1 Corintios 15:2 - Mixteco del suroeste de Tlaxiaco Oaxaca

² Jee suni jín tu̱ꞌun váꞌa vá ví ya̱ natavaꞌ re̱ꞌ ránoꞌó nu̱u̱nꞌ kua̱chi rán síkáku re̱ꞌ ránoꞌó, retú íñɨ́ ni̱ꞌin rán níkɨ́nꞌ rán tu̱ꞌun vá ya̱ nstékútu̱ꞌún ni̱ꞌ nu̱u̱nꞌ rán jee ni̱nu̱ꞌ iniꞌ rán ntɨɨn rán maa, soo retú ntu̱ví, jee kua̱chi ni̱nu̱ꞌ ka̱ꞌá iniꞌ rán maa.

1 Corintios 15:2 ပူးပေါင်းရင်းမြစ်များ

Lucas 8:13

Jee rá nikɨn ya̱ ñákava ráa nu̱u̱nꞌ yúúꞌ kúvi ráa rá ñɨvɨ ya̱ sáá tésóꞌo ráa Tu̱ꞌun Ndiosíꞌ jee ne̱ kúsɨ́ɨꞌ iniꞌ ráa tɨ́ɨn ráa maa, soo ntu kúun yoꞌo tu̱ꞌun vá iniꞌ ánímaꞌ ráa chi ntu kúkutú ráa ntu kúníꞌin ráa jín‑i, chi yakuꞌ ni tiempúꞌ jínúꞌ iniꞌ ráa maa. Chi sáá kenta táꞌán ráa tu̱nóꞌó, jee níkóyátá iniꞌ ráa nu̱u̱nꞌ tu̱ꞌun vá.

Hechos 2:47

Jee nákuetúꞌún ráa Ndiosíꞌ. Jee káꞌvi va̱ꞌa iniꞌ rá ñɨvɨ néꞌyá rává ráa. Jee ta ki̱vɨ̱ꞌ, násaꞌá kue̱ꞌe̱ꞌ ka̱ꞌ I̱toꞌoꞌ‑ó rá ñɨvɨ ya̱ natavaꞌ Ndiosíꞌ ráa nu̱u̱nꞌ kua̱chi ráa nánitáꞌvíꞌ ráa ya̱ nákɨ́ꞌɨ ráa nu̱u̱nꞌ rá ñɨvɨ kúneí iniꞌ ráa Jesús.

Hechos 8:13

Jee suni ne̱ maá Simón ni̱nu̱ꞌ iniꞌ re̱ꞌ jee ña̱nuté re̱ꞌ. Saájee nku̱táꞌán re̱ꞌ jín Felipe. Jee sáá niniꞌ re̱ꞌ rá seña jín rá a̱nasɨ́ sáꞌá Felipe, ya̱ stúvi‑i ya̱ njia̱ꞌa Ndiosíꞌ tu̱ꞌun vá, jee nti̱vɨ́ xíniꞌ re̱ꞌ.

Romanos 1:16

Chi ntu̱ví kúkanuun ni̱ꞌ jie̱ꞌe̱ꞌ tu̱ꞌun váꞌa Jesús, chi kúvi tu̱ꞌun vá fuersáꞌ ííꞌ Ndiosíꞌ sáva nátavaꞌ re̱ꞌ ntáká ñɨvɨ ya̱ kúneí iniꞌ ráa tu̱ꞌun vá nu̱u̱nꞌ kua̱chi ráa xinánitáꞌvíꞌ re̱ꞌ ráa, xíꞌnañúꞌún rá ñɨvɨ Israel jee suni rá ñɨvɨ ntu kúvi Israel.

Romanos 11:22

Saáva tɨɨn kuéntáꞌ rán na̱sa kúváꞌa iniꞌ Ndiosíꞌ jín ya̱ xichiꞌ re̱ꞌ. Nu̱u̱nꞌ ráa ya̱ nkininkava ráa ntu nku̱neí iniꞌ ráa Cristo jee xichiꞌ re̱ꞌ ráa. Soo kúváꞌa iniꞌ re̱ꞌ néꞌyá re̱ꞌ noꞌó, retú kino̱o ni̱ꞌin nú nu̱u̱nꞌ ya̱ kúváꞌa iniꞌ re̱ꞌ néꞌyá re̱ꞌ noꞌó jie̱ꞌe̱ꞌ kúneí iniꞌ nú Cristo. Chi retú ntu̱ví, jee suni ne̱ maánú naneeꞌ.

