1 Corintios 4:5 - Mixteco del suroeste de Tlaxiaco Oaxaca

⁵ Saáva, koto sáꞌá náaꞌ rán si̱kɨ̱ꞌ táꞌán rán nekuaꞌ niji maá I̱toꞌoꞌ‑ó. Maáréꞌ nastúvi nijinꞌ re̱ꞌ rá tiñu nsa̱ꞌá yuꞌuꞌ‑ó nu̱u̱nꞌ neenꞌ, jee nastúvi re̱ꞌ ya̱ ñúꞌún iniꞌ ánímaꞌ‑ó. Saájee nakuetúꞌún Ndiosíꞌ ta ɨɨn ɨɨn ñɨvɨ sánikua̱ꞌ íyó ni̱ꞌi̱nꞌ maa.

1 Corintios 4:5 ပူးပေါင်းရင်းမြစ်များ

Mateo 10:26

’Jee saáva koto yúꞌví rán ya̱ sáꞌá ñɨvɨ ránoꞌó. Chi ni ntu̱né íyó ni ɨɨn yɨ́séꞌí‑i ya̱ nsáꞌ natu̱vi‑i nu̱nijínꞌ, jee ni ntu íyó ɨɨn ya̱ kínóo yuꞌuꞌ‑u, ya̱ nsáꞌ kenta kuniꞌ maa.

Mateo 24:30

Saájee nuꞌuꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ jee tu̱vi seña nuꞌuꞌ ne̱ súkún, saájee kunaꞌyuꞌ nɨꞌɨ kuitɨꞌ rá ñɨvɨ ñuunꞌ íyó ñɨ̱vɨ́ yaꞌá, jee kuniꞌ ráa nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee niji ni̱ꞌ nu̱u̱nꞌ vi̱ko̱ꞌ súkún jín kue̱ꞌe̱ꞌ nasɨ́kuitɨꞌ fuersáꞌ ííꞌ níꞌin níso ni̱ꞌ, jín ya̱ viiꞌ nasɨ́kuitɨꞌ kúñáꞌnú ni̱ꞌ ya̱ va̱ne̱ꞌ tu̱u̱nꞌ kujianu̱te̱ꞌ nuva ni̱ꞌ.

Mateo 24:46

Na̱ ka̱ꞌ netuꞌ ka̱ꞌ ví musúꞌ yukuán ya̱ sáá nenta i̱toꞌoꞌ‑o, jee naniꞌinꞌ re̱ꞌ maa síkúnkuvi na̱a̱ꞌ‑a sukuán.

Mateo 25:21

Jee nkachiꞌ i̱toꞌoꞌ re̱ꞌ nu̱u̱nꞌ re̱ꞌ: “Va̱ꞌa nsa̱ꞌá nú, chi musúꞌ va̱ꞌa síkínkuvi na̱a̱ꞌ kúvi nú. Chi síkúnkuvi na̱a̱ꞌ nú jín yakuꞌ tiñu lúlí, saájee kani ni̱ꞌ noꞌó nu̱u̱nꞌ kue̱ꞌe̱ꞌ tiñu ñáꞌnú ka̱ꞌ. Ki̱vɨ nu̱u̱nꞌ nasaꞌá sɨ́ɨꞌ ni̱ꞌ iniꞌ nú jín nuꞌuꞌ, ya̱ kúvi I̱toꞌoꞌ nú”, nkachiꞌ i̱toꞌoꞌ musúꞌ vá.

Mateo 25:23

Jee nkachiꞌ i̱toꞌoꞌ re̱ꞌ nu̱u̱nꞌ re̱ꞌ: “Va̱ꞌa nsa̱ꞌá nú, chi musúꞌ va̱ꞌa síkúnkuvi na̱a̱ꞌ kúvi nú. Chi síkúnkuvi na̱a̱ꞌ nú jín yakuꞌ tiñu lúlí, saájee kani ni̱ꞌ noꞌó nu̱u̱nꞌ kue̱ꞌe̱ꞌ tiñu ñáꞌnú ka̱ꞌ. Ki̱vɨ nu̱u̱nꞌ nasaꞌá sɨ́ɨꞌ ni̱ꞌ iniꞌ nú jín nuꞌuꞌ, ya̱ kúvi I̱toꞌoꞌ nú”, nkachiꞌ i̱toꞌoꞌ musúꞌ vá.

