1 Corintios 8:12 - Mixteco del suroeste de Tlaxiaco Oaxaca

¹² Jee sáá sukuán sáꞌá rán kua̱chi nu̱u̱nꞌ rá ñanitáꞌán rán, chi sáꞌá rán ya̱ ñúꞌún kuáchi iniꞌ ráa chi káꞌvi iniꞌ ráa ya̱ sáꞌá ráa kua̱chi jie̱ꞌe̱ꞌ táyáꞌ iniꞌ ráa ya̱ ntiáꞌan kujia va̱ꞌa iniꞌ ráa jín Tu̱ꞌun Ndiosíꞌ, jee suni sukuán sáꞌá rán kua̱chi nu̱u̱nꞌ Cristo.

1 Corintios 8:12 ပူးပေါင်းရင်းမြစ်များ

Génesis 20:9

Jee nkana Abimelec Abraham, jee nkachiꞌ‑i nu̱u̱nꞌ re̱ꞌ: ―¿Ná kuvi ya̱ nsa̱ꞌá nú jín ránꞌ rúja? Jee, ¿ná kúvi kua̱chi nsa̱ꞌá ni̱ꞌ si̱kɨ̱ꞌ noꞌó, ya̱ nxi̱nínkava nú nuꞌuꞌ saꞌá ni̱ꞌ kua̱chi máá káꞌnú jín rá ñɨvɨ ñuunꞌ ni̱ꞌ rúja? Jee tiñu ya̱ jíníi̱yo saꞌá ñɨvɨ jee nsa̱ꞌá nú maa jín nuꞌuꞌ.

Génesis 42:22

Jee nna̱xiníkó Rubén nu̱u̱nꞌ ráa: ―¿Á ntu nkachiꞌ ni̱ꞌ nu̱u̱nꞌ rán ya̱ koto sáꞌá niva̱ꞌa rán te̱e súchí rúja? Soo ntu nsáꞌá rán kuéntáꞌ nu̱u̱nꞌ nkaꞌanꞌ ni̱ꞌ, jee vitan íyó ni̱ꞌi̱nꞌ‑ó ya̱ nakuniꞌ‑ó jie̱ꞌe̱ꞌ ya̱ ni̱ꞌi̱ꞌ ñaniꞌ‑ó ―nkachiꞌ Rubén.

Mateo 18:10

’Jee koto kúníichiꞌ iniꞌ rán ni ɨɨn rá su̱chí lúlí yaꞌá. Chi nuꞌuꞌ káchíꞌ ni̱ꞌ nu̱u̱nꞌ rán, ya̱ rá najiáꞌáꞌ ííꞌ ya̱ íyó ne̱ antivɨ́ súkún, ya̱ kúmí ráa rá su̱chí lúlí yaꞌá, jee sukuáni íñɨ́ rá najiáꞌáꞌ vá ichinúúnꞌ Tátáꞌ ni̱ꞌ ya̱ íyó ne̱ antivɨ́ súkún nákani ráa jie̱ꞌe̱ꞌ rává.

Mateo 18:21

Saájee ña̱kuyatin Pedro nu̱u̱nꞌ Jesús, jee ni̱ka̱tu̱ꞌún‑u Jesús, jee nkachiꞌ‑i: ―I̱toꞌoꞌ, ¿na̱ja íchí íyó kunekáꞌnú iniꞌ ni̱ꞌ kune̱ꞌyá ni̱ꞌ ñanitáꞌán ni̱ꞌ retú sáꞌá‑a kua̱chi si̱kɨ̱ꞌ ni̱ꞌ rúja? ¿Á ne̱ u̱xa̱ꞌ íchí rúja? ―nkachiꞌ Pedro.

Mateo 18:6

’Ré íyó su̱chí lúlí suꞌva ya̱ kúneí iniꞌ‑i nuꞌuꞌ, jee néni ɨɨn ñɨvɨ ya̱ xinínkava ɨɨn rá su̱chí lúlí vá xinóo‑o ichi nuꞌuꞌ, jee íyó va̱ꞌa ka̱ꞌ ré kuꞌniꞌ su̱ku̱nꞌ ñɨvɨ vá nu̱u̱nꞌ ɨɨn yu̱u̱ꞌ molínúꞌ máá káꞌnú ya̱ síkótíyu burrúꞌ maa jee sikéi ráa ñɨvɨ vá nu̱u̱nꞌ nteñúꞌún.

