1 Corintios 3:12 - Mixteco del suroeste de Tlaxiaco Oaxaca

¹² Jee rá tiñu sáꞌá néni ɨɨn ñɨvɨ kúvi kuéntáꞌ náchisó‑o no̱ꞌo nu̱u̱nꞌ jie̱ꞌe̱ꞌ ve̱ꞌí vá ya̱ nsamaꞌ Ndiosíꞌ. Jee na̱sa sátíñú ɨɨn ñɨvɨ nu̱u̱nꞌ Ndiosíꞌ kúvi kuéntáꞌ sámáꞌ‑a no̱ꞌo ya̱ kúvi ka̱a kuáán yɨ́yáꞌvi ya̱ kúvi oro, áxí ka̱a kuíjín yɨ́yáꞌvi ya̱ kúvi plata, áxí jín rá yu̱u̱ꞌ maa viiꞌ xiñúꞌ yɨ́yáꞌvi, áxí jín yutun, áxí jín iteꞌ, áxí jín nayóꞌo,

1 Corintios 3:12 ပူးပေါင်းရင်းမြစ်များ

Hechos 20:30

Jee ne̱ nteñu rán koo rá te̱e ya̱ kijiéꞌé xinéꞌénꞌ ráa tu̱ꞌun xínáꞌví nu̱u̱nꞌ Tu̱ꞌun Ndiosíꞌ nu̱u̱nꞌ rá ñɨvɨ níta ñujiínꞌ Jesús sáva tɨɨn rává tu̱ꞌun xínéꞌénꞌ ráa sáva kunikɨnꞌ rává ráa.

Romanos 16:17

Jee ránoꞌó ñanitáꞌán ni̱ꞌ, jíkánꞌ táꞌvíꞌ ni̱ꞌ ya̱ nito koo rán maárán nu̱u̱nꞌ rá ñɨvɨ ya̱ sáꞌá ráa ya̱ kusɨ́ɨ́n rá táꞌán‑ó jín xíkíninkava ráa táꞌán‑ó jín tu̱ꞌun ya̱ ntu kétáꞌán jín tu̱ꞌun ya̱ ya nku̱tu̱ꞌva rán. Jee kuiyo rán nu̱u̱nꞌ ráa.

1 Corintios 3:11

Chi Jesús ya̱ kúvi Cristo chi métúꞌún maáréꞌ ví jie̱ꞌe̱ꞌ ve̱ꞌí Ndiosíꞌ. Jee nkúvi nachisó ni ɨɨn ñɨvɨ inka ka̱ꞌ nu̱u̱nꞌ nsamaꞌ jie̱ꞌe̱ꞌ ve̱ꞌí Ndiosíꞌ, chisaꞌ Jesús kúvi métúꞌún jie̱ꞌe̱ꞌ ve̱ꞌí ya̱ ya nsamaꞌ Ndiosíꞌ, jee maáréꞌ kúvi Cristo.

1 Corintios 3:13

jee rá tiñu ya̱ nsa̱ꞌá ta ɨɨn ta ɨɨn ñɨvɨ jee kenta natu̱vi nijinꞌ‑i, chi ki̱vɨ̱ꞌ ya̱ koo juisiúꞌ ya̱ kenta keꞌneꞌ Ndiosíꞌ rá tiñu nsa̱ꞌá ñɨvɨ jee tu̱vi kájí na̱ nu̱u̱nꞌ tiñu kúvi ráa. Kototúníꞌ Ndiosíꞌ rá tiñu sáꞌá ta ɨɨn ta ɨɨn ñɨvɨ jín ñuꞌunꞌ sáva stúvi na̱ nu̱u̱nꞌ tiñu kúvi tiñu nsa̱ꞌá‑a.

2 Corintios 2:17

Soo ránuꞌuꞌ, chi ntu̱ví núkú ránꞌ táváꞌ ránꞌ xu̱ꞌún jie̱ꞌe̱ꞌ Tu̱ꞌun Ndiosíꞌ, kuéntáꞌ sáꞌá kue̱ꞌe̱ꞌ rá te̱e, [jee ntu sáma ránꞌ maa]. Chisaꞌ jíníꞌ Ndiosíꞌ ya̱ saɨn ñúꞌún iniꞌ ránꞌ káchíꞌ ránꞌ tu̱ꞌun re̱ꞌ, chi maá Ndiosíꞌ ví ya̱ nta̱jí re̱ꞌ ránuꞌuꞌ ya̱ stékútu̱ꞌún ránꞌ tu̱ꞌun re̱ꞌ. Jie̱ꞌe̱ꞌ yɨ́ꞌɨ́ ránꞌ nu̱u̱nꞌ Cristo káchíꞌ ránꞌ tu̱ꞌun re̱ꞌ.