Lucas 6:37

’Koto sánáaꞌ rán káꞌánꞌ rán si̱kɨ̱ꞌ ñɨvɨ, jee ntu sanáaꞌ Ndiosíꞌ si̱kɨ̱ꞌ ránoꞌó. Koto síjíta rán rá ñɨvɨ jín tu̱ꞌun káꞌánꞌ rán, jee ntu sijíta Ndiosíꞌ ránoꞌó. Kunekáꞌnú iniꞌ rán kune̱ꞌyá rán rá ñɨvɨ, jee kunekáꞌnú iniꞌ Ndiosíꞌ kune̱ꞌyá re̱ꞌ ránoꞌó.

Juan 21:22

Jee nkachiꞌ Jesús nu̱u̱nꞌ Pedro: ―Retú kuíni ni̱ꞌ ya̱ kino̱o re̱ꞌ kutekuꞌ re̱ꞌ ne̱ ki̱vɨ̱ꞌ nikó tuku ni̱ꞌ niji ni̱ꞌ, ¿na̱ kuvi chi jítú iniꞌ nú maa? Noꞌó, kunikɨnꞌ nuꞌuꞌ ―nkachiꞌ Jesús.

Juan 21:23

Saájee nteñu rá ñanitáꞌán, ya̱ kúneí iniꞌ ráa Jesús, ñe̱te̱nuun tu̱ꞌun yaꞌá ya̱ nsáꞌ kuviꞌ te̱e vá ya̱ súkuáꞌa Jesús maa. Soo nsáꞌ nkachiꞌ Jesús ya̱ nku̱víꞌ‑i, chisaꞌ nkachiꞌ re̱ꞌ ya̱: “Retú kuíni ni̱ꞌ ya̱ kino̱o re̱ꞌ ya̱ kutekuꞌ re̱ꞌ ne̱ ki̱vɨ̱ꞌ nikó tuku ni̱ꞌ niji ni̱ꞌ, ¿na̱ kuvi chi jítú iniꞌ nú maa?” nkachiꞌ Jesús.

Juan 5:44

¿Na̱sa kúvi i̱nu̱ꞌ iniꞌ rán nuꞌuꞌ?, chi yɨ́netuꞌ rán ya̱ nakuetúꞌún ɨɨn inka rán táꞌán rán, jee ntu núkú rán ya̱ nakuetúꞌún Ndiosíꞌ ránoꞌó, ya̱ métúꞌún re̱ꞌ ví Ndiosíꞌ.

Romanos 14:4

Jee noꞌó, ¿né ɨɨn kúvi nú, ya̱ síjíta nú jie̱ꞌe̱ꞌ ya̱ sáꞌá ɨɨn musúꞌ inka i̱toꞌoꞌ, résa? Chi i̱toꞌoꞌ musúꞌ vá sanáaꞌ‑a jie̱ꞌe̱ꞌ ya̱ ni̱ñɨ ni̱ꞌin musúꞌ vá áxí nkininkava musúꞌ vá, jee nsú noꞌó. Jee kuiñɨ ni̱ꞌin‑i, chi I̱toꞌoꞌ‑ó níso re̱ꞌ fesáꞌ sáva kuvi saꞌá re̱ꞌ ya̱ kuiñɨ ni̱ꞌin‑i nu̱u̱nꞌ re̱ꞌ.

Romanos 2:1

Saájee ntu̱né íyó ya̱ tee nú si̱kɨ̱ꞌ sáva nama nú maánú, néni ɨɨn ránoꞌó ya̱ tée nú kua̱chi si̱kɨ̱ꞌ inka ñɨvɨ. Chi retú tee kua̱chi nú si̱kɨ̱ꞌ inka ñɨvɨ jee síjíta nú si̱kɨ̱ꞌ maánú, chi noꞌó ya̱ síjíta nú inka ñɨvɨ jee suni ɨɨn nuún ni sáꞌá nú ya̱ sáꞌá ráa.

Romanos 2:16

Sukuán kuvi ki̱vɨ̱ꞌ saꞌá Ndiosíꞌ ya̱ sanáaꞌ Cristo Jesús jie̱ꞌe̱ꞌ rá tiñu íyó yuꞌuꞌ ya̱ nsa̱ꞌá rá ñɨvɨ jín ya̱ ñani iniꞌ ráa. Jee sanáaꞌ re̱ꞌ kua̱chi ráa sánikua̱ꞌ tu̱ꞌun váꞌa re̱ꞌ ya̱ káchítu̱ꞌún ni̱ꞌ.

