2 Corintios 7:11 - Mixteco del suroeste de Tlaxiaco Oaxaca

¹¹ Chi tu̱nkuéká ni̱yo iniꞌ rán sáni kuíni Ndiosíꞌ, jee tɨɨn kuéntáꞌ ránú ná kúvi ya̱ nsa̱ꞌá‑a iniꞌ ánímaꞌ rán: ¡Na̱ ka̱ꞌ ntɨɨn ñáꞌnú rán tiñu yaꞌá! ¡Na̱ ka̱ꞌ nnakui̱ñɨ̱ꞌ rán jín ránuꞌuꞌ! ¡Na̱ ka̱ꞌ nki̱tɨ̱ꞌ iniꞌ maárán jie̱ꞌe̱ꞌ ya̱ nsa̱ꞌá rán! ¡Na̱ ka̱ꞌ nñu̱yúꞌví iniꞌ rán Ndiosíꞌ! ¡Na̱ ka̱ꞌ nñu̱ꞌun káñá iniꞌ rán kune̱ꞌyá tuku rán ránuꞌuꞌ! ¡Na̱ ka̱ꞌ nániꞌvɨꞌ iniꞌ rán jie̱ꞌe̱ꞌ ránuꞌuꞌ! ¡Na̱ ka̱ꞌ viiꞌ nsa̱náaꞌ rán si̱kɨ̱ꞌ ñɨvɨ vá ya̱ nsa̱ꞌá‑a kua̱chi yaꞌá! Jee ntáká nu̱u̱nꞌ nstúvi rán ya̱ íyó noo ninuꞌun rán jie̱ꞌe̱ꞌ tiñu níváꞌa yaꞌá.

2 Corintios 7:11 ပူးပေါင်းရင်းမြစ်များ

Marcos 3:5

Nákune̱ꞌyá xe̱e̱nꞌ Jesús nu̱u̱nꞌ ráa jee nku̱kuéká iniꞌ re̱ꞌ jie̱ꞌe̱ꞌ ya̱ ni̱ꞌin iniꞌ ánímaꞌ ráa. Jee nkachiꞌ re̱ꞌ nu̱u̱nꞌ te̱e yukuán: ―Skaáꞌ naꞌá nú. Jee nsi̱kááꞌ‑a naꞌá jee nnuvi‑i.

Juan 2:17

Saájee nna̱ku̱ꞌun iniꞌ rá te̱e súkuáꞌa re̱ꞌ rává tu̱ꞌun níso nu̱u̱nꞌ Tutuꞌ nééꞌ Tu̱ꞌun Ndiosíꞌ: “Ñúkuíñɨ́ iniꞌ ni̱ꞌ jie̱ꞌe̱ꞌ ve̱ꞌí nú ne̱ tɨ́ɨn ñuꞌunꞌ nuꞌuꞌ.”

Hechos 17:16

Soo ni nnetu Pablo ráa ñuunꞌ Atenas, nku̱níní iniꞌ‑i, chi niniꞌ‑i ya̱ nchi̱tú ñuunꞌ vá máá santúꞌ ñunéꞌyúꞌ.

Romanos 11:20

Va̱tu̱ni, chi jie̱ꞌe̱ꞌ ya̱ ntu nkúneí iniꞌ sava rá ñɨvɨ ñuunꞌ Israel vá Cristo jee nku̱ichi iniꞌ Ndiosíꞌ ráa nna̱neeꞌ re̱ꞌ ráa. Soo noꞌó, jie̱ꞌe̱ꞌ ya̱ kúneí iniꞌ nú Cristo íñɨ́ kutú nú nu̱u̱nꞌ re̱ꞌ. Saáva koto kútéyɨ́ɨ́ nú chisaꞌ kuyúꞌví iniꞌ nú.