2 Corintios 4:2

Jee jíníi̱yo ráníꞌ sáꞌá ránꞌ rá tiñu yɨ́séꞌí ya̱ kúvi tu̱ꞌun kánuun sáꞌá ñɨvɨ. Jee ni ntu̱ví jíka ránꞌ jín tiñu máñáꞌ. Jee ni ntu̱ví sáma ránꞌ sáá káꞌánꞌ Tu̱ꞌun Ndiosíꞌ. Chisaꞌ stúvi nijinꞌ ránꞌ tu̱ꞌun na̱a̱ꞌ Ndiosíꞌ, jee sukuán nákutíñú rán jie̱ꞌe̱ꞌ maáránꞌ sáva kuniꞌ nta̱ká rá ñɨvɨ ne̱ ánímaꞌ ráa ya̱ na̱a̱ꞌ íyó ránꞌ. Jee jíníꞌ maá Ndiosíꞌ ya̱ na̱a̱ꞌ íyó ránꞌ.

Colosenses 2:8

Nito koo rán maárán ya̱ ntɨ́ɨn ñɨvɨ ránoꞌó, ya̱ sijínúꞌ ráa iniꞌ rán jín tu̱ꞌun váji xi̱ni̱ꞌ maáráa, jín tu̱ꞌun ka̱ꞌá ya̱ xínáꞌví. Chi rá tu̱ꞌun yukuán kétáꞌán jín rá ñujiínꞌ va̱ji ya̱ta̱ꞌ, ya̱ kétáꞌán jín rá costumbre xínéꞌénꞌ ñɨvɨ ñɨ̱vɨ́ yaꞌá, ya̱ ntu yɨ́ꞌɨ́ ráa naꞌá Cristo. Jee ntu kétáꞌán rá tu̱ꞌun vá jín tu̱ꞌun jie̱ꞌe̱ꞌ Cristo.

1 Timoteo 6:3

Ré néni ɨɨn ñɨvɨ xínéꞌénꞌ tu̱ꞌun íyó sɨ́ɨ́n, ya̱ ntu káꞌánꞌ nuún jín tu̱ꞌun na̱a̱ꞌ I̱toꞌoꞌ‑ó Jesús ya̱ kúvi Cristo, jee ya̱ ntu íyó na̱kua̱ꞌ xínéꞌénꞌ Ndiosíꞌ jie̱ꞌe̱ꞌ ichi na̱a̱ꞌ sáni kuíni Ndiosíꞌ ya̱ kaka‑ó,

2 Timoteo 2:20

Iniꞌ ɨɨn veꞌi káꞌnú, nsáꞌ kua̱chi ko̱ꞌo̱ꞌ yɨ́yáꞌvi íyó ya̱ kúvi jín oro áxí plata, chi suni íyó nantíñú kúvi jín yutun jín ñunkíxín. Jee sava ví nantíñú ya̱ jiátíñú ñunkúún. Jee sava ví nantíñú jiátíñú niva̱ꞌa ni.

2 Timoteo 3:13

Soo rá ñɨvɨ kánéꞌén ya̱ xínáꞌví ráa ñɨvɨ saꞌ víꞌí káꞌ saꞌá ráa rá mánasɨ́ nijia ka̱ꞌ. Jee xináꞌví ráa rá ñɨvɨ, jee suni xináꞌví ñɨvɨ ráa.

2 Timoteo 3:7

Sukuáni núkú ráña kútúꞌva ráña inka tu̱ꞌun jiáá, soo ni nsáꞌ kuvi kenta kukáꞌnú iniꞌ ráña ya̱ nááꞌ.

2 Timoteo 4:3

Chi kiji tiempúꞌ ya̱ ni nsáꞌ keꞌneꞌ iniꞌ rá ñɨvɨ teso̱ꞌo ráa tu̱ꞌun na̱a̱ꞌ va̱ꞌa ya̱ xínéꞌénꞌ‑ó, chi sáni níyo iniꞌ maáráa, jee nukú ráa kue̱ꞌe̱ꞌ te̱e ya̱ xínéꞌénꞌ tu̱ꞌun sáni táꞌán iniꞌ ráa teso̱ꞌo ráa.