Romanos 2:29

Chisaꞌ ñɨvɨ Israel nijia jee ne̱ ánímaꞌ‑a kúvi‑i vá. Jee tiñu sáꞌá Ta̱chi̱ꞌ Ííꞌ Ndiosíꞌ iniꞌ ánímaꞌ ñɨvɨ ví circuncisión nijia ya̱ kúvi seña ya̱ stúvi ya̱ kúvi‑i ñɨvɨ Ndiosíꞌ jee nsú jie̱ꞌe̱ꞌ nánukú ráa sikúnkuvi ráa ley ya̱ níso nu̱u̱nꞌ Tutuꞌ Ííꞌ. Jee ñɨvɨ sukuán, nsú rá ñɨvɨ nákuetúꞌún maa, chisaꞌ ne̱ nu̱u̱nꞌ Ndiosíꞌ va̱ji ya̱ nákuetúꞌún re̱ꞌ maa.

Romanos 2:7

Jee rá ñɨvɨ níkɨ́nꞌ ni̱ꞌin ráa sáꞌá ráa ya̱ váꞌa chi núkú ráa ya̱ saꞌá Ndiosíꞌ ya̱ nuñáꞌnú ráa, jín ya̱ nakuatáꞌví re̱ꞌ ráa jín ya̱ nku̱víꞌ ráa ka̱ꞌ. Jee nachunáán re̱ꞌ nu̱u̱nꞌ ráa ya̱ kutekuꞌ ráa jín re̱ꞌ nɨ́ɨ́nkání.

1 Corintios 1:7

jee suꞌva ntu̱náꞌ kúmániꞌ ni ɨɨn ta̱ꞌvi̱ꞌ táji Ndiosíꞌ ni nétu kuvi‑ó ya̱ niji nijinꞌ I̱toꞌoꞌ‑ó Jesús ya̱ kúvi Cristo.

1 Corintios 11:16

Jee retú íyó ñɨvɨ ya̱ ntu̱ví nánu iniꞌ‑i jie̱ꞌe̱ꞌ rá tu̱ꞌun ya̱ nkachiꞌ ni̱ꞌ ya̱ kuíni‑i kantátúꞌun‑u jie̱ꞌe̱ꞌ tu̱ꞌun yaꞌá, soo ránuꞌuꞌ, jín ni rá inka ka̱ꞌ grupo ñɨvɨ ya̱ jínúꞌ iniꞌ ráa Ndiosíꞌ, ni ntu̱ví íyó na̱ inka ka̱ꞌ ñujiínꞌ ya̱ na̱sa koo.

1 Corintios 11:26

Jee saáva ntáká íchí ya̱ kajiꞌ rán i̱xta̱tíláꞌ yaꞌá jín ya̱ koꞌo rán ya̱ ñúꞌún iniꞌ vasúꞌ yaꞌá, jee stékútu̱ꞌún rán ya̱ ni̱ꞌi̱ꞌ I̱toꞌoꞌ‑ó jie̱ꞌe̱ꞌ kua̱chi‑ó nekuaꞌ niji tuku re̱ꞌ.

1 Corintios 15:23

Soo ta ɨɨn ɨɨn ñɨvɨ sánikua̱ꞌ níkɨ́nꞌ táꞌán‑a. Xíꞌnañúꞌún ka̱ꞌ Cristo ya nna̱tekuꞌ i̱i̱ꞌ, jee kuíre natekuꞌ ntáká rá ñɨvɨ ya̱ yɨ́ꞌɨ́ ráa nu̱u̱nꞌ re̱ꞌ, sáá niji tuku re̱ꞌ iniꞌ ñɨ̱vɨ́ yaꞌá.

1 Corintios 3:13

jee rá tiñu ya̱ nsa̱ꞌá ta ɨɨn ta ɨɨn ñɨvɨ jee kenta natu̱vi nijinꞌ‑i, chi ki̱vɨ̱ꞌ ya̱ koo juisiúꞌ ya̱ kenta keꞌneꞌ Ndiosíꞌ rá tiñu nsa̱ꞌá ñɨvɨ jee tu̱vi kájí na̱ nu̱u̱nꞌ tiñu kúvi ráa. Kototúníꞌ Ndiosíꞌ rá tiñu sáꞌá ta ɨɨn ta ɨɨn ñɨvɨ jín ñuꞌunꞌ sáva stúvi na̱ nu̱u̱nꞌ tiñu kúvi tiñu nsa̱ꞌá‑a.

