1 Corintios 1:30 - Mixteco del suroeste de Tlaxiaco Oaxaca

³⁰ Soo maá Ndiosíꞌ chi nsa̱ꞌá re̱ꞌ ya̱ kɨꞌɨ rán xi̱ntíín Cristo Jesús, jee ne̱ nu̱u̱nꞌ Jesús va̱ji tu̱ꞌun níchí tánɨ́ꞌ xi̱ni̱ꞌ táji Ndiosíꞌ nu̱u̱nꞌ‑ó, jee nsa̱ꞌá re̱ꞌ ya̱ kínóo na̱a̱ꞌ‑ó nu̱u̱nꞌ Ndiosíꞌ, jee nsa̱ꞌá sɨ́ɨ́n re̱ꞌ yó sáva kɨꞌɨ‑ó nu̱u̱nꞌ Ndiosíꞌ, jee nna̱kani núne re̱ꞌ yó nu̱u̱nꞌ kua̱chi ya̱ nkɨ́ꞌɨ‑ó ka̱ꞌ xi̱ntíín kua̱chi.

1 Corintios 1:30 ပူးပေါင်းရင်းမြစ်များ

Mateo 1:21

Jee staꞌvíꞌ ña ɨɨn su̱chí yɨ́ɨ́, jee sikúnání nú maa Jesús. Chi maáréꞌ natavaꞌ re̱ꞌ rá ñɨvɨ re̱ꞌ nu̱u̱nꞌ kua̱chi ráa sikáku re̱ꞌ ráa ―nkachiꞌ najiáꞌáꞌ ííꞌ vá.

Lucas 11:49

Jee saáva tu̱ꞌun níchí káchíꞌ Ndiosíꞌ: “Chuichí ni̱ꞌ rá te̱e ni̱ꞌ nakani tu̱ꞌun kene yuꞌú maá maáníꞌ nu̱u̱nꞌ ráa jín rá najiáꞌáꞌ ni̱ꞌ ya̱ kúvi apóstol ni̱ꞌ nu̱u̱nꞌ ráa. Jee sava rá te̱e vá kaꞌniꞌ rá ñɨvɨ ráréꞌ, jee sava ka̱ꞌ rá te̱e vá kuniꞌ u̱ꞌvi̱ꞌ rá ñɨvɨ ráréꞌ, káchíꞌ Ndiosíꞌ.”

Lucas 21:15

Chi nuꞌuꞌ taji ni̱ꞌ tu̱ꞌun níchí ki̱vɨ antúníꞌ rán na̱ja kaꞌanꞌ rán naxiníkó rán nu̱u̱nꞌ ráa, sáva ni ɨɨn rá ñɨvɨ ya̱ kénta ráa si̱kɨ̱ꞌ ránó ni nsáꞌ kuneí ráa jín rán ni ntu̱náꞌ íyó nakachiꞌ ráa si̱kɨ̱ꞌ tu̱ꞌun kachiꞌ rán.

Juan 1:18

Ndiosíꞌ chi ni ɨɨn ñɨvɨ ntu̱ví jíníꞌ nijinꞌ maa na̱sa íyó re̱ꞌ, chi métúꞌún ni Se̱ꞌya re̱ꞌ ya̱ kúvi Ndiosíꞌ ya̱ nééꞌ‑e jín re̱ꞌ jíníꞌ na̱sa íyó re̱ꞌ, jee suvi‑i vá nstúvi‑i na̱sa iniꞌ re̱ꞌ.

Juan 14:6

Jee nkachiꞌ Jesús nu̱u̱nꞌ‑u: ―Nuꞌuꞌ kúvi ni̱ꞌ ichi ya̱ nátuꞌva ñɨvɨ nu̱u̱nꞌ Ndiosíꞌ, jín nu̱u̱nꞌ nuꞌuꞌ va̱ji ya̱ naáꞌ, jín maáníꞌ ví ya̱ sáꞌá‑a ya̱ kutekuꞌ ñɨvɨ jín Ndiosíꞌ nɨ́ɨ́nkání. Ntu íyó inka ka̱ꞌ ichi ya̱ kenta ñɨvɨ nu̱u̱nꞌ Tátáꞌ ni̱ꞌ Ndiosíꞌ, chi métúꞌún nuꞌuꞌ ví‑i ya̱ sáꞌá ya̱ nkénta ñɨvɨ nu̱u̱nꞌ Ndiosíꞌ.

Juan 17:26

Ni̱stúvi ni̱ꞌ noꞌó nu̱u̱nꞌ ráa jee istúvi ni̱ꞌ ka̱ꞌ noꞌó, sáva kuéntáꞌ kua̱ꞌ ñúnúunꞌ nú nuꞌuꞌ, jee suni sukuán kunu̱u̱nꞌ ráa rá táꞌán ráa, jee kɨꞌɨ ni̱ꞌ iniꞌ ráa ―nkachiꞌ Jesús.

