Apoclipsis 12:9 - Mixteco del suroeste de Tlaxiaco Oaxaca

⁹ Sukuán nkuvi jee ntavaꞌ rá najiáꞌáꞌ ííꞌ vá ko̱o̱ꞌ mánasɨ́ yukuán antivɨ́ súkún. Jee ko̱o̱ꞌ mánasɨ́ vá kúvi ko̱o̱ꞌ ya̱ íyó ne̱ yanaꞌán víꞌí. Jee maátíꞌ ví ya̱ naní ti̱ꞌ kui̱ꞌna̱ꞌ kúñáꞌnú jín suni naní ti̱ꞌ Satanás. Jee maáa vá xínáꞌví‑i rá ñɨvɨ kua̱íyó ñɨ̱vɨ́. Jee ntavaꞌ ráa maa ne̱ jín rá najiáꞌáꞌ‑a antivɨ́ súkún, jee nsi̱kéne ráa maa jín ne̱ rá najiáꞌáꞌ‑a nu̱u̱nꞌ ñu̱ꞌún iniꞌ ñɨ̱vɨ́ yaꞌá.

Apoclipsis 12:9 ပူးပေါင်းရင်းမြစ်များ

Génesis 3:1

Ko̱o̱ꞌ kúvi kitɨ máñáꞌ ka̱ꞌ nsú ka̱ꞌ inka ka̱ꞌ rá kitɨ yúkú ya̱ nsa̱ꞌá I̱toꞌoꞌ‑ó Ndiosíꞌ. Suviti̱ꞌ vá nkachiꞌ nu̱u̱nꞌ ñaꞌan vá: ―¿Á nijia kúvi ya̱ nkachiꞌ Ndiosíꞌ nu̱u̱nꞌ rán ya̱ ntu íyó kajiꞌ niva̱ꞌa rán rá vixíꞌ néni ɨɨn yutun íñɨ́ nu̱u̱nꞌ viiꞌ víꞌí íyó, réja?

Génesis 3:13

I̱ña̱jée I̱toꞌoꞌ‑ó Ndiosíꞌ nkachiꞌ nu̱u̱nꞌ ñaꞌan vá: ―¿Na̱kuá kúvi ya̱ nsa̱ꞌá nú rúja? Jee nkachiꞌ ñaꞌan vá: ―Ko̱o̱ꞌ nxi̱náꞌví nuꞌuꞌ, jee nyajiꞌ ni̱ꞌ ya̱ vixíꞌ vá.

Mateo 13:39

Jee maáréꞌ ya̱ túfíꞌ ta̱ꞌán jín Ndiosíꞌ ví ya̱ ntee yu̱ku̱ꞌ ne̱ꞌén vá ví kui̱ꞌna̱ꞌ kúñáꞌnú, jee sáá kenta nastútú tataꞌ sáꞌá vá, yukuán kúvi sáá kenta ji̱nu ñɨ̱vɨ́ yaꞌá, jee rá nastútú tataꞌ ví rá najiáꞌáꞌ ííꞌ Ndiosíꞌ.

Mateo 24:24

Chi kiji rá te̱e xínáꞌví ya̱ kachiꞌ ráa nika̱ꞌ ya̱ Cristo ví ráa. Jee kenta rá ñɨvɨ ya̱ kachiꞌ ráa nika̱ꞌ ya̱ nákani ráa tu̱ꞌun kéne yuꞌú Ndiosíꞌ, jee saꞌá ráa rá seña a̱nasɨ́ jín rá tiñu a̱nasɨ́ ya̱ ti̱vɨ́ xíniꞌ rá ñɨvɨ sáva xináꞌví ráa rá ñɨvɨ. Jee saꞌá ráa maa sáva xináꞌví ráa ne̱ rá ñɨvɨ nka̱ji Ndiosíꞌ, retú sa̱naanꞌ kuvi.

Mateo 25:41

’Saájee kachiꞌ ni̱ꞌ nu̱u̱nꞌ rá ñɨvɨ íñɨ́ ichi sátín ni̱ꞌ: “¡Kuiyo rán nu̱u̱nꞌ ni̱ꞌ! Chísónínu Tátáꞌ ni̱ꞌ ránoꞌó. Kɨ̱ꞌɨ̱nꞌ rán nu̱u̱nꞌ ñuꞌúnꞌ xéénꞌ ya̱ káyúꞌ nɨ́ɨ́nkání, nu̱u̱nꞌ ya̱ íyó stákoo nu̱u̱nꞌ kɨ̱ꞌɨ̱nꞌ kui̱ꞌna̱ꞌ kúñáꞌnú jín rá ta̱chi̱ꞌ kíni‑i ya̱ kúvi najiáꞌáꞌ‑a.