1 Corintios 1:18

Chi nu̱u̱nꞌ rá ñɨvɨ ya̱ xináánꞌ Ndiosíꞌ ráa jee tu̱ꞌun jie̱ꞌe̱ꞌ ya̱ níꞌiꞌ Cristo nu̱u̱nꞌ kurúsiꞌ kúvi tu̱ꞌun sáná xíniꞌ nu̱u̱nꞌ ráa, soo nu̱u̱nꞌ maáó ya̱ nátavaꞌ Cristo yó nu̱u̱nꞌ kua̱chi‑ó xinánitáꞌvíꞌ re̱ꞌ yó jee tu̱ꞌun vá kúvi fuersáꞌ níꞌin ííꞌ re̱ꞌ nu̱u̱nꞌ‑ó.

1 Corintios 1:21

Chi níchí nasɨ́kuitɨꞌ sáꞌá Ndiosíꞌ, chi nsú ya̱ níchí ñúꞌún xi̱ni̱ꞌ rá ñɨvɨ ñɨ̱vɨ́ sáꞌá ya̱ kuniꞌ ráa iniꞌ Ndiosíꞌ, chisaꞌ nkuva̱ꞌa iniꞌ Ndiosíꞌ ya̱ jiátíñú re̱ꞌ tu̱ꞌun váꞌa re̱ꞌ sáva natavaꞌ re̱ꞌ rá ñɨvɨ nu̱u̱nꞌ kua̱chi ráa sikáku re̱ꞌ ráa ya̱ kúneí iniꞌ ráa ínúꞌ iniꞌ ráa re̱ꞌ, asúꞌ jiáni iniꞌ rá ñɨvɨ ñɨ̱vɨ́ ya̱ tu̱ꞌun naanꞌ ví tu̱ꞌun re̱ꞌ ya̱ tékútu̱ꞌún nu̱u̱nꞌ ráa.

1 Corintios 11:2

Nákuetúꞌún ni̱ꞌ ránoꞌó [rá ñaniꞌ jín ku̱ꞌva], chi níní sukuáni nákúꞌun iniꞌ rán nuꞌuꞌ, jee kuiñɨ kutú rán jín Tu̱ꞌun Ndiosíꞌ sánikua̱ꞌ nxi̱néꞌénꞌ ni̱ꞌ ránoꞌó.

1 Corintios 15:14

Jee retánꞌ ntu̱ví nna̱tekuꞌ i̱i̱ꞌ Cristo, saájee kua̱chi káchítu̱ꞌún ka̱ꞌá ráníꞌ tu̱ꞌun vá nékúvi retánꞌ sukuán, jee suni kúneí ka̱ꞌá iniꞌ rán Cristo nékúvi.

2 Corintios 2:15

Chi kúvi ránꞌ kuéntáꞌ xikoꞌ su̱jie ya̱ sókóꞌ Cristo nu̱u̱nꞌ Ndiosíꞌ, jee sukuán kúvi ránꞌ sáá stékútu̱ꞌún ránꞌ tu̱ꞌun re̱ꞌ nteñu rá ñɨvɨ ya̱ nátavaꞌ Jesús ráa nu̱u̱nꞌ kua̱chi ráa síkáku re̱ꞌ ráa, jín nteñu rá ñɨvɨ ya̱ síjíta Ndiosíꞌ ráa, ya̱ kuéntáꞌ níꞌiꞌ ráa nu̱u̱nꞌ re̱ꞌ.

2 Corintios 6:1

Jee saáva ránuꞌuꞌ, táꞌán sátíñú kúvi ránꞌ jín Ndiosíꞌ, jee jíkánꞌ táꞌvíꞌ ránꞌ nu̱u̱nꞌ ránoꞌó ya̱ koto níꞌínꞌ ka̱ꞌá rán ya̱ ma̱ni̱ꞌ iniꞌ Ndiosíꞌ néꞌyá re̱ꞌ ránoꞌó.

Gálatas 3:4

Nxi̱nóꞌo ñɨvɨ ránoꞌó kue̱ꞌe̱ꞌ tu̱nóꞌó jie̱ꞌe̱ꞌ tu̱ꞌun váꞌa Jesús. ¿Á nnoꞌo ka̱ꞌá rán, rúsa? ¡Va̱ꞌa ka̱ꞌ retú ntu nnóꞌo ka̱ꞌá rán!