Juan 17:8

Chi ntáká rá tu̱ꞌun ya̱ ntaji nú nu̱u̱nꞌ ni̱ꞌ, jee njia̱ꞌa ni̱ꞌ maa nu̱u̱nꞌ ráa. Jee ntɨɨn ráa ñúꞌún iniꞌ ráa maa, chi nku̱káꞌnú iniꞌ ráa ya̱ máá naáꞌ nijia kúvi ya̱ ne̱ nu̱u̱nꞌ maánú nkene ni̱ꞌ va̱ji ni̱ꞌ, jee suni ni̱nu̱ꞌ iniꞌ ráa ya̱ maánú nchu̱ichí nú nuꞌuꞌ va̱ji ni̱ꞌ jín tiñu sáꞌá ni̱ꞌ.

Juan 8:12

Jee tukuni nkaꞌanꞌ Jesús jín rá ñɨvɨ, jee nkachiꞌ re̱ꞌ nu̱u̱nꞌ ráa: ―Nuꞌuꞌ ñuꞌunꞌ kúvi ni̱ꞌ nu̱u̱nꞌ rá ñɨvɨ ñɨ̱vɨ́ ya̱ stúúnꞌ ni̱ꞌ iniꞌ ánímaꞌ ráa, jee ɨɨn ñɨvɨ ya̱ níkɨ́nꞌ‑ɨ nuꞌuꞌ ntu̱né kaka‑a ñujiínꞌ nu̱u̱nꞌ neenꞌ, chisaꞌ kuꞌun ñuꞌunꞌ ya̱ stúúnꞌ ni̱ꞌ iniꞌ ánímaꞌ ñɨvɨ vá ya̱ sáꞌá‑a ya̱ kutekuꞌ ñɨvɨ nɨ́ɨ́nkání jín Ndiosíꞌ ―nkachiꞌ Jesús.

Hechos 26:18

sava sine nú rá nchinúún ráa sáva kɨ̱ku̱ꞌun iniꞌ ráa Tu̱ꞌun Ndiosíꞌ. Jee sáva kene ráa nu̱u̱nꞌ neenꞌ, jee nakui̱ñɨ̱ꞌ ráa nu̱u̱nꞌ túúnꞌ ñuꞌunꞌ. Jee kene ráa naꞌá ta̱chi̱ꞌ kini kúñáꞌnú kúvi Satanás, jee ki̱vɨ ráa naꞌá Ndiosíꞌ. Sáva ni̱ꞌi̱nꞌ ráa ya̱ kunekáꞌnú iniꞌ Ndiosíꞌ jie̱ꞌe̱ꞌ kua̱chi ráa, jín sáva ni̱ꞌi̱nꞌ ráa ta̱ꞌvi̱ꞌ nteñu rá ñɨvɨ ya̱ nsa̱ꞌá sɨ́ɨ́n re̱ꞌ ráa sáva kuvi ráa ñɨvɨ re̱ꞌ, chi kúneí iniꞌ ráa nuꞌuꞌ.”

Romanos 1:17

Chi tu̱ꞌun váꞌa Jesús stúvi ya̱ sííyo Ndiosíꞌ kua̱chi‑ó sáva kino̱o na̱a̱ꞌ‑ó nu̱u̱nꞌ re̱ꞌ, jie̱ꞌe̱ꞌ kúneí iniꞌ‑ó Jesús jee kua̱chi kuitɨꞌ jie̱ꞌe̱ꞌ ya̱ kúneí iniꞌ‑ó ví‑i, sáni káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ: “Rá ñɨvɨ ya̱ sáꞌá Ndiosíꞌ ya̱ nkino̱o na̱a̱ꞌ‑a nu̱u̱nꞌ re̱ꞌ, jie̱ꞌe̱ꞌ kúneí iniꞌ ráa re̱ꞌ, jee kutekuꞌ‑u nɨ́ɨ́nkání jín re̱ꞌ.”

Romanos 11:36

Chi nsa̱ꞌá Ndiosíꞌ nɨꞌɨ ya̱ íyó, jee néen kuéntáꞌ re̱ꞌ nɨꞌɨ, jee suni nsa̱ꞌá re̱ꞌ nɨꞌɨ sáva kuvi maáréꞌ maa. ¡Na̱ ka̱ꞌ nakuetúꞌún‑ó ya̱ viiꞌ kúñáꞌnú nasɨ́kuitɨꞌ re̱ꞌ nɨ́ɨ́nkání! Suꞌva koo, amén.

Romanos 12:5

Jee suni sukuán súnika̱ꞌ kue̱ꞌe̱ꞌ‑ó íyó, soo kuéntáꞌ ɨɨn yɨkɨkúñu kúvi‑ó ya̱ yɨ́ꞌɨ́‑ó nu̱u̱nꞌ Cristo, jee ta ɨɨn‑ó yɨ́ꞌɨ́‑ó nu̱u̱nꞌ ɨɨn inka‑ó.

Romanos 16:11

Jee ku̱ꞌva rán xá nu̱u̱nꞌ Herodión tu̱ꞌun jíkátu̱ꞌún ni̱ꞌ jie̱ꞌe̱ꞌ re̱ꞌ, ya̱ kúvi te̱e táꞌán ñɨvɨ ñuunꞌ ni̱ꞌ. Jee ku̱ꞌva rán xá tu̱ꞌun jíkátu̱ꞌún nu̱u̱nꞌ rá ñɨvɨ táꞌán veꞌi Narciso, ya̱ yɨ́ꞌɨ́ ráa nu̱u̱nꞌ I̱toꞌoꞌ‑ó.