Mateo 4:1

Saájee náka Ta̱chi̱ꞌ Ííꞌ Ndiosíꞌ Jesús kua̱ꞌa̱nꞌ nu̱u̱nꞌ ñu̱ꞌún saɨn nu̱u̱nꞌ ntu̱náꞌ ñɨvɨ nééꞌ sáva sikúvi kui̱ꞌna̱ꞌ iniꞌ re̱ꞌ.

Mateo 4:10

Saájee nkachiꞌ Jesús nu̱u̱nꞌ‑u: ―Kuiyo nu̱u̱nꞌ ni̱ꞌ, Satanás, chi káchíꞌ tu̱ꞌun níso nu̱u̱nꞌ Tutuꞌ Ííꞌ ya̱: “Íyó kuneñu̱ꞌun nú I̱toꞌoꞌ nú ya̱ kúvi Ndiosíꞌ nú, jee nu̱u̱nꞌ métúꞌún maáréꞌ ni íyó kɨtíñú nú” ―nkachiꞌ Jesús.

Mateo 4:5

Saájee kua̱ꞌa̱nꞌ kui̱ꞌna̱ꞌ nnaka‑a Jesús ñuunꞌ Jerusalén ííꞌ jee kua̱na̱ka‑a re̱ꞌ ne̱ nu̱u̱nꞌ súkún víꞌí xi̱ni̱ꞌ veñu̱ꞌun káꞌnú.

Mateo 4:8

Soo tukuni kua̱ꞌa̱nꞌ kui̱ꞌna̱ꞌ nnaka‑a Jesús ne̱ ɨɨn yuku máá súkún, jee yukuán nxi̱néꞌénꞌ‑e re̱ꞌ kua̱íyó rá ñuunꞌ íyó ñɨ̱vɨ́ jín rá nantíñú viiꞌ íyó nu̱u̱nꞌ rává.

Lucas 10:18

Jee nkachiꞌ Jesús nu̱u̱nꞌ ráa: ―Niniꞌ ni̱ꞌ nkininkava Satanás kui̱ꞌna̱ꞌ kúñáꞌnú ne̱ antivɨ́ kuéntáꞌ nkuun ɨɨn nuva tajia.

Lucas 13:16

Soo ñaꞌan yaꞌá, ya̱ kúvi ña se̱ꞌya tataꞌ ichiyúkúnꞌ‑ó Abraham, ya̱ núꞌníꞌ ña nu̱u̱nꞌ kue̱ꞌi̱ꞌ xa̱ꞌu̱nꞌ u̱ni̱ꞌ (18) kui̱ya̱ꞌ nsa̱ꞌá Satanás, jee, ¿á ntu íyó nakui̱ñɨ̱ꞌ núne ña ki̱vɨ̱ꞌ nájiáví ya̱ núꞌníꞌ ña nu̱u̱nꞌ kue̱ꞌi̱ꞌ yaꞌá rúja? ―nkachiꞌ Jesús.

Lucas 22:3

Saájee nki̱vɨ kui̱ꞌna̱ꞌ kúñáꞌnú naní Satanás iniꞌ Judas ya̱ suni naní re̱ꞌ Iscariote, jee kúvi re̱ꞌ ɨɨn rá u̱xu̱ꞌ u̱vi̱ꞌ (12) rá kútáꞌán ráa jín Jesús.

Lucas 22:31

’Simón, Simón chi, Satanás jíkánꞌ re̱ꞌ nu̱u̱nꞌ Ndiosíꞌ ya̱ saꞌá kini re̱ꞌ ránó kototúníꞌ re̱ꞌ ránó, kuéntáꞌ kua̱ꞌ kísɨ‑ó trigúꞌ sáá náskuíjin maa.

Lucas 8:12

Rá nikɨn ñákava yuíchí kúvi rá ñɨvɨ ya̱ tésóꞌo ráa Tu̱ꞌun Ndiosíꞌ, soo kenta máá maá kui̱ꞌna̱ꞌ jee síyo‑o tu̱ꞌun vá ánímaꞌ ráa, sáva nsáꞌ i̱nu̱ꞌ iniꞌ ráa tu̱ꞌun vá jee sáva nsáꞌ nene ráa nu̱u̱nꞌ kua̱chi ráa nsáꞌ nanitáꞌvíꞌ ráa.

Juan 12:31

Vitan kúvi tiempúꞌ ya̱ saꞌá na̱a̱ꞌ Ndiosíꞌ kua̱chi jie̱ꞌe̱ꞌ rá ñɨvɨ ñɨ̱vɨ́ yaꞌá. Jee vitan jee tavaꞌ Ndiosíꞌ máá maá kui̱ꞌna̱ꞌ kúñáꞌnú ya̱ tátúníꞌ iniꞌ ñɨ̱vɨ́ yaꞌá kɨ̱ꞌɨ̱nꞌ iyo‑o.

