1 Pedro 4:7 - Mixteco del suroeste de Tlaxiaco Oaxaca

⁷ Soo ya̱ va̱kuyatin ya̱ nɨꞌɨ ntáká rá íyó, saáva nito koo rán kuꞌun kájí iniꞌ rán sáva kuvi kaꞌanꞌ rán jín Ndiosíꞌ.

1 Pedro 4:7 ပူးပေါင်းရင်းမြစ်များ

Génesis 19:35

Jee yakuááꞌ yukuán suni nsi̱kóꞌo ráa tátáꞌ ráa nu̱xi nixiꞌ, jee nna̱kuiñɨ́ꞌ se̱ꞌya sɨ́ꞌɨ́ súchí re̱ꞌ ka̱ꞌ ña̱kava‑a nna̱kusuꞌ‑u jín re̱ꞌ, jee ni ntu̱ví niniꞌ re̱ꞌ sáá ña̱kava ña jín re̱ꞌ ni sáá nnako̱o ña.

Génesis 6:13

Jee nkachiꞌ Ndiosíꞌ nu̱u̱nꞌ Noé: “Ya nkuna̱a̱ꞌ iniꞌ ni̱ꞌ xinɨ́ꞌɨ ni̱ꞌ nɨꞌɨ rá tékúꞌ, chi nchu̱chítú ráa ñɨ̱vɨ́ jín máá tiñu kántáꞌán. Jee sa̱néꞌ íyó xináánꞌ ni̱ꞌ ráa jín ñɨ̱vɨ́.

Mateo 24:42

Saáva nito koo rán, chi ntu jíníꞌ rán na̱ ki̱vɨ̱ꞌ niji I̱toꞌoꞌ rán.

Mateo 25:13

Jee nkachiꞌ Jesús: ―Saáva nito koo rán chi ntu̱ví jíníꞌ rán na̱ ki̱vɨ̱ꞌ ni na̱ hora kiji tuku nuꞌuꞌ, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ñɨ̱vɨ́.

Lucas 21:34

’Saáva kumí rán maárán ya̱ koto túví rán maárán nu̱u̱nꞌ ñujiínꞌ ya̱ stívɨ́ rán maárán, jín nu̱u̱nꞌ ya̱ ku̱ka̱ꞌva rán nu̱u̱nꞌ nixiꞌ, jín nu̱u̱nꞌ ya̱ nívini naniꞌvɨꞌ iniꞌ rán na̱ni jie̱ꞌe̱ꞌ ya̱ íyó ni tékúꞌ rán iniꞌ ñɨ̱vɨ́ yaꞌá, sáva ntu kininkava sa̱naanꞌ kuitɨꞌ ki̱vɨ̱ꞌ vá ya̱ta̱ꞌ rán,

Lucas 21:36

Saáva nito koo rán, ka̱ka̱nꞌ táꞌvíꞌ rán nu̱u̱nꞌ Ndiosíꞌ ntáká tiempúꞌ, sáva kuneí rán ka̱ku rán nu̱u̱nꞌ nta̱ká rá tu̱nóꞌó yaꞌá kiji, jee sáva kuneí rán kenta rán kuiñɨ rán ichinúúnꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.

Lucas 22:46

Jee nkachiꞌ re̱ꞌ nu̱u̱nꞌ ráa: ―¿Na̱ kuvi chi kíxíꞌ rán? Nako̱o rán, jee ka̱ka̱nꞌ táꞌvíꞌ rán sáva koto síkúvi iniꞌ rán kininkava rán nu̱u̱nꞌ xinóo rán ya̱ kuiñɨ ni̱ꞌin rán jín nuꞌuꞌ ―nkachiꞌ re̱ꞌ.

Romanos 12:12

Jee kusɨ̱ɨ̱ꞌ iniꞌ ánímaꞌ rán jie̱ꞌe̱ꞌ ya̱ íyó tu̱neí iniꞌ rán ki̱vɨ̱ꞌ nétu rán ya̱ xinánitáꞌvíꞌ Cristo ránoꞌó. Jee keꞌneꞌ iniꞌ rán kuiñɨ ni̱ꞌin rán sáá nóꞌo rán tu̱nóꞌó. Jee kuni̱ꞌin kaꞌanꞌ rán jín Ndiosíꞌ.