1 Corintios 3:14

Jee retú nka̱yúꞌ tiñu ya̱ nsa̱ꞌá néni ɨɨn ñɨvɨ ya̱ nna̱chisó‑o nu̱u̱nꞌ nsamaꞌ vá jee kino̱o‑o, jee yukuán re ni̱ꞌi̱nꞌ ñɨvɨ vá ta̱ꞌvi̱ꞌ ya̱ nachunáán Ndiosíꞌ nu̱u̱nꞌ‑u.

1 Corintios 3:8

Jee saáva, te̱e ya̱ tée tataꞌ sáꞌá jín te̱e ya̱ chíꞌi nute nu̱u̱nꞌ tataꞌ sáꞌá vá, jee ɨɨn ni̱ꞌ kúvi ráa. Soo tanu̱u̱nꞌ ráa ni̱ꞌi̱nꞌ rá ya̱ꞌvi ráa ya̱ nachunáán Ndiosíꞌ nu̱u̱nꞌ ráa sánikua̱ꞌ tanu̱u̱nꞌ tiñu nsa̱ꞌá ráa.

2 Corintios 10:18

Chi nsú ñɨvɨ ya̱ nákutíñú va̱ꞌa ráa maáráa ví ya̱ kene na̱a̱ꞌ, chisaꞌ ñɨvɨ ya̱ maá I̱toꞌoꞌ‑ó ví ya̱ nákutíñú va̱ꞌa re̱ꞌ maa ví ya̱ kene na̱a̱ꞌ.

2 Corintios 10:9

Soo ntu kuíni ni̱ꞌ ya̱ kani iniꞌ rán ya̱ núkú ni̱ꞌ siúꞌví ni̱ꞌ ránoꞌó jie̱ꞌe̱ꞌ tutuꞌ tée ni̱ꞌ nu̱u̱nꞌ ránoꞌó.

2 Corintios 4:2

Jee jíníi̱yo ráníꞌ sáꞌá ránꞌ rá tiñu yɨ́séꞌí ya̱ kúvi tu̱ꞌun kánuun sáꞌá ñɨvɨ. Jee ni ntu̱ví jíka ránꞌ jín tiñu máñáꞌ. Jee ni ntu̱ví sáma ránꞌ sáá káꞌánꞌ Tu̱ꞌun Ndiosíꞌ. Chisaꞌ stúvi nijinꞌ ránꞌ tu̱ꞌun na̱a̱ꞌ Ndiosíꞌ, jee sukuán nákutíñú rán jie̱ꞌe̱ꞌ maáránꞌ sáva kuniꞌ nta̱ká rá ñɨvɨ ne̱ ánímaꞌ ráa ya̱ na̱a̱ꞌ íyó ránꞌ. Jee jíníꞌ maá Ndiosíꞌ ya̱ na̱a̱ꞌ íyó ránꞌ.

2 Corintios 5:10

Chi nta̱ká‑ó saá íyó kɨ̱ꞌɨ̱nꞌ‑ó kuiñɨ‑ó nu̱u̱nꞌ keꞌneꞌ Cristo rá tiñu nsa̱ꞌá‑ó, sáva ta ɨɨn ɨɨn‑ó ni̱ꞌi̱nꞌ‑ó sánikua̱ꞌ na̱ja nsa̱ꞌá‑ó, va̱ni tiñu váꞌa áxí va̱ni tiñu níváꞌa, sáá ni̱yo‑ó jín yɨkɨkúñu‑ó iniꞌ ñɨ̱vɨ́ yaꞌá.

1 Tesalonicenses 5:2

Chi maáránoꞌó ya̱ jíníꞌ va̱ꞌa rán ya̱ kenta sa̱naanꞌ ni ki̱vɨ̱ꞌ ya̱ kiji I̱toꞌoꞌ‑ó kuéntáꞌ kénta sa̱naanꞌ ɨɨn te̱e sákuíꞌná yakuááꞌ.

Hebreos 4:13

Jee ni ntu̱né íyó ni ɨɨn ya̱ nsa̱ꞌá Ndiosíꞌ ya̱ ntu túvi nijinꞌ nu̱u̱nꞌ re̱ꞌ, chisaꞌ nɨꞌɨ kuitɨꞌ núne ráa nu̱u̱nꞌ re̱ꞌ chi túvi nijinꞌ‑i néꞌyá maáréꞌ, ya̱ nu̱u̱nꞌ re̱ꞌ naku̱ꞌva‑ó kuéntáꞌ nɨꞌɨ ya̱ sáꞌá‑ó.