Hebreos 13:9

Íyó kéꞌín tu̱ꞌun xínéꞌénꞌ ñɨvɨ ya̱ ntu kúnuún jín Tu̱ꞌun Ndiosíꞌ. Jee koto jiáꞌa rán ya̱ nastúꞌva rá tu̱ꞌun vá ránoꞌó nu̱u̱nꞌ‑u. Chi íyó váꞌa ya̱ nukutú ánímaꞌ‑ó saꞌá Ndiosíꞌ chi íyó mániꞌ iniꞌ re̱ꞌ yó, nsú káꞌ jie̱ꞌe̱ꞌ tu̱ꞌun ya̱ tátúníꞌ jie̱ꞌe̱ꞌ ya̱ yájíꞌ‑ó, chi ni ntu̱náꞌ váꞌa nsa̱ꞌá tu̱ꞌun tátúníꞌ vá nu̱u̱nꞌ rá ñɨvɨ ya̱ nyɨ̱tíñú ráa nsa̱ꞌá ráa maa.

1 Pedro 1:7

Sáva kototúníꞌ tu̱nóꞌó ránoꞌó sáva stúvi maá nááꞌ nijia íñɨ́ ni̱ꞌi̱nꞌ rán kúneí iniꞌ rán Cristo, kuéntáꞌ kua̱ꞌ jítotúníꞌ ñɨvɨ ka̱a kuáán oro sáá náteñuꞌunꞌ ráa maa jín ñuꞌunꞌ, sáá jítotúníꞌ ráa oro retú ya̱ váꞌa ví‑i áxí ntu̱ví, soo ya̱ kúneí iniꞌ rán Cristo yɨ́yáꞌvi víꞌí‑i ka̱ꞌ nsú káꞌ oro, ya̱ kúvi‑i nantíñú náánꞌ. Jee retú nkene na̱a̱ꞌ va̱ꞌa ya̱ kúneí iniꞌ rán, jee ni̱ꞌi̱nꞌ rán nakuetúꞌún Ndiosíꞌ ránoꞌó, jee saꞌá yɨ́ñúꞌún jín rán, jee saꞌá ñáꞌnú re̱ꞌ ránoꞌó, ki̱vɨ̱ꞌ nenta nijinꞌ tuku Cristo.

Apoclipsis 2:14

’Soo súka̱ꞌ sukuán íyó soo íyó yakuꞌ kua̱chi si̱kɨ̱ꞌ rán nu̱u̱nꞌ ni̱ꞌ. Chi nteñu ránoꞌó íyó sava rá ñɨvɨ ya̱ jínúꞌ iniꞌ ráa níkɨ́nꞌ ráa tu̱ꞌun ya̱ nxi̱néꞌénꞌ Balaam. Chi ne̱ tiempúꞌ yanaꞌán jee suvire̱ꞌ nxi̱néꞌénꞌ re̱ꞌ Balac na̱ja saꞌá máñáꞌ‑a sáva sikívɨ‑ɨ rá ñɨvɨ Israel nu̱u̱nꞌ kua̱chi, ya̱ kajiꞌ ráa rá nantíñú nso̱ko̱ꞌ nu̱u̱nꞌ rá santúꞌ ñunéꞌyúꞌ, jín ya̱ jiáꞌnu ráa jín tiñu téní.

Apoclipsis 21:18

Jee rá nantíñú ya̱ nkuvi nu̱u̱nꞌ nsamaꞌ ti̱yu̱ꞌ yuꞌú ñuunꞌ vá, ví máá ninuꞌun máá yu̱u̱ꞌ kuíjín xiñúꞌ naní jaspe. Jee máá maá ñuunꞌ vá ví máá ninuꞌun oro, jee túvi ñuunꞌ vá kuéntáꞌ túvi vidrio ya̱ túvi nɨꞌɨ iniꞌ‑i néꞌyá‑ó.

Apoclipsis 3:18

Saáva nákutíñú ni̱ꞌ nu̱u̱nꞌ rán ya̱ kunenu̱u̱nꞌ rán ya̱ yɨ́yáꞌvi ka̱ꞌ ya̱ va̱ji nu̱u̱nꞌ ni̱ꞌ kuéntáꞌ keꞌen rán ka̱a oro ya̱ ya nna̱ka̱yu̱ꞌ nu̱u̱nꞌ ñúꞌúnꞌ sáva saꞌá ninuꞌun maa, sáva kukúká nijia rán nu̱u̱nꞌ nuꞌuꞌ. Jee nunasɨ́ rán koo ninuꞌun rán nu̱u̱nꞌ ni̱ꞌ kuéntáꞌ keꞌen rán nu̱u̱nꞌ ni̱ꞌ saꞌma kuíjín sáva ntu koo tu̱nkánuun rán jie̱ꞌe̱ꞌ íyó ñɨɨn rán nu̱u̱nꞌ nuꞌuꞌ. Jee tɨɨn rán tu̱ꞌun ni̱ꞌ kuéntáꞌ keꞌen rán nu̱u̱nꞌ ni̱ꞌ ta̱ta̱nꞌ chuꞌun rán nchinúún rán sáva nu̱nijínꞌ nu̱u̱nꞌ rán.