Efesios 2:8

Chi jie̱ꞌe̱ꞌ ya̱ íyó mániꞌ iniꞌ Ndiosíꞌ néꞌyá re̱ꞌ ránoꞌó jee nna̱tavaꞌ re̱ꞌ ránoꞌó nu̱u̱nꞌ kua̱chi rán nsi̱káku re̱ꞌ ránoꞌó jie̱ꞌe̱ꞌ ya̱ kúneí iniꞌ rán Cristo, sú ntu íyó ni̱ꞌi̱nꞌ rán maa. Soo nsú ránoꞌó sáꞌá maa, chisaꞌ kúvi‑i ta̱ꞌvi̱ꞌ nsi̱kútaꞌviꞌ Ndiosíꞌ nu̱u̱nꞌ rán.

Colosenses 1:23

Jee sukuán sáꞌá re̱ꞌ, nu̱u̱nꞌ na̱a̱ꞌ nijia ya̱ kúníꞌin rán kúkutú rán kúneí iniꞌ rán Cristo, jee íñɨ́ ni̱ꞌin rán. Jee ntu núsɨ́ɨ́n rán nu̱u̱nꞌ ya̱ íyó tu̱ꞌun neí iniꞌ‑ó ya̱ nanitáꞌvíꞌ‑ó, ya̱ táji tu̱ꞌun váꞌa jie̱ꞌe̱ꞌ Cristo nu̱u̱nꞌ‑ó, ya̱ nteso̱ꞌo rán. Chi tu̱ꞌun váꞌa yaꞌá tékútu̱ꞌún‑u kua̱íyó rá ñuunꞌ ñɨ̱vɨ́ yaꞌá. Jee nuꞌuꞌ Pablo nkenta kúvi ni̱ꞌ ɨɨn ya̱ jiátíñú Ndiosíꞌ nuꞌuꞌ stékútu̱ꞌún ni̱ꞌ tu̱ꞌun váꞌa vá.

2 Tesalonicenses 2:15

Saáva, ránoꞌó ñanitáꞌán, kuiñɨ ni̱ꞌin rán jín tu̱ꞌun nxi̱néꞌénꞌ ránꞌ ránoꞌó, jee tɨɨn ni̱ꞌin rán maa, va̱ni tu̱ꞌun yuꞌú ránꞌ nkachiꞌ ránꞌ nu̱u̱nꞌ ránoꞌó áxí va̱ni ntee ránꞌ maa nu̱u̱nꞌ tutuꞌ nta̱jí ránꞌ nu̱u̱nꞌ ránoꞌó.

2 Timoteo 1:9

Chi Ndiosíꞌ nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó, jee nkana re̱ꞌ yó sáva sasɨ́ɨ́n re̱ꞌ yó ya̱ kuvi‑ó ñɨvɨ re̱ꞌ ya̱ kɨtíñú‑ó nu̱u̱nꞌ re̱ꞌ. Nsáꞌá re̱ꞌ suꞌva jín yó nsú jie̱ꞌe̱ꞌ ya̱ váꞌa nsa̱ꞌá‑ó. Soo nsi̱káku re̱ꞌ yó, chi saá nkuini re̱ꞌ, chi suni íyó mániꞌ iniꞌ re̱ꞌ néꞌyá re̱ꞌ yó, ya̱ ntu íyó ni̱ꞌi̱nꞌ‑ó maa. Jee ne̱ sáá ntiáꞌan kijiéꞌé kiko̱o ñɨ̱vɨ́ íyó mániꞌ iniꞌ re̱ꞌ néꞌyá re̱ꞌ yó ya̱ yɨ́ꞌɨ́‑ó nu̱u̱nꞌ Cristo Jesús.

Hebreos 10:23

Jee saáva kuiñɨ ni̱ꞌin‑ó jín tu̱ꞌun váꞌa ya̱ jiáꞌayuꞌú‑ó ya̱ íyó tu̱neí iniꞌ‑ó kúnáaꞌ iniꞌ‑ó ya̱ ki̱vɨ‑ó nu̱u̱nꞌ nééꞌ Ndiosíꞌ. Jee koto ɨɨn u̱vi̱ꞌ jiáni iniꞌ‑ó, chi Ndiosíꞌ nchi̱sóyuꞌú re̱ꞌ maa nu̱u̱nꞌ‑ó, jee síkúnkuvi na̱a̱ꞌ nijia re̱ꞌ ya̱ káchíꞌ re̱ꞌ.

