1 Juan 3:14 - Mixteco del suroeste de Tlaxiaco Oaxaca

¹⁴ Sú ñaꞌnu‑ó suꞌva kuéntáꞌ ya̱ níꞌiꞌ‑ó nu̱u̱nꞌ Ndiosíꞌ, soo nxi̱nóo‑ó ya̱ kuéntáꞌ níꞌiꞌ‑ó sukuán jee nkenta kutekuꞌ‑ó jín Ndiosíꞌ. Jee maáórán chi jíníꞌ‑ó maa chi ñúnúunꞌ‑ó rá ñanitáꞌán‑ó. Jee ñɨvɨ ya̱ ntu ñúnúunꞌ rá ñanitáꞌán‑ó jee kínóo i̱i̱ꞌ ráa ya̱ kuéntáꞌ níꞌiꞌ ráa.

1 Juan 3:14 ပူးပေါင်းရင်းမြစ်များ

Mateo 25:40

’Jee nuꞌuꞌ ya̱ kúvi ya̱ tátúníꞌ nu̱u̱nꞌ nɨꞌɨ naxiníkó ni̱ꞌ nu̱u̱nꞌ ráa, jee kachiꞌ ni̱ꞌ: “Máá nááꞌ vá káchíꞌ ni̱ꞌ nu̱u̱nꞌ rán ya̱, mákua sukuán nsa̱ꞌá rán jín ɨɨn rá ñanitáꞌán ni̱ꞌ yaꞌá, ya̱ kúneí iniꞌ ráa nuꞌuꞌ, sú ɨɨn máá ñɨvɨ láꞌví ka̱ꞌ kúvi‑i, saájee nu̱u̱nꞌ nuꞌuꞌ nsa̱ꞌá rán maa”, kachiꞌ ni̱ꞌ.

Lucas 15:24

Chi se̱ꞌya yɨ́ɨ́ ni̱ꞌ yaꞌá jee kuéntáꞌ ya̱ ni̱ꞌi̱ꞌ‑i, jee nna̱tekuꞌ‑u, chi kuéntáꞌ nsu̱kuíta ni̱ꞌ maa jee vitan nna̱niꞌinꞌ ni̱ꞌ maa”, nkachiꞌ re̱ꞌ. Jee nka̱jiéꞌé ráa kúsɨ́ɨꞌ iniꞌ ráa viko sáꞌá ráa.

Lucas 15:32

Soo jíniñúꞌún ya̱ saꞌá viko yaꞌá vitan jee nusɨ̱ɨ̱ꞌ iniꞌ‑ó, chi ñaniꞌ nú yaꞌá kuéntáꞌ níꞌiꞌ‑i, jee nna̱tekuꞌ‑u, chi nsu̱kuíta ni̱ꞌ maa, jee vitan nna̱niꞌinꞌ ni̱ꞌ maa”, nkachiꞌ tátáꞌ‑a ―nkachiꞌ Jesús.

Lucas 7:5

chi ñúnúunꞌ re̱ꞌ rá ñɨvɨ nación yó, jee maáréꞌ nchi̱neí re̱ꞌ ránuꞌuꞌ ña̱kui̱ñɨ̱ꞌ veꞌi sinagoga nu̱u̱nꞌ kútútú ráníꞌ súkuáꞌa ránꞌ Tu̱ꞌun Ndiosíꞌ ―nkachiꞌ ráa.

Juan 13:35

Chi retú nu̱u̱nꞌ viiꞌ ñúnúunꞌ rán ɨɨn inka táꞌán rán, yukuán jee kuniꞌ ntáká rá ñɨvɨ ya̱ maárán kúvi te̱e súkuáꞌa ni̱ꞌ ―nkachiꞌ Jesús.

Juan 15:12

Jee yaꞌá kúvi máá tu̱ꞌun ya̱ tátúníꞌ ni̱ꞌ nu̱u̱nꞌ rán ya̱: Kunu̱u̱nꞌ rán inka rá táꞌán rán, kuéntáꞌ ñúnúunꞌ ni̱ꞌ ránoꞌó.

Juan 15:17

Jee yaꞌá kúvi rá tu̱ꞌun ya̱ tátúníꞌ ni̱ꞌ nu̱u̱nꞌ rán ya̱: Kunu̱u̱nꞌ ɨɨn inka rán rá táꞌán rán.

