2 Corintios 10:3 - Mixteco del suroeste de Tlaxiaco Oaxaca

³ Chi sú kúvi ráníꞌ ñɨvɨ ñunéꞌyúꞌ jiáꞌnu ránꞌ nu̱u̱nꞌ ñɨ̱vɨ́ yaꞌá, jee kúvi ránꞌ kuéntáꞌ soldado jiátíñú Cristo sáva núnasɨ́ ránꞌ kántáꞌán ránꞌ, soo ntu kántáꞌán ránꞌ sánikua̱ꞌ kántáꞌán rá ñɨvɨ ñɨ̱vɨ́ yaꞌá.

2 Corintios 10:3 ပူးပေါင်းရင်းမြစ်များ

Romanos 7:5

Chi sáá ntu yɨ́ꞌɨ́‑ó xi̱ntíín Ndiosíꞌ jee ñaꞌnu‑ó sánikua̱ꞌ níyo iniꞌ‑ó, jee jie̱ꞌe̱ꞌ tátúníꞌ ley Ndiosíꞌ ya̱ koto sáꞌá kua̱chi, jee xínóto‑o iniꞌ‑ó ya̱ níyo iniꞌ‑ó saꞌá‑ó kua̱chi. Jee sukuán nsa̱tíñú‑u iniꞌ ñunéꞌyúꞌ kua̱chi‑ó sáva saꞌá‑ó tiñu niváꞌa, saáva kenta‑ó kuéntáꞌ kuviꞌ‑ó nu̱u̱nꞌ Ndiosíꞌ.

Romanos 8:13

Chi retú jiáꞌnu rán sáni kuíni rán jín ñunéꞌyúꞌ kua̱chi rán saájee kɨ̱naanꞌ rán nu̱u̱nꞌ Ndiosíꞌ. Soo retú jín fesáꞌ ííꞌ Ta̱chi̱ꞌ Ííꞌ Ndiosíꞌ jee xináánꞌ rán tiñu niváꞌa sáꞌá rán jín yɨkɨkúñu rán jee kutekuꞌ rán jín Ndiosíꞌ.

Romanos 8:4

Nsa̱ꞌá Ndiosíꞌ sukuán sáva kuvi sikúnkuvi‑ó ntáká tiñu na̱a̱ꞌ ya̱ tátúníꞌ ley, ya̱ ntu ka̱ꞌ jiáꞌnu‑ó ichi néꞌén sáni níyo iniꞌ‑ó, chisaꞌ jiáꞌnu‑ó sáni kuíni Ta̱chi̱ꞌ Ííꞌ Ndiosíꞌ.

2 Corintios 1:17

Sáá nkuna̱a̱ꞌ iniꞌ ni̱ꞌ yaꞌá, ¿á nka̱si̱kɨ́ ni̱ꞌ jie̱ꞌe̱ꞌ ya̱ ntu ñáne̱ꞌyá ni̱ꞌ ránoꞌó ya̱ uvíꞌ íchí, rúsa? Áxí, ¿á jiáni iniꞌ ni̱ꞌ ya̱ saꞌá ni̱ꞌ sáni níyo iniꞌ ni̱ꞌ kuéntáꞌ ñɨvɨ ya̱ ntu yɨ́ꞌɨ́ ráa nu̱u̱nꞌ Ndiosíꞌ, ya̱ u̱vi̱ꞌ nu̱u̱nꞌ jiáni iniꞌ‑i, ya̱ sa̱naanꞌ “kuvi, kuvi” káchíꞌ ni̱ꞌ soo tukuni “ntu̱ví, ntu̱ví” káchíꞌ ni̱ꞌ, rúsa?

