Apoclipsis 13:16 - Mixteco del suroeste de Tlaxiaco Oaxaca

¹⁶ Jee kitɨ ya̱ nkene chi̱ji ñuꞌun vá, tétuvi ti̱ꞌ ya̱ ntáká rá ñɨvɨ ni̱ꞌi̱nꞌ ráa ɨɨn seña kuneeꞌ naꞌá kuáꞌá ráa áxí te̱e̱nꞌ ráa ya̱ ntu kúñáꞌnú ráa jín ya̱ kúñáꞌnú ráa, va̱ni ñɨvɨ kúká, va̱ni ñɨvɨ láꞌví, va̱ni ñɨvɨ ya̱ sátíñú‑u tiñu maáa, va̱ni musúꞌ nkuya̱ꞌvi.

Apoclipsis 13:16 ပူးပေါင်းရင်းမြစ်များ

Hechos 26:22

Ne̱ vitan Ndiosíꞌ nchi̱neí nuꞌuꞌ. Jee íñɨ́ ni̱ꞌ, sáva nástúvi ni̱ꞌ ya̱ naáꞌ nu̱u̱nꞌ rá ñɨvɨ ñáꞌnú jín nu̱u̱nꞌ rá ñɨvɨ láꞌví. Jee ntu sɨ́ɨ́n káꞌánꞌ ni̱ꞌ ya̱ nkachiꞌ Moisés jín rá inka te̱e ya̱ nna̱kani ráa tu̱ꞌun nkene yuꞌú Ndiosíꞌ, chi káchíꞌ ni̱ꞌ mákua nkachiꞌ ráa ya̱ kuvi.

1 Corintios 12:13

Chi suni nsi̱kuánuté Cristo yó jín métúꞌún ni Ta̱chi̱ꞌ Ííꞌ vá sáva kɨꞌɨ‑ɨ iniꞌ ánímaꞌ‑ó jee nsa̱ꞌá Ta̱chi̱ꞌ Ííꞌ vá ya̱ kɨꞌɨ ntáká‑ó nu̱u̱nꞌ Cristo kuéntáꞌ nki̱vɨ‑ó nu̱u̱nꞌ ɨɨn ni yɨkɨkúñu re̱ꞌ. Ya̱ súka̱ꞌ ñɨvɨ Israel kúvi‑ó, áxí ñɨvɨ ntu kúvi‑ó Israel, áxí súka̱ꞌ ñɨvɨ ya̱ kúvi musúꞌ ya̱ nkeꞌen ñɨvɨ maa, áxí va̱ni ñɨvɨ ya̱ íyó núne ya̱ sátíñú‑u tiñu maá‑a, chi ntáká‑ó chi yɨ́ꞌɨ́‑ó nu̱u̱nꞌ rá ñɨvɨ Ndiosíꞌ, chi ɨɨn ni Ta̱chi̱ꞌ Ííꞌ níꞌínꞌ nɨꞌɨ‑ó.

Gálatas 3:28

Maáóránꞌ ya̱ yɨ́ꞌɨ́‑ó nu̱u̱nꞌ Cristo Jesús, ntu sɨ́ɨ́n íyó‑ó nu̱u̱nꞌ Ndiosíꞌ, sú kúvi rán ñɨvɨ Israel áxí ñɨvɨ ntu kúvi Israel, ni te̱e kúvi musúꞌ ya̱ nkeꞌen ñɨvɨ, ni te̱e xí tiñu ya̱ íñɨ́ núne, ni te̱e jín ni ñaꞌan, chi ɨɨn ni kúvi nɨꞌɨ‑ó nu̱u̱nꞌ Ndiosíꞌ, ya̱ yɨ́ꞌɨ́‑ó nu̱u̱nꞌ Cristo Jesús.