Juan 14:30

Nka̱ꞌánꞌ kue̱ꞌe̱ꞌ ni̱ꞌ ka̱ꞌ jín rán, chi ya̱ va̱ji máá kui̱ꞌna̱ꞌ kúñáꞌnú ya̱ tátúníꞌ iniꞌ ñɨ̱vɨ́ yaꞌá. Asúnika̱ꞌ ntu̱náꞌ fesáꞌ níso‑o tatúníꞌ‑i nu̱u̱nꞌ nuꞌuꞌ.

Juan 16:11

Jee stúvi kájí re̱ꞌ ya̱ keꞌneꞌ na̱a̱ꞌ re̱ꞌ kua̱chi si̱kɨ̱ꞌ rá ñɨvɨ ñɨ̱vɨ́, chi ya̱ nkuna̱a̱ꞌ kɨ̱naanꞌ ta̱chi̱ꞌ kíni kúñáꞌnú ya̱ tátúníꞌ iniꞌ ñɨ̱vɨ́ yaꞌá.

Juan 8:44

Chi ránoꞌó chi tátáꞌ rán kúvi kui̱ꞌna̱ꞌ kúñáꞌnú, chi kuíni rán saꞌá rán rá tiñu ya̱ níyo iniꞌ tátáꞌ rán vá saꞌá rán. Chi maáréꞌ kúvi re̱ꞌ ya̱ sáꞌá re̱ꞌ ni̱yɨ ne̱ tiempúꞌ xíꞌnañúꞌún ya̱ ña̱ko̱o ñɨ̱vɨ́ yaꞌá. Jee ni ntu̱ví íñɨ́‑ɨ jín ya̱ naáꞌ, chi ntu̱ví ñúꞌún ya̱ naáꞌ iniꞌ‑i. Sáá káꞌánꞌ re̱ꞌ tu̱ꞌun túꞌún jee káꞌánꞌ re̱ꞌ sánikua̱ꞌ na̱sa íyó maáréꞌ, chi ya̱ kini túꞌún ví re̱ꞌ jee kúvi re̱ꞌ tátáꞌ nu̱u̱nꞌ ya̱ váji tu̱ꞌun túꞌún.

Hechos 26:18

sava sine nú rá nchinúún ráa sáva kɨ̱ku̱ꞌun iniꞌ ráa Tu̱ꞌun Ndiosíꞌ. Jee sáva kene ráa nu̱u̱nꞌ neenꞌ, jee nakui̱ñɨ̱ꞌ ráa nu̱u̱nꞌ túúnꞌ ñuꞌunꞌ. Jee kene ráa naꞌá ta̱chi̱ꞌ kini kúñáꞌnú kúvi Satanás, jee ki̱vɨ ráa naꞌá Ndiosíꞌ. Sáva ni̱ꞌi̱nꞌ ráa ya̱ kunekáꞌnú iniꞌ Ndiosíꞌ jie̱ꞌe̱ꞌ kua̱chi ráa, jín sáva ni̱ꞌi̱nꞌ ráa ta̱ꞌvi̱ꞌ nteñu rá ñɨvɨ ya̱ nsa̱ꞌá sɨ́ɨ́n re̱ꞌ ráa sáva kuvi ráa ñɨvɨ re̱ꞌ, chi kúneí iniꞌ ráa nuꞌuꞌ.”

Hechos 5:3

Soo nkachiꞌ Pedro nu̱u̱nꞌ‑u: ―Ananías, ¿na̱ jie̱ꞌe̱ꞌ chi nku̱neí Satanás ntɨɨn‑ɨ ánímaꞌ nú, sáva katúꞌún nú nu̱u̱nꞌ Ta̱chi̱ꞌ Ííꞌ Ndiosíꞌ, jee nkino̱o nú jín sava xu̱ꞌún ya̱ꞌvi ñuꞌun nú ya̱ nxi̱kó nú?

Romanos 16:18

Chi rá ñɨvɨ sáꞌá sukuán jee ntu yɨ́tíñú ráa nu̱u̱nꞌ I̱toꞌoꞌ‑ó Cristo, chisaꞌ chíñúꞌún ráa chi̱ji maáráa. Jee ne̱ jiákɨ́nꞌ ráa tu̱ꞌun káꞌánꞌ ráa jín tu̱ꞌun yɨ́ñúꞌún káꞌánꞌ ráa, jee sukuán xínáꞌví ráa ánímaꞌ rá ñɨvɨ ya̱ ntiáꞌan kujia iniꞌ rává Tu̱ꞌun Ndiosíꞌ.

Romanos 16:20

Jee maá Ndiosíꞌ ya̱ sáꞌá re̱ꞌ ya̱ nééꞌ va̱ꞌa‑ó, jee ya̱chi̱ꞌ ni saꞌá re̱ꞌ ya̱ kuneí rán jín kui̱ꞌna̱ꞌ kúñáꞌnú ya̱ naní Satanás kuéntáꞌ kua̱xin rán maa chi̱ji jie̱ꞌe̱ꞌ rán. Jee na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús kune̱ꞌyá re̱ꞌ ránoꞌó.