2 Corintios 10:4

Chi ya̱ jiátíñú ránꞌ kántáꞌán ránꞌ nsú nantíñú ya̱ jiátíñú rá ñɨvɨ ñɨ̱vɨ́ yaꞌá kúvi‑i. Chisaꞌ táji Ndiosíꞌ ya̱ maá ñáꞌnú mánasɨ́ ví ya̱ jiátíñú ránꞌ sáva kántáꞌán ránꞌ, sáva xináánꞌ ránꞌ fuersáꞌ ya̱ níkó neí ñɨvɨ núníꞌin iniꞌ ánímaꞌ ráa sáva ntɨ́ɨn ráa tu̱ꞌun váꞌa Jesús.

Gálatas 2:20

Taꞌanꞌ ni̱ꞌ níꞌiꞌ ni̱ꞌ nu̱u̱nꞌ kurúsiꞌ jín Cristo. Saáva nsú káꞌ nuꞌuꞌ ví ya̱ tékúꞌ, chi maá Cristo ví ya̱ tékúꞌ iniꞌ ni̱ꞌ. Jee ni tékúꞌ ni̱ꞌ iniꞌ yɨkɨkúñu ni̱ꞌ yaꞌá, jee jiáꞌnu ni̱ꞌ ichi jie̱ꞌe̱ꞌ kúneí iniꞌ ni̱ꞌ Se̱ꞌya Ndiosíꞌ. Chi Cristo ví ya̱ ñúnúunꞌ re̱ꞌ nuꞌuꞌ jee nna̱sokoꞌ re̱ꞌ maáréꞌ ya̱ níꞌiꞌ re̱ꞌ jie̱ꞌe̱ꞌ ya̱ váꞌa kuvi ni̱ꞌ.

1 Timoteo 1:18

Noꞌó, Timoteo, ya̱ kúvi kuéntáꞌ se̱ꞌya ni̱ꞌ. Tiñu yaꞌá tétíñú ni̱ꞌ noꞌó, sánikua̱ꞌ tu̱ꞌun nna̱kani sava rá ñanitáꞌán‑ó ya̱ nkene yuꞌú Ndiosíꞌ. Tétíñú ni̱ꞌ noꞌó, sáva nunasɨ́ nú sikúnkuvi va̱ꞌa nú tiñu vá, kuéntáꞌ kántáꞌán va̱ꞌa ɨɨn soldado.

2 Timoteo 4:7

Nnu̱nasɨ́ ni̱ꞌ nka̱ntáꞌán ni̱ꞌ nu̱u̱nꞌ tiñu váꞌa re̱ꞌ. Jee kuéntáꞌ te̱e jínu va̱ꞌa carrera, nku̱neí ni̱ꞌ nsi̱jínu ni̱ꞌ ya̱ nsi̱kúnkuvi ni̱ꞌ ne̱ nu̱u̱nꞌ nɨ́ꞌɨ tiñu ya̱ ntaji Ndiosíꞌ nu̱u̱nꞌ ni̱ꞌ. Jee nnikɨnꞌ ni̱ꞌin ni̱ꞌ tu̱ꞌun kúneí iniꞌ‑ó.

Hebreos 12:1

Saáva, suni maáó ranika̱ꞌ, jee kuéntáꞌ nñuti̱yu̱ꞌ kue̱ꞌe̱ꞌ víꞌí nasɨ́kuitɨꞌ rá ñɨvɨ vá yó, ya̱ nstúvi ráa ya̱ naáꞌ jie̱ꞌe̱ꞌ yɨ́yáꞌvi ka̱ꞌ ya̱ kúneí iniꞌ ñɨvɨ Ndiosíꞌ. Jee saáva, xinóo‑ó ntáká tiñu sávéi yó jín rá kua̱chi ya̱ tɨ́ɨn ñamaꞌ‑a yó. Jee kuniꞌvɨꞌ iniꞌ‑ó kuni̱ꞌin‑ó kɨ̱ꞌɨ̱nꞌ‑ó ichinúúnꞌ‑ó nu̱u̱nꞌ ichi ñakɨnꞌ Ndiosíꞌ nu̱u̱nꞌ‑ó ñɨ̱vɨ́ yaꞌá, kuéntáꞌ jínu‑ó carrera.