Gálatas 6:17

Ne̱ vitan ré, koto stáña̱ꞌán ni ɨɨn ka̱ꞌ ñɨvɨ nuꞌuꞌ. Chi nééꞌ rá ya̱nta nu̱u̱nꞌ yɨkɨkúñu ni̱ꞌ nu̱u̱nꞌ nito u̱ꞌvi̱ꞌ ñɨvɨ nuꞌuꞌ jie̱ꞌe̱ꞌ Jesús. Kúvi vá kuéntáꞌ jerúꞌ ya̱ stúvi ya̱ musúꞌ Jesús ví ni̱ꞌ.

Efesios 6:8

Chi ya̱ jíníꞌ rán ya̱ nu̱u̱nꞌ máá I̱toꞌoꞌ‑ó ni̱ꞌi̱nꞌ ta ɨɨn ɨɨn ñɨvɨ ta̱ꞌvi̱ꞌ jie̱ꞌe̱ꞌ néni ɨɨn tiñu váꞌa sáꞌá‑a, va̱ni musúꞌ, va̱ni ñɨvɨ xí tiñu.

Colosenses 3:11

Jee saáva ntu̱náꞌ ítú iniꞌ retú ntu kúvi‑ó ñɨvɨ Israel, áxí kúvi‑ó ñɨvɨ Israel, retú níso yɨkɨkúñu‑ó seña ñɨvɨ Israel naní circuncisión, áxí ntu níso‑ó maa, retú kúvi‑ó rá to̱ꞌo̱ꞌ, áxí ñɨvɨ ñuunꞌ láꞌví, retú kúvi‑ó musúꞌ ya̱ kéꞌen ñɨvɨ maa, áxí ñɨvɨ ya̱ yɨ́tíñú nu̱u̱nꞌ tiñu maáa. Chi I̱toꞌoꞌ kua̱íyó kuitɨꞌ‑ó ví Cristo, jee yɨ́ꞌɨ́ re̱ꞌ iniꞌ kua̱íyó kuitɨꞌ‑ó.

2 Timoteo 3:8

Kuéntáꞌ rá te̱e tásɨ́ naní Janes jín Jambres nnuni̱ꞌin ráa nu̱u̱nꞌ Moisés tiempúꞌ yanaꞌán, suni sukuán rá ñɨvɨ xínáꞌví núníꞌin ráa nu̱u̱nꞌ ya̱ nááꞌ. Chi maá ñɨvɨ ni̱ta antúníꞌ ví ráa, jee nni̱kóyátá iniꞌ ráa nu̱u̱nꞌ tu̱ꞌun Cristo ya̱ kúneí iniꞌ‑ó.

Apoclipsis 11:18

Jee rá ñɨvɨ ntáká nación nki̱tɨ̱ꞌ víꞌí iniꞌ ráa jín nú, soo nkenta ki̱tɨ̱ꞌ iniꞌ nú xinóꞌo nú ráa. Jee ya nkenta tiempúꞌ ya̱ saꞌá na̱a̱ꞌ nú jie̱ꞌe̱ꞌ kua̱chi ntáká rá ñɨvɨ ya̱ níꞌiꞌ, jín ya ku̱ꞌva nú ta̱ꞌvi̱ꞌ kutaꞌviꞌ rá musúꞌ nú, rá ñɨvɨ ya̱ nkachitu̱ꞌún ráa tu̱ꞌun nkene yuꞌú nú, jín ntáká ñɨvɨ yɨ́tíñú ráa nu̱u̱nꞌ nú, ya̱ kúvi rá ñɨvɨ ya̱ ñúyúꞌví iniꞌ ráa noꞌó, va̱ni kuvi ráa ñɨvɨ kúñáꞌnú va̱ni ntu̱ví, jee xináánꞌ nú rá ñɨvɨ ya̱ xínáánꞌ ráa rá ñɨvɨ ñɨ̱vɨ́, nkachiꞌ rá te̱e ñáꞌnú vá.