Mateo 25:40

’Jee nuꞌuꞌ ya̱ kúvi ya̱ tátúníꞌ nu̱u̱nꞌ nɨꞌɨ naxiníkó ni̱ꞌ nu̱u̱nꞌ ráa, jee kachiꞌ ni̱ꞌ: “Máá nááꞌ vá káchíꞌ ni̱ꞌ nu̱u̱nꞌ rán ya̱, mákua sukuán nsa̱ꞌá rán jín ɨɨn rá ñanitáꞌán ni̱ꞌ yaꞌá, ya̱ kúneí iniꞌ ráa nuꞌuꞌ, sú ɨɨn máá ñɨvɨ láꞌví ka̱ꞌ kúvi‑i, saájee nu̱u̱nꞌ nuꞌuꞌ nsa̱ꞌá rán maa”, kachiꞌ ni̱ꞌ.

Mateo 25:45

’Saájee naxiníkó ni̱ꞌ nu̱u̱nꞌ ráa, jee kachiꞌ ni̱ꞌ: “Máá nááꞌ vá káchíꞌ ni̱ꞌ nu̱u̱nꞌ rán, ya̱ mákua sukuán ntu nsáꞌá rán maa jín ɨɨn rá ñanitáꞌán ni̱ꞌ yaꞌá, ya̱ kúneí iniꞌ ráa nuꞌuꞌ, sú ɨɨn máá ñɨvɨ láꞌví ka̱ꞌ kúvi‑i, saájee suni ntu nsáꞌá rán maa nu̱u̱nꞌ nuꞌuꞌ”, kachiꞌ ni̱ꞌ nu̱u̱nꞌ ráa.

Marcos 9:42

’Ré íyó ɨɨn su̱chí lúlí suꞌva ya̱ kúneí iniꞌ‑i nuꞌuꞌ, jee néni ɨɨn ñɨvɨ xinínkava ɨɨn rá su̱chí lúlí yaꞌá xinóo‑o ichi nuꞌuꞌ, jee íyó va̱ꞌa ka̱ꞌ ré kuꞌniꞌ su̱ku̱nꞌ ñɨvɨ vá nu̱u̱nꞌ ɨɨn yu̱u̱ꞌ molínúꞌ máá káꞌnú ya̱ síkótíyu burrúꞌ maa, jee sikéne ráa ñɨvɨ vá nu̱u̱nꞌ nteñúꞌún.

Lucas 17:2

Chi va̱ꞌa ka̱ꞌ kúvi‑i retánꞌ sukuán jee kunuꞌniꞌ su̱ku̱nꞌ‑u ɨɨn yu̱u̱ꞌ molínúꞌ máá káꞌnú jee kɨ̱sikéne maa nu̱u̱nꞌ nteñúꞌún, nsú káꞌ retú xinínkava‑a ɨɨn rá su̱chí lúlí yaꞌá xinóo‑o ichi nuꞌuꞌ.

Romanos 14:20

Jee koto stívɨ́ nú xtánɨ́ꞌ nú tiñu nsa̱ꞌá Ndiosíꞌ jín ñanitáꞌán nú, jie̱ꞌe̱ꞌ ya̱ yájíꞌ nú. Chi ya̱ naáꞌ nijia kúvi ya̱ ntáká ya̱ yájíꞌ‑ó íyó noo ninuꞌun, soo saꞌá niváꞌa nú retú sikíninkava nú inka ñanitáꞌán nú jie̱ꞌe̱ꞌ ya̱ yájíꞌ nú.

1 Corintios 12:12

Chi kuéntáꞌ ɨɨn yɨkɨkúñu métúꞌún ɨɨn ni ví‑i jee kue̱ꞌe̱ꞌ rá pedasúꞌ íyó nu̱u̱nꞌ yɨkɨkúñu vá, jee sú íyó kue̱ꞌe̱ꞌ rá pedasúꞌ soo ntáká ráa yɨ́ꞌɨ́ nu̱u̱nꞌ ɨɨn ni yɨkɨkúñu. Jee suni sukuán yɨ́ꞌɨ́‑ó nu̱u̱nꞌ Cristo.