Apoclipsis 13:15 - Mixteco del suroeste de Tlaxiaco Oaxaca

¹⁵ Jee nni̱ꞌi̱nꞌ ti̱ꞌ nísotíñú ti̱ꞌ ya̱ ku̱ꞌva ti̱ꞌ ta̱chi̱ꞌ káꞌánꞌ santúꞌ ñunéꞌyúꞌ máá maá kitɨ xéénꞌ kákini xíꞌnañúꞌún, sáva kuvi kaꞌanꞌ‑a, jee kuvi saꞌá‑a ya̱ kaꞌniꞌ rá ñɨvɨ ntáká rá ñɨvɨ ya̱ ntu néñu̱ꞌun ráa maa.

Apoclipsis 13:15 ပူးပေါင်းရင်းမြစ်များ

Génesis 2:7

Saájee jín ti̱ka̱cha̱a̱ꞌ ñuꞌun nsa̱ꞌá I̱toꞌoꞌ‑ó Ndiosíꞌ ɨɨn ñɨvɨ. Jee ntivɨꞌ ta̱chi̱ꞌ re̱ꞌ i̱xti̱nꞌ ñɨvɨ vá jín yo̱ko̱yuꞌú re̱ꞌ ya̱ stekúꞌ‑u ñɨvɨ vá, jee nkenta kúvi ñɨvɨ vá ɨɨn ya̱ tékúꞌ.

Santiago 2:26

Chi ni̱yɨ ví ñunéꞌyúꞌ‑ó retú ni nsú jín ta̱chi̱ꞌ káꞌánꞌ‑ó, jee suni suꞌva kuéntáꞌ níꞌiꞌ ya̱ ínúꞌ iniꞌ‑ó Ndiosíꞌ retú ni nsú jín tiñu váꞌa sáꞌá‑ó.

Apoclipsis 13:1

Jee nuꞌuꞌ, Juan, ni̱ñɨ ni̱ꞌ nu̱u̱nꞌ ñuítɨ́ yúnteñúꞌún. Saájee niniꞌ ni̱ꞌ ɨɨn kitɨ xéénꞌ kákini ya̱ va̱nkaa ti̱ꞌ kéne ti̱ꞌ nu̱u̱nꞌ nteñúꞌún, jee u̱xa̱ꞌ xi̱ni̱ꞌ ti̱ꞌ jee u̱ji̱ꞌ nikɨ ti̱ꞌ. Jee u̱ji̱ꞌ corona ti̱ꞌ jee ɨɨn corona ñúꞌún ta nikɨ ti̱ꞌ ya̱ stúvi ya̱ kúñáꞌnú ti̱ꞌ. Jee nu̱u̱nꞌ ni uxáꞌ xi̱ni̱ꞌ ti̱ꞌ vá níso ɨɨn súví níváꞌa jie̱ꞌe̱ꞌ Ndiosíꞌ.

Apoclipsis 13:12

Jee nísotíñú ti̱ꞌ nɨꞌɨ tiñu níso kitɨ xéénꞌ kákini xíꞌnañúꞌún sáva saꞌá ti̱ꞌ maa nu̱u̱nꞌ‑u, jee sáꞌá‑a ya̱ kua̱íyó kuitɨꞌ rá ñɨvɨ ya̱ nééꞌ ráa iniꞌ ñɨ̱vɨ́ kuneñu̱ꞌun ráa kitɨ xéénꞌ kákini xíꞌnañúꞌún ya̱ nnuvi nu̱u̱nꞌ ntúfiꞌ xe̱e̱nꞌ‑e ya̱ íyó kuviꞌ‑i.

Apoclipsis 13:14

Jee xínáꞌví ti̱ꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ Cristo, jie̱ꞌe̱ꞌ rá seña a̱nasɨ́ sáꞌá ti̱ꞌ, ya̱ níꞌinꞌ ti̱ꞌ ya̱ kuvi saꞌá ti̱ꞌ maa ichinúúnꞌ kitɨ xéénꞌ kákini xíꞌnañúꞌún vá. Jee nta̱túníꞌ ti̱ꞌ nu̱u̱nꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ saꞌá ráa ɨɨn santúꞌ ñunéꞌyúꞌ máá maá kitɨ xéénꞌ xíꞌnañúꞌún ya̱ ntu̱fi̱ꞌ‑i nsa̱ꞌá yuchiꞌ, jee nna̱tekuꞌ‑u.

Apoclipsis 14:11

Jee ñu̱ꞌma̱ꞌ ya̱ káyúꞌ ráa yukuán kɨ̱nkaa‑a nɨ́ɨ́nkání kuitɨꞌ. Jee ni nsáꞌ koo tu̱najia̱ví ráa nuví niñuꞌ nu̱u̱nꞌ tu̱nóꞌó kunoꞌo ráa, jie̱ꞌe̱ꞌ ya̱ néñu̱ꞌun ráa kitɨ xéénꞌ kákini vá, jín santúꞌ ñunéꞌyúꞌ máá maátíꞌ, jín retú néni ɨɨn ni̱ꞌi̱nꞌ‑i kuniso‑o seña súví ti̱ꞌ.