Apoclipsis 15:2

Jee niniꞌ ni̱ꞌ ya̱ kuéntáꞌ íyó nteñúꞌún nute ya̱ túvi ni núvíꞌ ichi kuéntáꞌ vidrio, jee sákánuun nute vá jín ñuꞌunꞌ. Jee rá ñɨvɨ ya̱ nku̱neí ráa si̱kɨ̱ꞌ kitɨ xéénꞌ kákini vá, jín si̱kɨ̱ꞌ santúꞌ ñunéꞌyúꞌ máá maátíꞌ, jín ya̱ ntu níso seña ti̱ꞌ te̱e̱nꞌ ráa, ni jín numero súví ti̱ꞌ, jee íñɨ́ rá ñɨvɨ vá yúnteñúꞌún vá ínaꞌá ráa yaaꞌ arpa ya̱ njiáꞌa Ndiosíꞌ nu̱u̱nꞌ ráa.

Apoclipsis 19:18

sáva kajiꞌ rán ku̱ñu rá ñɨvɨ nísotíñú ya̱ tátúníꞌ, jín ku̱ñu rá capitán, jín ku̱ñu rá te̱e tiɨ́kɨ́, jín ku̱ñu rá kitɨ jín rá te̱e ya̱ nyosoꞌ ya̱ta̱ꞌ ti̱ꞌ, jín suni ku̱ñu ntáká rá ñɨvɨ, va̱ni ku̱ñu rá ñɨvɨ íyó núne ya̱ sáꞌá‑a tiñu maáa, va̱ni ku̱ñu rá musúꞌ satíñú saɨn ya̱ nkuya̱ꞌvi ráa, va̱ni ñɨvɨ kúñáꞌnú va̱ni ñɨvɨ ntu kúñáꞌnú ―nkachiꞌ najiáꞌáꞌ ííꞌ vá.

Apoclipsis 19:20

Soo maáréꞌ jín rá soldado ííꞌ re̱ꞌ ntɨɨn ráa kitɨ xéénꞌ kákini vá jín suni inka ka̱ꞌ kitɨ xéénꞌ kákini ya̱ kúvi te̱e ya̱ nkachitu̱ꞌún tu̱ꞌun túꞌún ya̱ nkene yuꞌú kitɨ xe̱e̱nꞌ xíꞌnañúꞌún, jín suni nsa̱ꞌá‑a rá seña a̱nasɨ́ ichinúúnꞌ kitɨ xéénꞌ kákini xíꞌnañúꞌún. Jee jín rá seña a̱nasɨ́ nsa̱ꞌá‑a nxi̱náꞌví‑i rá ñɨvɨ ya̱ nni̱ꞌi̱nꞌ ráa seña kitɨ xéénꞌ kákini xíꞌnañúꞌún kuniso ráa jee kúvi ráa ya̱ nneñu̱ꞌun ráa santúꞌ ñunéꞌyúꞌ maátíꞌ. Jee ni núvíꞌ ráa kitɨ xéénꞌ kákini vá, ni tékúꞌ rátíꞌ jee nsi̱kéne maáréꞌ ya̱ yósóꞌ kitɨ kuíjín vá rátíꞌ nu̱u̱nꞌ ñúꞌúnꞌ xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ sufríꞌ.

Apoclipsis 19:5

Saájee nkene ɨɨn nusuyuꞌú nkaꞌanꞌ‑a ne̱ nu̱u̱nꞌ teyuꞌ nu̱u̱nꞌ nééꞌ re̱ꞌ tátúníꞌ re̱ꞌ yukuán jee nkachiꞌ‑i: Ntáká ránoꞌó ya̱ kúvi rán musúꞌ re̱ꞌ yɨ́tíñú rán nu̱u̱nꞌ re̱ꞌ, jín ntáká ránoꞌó ya̱ ñúyúꞌví iniꞌ rán re̱ꞌ, va̱ni ntáká ránoꞌó ya̱ kúñáꞌnú áxí va̱ni ntu̱ví, ntáká ránoꞌó íyó nakuetúꞌún rán re̱ꞌ, nkachiꞌ‑i.