2 Corintios 11:14

Jee nsú tiñu tívɨ́ xíniꞌ‑ó ví‑i, chi ne̱ maá Satanás sáꞌá re̱ꞌ nika̱ꞌ maáréꞌ ya̱ kúvi re̱ꞌ najiáꞌáꞌ jiánu̱te̱ꞌ kuéntáꞌ ɨɨn najiáꞌáꞌ ííꞌ Ndiosíꞌ.

2 Corintios 11:3

Soo yúꞌví ni̱ꞌ ya̱ sa̱naanꞌ jee kusɨ́ɨ́n rán nu̱u̱nꞌ yɨ́tíñú rán ne̱ saɨn ninuꞌun iniꞌ rán nu̱u̱nꞌ métúꞌún Cristo, jee sukuán jíta antúníꞌ rán, kuéntáꞌ nxi̱náꞌví ko̱o̱ꞌ Eva jín máñáꞌ ti̱ꞌ.

2 Corintios 12:7

Jee sáva nkáni téyɨ́ɨ́ víꞌí iniꞌ ni̱ꞌ jie̱ꞌe̱ꞌ ya̱ nxi̱nénu̱u̱nꞌ Ndiosíꞌ nu̱u̱nꞌ nuꞌuꞌ, ya̱ kúvi‑i mánasɨ́ nasɨ́kuitɨꞌ, jee jie̱ꞌe̱ꞌ yaꞌá ntaji Ndiosíꞌ nkenta tu̱nóꞌó nóꞌo ni̱ꞌ iniꞌ yɨkɨkúñu ni̱ꞌ, kuéntáꞌ yɨ́ꞌɨ́ iñu yɨkɨkúñu ni̱ꞌ. Yukuán kúvi ya̱ njia̱ꞌa re̱ꞌ nu̱u̱nꞌ ɨɨn najiáꞌáꞌ Satanás xinóꞌo‑o nuꞌuꞌ sáva nkáni téyɨ́ɨ́ iniꞌ ni̱ꞌ.

2 Corintios 2:11

sáva nkúneí kui̱ꞌna̱ꞌ maá ñáꞌnú naní Satanás kosoꞌ‑o nu̱u̱nꞌ‑ó, chi jíníꞌ‑ó rá máñáꞌ re̱ꞌ.

2 Corintios 4:4

Maá kui̱ꞌna̱ꞌ kúñáꞌnú ya̱ yósóꞌ nu̱u̱nꞌ rá ñɨvɨ ñɨ̱vɨ́ yaꞌá tiempúꞌ vitan kuéntáꞌ ɨɨn ndiosíꞌ, jee sáꞌá re̱ꞌ kuneenꞌ antúníꞌ rá ñɨvɨ vá, ya̱ ntu ínúꞌ iniꞌ ráa Cristo, ya̱ kuéntáꞌ kuáá ráa, sáva ntu̱ví jiáꞌa re̱ꞌ tu̱ꞌun váꞌa jie̱ꞌe̱ꞌ Cristo na̱tuunꞌ‑u iniꞌ ánímaꞌ ráa, sáva ntu kuniꞌ ráa ya̱ máá kúñáꞌnú Cristo ya̱ ɨɨn ni kúvi re̱ꞌ jín Ndiosíꞌ ya̱ tu̱vi nijinꞌ sáá íyó Ndiosíꞌ.

Efesios 4:14

Sáva nkúvi‑ó ka̱ꞌ kuéntáꞌ rá súchí lúlí ya̱ ntu ɨɨn ni jiáni iniꞌ ráa, jee sáva ntu kúvi‑ó ka̱ꞌ kuéntáꞌ ɨɨn nantíñú xínó xíníji ta̱chi̱ꞌ víjin chínaꞌá‑a cháꞌá chúkuán ya̱ súkuíkó‑o, chi nsáꞌ síkívɨ inka tu̱ꞌun ka̱ꞌ maáó yaꞌá yukuán, ya̱ xínéꞌénꞌ rá te̱e xínáꞌví cháꞌá chúkuán, ya̱ nito nasɨ́kuitɨꞌ íyó ráa jee máñáꞌ ráa jín tu̱ꞌun jíta xínéꞌénꞌ ráa.

2 Tesalonicenses 2:3

Jee koto jiáꞌa rán ni ɨɨn ñɨvɨ xináꞌví ráa ránoꞌó sú na̱sa ka̱ꞌ. Chi ne̱ ntiáꞌan kenta ki̱vɨ̱ꞌ vá jee xíꞌna ka̱ꞌ nuni̱ꞌin iniꞌ kue̱ꞌe̱ꞌ víꞌí ñɨvɨ nu̱u̱nꞌ Ndiosíꞌ, jee kenta nijinꞌ máá maá te̱e ya̱ ntu íyó ley nu̱u̱nꞌ‑u. Jee saá yósóꞌ ni̱nu re̱ꞌ ya̱ sijíta Ndiosíꞌ re̱ꞌ nu̱u̱nꞌ ñúꞌúnꞌ xéénꞌ.