Romanos 16:7

Jee ku̱ꞌva rán xá tu̱ꞌun káva̱ꞌa nu̱u̱nꞌ Andrónico jín Junias ya̱ jíkátu̱ꞌún ni̱ꞌ jie̱ꞌe̱ꞌ ráa, ya̱ kúvi ráa táꞌán ñɨvɨ ñuunꞌ ni̱ꞌ, jín rá táꞌán nyɨ̱ꞌɨ jín ni̱ꞌ iniꞌ veka̱a ví ráa. Jee níꞌínꞌ ráa ya̱ nákuetúꞌún rá te̱e kúvi apóstol ráa. Jee suviráa xíꞌna ráa ka̱ꞌ nki̱vɨ ráa nu̱u̱nꞌ Cristo nsú káꞌ nuꞌuꞌ.

Romanos 4:25

Ya̱ nna̱ku̱ꞌva Ndiosíꞌ maa sáva kuviꞌ‑i jie̱ꞌe̱ꞌ kua̱chi‑ó jee nna̱tekuꞌ i̱i̱ꞌ‑i sáva siíyo Ndiosíꞌ kua̱chi‑ó sáva saꞌá re̱ꞌ ya̱ kino̱o na̱a̱ꞌ‑ó nu̱u̱nꞌ re̱ꞌ.

Romanos 4:6

Jee suni sukuán káchíꞌ David ya̱ netuꞌ kúvi ñɨvɨ ya̱ kúnáaꞌ iniꞌ Ndiosíꞌ ya̱ kínóo na̱a̱ꞌ‑a nu̱u̱nꞌ re̱ꞌ jee nsú jie̱ꞌe̱ꞌ tiñu váꞌa sáꞌá ñɨvɨ vá:

Romanos 5:19

Chi jie̱ꞌe̱ꞌ ya̱ ntu nka̱níjiá métúꞌún ni te̱e nkenta nu̱u̱nꞌ rá kue̱ꞌe̱ꞌ ñɨvɨ ya̱ kúvi ráa ñɨvɨ kua̱chi, jee suni sukuán jie̱ꞌe̱ꞌ ya̱ nka̱níjiá métúꞌún ni te̱e jee kue̱ꞌe̱ꞌ ñɨvɨ kenta kuvi ráa ñɨvɨ na̱a̱ꞌ.

Romanos 5:21

Sáva kuéntáꞌ kua̱ꞌ nku̱neí kua̱chi si̱kɨ̱ꞌ ñɨvɨ ya̱ yɨ́ꞌɨ́ ráa xi̱ntíín kua̱chi jee sáꞌá‑a ya̱ jíꞌíꞌ ñɨvɨ, jee suni sukuán nku̱neí ya̱ íyó mániꞌ iniꞌ Ndiosíꞌ néꞌyá re̱ꞌ yó yɨ́ꞌɨ́‑ó xi̱ntíín re̱ꞌ, chi nsa̱ꞌá re̱ꞌ ya̱ kino̱o na̱a̱ꞌ‑ó nu̱u̱nꞌ re̱ꞌ. Jee nsa̱ꞌá re̱ꞌ sukuán sáva ni̱ꞌi̱nꞌ‑ó ya̱ kutekuꞌ‑ó jín re̱ꞌ nɨ́ɨ́nkání jie̱ꞌe̱ꞌ ya̱ nsáꞌá I̱toꞌoꞌ‑ó Jesús ya̱ kúvi Cristo.

Romanos 8:1

Saájee vitan jee ni ntu̱náꞌ íyó ya̱ sijíta Ndiosíꞌ xinóꞌo re̱ꞌ rá ñɨvɨ ya̱ yɨ́ꞌɨ́ ráa nu̱u̱nꞌ Cristo Jesús, [ya̱ ntu jiáꞌnu ráa ka̱ꞌ sáni níyo néꞌén iniꞌ ráa jín yɨkɨkúñu ráa, chisaꞌ jiáꞌnu ráa sáni kuíni Ta̱chi̱ꞌ Ííꞌ Ndiosíꞌ].

Romanos 8:23

Soo nsáꞌ kua̱chi ñɨ̱vɨ́ yaꞌá nóꞌo sukuán, chisaꞌ suni máá maáórán ranika̱ꞌ nóꞌo‑órán sukuán. Yɨ́ꞌɨ́ Ta̱chi̱ꞌ Ííꞌ iniꞌ‑ó jee kúvi re̱ꞌ ya̱ xíꞌnañúꞌún nu̱u̱nꞌ saꞌ víꞌí káꞌ ni̱ꞌi̱nꞌ‑ó. Saáva suni tána kuéká‑ó iniꞌ maáó chi nétu numíjiꞌíꞌ‑ó ya̱ saꞌá Ndiosíꞌ nɨꞌɨ jie̱ꞌe̱ꞌ nna̱keꞌen Ndiosíꞌ yó kuvi‑ó se̱ꞌya re̱ꞌ, chi nakani núne re̱ꞌ yɨkɨkúñu‑ó sáva ntívɨ́‑ɨ ka̱ꞌ jee nasaꞌá jiáá re̱ꞌ maa.