Romanos 14:18

Chi ñɨvɨ ya̱ sukuán yɨ́tíñú‑u nu̱u̱nꞌ Cristo, jee kúváꞌa iniꞌ Ndiosíꞌ néꞌyá re̱ꞌ maa, jee kúváꞌa iniꞌ rá inka ñɨvɨ jie̱ꞌe̱ꞌ ya̱ sáꞌá‑a.

Romanos 3:5

Soo retú ya̱ niva̱ꞌa sáꞌá‑ó stúvi ya̱ na̱a̱ꞌ sáꞌá Ndiosíꞌ, ¿ná kúvi ya̱ kachiꞌ‑ó, résa? ¿Á ntu na̱a̱ꞌ kúvi Ndiosíꞌ xinóꞌo re̱ꞌ yó, résa? (Va̱ káꞌánꞌ ni̱ꞌ kuéntáꞌ káꞌánꞌ rá ñɨvɨ ñɨ̱vɨ́ yaꞌá.)

1 Corintios 12:25

Jee sukuán nsa̱ꞌá Ndiosíꞌ sáva ntu kusɨ́ɨ́n rá pedasúꞌ yɨkɨkúñu, chisaꞌ sáva íyó chineí táꞌán ráa.

1 Corintios 5:2

Jee súka̱ꞌ sukuán kúvi, jee ránoꞌó chi jiáni téyɨ́ɨ́ iniꞌ rán. ¿Á ntu váꞌa ka̱ꞌ retánꞌ jiáni iniꞌ rán tu̱ꞌun ñúkuíꞌyáꞌ iniꞌ, jín ya̱ tavaꞌ rán te̱e vá nteñu rán ya̱ nsa̱ꞌá tiñu yaꞌá résa?

2 Corintios 13:7

Jee jíkánꞌ táꞌvíꞌ ráníꞌ nu̱u̱nꞌ Ndiosíꞌ, ya̱ ni nsáꞌá ránú ni ɨɨn ya̱ níváꞌa. Soo jíkánꞌ táꞌvíꞌ ráníꞌ suꞌva nsú sáva túvi ráníꞌ nu̱u̱nꞌ rán ya̱ kéne na̱a̱ꞌ ráníꞌ, chisaꞌ sáva saꞌá ránú ya̱ váꞌa, súnika̱ꞌ jiáni iniꞌ ránú ya̱ ránuꞌuꞌ ntu kéne na̱a̱ꞌ ráníꞌ.

2 Corintios 2:6

Jee jín ya̱ nxi̱nóꞌo ntáká maárán ñɨvɨ vá, jee jín yukuán jee nkuvi.

2 Corintios 6:4

Chisaꞌ, nta̱ká nu̱u̱nꞌ ya̱ kúvi, stúvi ránꞌ ya̱ kúvi ránꞌ musúꞌ ya̱ sátíñú nu̱u̱nꞌ Ndiosíꞌ, jie̱ꞌe̱ꞌ ya̱ kúníꞌin ránꞌ íñɨ́ ni̱ꞌin rán jín Cristo, jín nu̱u̱nꞌ ya̱ kúmániꞌ nu̱u̱nꞌ ránꞌ, jín nu̱u̱nꞌ ya̱ víjí sáꞌá‑a nu̱u̱nꞌ ránꞌ,

2 Corintios 7:1

Jee ránoꞌó ñanitáꞌán ya̱ ñúnúunꞌ ni̱ꞌ, nni̱ꞌi̱nꞌ‑ó tu̱ꞌun yaꞌá ya̱ nchi̱sóyuꞌú Ndiosíꞌ saꞌá re̱ꞌ jín‑ó. Jee saáva íyó koo noo ninuꞌun‑ó ya̱ nkɨ́ꞌɨ‑ó nu̱u̱nꞌ nta̱ká ya̱ sátéꞌén yɨkɨkúñu‑ó jín ánímaꞌ‑ó nu̱u̱nꞌ Ndiosíꞌ. Jee íyó kujia iniꞌ‑ó sasɨ́ɨ́n‑ó maáó ya̱ nkɨ́ꞌɨ‑ó nu̱u̱nꞌ ya̱ níváꞌa, chi ñúyúꞌví iniꞌ‑ó Ndiosíꞌ.