1 Timoteo 2:14

Jee ntu nxínáꞌví ko̱o̱ꞌ Adán. Chisaꞌ nxi̱náꞌví ti̱ꞌ ñaꞌan vá, jee nkininkava ña ya̱ njia̱ꞌa ña nu̱u̱nꞌ ya̱ nta̱túníꞌ Ndiosíꞌ.

2 Timoteo 3:13

Soo rá ñɨvɨ kánéꞌén ya̱ xínáꞌví ráa ñɨvɨ saꞌ víꞌí káꞌ saꞌá ráa rá mánasɨ́ nijia ka̱ꞌ. Jee xináꞌví ráa rá ñɨvɨ, jee suni xináꞌví ñɨvɨ ráa.

Hebreos 2:14

Saáva rá se̱ꞌya vá jee ñɨvɨ yɨkɨkúñu ví ráa, jee suni sukuán nuún nkuvi maá Jesús chi suni ñɨvɨ yɨkɨkúñu ví re̱ꞌ ranika̱ꞌ, sáva nkuvi ni̱ꞌi̱ꞌ re̱ꞌ jie̱ꞌe̱ꞌ‑ó, sáva kuneí re̱ꞌ nu̱u̱nꞌ kui̱ꞌna̱ꞌ kúñáꞌnú ya̱ níso fuersáꞌ ya̱ kínóo ñɨvɨ jín kua̱chi ráa jee jíꞌíꞌ ráa jee ntu nánitáꞌvíꞌ ráa.

1 Pedro 5:8

Jee kuꞌun ñáꞌnú iniꞌ rán nito koo rán, chi kui̱ꞌna̱ꞌ kúñáꞌnú ya̱ túfíꞌ ta̱ꞌán re̱ꞌ jín ránoꞌó, jíkanuun re̱ꞌ kuéntáꞌ ɨɨn nikaꞌa ya̱ ne̱ nɨ́ꞌɨn sáxéenꞌ ti̱ꞌ núkú ti̱ꞌ kajiꞌ ti̱ꞌ chi núkú re̱ꞌ ɨɨn ñɨvɨ sáva xináánꞌ re̱ꞌ maa.

1 Juan 5:19

Jee jíníꞌ‑ó ya̱ kúvi‑ó ñɨvɨ Ndiosíꞌ, jín ya̱ kua̱íyó kuitɨꞌ rá inka ñɨvɨ ñɨ̱vɨ́ yaꞌá ya̱ ntu yɨ́ꞌɨ́ ráa nu̱u̱nꞌ re̱ꞌ, yɨ́ꞌɨ́ ráa chi̱ji xi̱ntíín kui̱ꞌna̱ꞌ kúñáꞌnú.

Judas 1:9

Soo va̱tu̱ꞌ ni̱ka̱ꞌ najiáꞌáꞌ ííꞌ kuñáꞌnú naní Miguel, jee nsú sukuán nsa̱ꞌá‑a, chi sáá nka̱ntáꞌán túꞌun‑u jín kui̱ꞌna̱ꞌ kúñáꞌnú jie̱ꞌe̱ꞌ yɨkɨkúñu Moisés sáá ni̱ꞌi̱ꞌ re̱ꞌ, jee ni ntu nkiji iniꞌ‑i kaꞌanꞌ niva̱ꞌa‑a ntu nténúunꞌ‑u si̱kɨ̱ꞌ kui̱ꞌna̱ꞌ kúñáꞌnú vá. Chisaꞌ nkachiꞌ‑i: “Máá I̱toꞌoꞌ, kúxeenꞌ re̱ꞌ nu̱u̱nꞌ nú”, nkachiꞌ‑i.

Apoclipsis 12:12

Saáva ránoꞌó ya̱ nééꞌ ne̱ antivɨ́ súkún, na̱ ka̱ꞌ vá kusɨ̱ɨ̱ꞌ iniꞌ rán. Soo na̱ ka̱ꞌ náꞌví ka̱ꞌ ránoꞌó ya̱ nééꞌ iniꞌ ñɨ̱vɨ́ yaꞌá jín nu̱u̱nꞌ nteñúꞌún, chi nkuun máá kui̱ꞌna̱ꞌ kíni nkenta‑a nu̱u̱nꞌ nééꞌ rán, jee kítɨ́ꞌ nasɨ́kuitɨꞌ iniꞌ‑i, chi jíníꞌ‑i ya̱ ntu kue̱ꞌe̱ꞌ ka̱ꞌ tiempúꞌ íyó kuvi xináꞌví‑i ránoꞌó. Nkachiꞌ nusuyuꞌú vá.