Romanos 8:9

Soo ránoꞌó chi ntu̱ví ka̱ꞌ yɨ́ꞌɨ́ rán xi̱ntíín sáni kuíni rán saꞌá rán, chisaꞌ yɨ́ꞌɨ́ rán xi̱ntíín Ta̱chi̱ꞌ Ííꞌ Ndiosíꞌ, chi Ta̱chi̱ꞌ Ííꞌ Ndiosíꞌ yɨ́ꞌɨ́ re̱ꞌ iniꞌ rán. Soo retú néni ɨɨn ñɨvɨ ya̱ ntu yɨ́ꞌɨ́ Ta̱chi̱ꞌ Ííꞌ Cristo iniꞌ ráa jee ntu kúvi ráa ñɨvɨ Cristo.

1 Corintios 1:2

tájí ráníꞌ tutuꞌ yaꞌá ya̱ tée ni̱ꞌ nu̱u̱nꞌ ránoꞌó ñɨvɨ kúneí iniꞌ rán Jesús ya̱ yɨ́ꞌɨ́ rán naꞌá Ndiosíꞌ, ya̱ nééꞌ rán nu̱u̱nꞌ ñuunꞌ Corinto. Nsa̱ꞌá sɨ́ɨ́n Ndiosíꞌ ránoꞌó kɨꞌɨ rán nu̱u̱nꞌ Cristo Jesús. Nkana re̱ꞌ ránoꞌó sáva koo sɨ́ɨ́n rán ya̱ nkɨ́ꞌɨ rán ka̱ꞌ nu̱u̱nꞌ kua̱chi rán jee kɨꞌɨ rán naꞌá Cristo Jesús, sánikua̱ꞌ nsa̱ꞌá re̱ꞌ jín ntáká rá ñɨvɨ nééꞌ nta̱ká nu̱u̱nꞌ ya̱ kákua̱chi ráa nu̱u̱nꞌ I̱toꞌoꞌ‑ó Jesús ya̱ níso re̱ꞌ tiñu ya̱ kúvi re̱ꞌ Cristo. Kúvi re̱ꞌ I̱toꞌoꞌ ráa jín I̱toꞌoꞌ‑ó.

1 Corintios 1:24

Soo ntáká rá ñɨvɨ ya̱ nkana Ndiosíꞌ kɨꞌɨ ráa naꞌá re̱ꞌ jee ínúꞌ iniꞌ ráa Cristo, va̱ni kúvi ráa ñɨvɨ ñuunꞌ Israel, áxí va̱ni ñɨvɨ ntu kúvi ñuunꞌ Israel, jee nu̱u̱nꞌ ráa tu̱ꞌun jie̱ꞌe̱ꞌ Cristo kúvi‑i fuersáꞌ ííꞌ níꞌin níso Ndiosíꞌ ya̱ sátíñú re̱ꞌ jín‑i jín tu̱ꞌun níchí re̱ꞌ.

1 Corintios 12:18

Soo maá Ndiosíꞌ nchu̱táꞌán ta ɨɨn rá pedasúꞌ yɨkɨkúñu‑ó sáni nkuiniꞌ maáréꞌ ya̱ sukuán koo.

1 Corintios 12:27

Jee ránoꞌó ranika̱ꞌ chi kúvi rán yɨkɨkúñu Cristo, chi yɨ́ꞌɨ́ rán nu̱u̱nꞌ re̱ꞌ, jee ta ɨɨn ta ɨɨn‑ó kúvi‑ó pedasúꞌ yɨkɨkúñu re̱ꞌ.

1 Corintios 12:8

Chi nu̱u̱nꞌ sava‑ó táji Ta̱chi̱ꞌ Ííꞌ ta̱ꞌvi̱ꞌ ya̱ káꞌánꞌ‑a tu̱ꞌun níchí ya̱ va̱ji ne̱ nu̱u̱nꞌ Ndiosíꞌ. Jee nu̱u̱nꞌ inka‑ó ka̱ꞌ táji ɨɨn ni Ta̱chi̱ꞌ Ííꞌ vá ta̱ꞌvi̱ꞌ ya̱ sátíñú re̱ꞌ iniꞌ‑i sáva jíníꞌ va̱ꞌa‑a Tu̱ꞌun Ndiosíꞌ jee xínéꞌénꞌ‑e vá nu̱u̱nꞌ rá ñanitáꞌán‑ó.

1 Corintios 4:15

Chi súnika̱ꞌ koo ne̱ u̱ji̱ꞌ mil (10,000) te̱e ya̱ xínéꞌénꞌ tu̱ꞌun váꞌa Cristo nu̱u̱nꞌ ránoꞌó, soo nsáꞌ kue̱ꞌe̱ꞌ tátáꞌ rán íyó, chi kúvi ni̱ꞌ tátáꞌ rán ya̱ yɨ́ꞌɨ́ rán nu̱u̱nꞌ Cristo chi nuꞌuꞌ ví ya̱ nna̱kani ni̱ꞌ tu̱ꞌun váꞌa Jesús nu̱u̱nꞌ ránoꞌó jee nka̱níjiá rán ni̱nu̱ꞌ iniꞌ rán tu̱ꞌun vá jee sukuán nna̱kaku jiáá rán nsa̱ꞌá ni̱ꞌ.

