞌ.

Apoclipsis 19:11 ပူးပေါင်းရင်းမြစ်များ

Juan 1:51

Jee nkachiꞌ Jesús nu̱u̱nꞌ re̱ꞌ: ―Máá nááꞌ vá káchíꞌ ni̱ꞌ nu̱u̱nꞌ nú ya̱ kuniꞌ nú kunune antivɨ́ ne̱ nu̱u̱nꞌ nééꞌ Ndiosíꞌ, jee kuniꞌ rán rá najiáꞌáꞌ ííꞌ Ndiosíꞌ náa núun ráa kiji ráa nu̱u̱nꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.

Juan 14:6

Jee nkachiꞌ Jesús nu̱u̱nꞌ‑u: ―Nuꞌuꞌ kúvi ni̱ꞌ ichi ya̱ nátuꞌva ñɨvɨ nu̱u̱nꞌ Ndiosíꞌ, jín nu̱u̱nꞌ nuꞌuꞌ va̱ji ya̱ naáꞌ, jín maáníꞌ ví ya̱ sáꞌá‑a ya̱ kutekuꞌ ñɨvɨ jín Ndiosíꞌ nɨ́ɨ́nkání. Ntu íyó inka ka̱ꞌ ichi ya̱ kenta ñɨvɨ nu̱u̱nꞌ Tátáꞌ ni̱ꞌ Ndiosíꞌ, chi métúꞌún nuꞌuꞌ ví‑i ya̱ sáꞌá ya̱ nkénta ñɨvɨ nu̱u̱nꞌ Ndiosíꞌ.

Apoclipsis 1:5

Jee Jesús ya̱ kúvi Cristo síkúnkuvi na̱a̱ꞌ re̱ꞌ ya̱ jiáꞌa re̱ꞌ ya̱ naáꞌ jie̱ꞌe̱ꞌ Ndiosíꞌ. Jee xíꞌnañúꞌún re̱ꞌ ví ya̱ nna̱tekuꞌ i̱i̱ꞌ re̱ꞌ jee nkene re̱ꞌ nteñu rá níyɨ, kuéntáꞌ se̱ꞌya nkaku xíꞌnañúꞌún ya̱ kúñáꞌnú ka̱ꞌ. Jee kúñáꞌnú re̱ꞌ tátúníꞌ re̱ꞌ nu̱u̱nꞌ ntáká rá te̱e tátúníꞌ iniꞌ ñɨ̱vɨ́ yaꞌá. Jee maáréꞌ ví ya̱ ñúnúunꞌ re̱ꞌ yó, chi ñatɨ re̱ꞌ ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ jie̱ꞌe̱ꞌ kua̱chi yó, jee nna̱kani núne re̱ꞌ yó nu̱u̱nꞌ kua̱chi‑ó.

Apoclipsis 11:19

Saájee nine veñu̱ꞌun Ndiosíꞌ ya̱ íyó antivɨ́ súkún nu̱u̱nꞌ nééꞌ re̱ꞌ. Jee iniꞌ veñu̱ꞌun re̱ꞌ túvi ya̱tu̱nꞌ nu̱u̱nꞌ ñúꞌún tratúꞌ ya̱ nchi̱sóyuꞌú re̱ꞌ. Jee jiánu̱te̱ꞌ sáꞌá tajia, jee nɨ́ꞌɨn xá jiáku kéꞌín nusuyuꞌú, jee káni tajia, jee táan, jee kúun víꞌí ñɨ́ñɨ́.

Apoclipsis 19:19

Saájee niniꞌ ni̱ꞌ máá maá kitɨ xéénꞌ kákini vá jín ntáká rá ñɨvɨ nísotíñú tátúníꞌ iniꞌ ñɨ̱vɨ́ jín ntáká rá soldado ráa. Jee nnu̱tútú ráa sáva kantáꞌán ráa jín máá te̱e ya̱ yósóꞌ kitɨ kuíjín vá jín rá soldado ííꞌ re̱ꞌ.