Apoclipsis 12:3

Jee kuíre tukuni ntu̱ví inka ka̱ꞌ seña ne̱ antivɨ́ súkún: ɨɨn ko̱o̱ꞌ kuéꞌé káꞌnú mánasɨ́ naní dragón. Jee u̱xa̱ꞌ xi̱ni̱ꞌ ti̱ꞌ, jee u̱ji̱ꞌ nikɨ ti̱ꞌ. Jee u̱xa̱ꞌ corona jee ɨɨn corona ñúꞌún ta xi̱ni̱ꞌ ti̱ꞌ.

Apoclipsis 12:7

Saájee ni̱yo tu̱ꞌun kantáꞌán máá xe̱e̱nꞌ antivɨ́ súkún. Jee najiáꞌáꞌ ííꞌ kúñáꞌnú, ya̱ naní Miguel, jín rá inka najiáꞌáꞌ ííꞌ ya̱ yɨ́ꞌɨ́ xi̱ntíín re̱ꞌ, nka̱ntáꞌán ráa jín ko̱o̱ꞌ mánasɨ́ vá ya̱ naní dragón. Jee ko̱o̱ꞌ mánasɨ́ vá jín rá najiáꞌáꞌ ya̱ yɨ́ꞌɨ́ xi̱ntíín re̱ꞌ nka̱ntáꞌán ráa jín rá najiáꞌáꞌ ííꞌ vá.

Apoclipsis 12:8

Soo ntu̱ví nkúvi nku̱neí ko̱o̱ꞌ mánasɨ́ vá, jee saáva ni ntu̱ví íyó ka̱ꞌ nu̱u̱nꞌ ni̱ꞌi̱nꞌ ráa kuneeꞌ ráa ne̱ antivɨ́ súkún.

Apoclipsis 13:14

Jee xínáꞌví ti̱ꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ Cristo, jie̱ꞌe̱ꞌ rá seña a̱nasɨ́ sáꞌá ti̱ꞌ, ya̱ níꞌinꞌ ti̱ꞌ ya̱ kuvi saꞌá ti̱ꞌ maa ichinúúnꞌ kitɨ xéénꞌ kákini xíꞌnañúꞌún vá. Jee nta̱túníꞌ ti̱ꞌ nu̱u̱nꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ saꞌá ráa ɨɨn santúꞌ ñunéꞌyúꞌ máá maá kitɨ xéénꞌ xíꞌnañúꞌún ya̱ ntu̱fi̱ꞌ‑i nsa̱ꞌá yuchiꞌ, jee nna̱tekuꞌ‑u.

Apoclipsis 16:14

Jee kúvi ráa ta̱chi̱ꞌ kíni kui̱ꞌna̱ꞌ, ya̱ sáꞌá ráa seña a̱nasɨ́. Jee kua̱ꞌa̱nꞌ ráa nu̱u̱nꞌ rá ñɨvɨ nísotíñú ya̱ tátúníꞌ nu̱u̱nꞌ nta̱ká rá ñuunꞌ kua̱íyó ñɨ̱vɨ́ nu̱u̱nꞌ nééꞌ ñɨvɨ, sáva nastútú ráa rává jín rá soldado rává kantáꞌán rává si̱kɨ̱ꞌ Ndiosíꞌ, máá ki̱vɨ̱ꞌ ñáꞌnú ñani Ndiosíꞌ keꞌneꞌ re̱ꞌ kua̱chi rá ñɨvɨ, ya̱ níso re̱ꞌ fesáꞌ ííꞌ ni̱ꞌin ya̱ kúñáꞌnú nasɨ́kuitɨꞌ re̱ꞌ nu̱u̱nꞌ kua̱íyó.

Apoclipsis 18:2

Jee ni̱ꞌin nka̱najíín re̱ꞌ jee nkachiꞌ re̱ꞌ: ¡Ya nnaanꞌ! ¡Ya nnaanꞌ!, ñuunꞌ káꞌnú ya̱ kúvi Babilonia ñáꞌnú, jee nkenta kuvi‑i nu̱u̱nꞌ nééꞌ rá kui̱ꞌna̱ꞌ ntu íyó ninuꞌun, jín nu̱u̱nꞌ yɨ́ꞌɨ́ ntáká nu̱u̱nꞌ rá ta̱chi̱ꞌ kákini, jín nu̱u̱nꞌ yɨ́ꞌɨ́ ntáká nu̱u̱nꞌ rá kitɨ kákini íyó chi̱yo̱ꞌ ya̱ ntu íyó ninuꞌun, [jín nu̱u̱nꞌ yɨ́ꞌɨ́ ntáká nu̱u̱nꞌ rá kitɨ kákini] íyó néꞌí.