1 Corintios 6:11

Jee suꞌva ñaꞌnu sava rán nékúvi, soo vitan chi ya̱ ntu̱ví ka̱ꞌ, chi nna̱kete Ndiosíꞌ ránoꞌó jee nno̱noo rán nu̱u̱nꞌ kua̱chi, jee nsa̱ꞌá sɨ́ɨ́n Ndiosíꞌ ránoꞌó nu̱u̱nꞌ kua̱chi rán sáva kɨꞌɨ rán nu̱u̱nꞌ Cristo, jee ya nkino̱o na̱a̱ꞌ rán nsa̱ꞌá Ndiosíꞌ jie̱ꞌe̱ꞌ yɨ́ꞌɨ́ rán nu̱u̱nꞌ I̱toꞌoꞌ‑ó Jesús ya̱ kúvi Cristo, jee ña̱tíñú Ndiosíꞌ‑ó Ta̱chi̱ꞌ Ííꞌ re̱ꞌ nsa̱ꞌá re̱ꞌ maa.

2 Corintios 12:2

Jíníꞌ ni̱ꞌ ɨɨn te̱e ya̱ yɨ́ꞌɨ́ re̱ꞌ nu̱u̱nꞌ Cristo, jee ya̱ nkuvi u̱xi̱ꞌ ku̱mi̱ꞌ (14) kui̱ya̱ꞌ, ya̱ nsiíyo Cristo re̱ꞌ ña̱ꞌa̱nꞌ re̱ꞌ antivɨ́ súkún nu̱u̱nꞌ nééꞌ Ndiosíꞌ, ya̱ káchíꞌ‑ó ya̱ kúvi ya̱ uníꞌ súkún. Soo ntu jíníꞌ ni̱ꞌ retú ña̱ꞌa̱nꞌ re̱ꞌ jín yɨkɨkúñu re̱ꞌ, áxí nkino̱o yɨkɨkúñu re̱ꞌ. Ndiosíꞌ jíníꞌ.

2 Corintios 4:6

Chi Ndiosíꞌ ví ya̱ nta̱túníꞌ re̱ꞌ ya̱ tu̱u̱nꞌ ñuꞌunꞌ nu̱u̱nꞌ neenꞌ sáá nsa̱ꞌá re̱ꞌ ñɨ̱vɨ́. Suni maá Ndiosíꞌ ví ya̱ stúúnꞌ re̱ꞌ iniꞌ ánímaꞌ‑ó sáva tu̱u̱nꞌ iniꞌ ánímaꞌ‑ó ya̱ kuniꞌ‑ó ya̱ viiꞌ nasɨ́kuitɨꞌ kúñáꞌnú re̱ꞌ chi jíníꞌ‑ó iniꞌ Jesús ya̱ kúvi Cristo, kuéntáꞌ jiánu̱te̱ꞌ nu̱u̱nꞌ re̱ꞌ.

Gálatas 1:4

Nso̱ko̱ꞌ Jesús maáréꞌ ya̱ níꞌiꞌ re̱ꞌ jie̱ꞌe̱ꞌ kua̱chi‑ó, sáva sikáku re̱ꞌ yó, sáva ntu íyó kaka‑ó ichi tu̱ꞌun kánéꞌén, sáni sáꞌá rá ñɨvɨ nééꞌ ñɨ̱vɨ́ vitan ya̱ ntu yɨ́ꞌɨ́ ráa nu̱u̱nꞌ re̱ꞌ. Nsa̱ꞌá re̱ꞌ suꞌva sáni kuíni Tátáꞌ‑ó Ndiosíꞌ.

Gálatas 3:13

Cristo nchu̱náán nkáꞌnú re̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi sáꞌá‑ó, sáva nakani núne re̱ꞌ yó nu̱u̱nꞌ ya̱ chísónínu tu̱ꞌun ley yó. Chi nkenta nyosoni̱nu re̱ꞌ sáva kuvi ya̱ váꞌa nu̱u̱nꞌ‑ó, chi níso nu̱u̱nꞌ Tutuꞌ Tu̱ꞌun Ndiosíꞌ ya̱: “Yósóni̱nu nta̱ká ñɨvɨ níntakaa nu̱u̱nꞌ yutun.”

Efesios 1:10

Chi sikúnkuvi re̱ꞌ maa sáá kenta máá tiempúꞌ ya̱ nkáji re̱ꞌ, ya̱ nachiꞌi re̱ꞌ ntáká nantíñú xi̱ntíín Cristo, rá íyó antivɨ́ jín rá íyó iniꞌ ñɨ̱vɨ́ yaꞌá.