2 Corintios 7:7

Jee nsú kua̱chi ya̱ nkiji Tito núváꞌa iniꞌ ránꞌ, chisaꞌ suni nna̱saváꞌa re̱ꞌ iniꞌ ránuꞌuꞌ jie̱ꞌe̱ꞌ ya̱ núváꞌa iniꞌ re̱ꞌ jie̱ꞌe̱ꞌ ránoꞌó. Chi nna̱kani re̱ꞌ nu̱u̱nꞌ ránuꞌuꞌ ya̱ ñúꞌún víꞌí iniꞌ ránú kune̱ꞌyá tuku rán ránuꞌuꞌ, jín ya̱ ñúꞌún kuáchi iniꞌ ránú jie̱ꞌe̱ꞌ ya̱ nsa̱ꞌá ránú, jín jie̱ꞌe̱ꞌ ya̱ nániꞌvɨꞌ iniꞌ rán jie̱ꞌe̱ꞌ ránuꞌuꞌ. Jee saáva kúsɨ́ɨꞌ víꞌí ka̱ꞌ iniꞌ ánímaꞌ ni̱ꞌ.

2 Corintios 7:9

Soo vitan jee kúsɨ́ɨꞌ iniꞌ ni̱ꞌ, soo nsú jie̱ꞌe̱ꞌ ya̱ nku̱kuéká iniꞌ rán, chisaꞌ jie̱ꞌe̱ꞌ ya̱ nku̱kuéká iniꞌ rán vá nsa̱ꞌá‑a ya̱ nna̱kani iniꞌ rán. Jee sukuán nku̱kuéká iniꞌ rán sáni kuíni Ndiosíꞌ. Saáva ntu̱náꞌ nsúkuíta rán nu̱u̱nꞌ Ndiosíꞌ jie̱ꞌe̱ꞌ ya̱ nsa̱ꞌá ráníꞌ.

2 Corintios 9:2

Chi ya jíníꞌ ni̱ꞌ ya̱ ñúꞌún káñá iniꞌ rán chineí rán. Jee jie̱ꞌe̱ꞌ vá káꞌánꞌ téyɨ́ɨ́ ni̱ꞌ nu̱u̱nꞌ rá ñɨvɨ ñuunꞌ Macedonia. Jee káchíꞌ ni̱ꞌ nu̱u̱nꞌ ráa ya̱ ránoꞌó, ñɨvɨ nééꞌ rán rá ñuunꞌ tɨ́ɨn Acaya, ya̱ nsa̱túꞌva rán ne̱ kiava. Jee jie̱ꞌe̱ꞌ ya̱ ñúkáñá iniꞌ rán chineí rán, jee nchuꞌun káñá‑a iniꞌ ráa ya̱ kue̱ꞌe̱ꞌ víꞌí ráa nóꞌónꞌ iniꞌ ráa chineí ráa.

Efesios 4:26

Jee retú kítɨ́ꞌ iniꞌ rán na̱ni jie̱ꞌe̱ꞌ jee koto sáꞌá rán kua̱chi, jee koto ñúꞌún tu̱nkítɨ́ꞌ iniꞌ rán núnuví, chi ñamani sijiáꞌa rán maa iniꞌ rán, ne̱ ntiáꞌan taꞌanꞌ nka̱niiꞌ.

Efesios 5:11

Jee koto kívɨ rán nu̱u̱nꞌ rá tiñu niváꞌa ya̱ ntu íyótiñu ya̱ sáꞌá ñɨvɨ ya̱ jiáꞌnu nu̱u̱nꞌ neenꞌ, chisaꞌ stúvi rán nu̱u̱nꞌ nijínꞌ ya̱ niváꞌa ví rá tiñu vá.