Juan 5:24

’Máá nááꞌ vá káchíꞌ ni̱ꞌ nu̱u̱nꞌ rán: Ñɨvɨ ya̱ chúꞌun iniꞌ‑i tu̱ꞌun káchíꞌ ni̱ꞌ, jee kuneí iniꞌ‑i Ndiosíꞌ ya̱ nchu̱ichí nuꞌuꞌ va̱ji ni̱ꞌ, jee ya̱ nni̱ꞌi̱nꞌ ñɨvɨ vá ya̱ kutekuꞌ‑u nɨ́ɨ́nkání jín re̱ꞌ. Nsáꞌ sijíta Ndiosíꞌ maa. Ya nxi̱nóo ñɨvɨ vá ya̱ kuéntáꞌ níꞌiꞌ‑i nu̱u̱nꞌ Ndiosíꞌ jee ya̱ nna̱jia̱ꞌa‑a nu̱u̱nꞌ tékúꞌ‑u nɨ́ɨ́nkání jín Ndiosíꞌ.

2 Corintios 5:1

Chi jíníꞌ‑ó ya̱ yɨkɨkúñu‑ó ya̱ kúmí‑ó iniꞌ ñɨ̱vɨ́ yaꞌá, jee kúvi‑i kuéntáꞌ ɨɨn vesayo ya̱ jiánaanꞌ. Soo jíníꞌ‑ó ya̱ sáá kɨ̱naanꞌ‑a, jee natají Ndiosíꞌ ɨɨn yɨkɨkúñu jiáá nu̱u̱nꞌ‑ó ya̱ koo nɨ́ɨ́nkání. Jee yukuán kúvi kuéntáꞌ ɨɨn veꞌi jee íyó‑o ñuunꞌ íyó antivɨ́ súkún. Soo ntu̱ví kúvi‑i ɨɨn veꞌi ya̱ sáꞌá ñɨvɨ jín naꞌá‑a, chi maá Ndiosíꞌ nsa̱ꞌá maa.

Gálatas 5:22

Soo suni túvi rá tiñu sáꞌá Ta̱chi̱ꞌ Ííꞌ Ndiosíꞌ iniꞌ ñɨvɨ kuéntáꞌ túvi rá vixíꞌ kúun yutun. Sáꞌá re̱ꞌ ya̱ ñɨvɨ: ñúnúunꞌ ráa táꞌán ráa, ñúꞌún tu̱ꞌun íyó sɨ́ɨꞌ iniꞌ ánímaꞌ ráa, nééꞌ ñunkúún ráa jín táꞌán ráa, káꞌnú iniꞌ ráa, kúváꞌa iniꞌ ráa, ma̱ni̱ꞌ iniꞌ ráa, na̱a̱ꞌ ráa nu̱u̱nꞌ rá táꞌán ráa ya̱ kúkáꞌnú iniꞌ rá ñɨvɨ ráa,

Efesios 1:15

Saáva, sáá nteso̱ꞌo ni̱ꞌ tu̱ꞌun jie̱ꞌe̱ꞌ rán, jie̱ꞌe̱ꞌ ya̱ kúneí iniꞌ rán I̱toꞌoꞌ‑ó Jesús, jín jie̱ꞌe̱ꞌ ya̱ ñúnúunꞌ rán ntáká rá ñɨvɨ ya̱ nsa̱ꞌá sɨ́ɨ́n Ndiosíꞌ ráa, sáva kɨꞌɨ ráa nu̱u̱nꞌ Cristo,

Efesios 2:1

Jee ránoꞌó, ya̱ níꞌiꞌ rán nu̱u̱nꞌ Ndiosíꞌ nékúvi jie̱ꞌe̱ꞌ njiáꞌa rán nu̱u̱nꞌ ya̱ tátúníꞌ Ndiosíꞌ jín jie̱ꞌe̱ꞌ rá kua̱chi nsa̱ꞌá rán.

Efesios 2:5

Jee asúnika̱ꞌ nkuvi‑ó kuéntáꞌ ñɨvɨ níꞌiꞌ nu̱u̱nꞌ re̱ꞌ, jie̱ꞌe̱ꞌ ya̱ njia̱ꞌa‑ó nu̱u̱nꞌ ya̱ tátúníꞌ Ndiosíꞌ, soo nsa̱ꞌá re̱ꞌ ya̱ kutekuꞌ‑ó nɨ́ɨ́nkání jín Cristo. (Chi jie̱ꞌe̱ꞌ ya̱ íyó mániꞌ iniꞌ re̱ꞌ néꞌyá re̱ꞌ yó nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó.)

Colosenses 1:4

Chi nteso̱ꞌo ránꞌ tu̱ꞌun jie̱ꞌe̱ꞌ ya̱ kúneí iniꞌ rán Cristo Jesús, jín jie̱ꞌe̱ꞌ ya̱ ñúnúunꞌ rán nta̱ká rá ñɨvɨ ya̱ nsa̱ꞌá sɨ́ɨ́n Ndiosíꞌ ráa sáva kɨꞌɨ ráa nu̱u̱nꞌ Cristo Jesús.