Efesios 1:14

Ta̱chi̱ꞌ Ííꞌ vá ví ya̱ ntaji ya̱chi̱ꞌ Ndiosíꞌ nu̱u̱nꞌ‑ó jee yukuán kúvi ya̱ naáꞌ ya̱ taji nijia re̱ꞌ ta̱ꞌvi̱ꞌ nu̱u̱nꞌ‑ó, ne̱ ki̱vɨ̱ꞌ sijínu re̱ꞌ tiñu re̱ꞌ ya̱ sikáku re̱ꞌ yó nu̱u̱nꞌ kua̱chi yó jee xinánitáꞌvíꞌ re̱ꞌ yó ya̱ kúvi‑ó ñɨvɨ re̱ꞌ. Jee sukuán níꞌínꞌ re̱ꞌ nakuetúꞌún nɨꞌɨ ñɨvɨ ya̱ viiꞌ kúñáꞌnú nasɨ́kuitɨꞌ re̱ꞌ.

Efesios 1:7

Jee ni̱ꞌi̱ꞌ Cristo nu̱u̱nꞌ kurúsiꞌ jee ñatɨ ni̱ñɨ̱ꞌ re̱ꞌ sáva chunáán nkáꞌnú re̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi‑ó sáva nakani núne re̱ꞌ yó ya̱ nkɨ́ꞌɨ‑ó ka̱ꞌ nu̱u̱nꞌ kua̱chi‑ó, jie̱ꞌe̱ꞌ yɨ́ꞌɨ́‑ó nu̱u̱nꞌ Cristo. Jee suꞌva nékáꞌnú iniꞌ Ndiosíꞌ yó, sánikua̱ꞌ ntántúníꞌ nasɨ́kuitɨꞌ íyó mániꞌ iniꞌ re̱ꞌ néꞌyá re̱ꞌ yó,

Efesios 2:10

Chi kúvi‑ó ɨɨn tiñu jiáá nsa̱ꞌá Ndiosíꞌ, chi maá Ndiosíꞌ nsa̱ꞌá yó sáá íyó‑ó ntañúꞌún jie̱ꞌe̱ꞌ yɨ́ꞌɨ́‑ó nu̱u̱nꞌ Cristo Jesús. Sáꞌá re̱ꞌ yó sukuán, sáva saꞌá‑ó rá tiñu váꞌa ya̱ ya nsa̱ꞌá túꞌva Ndiosíꞌ sáva kueꞌnu‑ó ichi re̱ꞌ sukuán.

Efesios 4:30

Jee koto sáꞌá rán kua̱chi sáva nsíkúkuíꞌyáꞌ rán iniꞌ Ta̱chi̱ꞌ Ííꞌ Ndiosíꞌ. Chi nni̱ꞌi̱nꞌ rán Ta̱chi̱ꞌ Ííꞌ vá kuéntáꞌ ɨɨn seyúꞌ ya̱ stúvi ya̱ kúvi rán ñɨvɨ Ndiosíꞌ, ne̱kua̱ꞌ kiji máá ki̱vɨ̱ꞌ ya̱ nakani núne Ndiosíꞌ yó nu̱u̱nꞌ ya̱ nóꞌo‑ó ñɨ̱vɨ́ yaꞌá jee xinánitáꞌvíꞌ re̱ꞌ yó.

Efesios 5:26

Nsa̱ꞌá re̱ꞌ sukuán sáva saꞌá sɨ́ɨ́n re̱ꞌ yó sáva nkɨ́ꞌɨ‑ó ka̱ꞌ nu̱u̱nꞌ kua̱chi‑ó, jee nna̱sánoo re̱ꞌ ánímaꞌ‑ó jín tu̱ꞌun re̱ꞌ, kuéntáꞌ nna̱kete re̱ꞌ yó jín nute.

Filipenses 3:9

Jee sáva kenta ni̱ꞌ kɨꞌɨ ni̱ꞌ nu̱u̱nꞌ re̱ꞌ. Jee nsáꞌ kino̱o na̱a̱ꞌ maáníꞌ nu̱u̱nꞌ Ndiosíꞌ jie̱ꞌe̱ꞌ ya̱ nukú ni̱ꞌ saꞌá ni̱ꞌ ya̱ káchíꞌ tu̱ꞌun ley Moisés. Chisaꞌ jiáꞌayuꞌú Ndiosíꞌ ya̱ kínóo na̱a̱ꞌ ni̱ꞌ nu̱u̱nꞌ re̱ꞌ, jie̱ꞌe̱ꞌ ya̱ kúneí iniꞌ ni̱ꞌ Cristo. Chi máá Ndiosíꞌ jiáꞌayuꞌú ya̱ kino̱o na̱a̱ꞌ ñɨvɨ nu̱u̱nꞌ re̱ꞌ, jie̱ꞌe̱ꞌ kúneí iniꞌ ráa Cristo.

Colosenses 1:14

Jie̱ꞌe̱ꞌ yɨ́ꞌɨ́‑ó nu̱u̱nꞌ Se̱ꞌya re̱ꞌ, jee ni̱ꞌi̱ꞌ‑i sáva nchu̱náán nkáꞌnú‑u jie̱ꞌe̱ꞌ kua̱chi‑ó, sáva nakani núne Ndiosíꞌ yó nu̱u̱nꞌ kua̱chi‑ó. Jee yukuán kúvi ya̱ nékáꞌnú iniꞌ re̱ꞌ jie̱ꞌe̱ꞌ kua̱chi‑ó.

