2 Pedro 1:5 - Mixteco del suroeste de Tlaxiaco Oaxaca

⁵ Jee saáva jie̱ꞌe̱ꞌ yukuán vá nu̱u̱nꞌ kúneí iniꞌ rán ínúꞌ iniꞌ rán Cristo jee nikó nei rán nachisó rán ka̱ꞌ ya̱ kueꞌnu va̱ꞌa rán. Jee jie̱ꞌe̱ꞌ kueꞌnu va̱ꞌa rán jee nachisó rán ka̱ꞌ ya̱ kukáꞌnú iniꞌ rán ka̱ꞌ jie̱ꞌe̱ꞌ Ndiosíꞌ.

2 Pedro 1:5 ပူးပေါင်းရင်းမြစ်များ

Lucas 16:26

Soo suni íyó ɨɨn numaꞌ ya̱ ntu jínu nu̱u̱nꞌ kúnú‑u ya̱ chúmáꞌñu‑u yó, saáva rá ñɨvɨ ya̱ íyó yaꞌá súka̱ꞌ kuíni ráa kua̱jiaaꞌ ráa nu̱u̱nꞌ ránoꞌó i̱ña̱ꞌ, soo ntu kúvi. Sunisaá ntu kúvi kene rá ñɨvɨ i̱ña̱ꞌ kiji ráa nu̱u̱nꞌ ránuꞌuꞌ yaꞌá ranika̱ꞌ”, nkachiꞌ Abraham.

Lucas 24:21

Soo ni̱yo tu̱neí iniꞌ ránꞌ ya̱ suvire̱ꞌ vá nakani núne re̱ꞌ rá ñɨvɨ ñuunꞌ Israel nu̱u̱nꞌ xi̱ntíín Roma, nékúvi. Soo vitan jee jie̱ꞌe̱ꞌ nɨꞌɨ rá tiñu yaꞌá, jee ya̱ íyó u̱ni̱ꞌ ki̱vɨ̱ꞌ ya̱ nkuvi yaꞌá.

Juan 6:27

Koto nániꞌvɨꞌ iniꞌ rán jie̱ꞌe̱ꞌ ya̱ yájíꞌ ya̱ tívɨ́. Chisaꞌ naniꞌvɨꞌ iniꞌ rán ni̱ꞌi̱nꞌ rán kuéntáꞌ ɨɨn ya̱ yájíꞌ ya̱ íyó nɨ́ɨ́nkání ya̱ sáꞌá‑a ya̱ kutekuꞌ rán nɨ́ɨ́nkání jín Ndiosíꞌ. Yaꞌá vá taji ni̱ꞌ nu̱u̱nꞌ ránoꞌó, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, chi Tátáꞌ ni̱ꞌ Ndiosíꞌ nstúvi re̱ꞌ nu̱u̱nꞌ ñɨvɨ ya̱ ñani re̱ꞌ nuꞌuꞌ kuniso ni̱ꞌ tiñu vá sáva nakuniꞌ ñɨvɨ níso ni̱ꞌ tiñu vá.

1 Corintios 14:20

Jee saáva ránoꞌó ñaniꞌ jín ku̱ꞌva, koto jiáni iniꞌ rán kuéntáꞌ rá su̱chí lúlí jie̱ꞌe̱ꞌ rá tiñu yaꞌá. Chisaꞌ koo rán kuéntáꞌ rá nchíkɨ́n nu̱u̱nꞌ rá tiñu níváꞌa, ya̱ kueꞌnu rán kuéntáꞌ retánꞌ ntu̱ví jíníꞌ rán tiñu níváꞌa, soo kujia iniꞌ rán iniꞌ antúníꞌ rán.

Efesios 5:17

Jee saáva koto kúvi rán ñɨvɨ jiáni naanꞌ xi̱ni̱ꞌ, chisaꞌ ki̱ku̱ꞌun iniꞌ rán ntáká tiñu ya̱ kuíni I̱toꞌoꞌ‑ó ya̱ saꞌá rán.

Filipenses 1:9

Jee jíkánꞌ táꞌvíꞌ ni̱ꞌ nu̱u̱nꞌ Ndiosíꞌ, ya̱ saꞌ víꞌí káꞌ sáá kunu̱u̱nꞌ víꞌí rán ka̱ꞌ ñɨvɨ jín Ndiosíꞌ, jín ya̱ kujia víꞌí iniꞌ rán ka̱ꞌ, sáva kuniꞌ rán ka̱ꞌ tu̱ꞌun nááꞌ Ndiosíꞌ, jín sáva kuníchí xi̱ni̱ꞌ rán ka̱ꞌ jie̱ꞌe̱ꞌ ichi re̱ꞌ.