Santiago 4:11

Ránoꞌó ñaniꞌ jín ku̱ꞌva, koto kákuíyuꞌú rán si̱kɨ̱ꞌ ɨɨn inka rán. Chi ɨɨn ñɨvɨ ya̱ káꞌánꞌ niva̱ꞌa si̱kɨ̱ꞌ ñaniꞌ‑i, áxí sánáaꞌ‑a si̱kɨ̱ꞌ ñaniꞌ‑i, jee suni káꞌánꞌ niva̱ꞌa ñɨvɨ vá si̱kɨ̱ꞌ tu̱ꞌun ley nta̱túníꞌ Ndiosíꞌ, jee káchíꞌ‑i ya̱ ntu íyó na̱a̱ꞌ tu̱ꞌun ley vá, [chi káchíꞌ tu̱ꞌun ley vá ya̱ íyó kunu̱u̱nꞌ‑ó ñanitáꞌán‑ó]. Jee retú sáꞌá nú si̱kɨ̱ꞌ tu̱ꞌun ley, jee ntu síkúnkuvi nú ya̱ káchíꞌ tu̱ꞌun vá, chisaꞌ sáꞌá nú maánú te̱e jiéꞌnéꞌ kua̱chi.

Santiago 5:7

Saájee, ránoꞌó rá ñaniꞌ ni̱ꞌ jín rá ku̱ꞌva ni̱ꞌ, íyó káꞌnú koo iniꞌ rán ne̱ ki̱vɨ̱ꞌ niji I̱toꞌoꞌ‑ó. Kune̱ꞌyá rán, te̱e sátíñú chi̱kuꞌuꞌ nétu re̱ꞌ kene tataꞌ yɨ́yáꞌvi sáꞌá re̱ꞌ nu̱u̱nꞌ ñuꞌun, chi íyó káꞌnú iniꞌ re̱ꞌ ne̱ tiaaꞌ sa̱vi̱ꞌ xíꞌnañúꞌún jín ne̱ sa̱vi̱ꞌ nu̱u̱nꞌ nɨꞌɨ.

Santiago 5:9

Ránoꞌó ñaniꞌ jín ku̱ꞌva, koto násóyu̱ꞌú rán nu̱u̱nꞌ ɨɨn inka táꞌán rán, sáva ntu kúnáaꞌ kua̱chi si̱kɨ̱ꞌ rán. Kune̱ꞌyá rán, Ndiosíꞌ ya̱ suvire̱ꞌ vá jiéꞌnéꞌ kua̱chi yatin niji re̱ꞌ, kuéntáꞌ ya ñúneen re̱ꞌ yuvéꞌí.

1 Pedro 1:7

Sáva kototúníꞌ tu̱nóꞌó ránoꞌó sáva stúvi maá nááꞌ nijia íñɨ́ ni̱ꞌi̱nꞌ rán kúneí iniꞌ rán Cristo, kuéntáꞌ kua̱ꞌ jítotúníꞌ ñɨvɨ ka̱a kuáán oro sáá náteñuꞌunꞌ ráa maa jín ñuꞌunꞌ, sáá jítotúníꞌ ráa oro retú ya̱ váꞌa ví‑i áxí ntu̱ví, soo ya̱ kúneí iniꞌ rán Cristo yɨ́yáꞌvi víꞌí‑i ka̱ꞌ nsú káꞌ oro, ya̱ kúvi‑i nantíñú náánꞌ. Jee retú nkene na̱a̱ꞌ va̱ꞌa ya̱ kúneí iniꞌ rán, jee ni̱ꞌi̱nꞌ rán nakuetúꞌún Ndiosíꞌ ránoꞌó, jee saꞌá yɨ́ñúꞌún jín rán, jee saꞌá ñáꞌnú re̱ꞌ ránoꞌó, ki̱vɨ̱ꞌ nenta nijinꞌ tuku Cristo.