Filipenses 2:12

Saájee, ránoꞌó ya̱ ñúnúunꞌ ni̱ꞌ. Kuéntáꞌ sukuáni káníjiá rán tu̱ꞌun xínéꞌénꞌ ni̱ꞌ sáá nééꞌ ni̱ꞌ jín rán, soo vitan, sáá íyó íká ni̱ꞌ nu̱u̱nꞌ rán, saꞌ víꞌí káꞌ naniꞌvɨꞌ iniꞌ rán kaka na̱a̱ꞌ rán nu̱u̱nꞌ Tu̱ꞌun Ndiosíꞌ, ya̱ ña̱tíñú re̱ꞌ sáva natavaꞌ re̱ꞌ ránoꞌó nu̱u̱nꞌ kua̱chi rán sikáku re̱ꞌ ránoꞌó. Jee naniꞌvɨꞌ iniꞌ rán saꞌá ñáꞌnú víꞌí rán nu̱u̱nꞌ re̱ꞌ, jee naniꞌvɨꞌ iniꞌ rán ya̱ koto stívɨ́ rán maárán.

1 Tesalonicenses 4:6

Jee koto jiáꞌa sáꞌá ni ɨɨn ránú nu̱u̱nꞌ ɨɨn ñaniꞌ nú jie̱ꞌe̱ꞌ vá. Jee koto xínáꞌví nú re̱ꞌ jie̱ꞌe̱ꞌ vá. Chi náchunáán I̱toꞌoꞌ‑ó xínóꞌo re̱ꞌ ñɨvɨ jie̱ꞌe̱ꞌ nta̱ká kua̱chi yaꞌá, sánikua̱ꞌ ya nstúꞌva ránꞌ nu̱u̱nꞌ ránoꞌó. Ya nstúvi na̱a̱ꞌ ránꞌ maa nu̱u̱nꞌ ránoꞌó.

1 Timoteo 5:20

Jee ichinúúnꞌ nɨꞌɨ, nuxeenꞌ nú nu̱u̱nꞌ rá ñɨvɨ níkɨ́nꞌ ichi kua̱chi, sáva kuyu̱ꞌví sava ka̱ꞌ rá ñɨvɨ, sáva nsáꞌá ráa maa.

2 Timoteo 2:15

Nunasɨ́ nú sáva kene na̱a̱ꞌ tiñu sáꞌá nú nu̱u̱nꞌ Ndiosíꞌ, ya̱ ntu íyó kukanuun nú, chi xínéꞌénꞌ na̱a̱ꞌ nú tu̱ꞌun na̱a̱ꞌ re̱ꞌ.

Tito 3:8

Tu̱ꞌun yaꞌá ví máá na̱a̱ꞌ nijia. Jee kuíni ni̱ꞌ, ya̱ íchí sanáaꞌ ni̱ꞌin nú rá tu̱ꞌun yaꞌá nu̱u̱nꞌ rá ñɨvɨ kúneí iniꞌ ráa Ndiosíꞌ, sáva kɨtíñú ráa saꞌá ráa rá tiñu váꞌa. Jee ya̱ váꞌa víꞌí ví rá tu̱ꞌun yaꞌá, jee íyótiñu‑u nu̱u̱nꞌ rá ñɨvɨ.

Hebreos 4:1

Jee saáva, vitan íyó‑ó ka̱ꞌ jín tu̱ꞌun ya̱ nchi̱sóyuꞌú Ndiosíꞌ ya̱ ni̱ꞌi̱nꞌ‑ó ki̱vɨ‑ó naꞌá re̱ꞌ nu̱u̱nꞌ ni̱ꞌi̱nꞌ‑ó najia̱ví‑ó saꞌá re̱ꞌ. Jee íyó kuꞌun yúꞌví iniꞌ rán kumí rán maárán sáva nkóo ni ɨɨn rán ya̱ sanáaꞌ Ndiosíꞌ jie̱ꞌe̱ꞌ ñɨvɨ vá ya̱ nsáꞌ ni̱ꞌi̱nꞌ‑i ki̱vɨ‑ɨ nu̱u̱nꞌ najia̱ví‑i saꞌá re̱ꞌ.