Filipenses 2:12

Saájee, ránoꞌó ya̱ ñúnúunꞌ ni̱ꞌ. Kuéntáꞌ sukuáni káníjiá rán tu̱ꞌun xínéꞌénꞌ ni̱ꞌ sáá nééꞌ ni̱ꞌ jín rán, soo vitan, sáá íyó íká ni̱ꞌ nu̱u̱nꞌ rán, saꞌ víꞌí káꞌ naniꞌvɨꞌ iniꞌ rán kaka na̱a̱ꞌ rán nu̱u̱nꞌ Tu̱ꞌun Ndiosíꞌ, ya̱ ña̱tíñú re̱ꞌ sáva natavaꞌ re̱ꞌ ránoꞌó nu̱u̱nꞌ kua̱chi rán sikáku re̱ꞌ ránoꞌó. Jee naniꞌvɨꞌ iniꞌ rán saꞌá ñáꞌnú víꞌí rán nu̱u̱nꞌ re̱ꞌ, jee naniꞌvɨꞌ iniꞌ rán ya̱ koto stívɨ́ rán maárán.

Filipenses 4:8

Jee nu̱u̱nꞌ nɨ́ꞌɨ ka̱ꞌ kachiꞌ ni̱ꞌ ka̱ꞌ nu̱u̱nꞌ rán, ránoꞌó ñaniꞌ jín ku̱ꞌva. Kuꞌun iniꞌ rán jie̱ꞌe̱ꞌ nta̱ká tu̱ꞌun na̱a̱ꞌ, jín jie̱ꞌe̱ꞌ nta̱ká tiñu ya̱ íyó ñáꞌnú, jín jie̱ꞌe̱ꞌ nta̱ká tiñu ya̱ íyó na̱a̱ꞌ, jín jie̱ꞌe̱ꞌ nta̱ká tiñu ya̱ íyó ninuꞌun, jín jie̱ꞌe̱ꞌ nta̱ká tiñu ya̱ sáꞌá ya̱ níní viiꞌ kuvi iniꞌ ñɨvɨ, jín jie̱ꞌe̱ꞌ nta̱ká tiñu ya̱ sáꞌá ñáꞌnú ñɨvɨ nu̱u̱nꞌ‑u. Retú íyó tiñu ya̱ íyó váꞌa, jee retú íyó tiñu ya̱ íyó níꞌínꞌ‑i ya̱ nakuetúꞌún ñɨvɨ jie̱ꞌe̱ꞌ‑e, kuꞌun iniꞌ rán maa.

Colosenses 1:9

Saájee, ne̱ ki̱vɨ̱ꞌ ya̱ nteso̱ꞌo ráníꞌ tu̱ꞌun vá jie̱ꞌe̱ꞌ ránoꞌó, jee ntu̱ví síkɨ́kui̱ñɨ̱ꞌ ránꞌ maáránꞌ ya̱ káꞌánꞌ ránꞌ jín Ndiosíꞌ jie̱ꞌe̱ꞌ ránú. Jee jíkánꞌ táꞌvíꞌ ránꞌ nu̱u̱nꞌ re̱ꞌ ya̱ chitú noo rán kukáꞌnú iniꞌ rán ya̱ kuíni re̱ꞌ, jie̱ꞌe̱ꞌ ya̱ sáꞌá Ta̱chi̱ꞌ Ííꞌ re̱ꞌ ya̱ nta̱ká nu̱u̱nꞌ kuníchí xíniꞌ rán jie̱ꞌe̱ꞌ tu̱ꞌun re̱ꞌ, jín ya̱ ki̱ku̱ꞌun iniꞌ rán tu̱ꞌun re̱ꞌ.

Colosenses 2:3

Chi iniꞌ Cristo ñúꞌún nta̱ká tu̱ꞌun yɨ́yáꞌvi ka̱ꞌ ya̱ kúvi tu̱ꞌun níchí Ndiosíꞌ, jín ya̱ kúvi kuniꞌ‑ó jie̱ꞌe̱ꞌ Ndiosíꞌ.

Hebreos 11:6

Soo retú ntu ínúꞌ iniꞌ‑ó kúneí iniꞌ‑ó Ndiosíꞌ tékúꞌ, jee ni ntu íyó na̱ja kuvi kuva̱ꞌa iniꞌ re̱ꞌ kune̱ꞌyá re̱ꞌ yó. Chi ñɨvɨ nátuꞌva‑a nu̱u̱nꞌ re̱ꞌ jee íyó‑o i̱nu̱ꞌ iniꞌ‑i ya̱ íyó nijia re̱ꞌ, jín suni ya̱ ku̱ꞌva re̱ꞌ ta̱ꞌvi̱ꞌ nu̱u̱nꞌ rá ñɨvɨ ya̱ nánukú ráa re̱ꞌ.