1 Pedro 5:4

Saájee sáá nenta nijinꞌ maáréꞌ ya̱ néen kuéntáꞌ re̱ꞌ yó ya̱ kúñáꞌnú re̱ꞌ nu̱u̱nꞌ nɨꞌɨ rá te̱e néen kuéntáꞌ ráa rá ñɨvɨ Ndiosíꞌ, jee ni̱ꞌi̱nꞌ rán ta̱ꞌvi̱ꞌ taji re̱ꞌ nu̱u̱nꞌ rán ya̱ viiꞌ nasɨ́kuitɨꞌ kúñáꞌnú rán ya̱ ntu náánꞌ‑a.

2 Pedro 3:12

ni nétu rán kiji ki̱vɨ̱ꞌ sanáaꞌ Ndiosíꞌ rá kua̱chi jee sukuán sáꞌá rán ya̱ ñamani kenta ki̱vɨ̱ꞌ yukuán. Jee ki̱vɨ̱ꞌ yukuán tɨɨn ñuꞌunꞌ súkún jee naanꞌ‑a, jee nta̱ká ya̱ íyó iniꞌ‑i ka̱yu̱ꞌ‑u jee ta̱nɨ̱ꞌ‑ɨ.

2 Pedro 3:4

Jee kachiꞌ ráa: “¿Né núꞌ íyó ya̱ nchi̱sóyuꞌú Cristo ya̱ nenta tuku re̱ꞌ rúja? Chi ne̱ ki̱vɨ̱ꞌ ya̱ níꞌiꞌ rá tataꞌ jííꞌ‑ó yanaꞌán jee ne̱ vitan, jee íyó i̱i̱ꞌ sáá íyó nɨꞌɨ kuitɨꞌ ne̱ sáá ña̱ko̱o ñɨ̱vɨ́ nékúvi”, kachiꞌ ráa.

Judas 1:14

Jee suni nkachiꞌ ya̱chi̱ꞌ Enoc tu̱ꞌun nkene yuꞌú maá Ndiosíꞌ ya̱ nkaꞌanꞌ‑a jie̱ꞌe̱ꞌ rá te̱e túꞌún yaꞌá. Jee ne̱ nu̱u̱nꞌ Adán nkene se̱ꞌya re̱ꞌ jee ni̱yo se̱ꞌya se̱ꞌya re̱ꞌ jee suꞌva níkɨ́nꞌ va̱ji ichinúúnꞌ nkenta u̱xa̱ꞌ táꞌ ráa ne̱ sáá nkaku Enoc. Jee nkachiꞌ Enoc: “Kune̱ꞌyá, kiji I̱toꞌoꞌ jín kue̱ꞌe̱ꞌ víꞌí mil rá najiáꞌáꞌ ííꞌ re̱ꞌ,

Apoclipsis 1:7

¡Kune̱ꞌyá rán!, chi nenta Cristo nu̱u̱nꞌ viko, jee ntáká rá ñɨvɨ kuniꞌ jín núunꞌ ráa re̱ꞌ, jee suni ne̱ rá ñɨvɨ ya̱ nkaanꞌ ráa yaviꞌ re̱ꞌ ñaꞌniꞌ ráa re̱ꞌ kuniꞌ jínúunꞌ ráa re̱ꞌ. Saájee suni ne̱ ntáká rá tataꞌ rá ñɨvɨ íyó kua̱íyó iniꞌ ñɨ̱vɨ́ yaꞌá, jee jiaku iniꞌ ráa kunaꞌyuꞌ ráa ya̱ ntu ni̱nu̱ꞌ iniꞌ ráa kaníjiá ráa re̱ꞌ. Saá nijia, sukuán koo.

Apoclipsis 20:12

Jee niniꞌ ni̱ꞌ kua̱íyó rá ni̱yɨ, va̱ni ya̱ kúñáꞌnú va̱ni ya̱ ntu kúñáꞌnú, íñɨ́ ráa ichinúúnꞌ re̱ꞌ. Jee nsa̱ꞌá re̱ꞌ ya̱ nnine rá tutuꞌ. Jee nsa̱ꞌá re̱ꞌ ya̱ nnine inka ka̱ꞌ tutuꞌ níso súví rá ñɨvɨ ya̱ kutekuꞌ ráa nɨ́ɨ́nkání jín Ndiosíꞌ. Jee nsa̱ꞌá náaꞌ re̱ꞌ jie̱ꞌe̱ꞌ rá ñɨvɨ sánikua̱ꞌ tiñu nsa̱ꞌá ráa ya̱ níso nu̱u̱nꞌ rá tutuꞌ yukuán.