Apoclipsis 19:21

Jee rá inka soldado rá kitɨ xe̱e̱nꞌ vá, chi ñaꞌniꞌ te̱e ya̱ yósóꞌ kitɨ kuíjín vá ráa jín yuchiꞌ espada ya̱ kéne yuꞌú re̱ꞌ. Saájee ntáká nu̱u̱nꞌ rá chi̱í nyajiꞌ rátíꞌ nnaꞌaꞌ rátíꞌ ku̱ñu ráa.

Apoclipsis 3:14

’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Laodicea: “Nuꞌuꞌ kúvi ya̱ stúvi ya̱ suꞌva koo sáni káchíꞌ Tu̱ꞌun Ndiosíꞌ, chi síkúnkuvi na̱a̱ꞌ ni̱ꞌ máá tu̱ꞌun na̱a̱ꞌ jee jiáꞌa ni̱ꞌ ya̱ naáꞌ. Jee nuꞌuꞌ nsa̱ꞌá ni̱ꞌ ntáká nantíñú ya̱ nta̱túníꞌ Ndiosíꞌ ya̱ kiko̱o ne̱ tiempúꞌ xíꞌnañúꞌún. Tu̱ꞌun yaꞌá káchíꞌ nuꞌuꞌ:

Apoclipsis 3:7

’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Filadelfia: “Nuꞌuꞌ vá i̱i̱ꞌ ni̱ꞌ jín nuꞌuꞌ vá na̱a̱ꞌ ni̱ꞌ. Ínaꞌá ni̱ꞌ nakáa David, ya̱ nísotíñú ni̱ꞌ kuéntáꞌ kua̱ꞌ nta̱túníꞌ re̱ꞌ nu̱u̱nꞌ nación Israel yanaꞌán. Saáva nuꞌuꞌ ví ya̱ jíne ni̱ꞌ nu̱u̱nꞌ ki̱vɨ rá ñɨvɨ nu̱u̱nꞌ tátúníꞌ ni̱ꞌ, jee ni ɨɨn ntu kuvi nakasɨꞌ maa. Jee nuꞌuꞌ nakasɨꞌ maa, jee ni ɨɨn ntu kúvi nakune maa. Suꞌva káchíꞌ nuꞌuꞌ:

Apoclipsis 4:1

Sáá nkuvi rá tiñu sukuán, jee nuꞌuꞌ Juan nne̱ꞌyá ni̱ꞌ jee niniꞌ ni̱ꞌ ɨɨn yuvéꞌí núne ne̱ súkún. Jee maá nusuyuꞌú ya̱ nteso̱ꞌo ni̱ꞌ xíꞌnañúꞌún ya̱ ni̱ꞌin nkaꞌanꞌ‑a jín ni̱ꞌ kuéntáꞌ kua̱ꞌ tívɨ́ꞌ ɨɨn trompeta, jee nkachiꞌ‑i nu̱u̱nꞌ ni̱ꞌ: ―Tínkaa yaꞌá, jee xinéꞌénꞌ ni̱ꞌ nóꞌo ntáká rá tiñu ya̱ íyó kuvi tiempúꞌ ichinúúnꞌ ka̱ꞌ ―nkachiꞌ‑i.

Apoclipsis 6:2

Saájee nna̱kune̱ꞌyá ni̱ꞌ, jee niniꞌ ni̱ꞌ ɨɨn kitɨ kuíjín, jee ɨɨn ya̱ yósóꞌ ya̱ta̱ꞌ kitɨ vá ínaꞌá‑a ɨɨn arco. Saájee nni̱ꞌi̱nꞌ‑i ɨɨn corona nna̱ku̱ꞌun xi̱ni̱ꞌ‑i, jee nkene‑e kɨ̱kantáꞌán‑a jee kuneí‑i, sáva kuneí‑i si̱kɨ̱ꞌ ntáká.