1 Corintios 15:24

Jee kuíre kenta ji̱nu tiempúꞌ nu̱u̱nꞌ nɨ́ꞌɨꞌ, sáá naku̱ꞌva re̱ꞌ tiñu níso re̱ꞌ xi̱ntíín Ndiosíꞌ, ya̱ kúvi Tátáꞌ re̱ꞌ, jee sáá xináánꞌ ntáká rá kúñáꞌnú, jín ntáká rá nísotíñú, jín rá níso fuersáꞌ.

1 Corintios 7:29

Ránoꞌó ñani jín ku̱ꞌva, káchíꞌ ni̱ꞌ rá tu̱ꞌun yaꞌá nu̱u̱nꞌ rán chi kuítɨ́ ni tiempúꞌ, jee saáva rá te̱e íyó ñasɨ́ꞌɨ́, jee íyó naniꞌvɨꞌ ka̱ꞌ iniꞌ ráa kuꞌun iniꞌ ráa kɨtíñú ráa nu̱u̱nꞌ I̱toꞌoꞌ‑ó, nsú káꞌ nu̱u̱nꞌ ñasɨ́ꞌɨ́ ráa, suꞌva koo ráa kuéntáꞌ ntu íyó ñasɨ́ꞌɨ́ ráa.

Efesios 6:18

Jee íyó kaꞌanꞌ rán jín Ndiosíꞌ jee ka̱ka̱nꞌ táꞌvíꞌ rán nu̱u̱nꞌ re̱ꞌ, ntáká tiempúꞌ. Kaꞌanꞌ rán jín Ndiosíꞌ sáni chíneí Ta̱chi̱ꞌ Ííꞌ re̱ꞌ ránoꞌó. Jee nito koo rán kunikɨnꞌ ni̱ꞌin rán ka̱ka̱nꞌ táꞌvíꞌ rán jie̱ꞌe̱ꞌ ntáká inka rá ñɨvɨ ya̱ nsásɨ́ɨ́n Ndiosíꞌ kuvi ráa ñɨvɨ re̱ꞌ.

Filipenses 4:5

Koo másúꞌ iniꞌ rán jín nta̱ká ñɨvɨ, sáva kuniꞌ nɨꞌɨ ráa ya̱ íyó rán suꞌva. I̱toꞌoꞌ‑ó íyó yatin.

Colosenses 4:2

Jee kɨtíñú rán kunikɨnꞌ rán kaꞌanꞌ rán jín Ndiosíꞌ, jee nito koo rán jie̱ꞌe̱ꞌ vá, jee ku̱ꞌva rán ya̱ kútaꞌviꞌ rán nu̱u̱nꞌ re̱ꞌ.

2 Timoteo 4:5

Soo noꞌó, kuꞌun kájí iniꞌ nú nu̱u̱nꞌ nta̱ká tiñu, keꞌneꞌ iniꞌ nú tu̱nóꞌó, saꞌá nú tiñu ya̱ kachitu̱ꞌún nú tu̱ꞌun váꞌa jie̱ꞌe̱ꞌ Cristo, jee sikúnkuvi va̱ꞌa nú tiñu sáꞌá nú nu̱u̱nꞌ Ndiosíꞌ.

Tito 2:12

Jie̱ꞌe̱ꞌ ya̱ íyó mániꞌ iniꞌ re̱ꞌ, jee suꞌva síkújia re̱ꞌ iniꞌ‑ó ya̱ chusává‑ó maáó nu̱u̱nꞌ ichi níváꞌa ya̱ ntu íyó sáni kuíni Ndiosíꞌ, jín nu̱u̱nꞌ ya̱ níyo iniꞌ‑ó ya̱ íyó sáni níyo iniꞌ rá ñɨvɨ ñɨ̱vɨ́ ya̱ ntu chíꞌi ráa maáráa naꞌá Ndiosíꞌ. Jee suꞌva síkújia re̱ꞌ iniꞌ‑ó, ya̱ tiempúꞌ vitan kueꞌnu kájí‑ó, jín ya̱ kaka na̱a̱ꞌ‑ó nu̱u̱nꞌ Ndiosíꞌ, jín ya̱ kɨtíñú‑ó nu̱u̱nꞌ ichi na̱a̱ꞌ sáni kuíni Ndiosíꞌ.

Hebreos 10:25

Jee ntu íyó xinóo‑ó nutútú‑ó kuneñu̱ꞌun‑ó Ndiosíꞌ, kuéntáꞌ kua̱ꞌ ya̱ nka̱an sava rá ñɨvɨ sáꞌá ráa ya̱ ni ntu nútútú ráa. Chisaꞌ nakutíñú‑ó nachuneí‑ó iniꞌ ɨɨn inka‑ó, jee saꞌ víꞌí káꞌ chi jíníꞌ‑ó ya̱ kua̱kuyatin ki̱vɨ̱ꞌ nenta I̱toꞌoꞌ‑ó Jesús.