Colosenses 3:16

Saájee íyó kuꞌun kutú nasɨ́kuitɨꞌ ka̱ꞌ tu̱ꞌun jie̱ꞌe̱ꞌ Cristo iniꞌ ánímaꞌ rán, jee suꞌva xinéꞌénꞌ rán jee nakutíñú rán nu̱u̱nꞌ rá táꞌán rán jín nta̱ká tu̱ꞌun níchí. Jee ne̱ jín ánímaꞌ rán kata rán nu̱u̱nꞌ rá yaaꞌ Tu̱ꞌun Ndiosíꞌ naní salmo, jín rá yaaꞌ himno ya̱ nákuetúꞌún rán Cristo, jín rá yaaꞌ ííꞌ jie̱ꞌe̱ꞌ Ndiosíꞌ, jee nakuatáꞌví rán re̱ꞌ.

1 Tesalonicenses 5:23

Ndiosíꞌ ví ya̱ sáꞌá‑a ya̱ kuneeꞌ ñunkúún ñɨvɨ. Jee ñúꞌún iniꞌ ni̱ꞌ ya̱ na̱ ka̱ꞌ sasɨ́ɨ́n re̱ꞌ ka̱ꞌ ránoꞌó ya̱ nkɨ́ꞌɨ rán ka̱ꞌ nu̱u̱nꞌ ya̱ níváꞌa, ya̱ kɨtíñú noo rán nu̱u̱nꞌ re̱ꞌ. Jee ñúꞌún iniꞌ ni̱ꞌ ya̱ na̱ ka̱ꞌ kumí re̱ꞌ ka̱ꞌ kávii kuitɨꞌ sáá íyó rán, va̱ni ánímaꞌ rán, va̱ni antúníꞌ rán, va̱ni yɨkɨkúñu rán, sáva ntu̱náꞌ kua̱chi koo si̱kɨ̱ꞌ ránoꞌó, sáá kiji tuku I̱toꞌoꞌ‑ó Jesús ya̱ kúvi Cristo.

Tito 2:14

Chi njia̱ꞌa re̱ꞌ maáréꞌ ya̱ kuviꞌ re̱ꞌ jie̱ꞌe̱ꞌ‑ó, sáva chunáán nkáꞌnú re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ‑ó, sáva nakani núne re̱ꞌ yó naꞌá nta̱ká nu̱u̱nꞌ ya̱ niva̱ꞌa. Jee nna̱saꞌá noo nɨꞌɨ kuitɨꞌ re̱ꞌ kua̱chi níso ánímaꞌ‑ó, sáva kuvi‑ó ñɨvɨ maáréꞌ, sáva kuꞌun káñá iniꞌ‑ó saꞌá‑ó ya̱ váꞌa.

Hebreos 9:12

Chisaꞌ Cristo jee nki̱vɨ re̱ꞌ Nu̱u̱nꞌ Ííꞌ Nasɨ́kuitɨꞌ Ka̱ꞌ ya̱ íyó antivɨ́, soo nsú jín sáva so̱ko̱ꞌ re̱ꞌ ni̱ñɨ̱ꞌ rá chuvátúꞌ lúlí jín rá chelu yɨ́ɨ́, chisaꞌ jín sáva so̱ko̱ꞌ re̱ꞌ ni̱ñɨ̱ꞌ maáréꞌ jie̱ꞌe̱ꞌ ya̱ níꞌiꞌ re̱ꞌ. Jee nki̱vɨ re̱ꞌ yukuán métúꞌún ɨɨn ni íchí nu̱u̱nꞌ ntáká tiempúꞌ. Jee sukuán nchu̱náán nkáꞌnú re̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi‑ó sáva ni̱ꞌi̱nꞌ re̱ꞌ ya̱ nakui̱ñɨ̱ꞌ núne‑ó nu̱u̱nꞌ kua̱chi‑ó nɨ́ɨ́nkání.

Santiago 1:5

Soo retú néni ɨɨn ránoꞌó kúmániꞌ ta̱nɨ̱ꞌ xi̱ni̱ꞌ‑i, ka̱ka̱nꞌ maa nu̱u̱nꞌ Ndiosíꞌ, jee ku̱ꞌva re̱ꞌ maa nu̱u̱nꞌ‑u. Chi ntu ñúkúꞌvá iniꞌ re̱ꞌ jiáꞌa re̱ꞌ maa nu̱u̱nꞌ nɨꞌɨ ñɨvɨ, jee ni ntu násóyu̱ꞌú re̱ꞌ nu̱u̱nꞌ ñɨvɨ vá jie̱ꞌe̱ꞌ ya̱ jíkánꞌ maa.