Hebreos 12:15

Kumí rán maárán sáva ni ɨɨn rán koto xínóo‑o ya̱ váꞌa táji Ndiosíꞌ nu̱u̱nꞌ‑ó jie̱ꞌe̱ꞌ íyó mániꞌ iniꞌ re̱ꞌ yó, sáva ni ɨɨn rán nkújia tu̱ꞌun ñúꞌún táꞌvi iniꞌ ñɨvɨ nteñu rán, ya̱ saꞌá níní‑i iniꞌ rá ñanitáꞌán‑ó jee stívɨ́‑ɨ kue̱ꞌe̱ꞌ ráa kuéntáꞌ yu̱ku̱ꞌ u̱va̱ꞌ.

Hebreos 6:11

Soo ñúkúvi iniꞌ ráníꞌ ya̱ suni sukuán kuꞌun káñá iniꞌ ta ɨɨn ɨɨn rán, ne̱ kenta ji̱nu tékúꞌ rán, sáva nɨꞌɨ noo kino̱o kutú iniꞌ rán ya̱ íyó tu̱neí iniꞌ‑órán ya̱ taji Ndiosíꞌ nu̱u̱nꞌ‑ó ya̱ nchi̱sóyuꞌú re̱ꞌ.

1 Pedro 3:7

Jee suni sukuán ránoꞌó, te̱e íyó ñasɨ́ꞌɨ́, kuneeꞌ ñunkúún rán jín ñasɨ́ꞌɨ́ rán kani va̱ꞌa iniꞌ rán jie̱ꞌe̱ꞌ ya̱ jíniñúꞌún ráña, jee koo yɨ́ñúꞌún ñáꞌnú rán nu̱u̱nꞌ ráña, chi táyáꞌ iniꞌ ráña ka̱ꞌ nsú ka̱ꞌ ránoꞌó. Jee koo yɨ́ñúꞌún ñáꞌnú rán nu̱u̱nꞌ ráña chi suni ne̱ jíꞌín ráña jín ránoꞌó ni̱ꞌi̱nꞌ rán ɨɨn ni ta̱ꞌvi̱ꞌ sikútaꞌviꞌ Ndiosíꞌ ránoꞌó kutekuꞌ rán nɨ́ɨ́nkání jín re̱ꞌ saꞌá re̱ꞌ. Sukuán íyó saꞌá rán sáva ntu̱náꞌ kasɨꞌ nu̱u̱nꞌ ya̱ káꞌánꞌ rán jín Ndiosíꞌ.

2 Pedro 1:10

Saáva, ránoꞌó ñanitáꞌán, nikó néí rán kueꞌnu rán sánikua̱ꞌ kuíni re̱ꞌ sáva tu̱vi niji ya̱ nkana Ndiosíꞌ ránoꞌó jín ya̱ nkáji re̱ꞌ ránoꞌó kuvi rán ñɨvɨ re̱ꞌ. Jee retú saꞌá nijia rán ntáká rá tiñu yaꞌá jee ni nsáꞌ kininkava rán ntu íyó nanikó ya̱ta̱ꞌ iniꞌ rán ichi Cristo.

2 Pedro 1:11

Chi retú sukuán nijia, saájee taji Ndiosíꞌ nu̱u̱nꞌ rán ya̱ núne va̱ꞌa ichi nu̱u̱nꞌ ki̱vɨ rán nu̱u̱nꞌ tátúníꞌ máá I̱toꞌoꞌ‑ó Jesús ya̱ kúvi Cristo nɨ́ɨ́nkání ya̱ maáréꞌ ví ya̱ nsa̱ꞌá‑a ya̱ nanitáꞌvíꞌ‑ó.

2 Pedro 3:14

Saáva ránoꞌó ya̱ ñúnúunꞌ ni̱ꞌ, jee ni nétu rán ya̱ kiji ntáká rá tiñu yaꞌá, jee kuniꞌvɨꞌ iniꞌ rán nikó néí rán ya̱ kino̱o noo ánímaꞌ rán jee ntu̱náꞌ kua̱chi kuniso ka̱ꞌ ánímaꞌ rán, jee kuniꞌ re̱ꞌ ya̱ ne̱ va̱ꞌa koo ntáká rán jín re̱ꞌ, sáá nenta re̱ꞌ.

2 Pedro 3:18

Chisaꞌ íyó kujia iniꞌ rán kueꞌnu rán jín Jesús ya̱ kúvi Cristo ya̱ máníꞌ iniꞌ re̱ꞌ chineí re̱ꞌ ka̱ꞌ ránoꞌó jee íyó kujia iniꞌ rán ka̱ꞌ jín tu̱ꞌun re̱ꞌ sáva kuniꞌ rán ka̱ꞌ iniꞌ re̱ꞌ. Jesús ví ya̱ nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó. Nákuetúꞌún‑ó re̱ꞌ vitan jín nɨ́ɨ́nkání. Sukuán koo. Amén.