Apoclipsis 20:12

Jee niniꞌ ni̱ꞌ kua̱íyó rá ni̱yɨ, va̱ni ya̱ kúñáꞌnú va̱ni ya̱ ntu kúñáꞌnú, íñɨ́ ráa ichinúúnꞌ re̱ꞌ. Jee nsa̱ꞌá re̱ꞌ ya̱ nnine rá tutuꞌ. Jee nsa̱ꞌá re̱ꞌ ya̱ nnine inka ka̱ꞌ tutuꞌ níso súví rá ñɨvɨ ya̱ kutekuꞌ ráa nɨ́ɨ́nkání jín Ndiosíꞌ. Jee nsa̱ꞌá náaꞌ re̱ꞌ jie̱ꞌe̱ꞌ rá ñɨvɨ sánikua̱ꞌ tiñu nsa̱ꞌá ráa ya̱ níso nu̱u̱nꞌ rá tutuꞌ yukuán.

Apoclipsis 20:4

Jee kuíre niniꞌ ni̱ꞌ rá teyuꞌ nu̱u̱nꞌ nééꞌ rá tátúníꞌ, jee yukuán ña̱kuneeꞌ rá ñɨvɨ ya̱ nni̱ꞌi̱nꞌ ráa tiñu ya̱ kuvi sanáaꞌ ráa kua̱chi. Jee nna̱tekuꞌ i̱i̱ꞌ rá ánímaꞌ rá ñɨvɨ ya̱ ntéꞌneꞌ xi̱ni̱ꞌ ráa jie̱ꞌe̱ꞌ ya̱ njia̱ꞌa ráa ya̱ naáꞌ jie̱ꞌe̱ꞌ Jesús jín jie̱ꞌe̱ꞌ ya̱ niñɨ na̱a̱ꞌ ráa jín Tu̱ꞌun Ndiosíꞌ. Jee suviráa ví rá ñɨvɨ ya̱ ntu nnéñu̱ꞌun ráa kitɨ xéénꞌ kákini xíꞌnañúꞌún vá, ni jín santúꞌ ñunéꞌyúꞌ maátíꞌ. Jee ni ntu nníꞌínꞌ ráa seña ti̱ꞌ kuniso te̱e̱nꞌ ráa ni jín naꞌá ráa. Jee nna̱tekuꞌ i̱i̱ꞌ ráa, jee nta̱túníꞌ ráa tiñu jín Cristo ɨɨn mil (1000) kui̱ya̱ꞌ.

Apoclipsis 6:15

Jee rá te̱e tátúníꞌ rá ñuunꞌ íyó ñɨ̱vɨ́, jín rá kúñáꞌnú, jín rá capitán, jín rá kúká, jín rá ñɨvɨ tátúníꞌ kéne nu̱u̱nꞌ, jín nta̱ká rá musúꞌ ya̱ nkeꞌen ñɨvɨ ráa, jín nta̱ká rá ñɨvɨ íñɨ́ núne ya̱ sáꞌá ráa tiñu maáráa, ña̱kɨ̱ꞌɨ yuꞌuꞌ ráa iniꞌ rá kava, jín nteñu rá kava íyó yuku.

Apoclipsis 7:3

Jee nkachiꞌ najiáꞌáꞌ ííꞌ vá: ―Koto na̱ sáꞌá kini rán xináánꞌ rán ñuꞌun ni nteñúꞌún ni rá yutun, ne̱kua̱ꞌ xíꞌna ka̱ꞌ tee ránꞌ seyúꞌ te̱e̱nꞌ ntáká rá musúꞌ Ndiosíꞌ ya̱ yɨ́tíñú ráa nu̱u̱nꞌ re̱ꞌ ―nkachiꞌ najiáꞌáꞌ ííꞌ vá.