Apoclipsis 18:23

Jee ni nsáꞌ kujianu̱te̱ꞌ ka̱ꞌ ɨɨn nuva ñuꞌunꞌ kantil nu̱u̱nꞌ nú, jee nu̱u̱nꞌ nú ni nsáꞌ teso̱ꞌo ka̱ꞌ ta̱chi̱yuꞌú ya̱ káꞌánꞌ te̱e tánáꞌá ni ñaꞌan tánáꞌá, kɨ̱naanꞌ ñuunꞌ nú chi ñɨvɨ kúñáꞌnú iniꞌ ñɨ̱vɨ́ yaꞌá nkuvi rá ñɨvɨ nú ya̱ nxi̱kó ráa nantíñú ráa, chi jín tiñu tásɨ́ sáꞌá rá ñɨvɨ nú nxi̱náꞌví nú rá ñɨvɨ ntáká nación.

Apoclipsis 19:20

Soo maáréꞌ jín rá soldado ííꞌ re̱ꞌ ntɨɨn ráa kitɨ xéénꞌ kákini vá jín suni inka ka̱ꞌ kitɨ xéénꞌ kákini ya̱ kúvi te̱e ya̱ nkachitu̱ꞌún tu̱ꞌun túꞌún ya̱ nkene yuꞌú kitɨ xe̱e̱nꞌ xíꞌnañúꞌún, jín suni nsa̱ꞌá‑a rá seña a̱nasɨ́ ichinúúnꞌ kitɨ xéénꞌ kákini xíꞌnañúꞌún. Jee jín rá seña a̱nasɨ́ nsa̱ꞌá‑a nxi̱náꞌví‑i rá ñɨvɨ ya̱ nni̱ꞌi̱nꞌ ráa seña kitɨ xéénꞌ kákini xíꞌnañúꞌún kuniso ráa jee kúvi ráa ya̱ nneñu̱ꞌun ráa santúꞌ ñunéꞌyúꞌ maátíꞌ. Jee ni núvíꞌ ráa kitɨ xéénꞌ kákini vá, ni tékúꞌ rátíꞌ jee nsi̱kéne maáréꞌ ya̱ yósóꞌ kitɨ kuíjín vá rátíꞌ nu̱u̱nꞌ ñúꞌúnꞌ xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ sufríꞌ.

Apoclipsis 2:13

[Jee jíníꞌ ni̱ꞌ ntáká tiñu váꞌa sáꞌá rán.] Jee jíníꞌ ni̱ꞌ ya̱ nééꞌ rán nu̱u̱nꞌ tátúníꞌ kui̱ꞌna̱ꞌ kúñáꞌnú naní Satanás. Soo súka̱ꞌ sukuán soo íñɨ́ ni̱ꞌin rán níkɨ́nꞌ na̱a̱ꞌ rán nuꞌuꞌ. Jee ni ntu nníkó iniꞌ rán ya̱ jínúꞌ iniꞌ rán nuꞌuꞌ, ni súnika̱ꞌ sáá nkuvi rá ki̱vɨ̱ꞌ nneeꞌ Antipas nteñu rán, ɨɨn te̱e ya̱ nsi̱kúnkuvi na̱a̱ꞌ re̱ꞌ nna̱kani na̱a̱ꞌ re̱ꞌ tu̱ꞌun ni̱ꞌ, jee ñaꞌniꞌ ráa maa nteñu rán yukuán ñuunꞌ nu̱u̱nꞌ nééꞌ Satanás.

Apoclipsis 2:24

’Soo rá inka ka̱ꞌ ránoꞌó ya̱ nééꞌ ñuunꞌ Tiatira, ya̱ ntu níkɨ́nꞌ rán tu̱ꞌun ya̱ xínéꞌénꞌ ñaꞌan yukuán, jee ni ntu yɨ́ꞌɨ́ rán ñujiínꞌ tu̱ꞌun, ya̱ káchíꞌ ráa ya̱ kúvi tu̱ꞌun yuꞌuꞌ kúñáꞌnú Satanás, jee káchíꞌ ni̱ꞌ nu̱u̱nꞌ ránoꞌó ya̱ ntu̱náꞌ inka ka̱ꞌ tiñu véi taji ni̱ꞌ nu̱u̱nꞌ ránoꞌó.

Apoclipsis 2:9

[Jee jíníꞌ ni̱ꞌ nta̱ká tiñu váꞌa sáꞌá rán] jee jíníꞌ ni̱ꞌ rá tu̱nóꞌó nóꞌo rán, jín suni jie̱ꞌe̱ꞌ tu̱nláꞌví nóꞌo rán. Soo súka̱ꞌ sukuán kúvi, soo kúká rán jín nɨꞌɨ ya̱ váꞌa níso tu̱ꞌun ni̱ꞌ, chi jínúꞌ iniꞌ rán maa. Jee suni jíníꞌ ni̱ꞌ ya̱ káꞌánꞌ niva̱ꞌa rá ñɨvɨ si̱kɨ̱ꞌ rán. Jee rá ñɨvɨ vá káchíꞌ ráa ya̱ ñɨvɨ ñuunꞌ Israel kúvi ráa ya̱ ñɨvɨ Ndiosíꞌ kúvi ráa, soo nsú ñɨvɨ Ndiosíꞌ kúvi ráa, jee kútútú ráa veꞌi sinagoga nu̱u̱nꞌ kútútú rá ñɨvɨ Israel soo ñɨvɨ ya̱ yɨ́ꞌɨ́ xi̱ntíín kui̱ꞌna̱ꞌ kúñáꞌnú naní Satanás kúvi ráa.