1 Tesalonicenses 4:9

Jee ntu jíniñúꞌún ránú ya̱ tee ráníꞌ tutuꞌ nu̱u̱nꞌ ránoꞌó sáva kunu̱u̱nꞌ rán rá ñanitáꞌán, ya̱ kúneí iniꞌ ráa Jesús. Chi máá maá Ndiosíꞌ xínéꞌénꞌ ránoꞌó sáva kunu̱u̱nꞌ rán ɨɨn inka rán.

Hebreos 13:1

Jee kuni̱ꞌin rán kunikɨnꞌ rán kunu̱u̱nꞌ rán ɨɨn inka ñanitáꞌán rán ya̱ jínúꞌ iniꞌ ráa Cristo.

1 Pedro 1:22

Soo vitan jee ya̱ nna̱saꞌá ninuꞌun re̱ꞌ iniꞌ ánímaꞌ rán, jie̱ꞌe̱ꞌ ya̱ [nsa̱ꞌá Ta̱chi̱ꞌ Ííꞌ re̱ꞌ] ya̱ nka̱níjiá rán tu̱ꞌun na̱a̱ꞌ re̱ꞌ, sáva kunu̱u̱nꞌ nijia rán rá ñanitáꞌán rán, saáva ne̱ ninuꞌun ánímaꞌ rán kunu̱u̱nꞌ ntántúníꞌ víꞌí rán ɨɨn inka táꞌán rán.

1 Pedro 3:8

Jee nu̱u̱nꞌ nɨꞌɨ ɨɨn nuún ni kuꞌun iniꞌ ɨɨn inka ntáká rán, kunáꞌví iniꞌ rán táꞌán rán ré na̱kuáꞌ nóꞌo‑o, kunu̱u̱nꞌ rán ɨɨn inka ñanitáꞌán rán, kuñunkúún iniꞌ ánímaꞌ rán jee kuꞌun láꞌví iniꞌ rán.

2 Pedro 1:7

Jee jie̱ꞌe̱ꞌ ya̱ yɨ́tíñú rán nu̱u̱nꞌ Cristo jee nachisó rán ya̱ kunu̱u̱nꞌ rán ɨɨn inka ñanitáꞌán rán ya̱ yɨ́ꞌɨ́ ráa nu̱u̱nꞌ Cristo, jee jie̱ꞌe̱ꞌ ñúnúunꞌ rán rá ñanitáꞌán jee nachisó rán ya̱ kunu̱u̱nꞌ rán rá ñɨvɨ.

1 Juan 2:3

Nu̱u̱nꞌ síkúnkuvi‑ó rá tiñu tátúníꞌ re̱ꞌ, jee suꞌva kukáꞌnú nijia iniꞌ‑ó ya̱ ma̱ni̱ꞌ‑ó jín Ndiosíꞌ.

1 Juan 3:23

Jee yaꞌá kúvi tiñu ya̱ tátúníꞌ re̱ꞌ: ya̱ kuneí iniꞌ‑ó Se̱ꞌya re̱ꞌ Jesucristo, jín ya̱ kunu̱u̱nꞌ‑ó ɨɨn inka táꞌán‑ó, sánikua̱ꞌ nta̱túníꞌ re̱ꞌ nu̱u̱nꞌ‑ó.

1 Juan 4:12

Ni ɨɨn ñɨvɨ ni ntiáꞌan né kuniꞌ kuitɨꞌ‑ɨ Ndiosíꞌ. Soo nu̱u̱nꞌ ñúnúunꞌ‑ó ɨɨn inka táꞌán‑ó, jee kínóo kutú Ndiosíꞌ yɨ́ꞌɨ́‑ɨ iniꞌ yó, jee sáꞌá re̱ꞌ ya̱ jíjia iniꞌ‑ó jín tu̱ꞌun ñúnúunꞌ ñúꞌún iniꞌ‑ó vá.

1 Juan 5:13

Rá tu̱ꞌun yaꞌá ntee ni̱ꞌ nu̱u̱nꞌ ránoꞌó ya̱ kúneí iniꞌ rán Se̱ꞌya Ndiosíꞌ sáva kukáꞌnú na̱a̱ꞌ iniꞌ rán ya̱ ya tékúꞌ rán nɨ́ɨ́nkání jín re̱ꞌ.

1 Juan 5:2

Jee jie̱ꞌe̱ꞌ yaꞌá jíníꞌ‑ó ya̱ ñúnúunꞌ‑ó rá se̱ꞌya Ndiosíꞌ, sáá ñúnúunꞌ‑ó Ndiosíꞌ, jee síkúnkuvi‑ó rá tu̱ꞌun nta̱túníꞌ re̱ꞌ.