Apoclipsis 14:9

Saájee tuku inka ka̱ꞌ najiáꞌáꞌ ííꞌ ya̱ uníꞌ, jee nusuyuꞌú‑u laxín káchíꞌ‑i: ―Retú néni ɨɨn ya̱ néñu̱ꞌun‑u kitɨ xéénꞌ kákini vá, jín santúꞌ ñunéꞌyúꞌ máá maátíꞌ, jín retú ni̱ꞌi̱nꞌ‑i kuniso‑o seña ti̱ꞌ te̱e̱nꞌ‑e, áxí naꞌá‑a,

Apoclipsis 16:2

Saájee kua̱ꞌa̱nꞌ xíꞌna najiáꞌáꞌ ííꞌ, jee nsi̱kúténuun‑u tu̱nóꞌó ñúꞌún iniꞌ ko̱ꞌo̱ꞌ‑o nu̱u̱nꞌ ñɨ̱vɨ́, saájee ntáká rá ñɨvɨ ya̱ néñu̱ꞌun ráa santúꞌ ñunéꞌyúꞌ kitɨ xéénꞌ kákini vá, jín ya̱ níso ráa seña ti̱ꞌ, jee nki̱vɨ kue̱ꞌi̱ꞌ ni̱ꞌyɨ xki̱yɨ́ máá kini máá uꞌviꞌ yɨkɨkúñu ráa.

Apoclipsis 16:5

Jee nteso̱ꞌo ni̱ꞌ ya̱ nkachiꞌ najiáꞌáꞌ ííꞌ ya̱ nísotíñú nu̱u̱nꞌ nute: Na̱a̱ꞌ kúvi nú, Ndiosíꞌ i̱i̱ꞌ, jee maánú vá íyó nɨ́ɨ́nkání, jee nóꞌo vá ni̱yo nɨ́ɨ́nkání, chi na̱a̱ꞌ ñeꞌneꞌ nú kua̱chi si̱kɨ̱ꞌ rá ñɨvɨ.

Apoclipsis 17:14

Saájee kantáꞌán ráa jín maáréꞌ ya̱ kúvi Lanchi Lúlí Ndiosíꞌ. Jee Lanchi Lúlí vá kuneí re̱ꞌ si̱kɨ̱ꞌ ráa, chi maáréꞌ kúvi I̱toꞌoꞌ nu̱u̱nꞌ ntáká rá i̱toꞌoꞌ jín nísotíñú re̱ꞌ tátúníꞌ re̱ꞌ nu̱u̱nꞌ ntáká ráa ya tátúníꞌ rá nu̱u̱nꞌ rá ñuunꞌ. Jee rá ñɨvɨ ya̱ íñɨ́ jín re̱ꞌ kúvi ráa ya̱ nkana Ndiosíꞌ ráa, jín ya̱ nka̱ji re̱ꞌ ráa, jín ya̱ íñɨ́ ni̱ꞌin ráa síkúnkuvi na̱a̱ꞌ ráa nu̱u̱nꞌ re̱ꞌ ―nkachiꞌ najiáꞌáꞌ ííꞌ vá.

Apoclipsis 17:17

Chi maá Ndiosíꞌ nchuꞌun re̱ꞌ iniꞌ ánímaꞌ ráa ya̱ saꞌá ráa sukuán sáni nkuna̱a̱ꞌ iniꞌ re̱ꞌ, sáva ɨɨn nuún ni nnuvi iniꞌ ráa sáá saꞌá ráa jee naku̱ꞌva ráa tiñu níso ráa nu̱u̱nꞌ kitɨ xéénꞌ kákini vá, sáva tatúníꞌ ti̱ꞌ, ne̱kua̱ꞌ sikúnkuvi ntáká jie̱ꞌe̱ꞌ tu̱ꞌun ya̱ nkachiꞌ Ndiosíꞌ.

Apoclipsis 17:6

Jee niniꞌ ni̱ꞌ ya̱ jíni ñaꞌan vá jín ni̱ñɨ̱ꞌ rá ñɨvɨ ya̱ yɨ́ꞌɨ́ ráa nu̱u̱nꞌ Ndiosíꞌ, jín ni̱ñɨ̱ꞌ rá ñɨvɨ ya̱ nnákani ráa ya̱ nááꞌ jie̱ꞌe̱ꞌ Jesús, ya̱ káchíꞌ‑ó ya̱ ñaꞌniꞌ víꞌí ña ráa. Jee nti̱vɨ́ víꞌí xíniꞌ ni̱ꞌ sáá niniꞌ ni̱ꞌ ña.