Santiago 3:17

Soo ya̱ níchí ya̱ va̱ji ne̱ nu̱u̱nꞌ Ndiosíꞌ ví ya̱: xíꞌna ka̱ꞌ jiáꞌnu ninuꞌun ñɨvɨ, jee kuíre nééꞌ ñunkúún ráa, jee másúꞌ iniꞌ ráa, jee jiáku̱ꞌun iniꞌ ráa íyó maniꞌ ráa ya̱ káchíꞌ inka ñɨvɨ, jee kúkánáa ráa ya̱ náꞌví iniꞌ ráa, jee sáꞌá ráa ya̱ váꞌa ya̱ va̱ji ne̱ ánímaꞌ ráa kuéntáꞌ kúun rá vixíꞌ nu̱u̱nꞌ yutun, jee saɨn íyó iniꞌ ráa, jee nsú sansuꞌva íyó ráa.

1 Pedro 1:17

Jee ya̱ káchíꞌ rán ya̱ Ndiosíꞌ ví Tátáꞌ rán ya̱ maáréꞌ vá ntu tɨ́ɨn kuéntáꞌ re̱ꞌ ne̱ ɨɨn kúvi ta ɨɨn ɨɨn ñɨvɨ, chi ɨɨn nuún ni sánáaꞌ re̱ꞌ jie̱ꞌe̱ꞌ ta ɨɨn ɨɨn ráa sánikua̱ꞌ tiñu sáꞌá ráa. Jee saáva kuꞌun yúꞌví iniꞌ rán kɨtíñú rán nu̱u̱nꞌ re̱ꞌ tiempúꞌ ya̱ nééꞌ rán tékúꞌ rán iniꞌ ñɨ̱vɨ́ yaꞌá.

1 Pedro 2:2

Jee kuéntáꞌ ñúkúvi iniꞌ rá nchíkɨ́n yɨ́kɨ́n xu̱kui jíꞌíꞌ ráa, jee sukuán kuꞌun kúvi iniꞌ rán xu̱kui ninuꞌun, ya̱ kúvi Tu̱ꞌun Ndiosíꞌ, sáva sikújia‑a iniꞌ rán kueꞌnu na̱a̱ꞌ rán sáni nsi̱káku re̱ꞌ ránoꞌó nkɨ́ꞌɨ rán xi̱ntíín kua̱chi rán.

Judas 1:23

Jee suni íyó nukú rán na̱ja saꞌá rán sáva sikáku rán sava ka̱ꞌ rá ñɨvɨ sáva nkíninkava ráa nu̱u̱nꞌ kua̱chi, yukuán kúvi ya̱ kuéntáꞌ náxitá rán ráa nu̱u̱nꞌ ñuꞌúnꞌ xéénꞌ. Jee íyó kunáꞌví iniꞌ rán sava ka̱ꞌ rá ñɨvɨ, soo kuyúꞌví iniꞌ rán jie̱ꞌe̱ꞌ maárán jee kumí rán maárán jee koto ne̱ jíꞌín rán kininkava rán nu̱u̱nꞌ kua̱chi, chisaꞌ ne̱ kukini rán kune̱ꞌyá rán saꞌma ya̱ nku̱téꞌén jín tiñu néꞌén ya̱ nsa̱ꞌá rá ñɨvɨ vá.

Apoclipsis 3:19

’Chi ntáká rá ñɨvɨ ya̱ ñúnúunꞌ ni̱ꞌ, jee núxeenꞌ ni̱ꞌ nu̱u̱nꞌ ráa jee xínóꞌo ni̱ꞌ ráa náchuꞌun na̱a̱ꞌ ni̱ꞌ ichi ráa. Saáva nakukáñá iniꞌ ráa nakunikɨnꞌ ráa ichi váꞌa jee nakani iniꞌ ráa.