1 Pedro 1:2

Jee máá Tátáꞌ‑ó Ndiosíꞌ nka̱ji re̱ꞌ ránoꞌó, sánikua̱ꞌ nkuna̱a̱ꞌ iniꞌ re̱ꞌ ne̱ yanaꞌán jee nsásɨ́ɨ́n Ta̱chi̱ꞌ Ííꞌ re̱ꞌ ránoꞌó kɨtíñú rán nu̱u̱nꞌ Ndiosíꞌ sáva kaníjiá rán re̱ꞌ jee sáva nasánoo re̱ꞌ ránoꞌó nu̱u̱nꞌ kua̱chi rán jín ni̱ñɨ̱ꞌ Jesucristo ya̱ ñatɨ re̱ꞌ sáá níꞌiꞌ re̱ꞌ jie̱ꞌe̱ꞌ rán. Na̱ ka̱ꞌ ntántúníꞌ ka̱ꞌ koo ya̱ máníꞌ iniꞌ Ndiosíꞌ jín rán jín ya̱ kino̱o va̱ꞌa iniꞌ ánímaꞌ rán saꞌá re̱ꞌ.

2 Pedro 1:1

Nuꞌuꞌ, Simón Pedro, ya̱ kúvi ni̱ꞌ musúꞌ nu̱u̱nꞌ I̱toꞌoꞌ‑ó Jesús ya̱ níso re̱ꞌ tiñu Cristo [ya̱ ñani Ndiosíꞌ sáva tatúníꞌ re̱ꞌ nu̱u̱nꞌ nɨꞌɨ] jee níso ni̱ꞌ tiñu apóstol chúichí re̱ꞌ nuꞌuꞌ nakani ni̱ꞌ tu̱ꞌun re̱ꞌ. Jee tée ni̱ꞌ tutuꞌ yaꞌá nu̱u̱nꞌ ránoꞌó ya̱ suni nni̱ꞌi̱nꞌ rán ya̱ kúneí iniꞌ rán Cristo kuéntáꞌ kua̱ꞌ ránuꞌuꞌ, jee máá viiꞌ yɨ́yáꞌvi ya̱ kúneí iniꞌ‑ó Cristo. Nni̱ꞌi̱nꞌ rán maa jie̱ꞌe̱ꞌ na̱a̱ꞌ ví Jesús ya̱ kúvi Cristo ya̱ kúvi re̱ꞌ Ndiosíꞌ‑ó jee nátavaꞌ re̱ꞌ yó nu̱u̱nꞌ kua̱chi‑ó xinánitáꞌvíꞌ re̱ꞌ yó.

1 Juan 5:6

Jee suvire̱ꞌ kúvi Jesús ya̱ nkiji re̱ꞌ jee túvi ya̱ kúvi re̱ꞌ Cristo sáá ña̱nuté re̱ꞌ jín nute, jee ñatɨ ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ nu̱u̱nꞌ kurúsiꞌ jie̱ꞌe̱ꞌ‑ó. Jee nsáꞌ kua̱chi kuitɨꞌ ña̱nuté re̱ꞌ jín nute, chisaꞌ suni ñatɨ ni̱ñɨ̱ꞌ re̱ꞌ nu̱u̱nꞌ kurúsiꞌ. Jee máá Ta̱chi̱ꞌ Ííꞌ Ndiosíꞌ ví ya̱ jiáꞌa ya̱ naáꞌ jie̱ꞌe̱ꞌ yaꞌá, chi mánitu̱ꞌun íyó na̱a̱ꞌ ñúꞌún iniꞌ re̱ꞌ.

Apoclipsis 14:4

Jee suviráa kúvi ñɨvɨ ya̱ ntu nkúkuáchi ráa jín ñaꞌan, chi íyó noo ninuꞌun ánímaꞌ ráa. Jee suviráa ví ya̱ níkɨ́nꞌ ráa maáréꞌ ya̱ kúvi re̱ꞌ Lanchi Lúlí Ndiosíꞌ né ni ví nkuvi nu̱u̱nꞌ kuáꞌánꞌ re̱ꞌ. Jee suviráa kúvi ñɨvɨ ya̱ nna̱chuya̱ꞌvi Lanchi Lúlí vá ráa ne̱ nu̱u̱nꞌ rá ñɨvɨ ñɨ̱vɨ́ sáva nuvi ráa ñɨvɨ re̱ꞌ. Jee nso̱ko̱ꞌ ráa maáráa nu̱u̱nꞌ Ndiosíꞌ, jín nu̱u̱nꞌ maáréꞌ ya̱ kúvi Lanchi Lúlí vá kuéntáꞌ kúvi ráa parte xíꞌnañúꞌún tataꞌ sáꞌá jee va̱ji kue̱ꞌe̱ꞌ ka̱ꞌ.

Apoclipsis 5:9

Jee jíta ráa ɨɨn yaaꞌ jiáá ya̱ káchíꞌ suꞌva: Noꞌó ví ya̱ íyó ni̱ꞌi̱nꞌ nú tɨɨn nú tutuꞌ i̱ña̱ꞌ jee kuvi kune nú rá seyúꞌ násɨ́ꞌ maa. Chi nso̱ko̱ꞌ nú maánú ñaꞌniꞌ rá ñɨvɨ noꞌó, jee jín ni̱ñɨ̱ꞌ nú nna̱chuya̱ꞌvi nú nkeꞌen nú rá ñɨvɨ sáva nuvi ráa ñɨvɨ Ndiosíꞌ. Rá ñɨvɨ vá va̱ji nu̱u̱nꞌ ntáká tataꞌ, ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, ntáká ñuunꞌ, ntáká nu̱u̱nꞌ rá ñɨvɨ.