Apoclipsis 18:20

Jee nkachiꞌ nusuyuꞌú vá ya̱ káꞌánꞌ‑a ne̱ súkún: Soo kusɨ̱ɨ̱ꞌ iniꞌ ránoꞌó ya̱ nééꞌ antivɨ́ súkún jín ránoꞌó ya̱ níso rán tiñu apóstol nchu̱ichí Cristo, jín ránoꞌó ya̱ nákani rán tu̱ꞌun kéne yuꞌú Ndiosíꞌ, jín ránoꞌó ya̱ kúvi rán rá inka ñɨvɨ ya̱ suni nsa̱ꞌá sɨ́ɨ́n re̱ꞌ kɨꞌɨ rán nu̱u̱nꞌ re̱ꞌ. Kusɨ̱ɨ̱ꞌ iniꞌ rán chi nsa̱náaꞌ Ndiosíꞌ si̱kɨ̱ꞌ ñuunꞌ vá jie̱ꞌe̱ꞌ nsa̱ꞌá kini ráa si̱kɨ̱ꞌ rán, nkachiꞌ nusuyuꞌú vá.

Apoclipsis 18:24

Chi níso rá ñɨvɨ ñuunꞌ nú kua̱chi ni̱yɨ si̱kɨ̱ꞌ ráa, jie̱ꞌe̱ꞌ ñaꞌniꞌ ráa rá ñɨvɨ ya̱ nna̱kani ráa tu̱ꞌun nkene yuꞌú Ndiosíꞌ, jín rá ñɨvɨ ya̱ nsa̱ꞌá sɨ́ɨ́n re̱ꞌ kɨꞌɨ ráa nu̱u̱nꞌ re̱ꞌ, jín ntáká ka̱ꞌ rá ñɨvɨ ya̱ ñaꞌniꞌ ráa né ni ví nkuvi iniꞌ ñɨ̱vɨ́, nkachiꞌ najiáꞌáꞌ ííꞌ vá.

Apoclipsis 19:20

Soo maáréꞌ jín rá soldado ííꞌ re̱ꞌ ntɨɨn ráa kitɨ xéénꞌ kákini vá jín suni inka ka̱ꞌ kitɨ xéénꞌ kákini ya̱ kúvi te̱e ya̱ nkachitu̱ꞌún tu̱ꞌun túꞌún ya̱ nkene yuꞌú kitɨ xe̱e̱nꞌ xíꞌnañúꞌún, jín suni nsa̱ꞌá‑a rá seña a̱nasɨ́ ichinúúnꞌ kitɨ xéénꞌ kákini xíꞌnañúꞌún. Jee jín rá seña a̱nasɨ́ nsa̱ꞌá‑a nxi̱náꞌví‑i rá ñɨvɨ ya̱ nni̱ꞌi̱nꞌ ráa seña kitɨ xéénꞌ kákini xíꞌnañúꞌún kuniso ráa jee kúvi ráa ya̱ nneñu̱ꞌun ráa santúꞌ ñunéꞌyúꞌ maátíꞌ. Jee ni núvíꞌ ráa kitɨ xéénꞌ kákini vá, ni tékúꞌ rátíꞌ jee nsi̱kéne maáréꞌ ya̱ yósóꞌ kitɨ kuíjín vá rátíꞌ nu̱u̱nꞌ ñúꞌúnꞌ xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ sufríꞌ.

Apoclipsis 20:4

Jee kuíre niniꞌ ni̱ꞌ rá teyuꞌ nu̱u̱nꞌ nééꞌ rá tátúníꞌ, jee yukuán ña̱kuneeꞌ rá ñɨvɨ ya̱ nni̱ꞌi̱nꞌ ráa tiñu ya̱ kuvi sanáaꞌ ráa kua̱chi. Jee nna̱tekuꞌ i̱i̱ꞌ rá ánímaꞌ rá ñɨvɨ ya̱ ntéꞌneꞌ xi̱ni̱ꞌ ráa jie̱ꞌe̱ꞌ ya̱ njia̱ꞌa ráa ya̱ naáꞌ jie̱ꞌe̱ꞌ Jesús jín jie̱ꞌe̱ꞌ ya̱ niñɨ na̱a̱ꞌ ráa jín Tu̱ꞌun Ndiosíꞌ. Jee suviráa ví rá ñɨvɨ ya̱ ntu nnéñu̱ꞌun ráa kitɨ xéénꞌ kákini xíꞌnañúꞌún vá, ni jín santúꞌ ñunéꞌyúꞌ maátíꞌ. Jee ni ntu nníꞌínꞌ ráa seña ti̱ꞌ kuniso te̱e̱nꞌ ráa ni jín naꞌá ráa. Jee nna̱tekuꞌ i̱i̱ꞌ ráa, jee nta̱túníꞌ ráa tiñu jín Cristo ɨɨn mil (1000) kui̱ya̱ꞌ.