Hebreos 9:26

Chi retánꞌ sukuán nkuvi, soo jíniñúꞌún ya̱ kue̱ꞌe̱ꞌ íchí kunoꞌo re̱ꞌ kuviꞌ re̱ꞌ ne̱ sáá nka̱jiéꞌé ña̱ko̱o ñɨ̱vɨ́ jín ne̱ vitan réáꞌ sukuán. Soo ntu̱ví chi vitan ya̱ kúvi tiempúꞌ kuánɨꞌɨ yaꞌá jee nkiji re̱ꞌ sáva nso̱ko̱ꞌ re̱ꞌ maáréꞌ ɨɨn ni íchí ya̱ kúvi nɨ́ɨ́nkání sáva siíyo re̱ꞌ kua̱chi.

1 Pedro 1:13

Saáva saꞌá túꞌva rán antúníꞌ maárán nu̱u̱nꞌ tiñu sáꞌá rán nu̱u̱nꞌ Ndiosíꞌ, kani kájí iniꞌ rán, íchí kuneenu̱u̱nꞌ noo rán koo kutú tu̱neí iniꞌ rán kunetu rán ya̱ ni̱ꞌi̱nꞌ rán ya̱ váꞌa ya̱ máníꞌ iniꞌ Ndiosíꞌ sikútaꞌviꞌ re̱ꞌ ránoꞌó ki̱vɨ̱ꞌ nenta nijinꞌ tuku Jesús ya̱ kúvi Cristo.

1 Pedro 3:7

Jee suni sukuán ránoꞌó, te̱e íyó ñasɨ́ꞌɨ́, kuneeꞌ ñunkúún rán jín ñasɨ́ꞌɨ́ rán kani va̱ꞌa iniꞌ rán jie̱ꞌe̱ꞌ ya̱ jíniñúꞌún ráña, jee koo yɨ́ñúꞌún ñáꞌnú rán nu̱u̱nꞌ ráña, chi táyáꞌ iniꞌ ráña ka̱ꞌ nsú ka̱ꞌ ránoꞌó. Jee koo yɨ́ñúꞌún ñáꞌnú rán nu̱u̱nꞌ ráña chi suni ne̱ jíꞌín ráña jín ránoꞌó ni̱ꞌi̱nꞌ rán ɨɨn ni ta̱ꞌvi̱ꞌ sikútaꞌviꞌ Ndiosíꞌ ránoꞌó kutekuꞌ rán nɨ́ɨ́nkání jín re̱ꞌ saꞌá re̱ꞌ. Sukuán íyó saꞌá rán sáva ntu̱náꞌ kasɨꞌ nu̱u̱nꞌ ya̱ káꞌánꞌ rán jín Ndiosíꞌ.

1 Pedro 5:8

Jee kuꞌun ñáꞌnú iniꞌ rán nito koo rán, chi kui̱ꞌna̱ꞌ kúñáꞌnú ya̱ túfíꞌ ta̱ꞌán re̱ꞌ jín ránoꞌó, jíkanuun re̱ꞌ kuéntáꞌ ɨɨn nikaꞌa ya̱ ne̱ nɨ́ꞌɨn sáxéenꞌ ti̱ꞌ núkú ti̱ꞌ kajiꞌ ti̱ꞌ chi núkú re̱ꞌ ɨɨn ñɨvɨ sáva xináánꞌ re̱ꞌ maa.

Apoclipsis 16:15

Jee nkachiꞌ Jesús: ―Tɨɨn kuéntáꞌ va̱ꞌa rán, sa̱naanꞌ ni nenta ni̱ꞌ kuéntáꞌ kua̱ꞌ kénta sa̱naanꞌ ɨɨn te̱e kuíꞌná. Saáva na̱ ka̱ꞌ netuꞌ ka̱ꞌ kuvi ñɨvɨ ya̱ ñúꞌún nito iniꞌ‑i, kuéntáꞌ kua̱ꞌ ɨɨn ñɨvɨ ya̱ íyó listo saꞌma sáva ntu jíka ñɨɨn léꞌlé‑e jee nkóo‑o tu̱ꞌun kánuun sáá kune̱ꞌyá ñɨvɨ nu̱u̱nꞌ‑u.