Apoclipsis 20:10

Jee kui̱ꞌna̱ꞌ kúñáꞌnú ya̱ nxi̱náꞌví‑i ráa, jee nsi̱kéne Ndiosíꞌ maa nchuꞌun re̱ꞌ maa nu̱u̱nꞌ ñúꞌún xéénꞌ kuéntáꞌ nteñúꞌún nu̱u̱nꞌ káyúꞌ núꞌvéꞌ ñuꞌunꞌ jín sufríꞌ, nu̱u̱nꞌ ya̱ yɨ́ꞌɨ́ kitɨ xéénꞌ kákini vá jín inka ka̱ꞌ kitɨ xéénꞌ kákini ya̱ kúvi te̱e ya̱ káchítu̱ꞌún tu̱ꞌun túꞌún kéne yuꞌú kitɨ xe̱e̱nꞌ xíꞌnañúꞌún. Jee nu̱u̱nꞌ ñúꞌúnꞌ yukuán kuꞌun ráa kunoꞌo ráa nɨ́ɨ́nkání.

Apoclipsis 20:8

Jee kene‑e sáva xináꞌví‑i rá ñɨvɨ rá nación ya̱ íyó ni kúmíꞌ ichi ñɨ̱vɨ́. Jee kɨ̱xináꞌví‑i rá ñɨvɨ rá ñuunꞌ Gog jín Magog, sáva saꞌá‑a ya̱ nutútú rá ñɨvɨ vá sáva kantáꞌán ráa jín rá ñɨvɨ Ndiosíꞌ. Jee kue̱ꞌe̱ꞌ víꞌí ntántúníꞌ ráa nutútú kuéntáꞌ kua̱ꞌ kue̱ꞌe̱ꞌ ñuítɨ́ káá yuꞌú nteñúꞌún.

Apoclipsis 3:9

Soo kune̱ꞌyá, rá ñɨvɨ kútútú ráa veꞌi sinagoga ñɨvɨ Israel ya̱ yɨ́ꞌɨ́ ráa xi̱ntíín Satanás jee káchíꞌ ráa ya̱ ñɨvɨ ñuunꞌ Israel kúvi ráa ya̱ ñɨvɨ Ndiosíꞌ kúvi ráa, soo ntu̱ví, chisaꞌ kátúꞌún ráa, jee saꞌá ni̱ꞌ ya̱ kenta ráa nu̱u̱nꞌ rán, jee nakui̱ñɨ̱ꞌ ítɨ́ ráa nu̱u̱nꞌ rán saꞌá ni̱ꞌ, sáva kuniꞌ va̱ꞌa ráa ya̱ ñúnúunꞌ nijia ni̱ꞌ ránoꞌó.

Apoclipsis 9:1

Saájee najiáꞌáꞌ ííꞌ úꞌúnꞌ nti̱vɨ̱ꞌ‑ɨ trompeta‑a. Jee niniꞌ ni̱ꞌ ɨɨn tiu̱u̱nꞌ nkene‑e ne̱ súkún va̱ji‑i ñe̱te̱ꞌ‑e nu̱u̱nꞌ ñu̱ꞌún iniꞌ ñɨ̱vɨ́. Jee nni̱ꞌi̱nꞌ‑i nakáa ya̱ jíne‑e yuꞌú numaꞌ ya̱ ntu jínu nu̱u̱nꞌ kúnú‑u.

Apoclipsis 9:20

Soo sava ka̱ꞌ rá ñɨvɨ ñɨ̱vɨ́ ya̱ ntu níꞌiꞌ ráa nu̱u̱nꞌ rá tu̱nóꞌó vá, jee ni ntu̱ví nnákani iniꞌ ráa xinóo ráa rá tiñu níváꞌa sáꞌá ráa jín naꞌá ráa. Chi ni ntu̱ví nxínóo ráa ya̱ néñu̱ꞌun ráa rá ta̱chi̱ꞌ kíni jín rá santúꞌ ñunéꞌyúꞌ nsa̱ꞌá maa jín oro, jín plata, jín ka̱a kuáán bronce, jín yu̱u̱ꞌ, jín yutun, asúnika̱ꞌ ntu̱ví kúvi kune̱ꞌyá rává, jee ni ntu kúvi teso̱ꞌo rává, jee ni ntu kúvi kaka rává.