2 Corintios 1:17 - Mixteco del suroeste de Tlaxiaco Oaxaca

¹⁷ Sáá nkuna̱a̱ꞌ iniꞌ ni̱ꞌ yaꞌá, ¿á nka̱si̱kɨ́ ni̱ꞌ jie̱ꞌe̱ꞌ ya̱ ntu ñáne̱ꞌyá ni̱ꞌ ránoꞌó ya̱ uvíꞌ íchí, rúsa? Áxí, ¿á jiáni iniꞌ ni̱ꞌ ya̱ saꞌá ni̱ꞌ sáni níyo iniꞌ ni̱ꞌ kuéntáꞌ ñɨvɨ ya̱ ntu yɨ́ꞌɨ́ ráa nu̱u̱nꞌ Ndiosíꞌ, ya̱ u̱vi̱ꞌ nu̱u̱nꞌ jiáni iniꞌ‑i, ya̱ sa̱naanꞌ “kuvi, kuvi” káchíꞌ ni̱ꞌ soo tukuni “ntu̱ví, ntu̱ví” káchíꞌ ni̱ꞌ, rúsa?

2 Corintios 1:17 ပူးပေါင်းရင်းမြစ်များ

Mateo 1:19

Soo José, ya̱ káá náꞌviꞌ re̱ꞌ jie̱ꞌe̱ꞌ ña, jee kúvi re̱ꞌ ɨɨn te̱e na̱a̱ꞌ, jee ntu nkuíni re̱ꞌ ku̱ꞌva re̱ꞌ tu̱nkánuun María, saáva nkuna̱a̱ꞌ iniꞌ re̱ꞌ naneꞌen re̱ꞌ tutuꞌ ya̱ xinóo sayo yuꞌuꞌ re̱ꞌ ña.

Mateo 5:37

Chisaꞌ kuvi tu̱ꞌun káchíꞌ rán “kuvi”, retú kuvi, jee retú ntu̱ví, jee “ntu̱ví”. Chi retú chísó rán ka̱ꞌ nu̱u̱nꞌ tu̱ꞌun káꞌánꞌ rán, jee yukuán kúvi ya̱ váji‑i nu̱u̱nꞌ ya̱ kíni.

Juan 8:15

Ránoꞌó chi sánáaꞌ rán jie̱ꞌe̱ꞌ tu̱ꞌun káꞌánꞌ ni̱ꞌ sáni jiáni iniꞌ rá ñɨvɨ yɨkɨkúñu. Soo nuꞌuꞌ chi ntu sánáaꞌ ni̱ꞌ si̱kɨ̱ꞌ ni ɨɨn ñɨvɨ.

2 Corintios 1:12

Suꞌva káꞌánꞌ téyɨ́ɨ́ ráníꞌ, ya̱ ne̱ ánímaꞌ ránꞌ jíníꞌ ránꞌ ya̱, ñaꞌnu na̱a̱ꞌ ránꞌ jee saɨn ni̱yo iniꞌ ránꞌ ñaꞌnu ránꞌ jín rá ñɨvɨ ñɨ̱vɨ́ yaꞌá, sáni kuíni Ndiosíꞌ. Jee víꞌí káꞌ jíníꞌ ránꞌ ya̱ nsa̱ꞌá ránꞌ sukuán nu̱u̱nꞌ ránoꞌó. Chi ntu ñáꞌnu ránꞌ sáni ya̱ níchí xíniꞌ maáránꞌ, chisaꞌ chíneí chituvi Ndiosíꞌ ránuꞌuꞌ saꞌá ránꞌ sukuán, chi íyó mániꞌ iniꞌ re̱ꞌ néꞌyá re̱ꞌ ránuꞌuꞌ.

2 Corintios 11:18

Íyó kue̱ꞌe̱ꞌ ñɨvɨ ya̱ káꞌánꞌ téyɨ́ɨ́ ráa jie̱ꞌe̱ꞌ maáráa sánikua̱ꞌ íyó ráa, jee suni sukuán kaꞌanꞌ téyɨ́ɨ́ ni̱ꞌ.

Gálatas 1:16

stúvi re̱ꞌ Se̱ꞌya re̱ꞌ nu̱u̱nꞌ ni̱ꞌ, sáva stekútu̱ꞌún ni̱ꞌ jie̱ꞌe̱ꞌ vá nu̱u̱nꞌ rá ñɨvɨ ntu kúvi Israel. Sáá nsa̱ꞌá re̱ꞌ suꞌva, jee ntu kuísá níkátu̱ꞌún ni̱ꞌ inka ñɨvɨ jie̱ꞌe̱ꞌ tu̱ꞌun vá.

Gálatas 2:2

Jee ña̱ꞌa̱nꞌ ni̱ꞌ yukuán sáni nstúvi Ndiosíꞌ nu̱u̱nꞌ ni̱ꞌ ya̱ íyó kɨ̱ꞌɨ̱nꞌ ni̱ꞌ yukuán. Jee nnu̱tútú sɨ́ɨ́n ni̱ꞌ jín rá te̱e kúñáꞌnú nu̱u̱nꞌ rá ñɨvɨ ya̱ kúneí iniꞌ ráa Jesús. Jee nna̱kani ni̱ꞌ nu̱u̱nꞌ ráa tu̱ꞌun váꞌa Jesús ya̱ stékútu̱ꞌún ni̱ꞌ nu̱u̱nꞌ rá ñɨvɨ rá inka nación. Nsa̱ꞌá ni̱ꞌ yaꞌá sáva tɨɨn kuéntáꞌ ráa ya̱ íyó na̱a̱ꞌ tiñu sáꞌá ni̱ꞌ sáva nku̱íchi iniꞌ ráa tiñu vá, sáva ntu nsáꞌá ka̱ꞌá ni̱ꞌ tiñu nsa̱ꞌá ni̱ꞌ yanaꞌán jín ya̱ sáꞌá ni̱ꞌ ntañúꞌún.

1 Tesalonicenses 2:18

Saáva nkaꞌvi iniꞌ ránꞌ kɨ̱ne̱ꞌyá ránꞌ ránoꞌó. Jee nuꞌuꞌ, Pablo, nkaꞌvi iniꞌ ni̱ꞌ kɨ̱ne̱ꞌyá ni̱ꞌ ránoꞌó, ɨɨn u̱vi̱ꞌ íchí, soo ñasɨꞌ Satanás nu̱u̱nꞌ nuꞌuꞌ.

Santiago 5:12

Saájee, ránoꞌó ñaniꞌ ni̱ꞌ jín ku̱ꞌva ni̱ꞌ, káꞌnú ka̱ꞌ nu̱u̱nꞌ nɨꞌɨ ví ya̱ koto sánáaꞌ rán jie̱ꞌe̱ꞌ antivɨ́ nu̱u̱nꞌ tu̱ꞌun káꞌánꞌ rán, ni jie̱ꞌe̱ꞌ ñɨ̱vɨ́, ni jie̱ꞌe̱ꞌ na̱ni inka nantíñú. Chisaꞌ retú káchíꞌ rán ya̱ “suꞌva kúvi”, jee sukuán kachiꞌ maa. Jee retú káchíꞌ rán “ntu̱ví”, jee sukuán kachiꞌ maa, sáva ntu kúnáaꞌ kua̱chi si̱kɨ̱ꞌ rán.