Hebreos 2:1

Jee saáva, íyó kunenu̱u̱nꞌ‑ó saꞌ víꞌí káꞌ tu̱ꞌun Se̱ꞌya re̱ꞌ ya̱ nteso̱ꞌo‑ó, sáva ntu nusɨ́ɨ́n‑ó nu̱u̱nꞌ tu̱ꞌun vá.

Hebreos 3:14

Chi ni̱yo tu̱neí iniꞌ‑ó ne̱ tiempúꞌ xíꞌnañúꞌún ya̱ káchíꞌ tu̱ꞌun na̱a̱ꞌ. Jee retú koo kutú tu̱neí iniꞌ‑ó sukuán ne̱kua̱ꞌ kenta nu̱u̱nꞌ nɨ́ꞌɨ tékúꞌ‑ó, jee sukuán kenta‑ó kuneeꞌ nkáꞌnú‑ó jín Cristo.

Hebreos 3:6

Soo Cristo, kúvi re̱ꞌ Se̱ꞌya Ndiosíꞌ, jee síkúnkuvi na̱a̱ꞌ re̱ꞌ ntáká tiñu ya̱ yósóꞌ re̱ꞌ nu̱u̱nꞌ rá ñɨvɨ veꞌi Ndiosíꞌ, ya̱ suvi kúvi maáórán, retú íñɨ́ ni̱ꞌin‑ó níkɨ́nꞌ kutú‑ó kúneí iniꞌ‑ó re̱ꞌ ne̱ kenta nu̱u̱nꞌ nɨ́ꞌɨ tékúꞌ‑ó, jín ya̱ kúsɨ́ɨꞌ víꞌí iniꞌ‑ó jie̱ꞌe̱ꞌ ya̱ íyó tu̱neí iniꞌ‑ó ya̱ kuneeꞌ‑ó jín Ndiosíꞌ.

Hebreos 4:14

Íyó jín‑ó ɨɨn su̱tu̱ꞌ kúñáꞌnú ka̱ꞌ ya̱ nnaa re̱ꞌ súkún nu̱u̱nꞌ nééꞌ Ndiosíꞌ. Jesús ví su̱tu̱ꞌ vá, ya̱ kúvi re̱ꞌ Se̱ꞌya Ndiosíꞌ. Saáva íyó kuiñɨ ni̱ꞌin‑ó jín tu̱ꞌun njia̱ꞌayuꞌú‑ó ya̱ jínúꞌ iniꞌ‑ó.

Santiago 2:14

Ránoꞌó ñaniꞌ ni̱ꞌ jín ku̱ꞌva ni̱ꞌ, ¿na̱ nu̱u̱nꞌ vá íyótiñu, retú ɨɨn ñɨvɨ káchíꞌ ya̱ kúneí iniꞌ‑i Jesús, jee retú ntu sáꞌá‑a tiñu váꞌa rúja? Retú suꞌva kúneí iniꞌ ñɨvɨ vá, ¿á kúvi natavaꞌ‑a ñɨvɨ vá nu̱u̱nꞌ kua̱chi ñɨvɨ vá sikáku‑u ñɨvɨ vá résa?

Santiago 2:17

Jee sukuán jee, retú káchíꞌ ñɨvɨ ya̱ kúneí iniꞌ ráa Jesús, jee suni retú ntu sáꞌá‑a tiñu váꞌa, saájee kuéntáꞌ níꞌiꞌ ya̱ kua̱chi kúneí iniꞌ‑i, chi ntu tékúꞌ ya̱ ínúꞌ iniꞌ‑i.

Santiago 2:26

Chi ni̱yɨ ví ñunéꞌyúꞌ‑ó retú ni nsú jín ta̱chi̱ꞌ káꞌánꞌ‑ó, jee suni suꞌva kuéntáꞌ níꞌiꞌ ya̱ ínúꞌ iniꞌ‑ó Ndiosíꞌ retú ni nsú jín tiñu váꞌa sáꞌá‑ó.