18 ᐊᓂᑭ ᓀᔥᑕ ᑳ ᐊᓕᒥᐃᑯᒋᒃ ᐎᓕᐱ ᐊᒑᑾ: ᑮ ᒥᓇᐙᒋᐋᐗᒃ ᒫᑲ᙮
ᒫᑎᑲ, ᒫᑲ, ᐯᔭᒃ ᑫᓇᓂ ᐃᔅᑴᐗ ᐁᑯᑕ ᐌᑐᑌᓕᒋ, ᑭ ᓈᓇᑐᒥᑯ, ᐁ ᐃᑎᑯᑦ ᒫᑲ, ᔕᐌᓕᒥᓐ, ᐅ ᑌᐯᓕᒋᑫᔭᓐ, ᑌᐱᑦ ᐌᑯᓯᓯᒥᔉ: ᓂᑖᓂᔅ ᓈᔅᐱᒡ ᐙᐎᓴᑭᔅᑳᑯ ᒪᒋ ᐊᒑᑾ᙮
ᑌᐯᓕᒋᑫᔭᓐ, ᔕᐌᓕᒻ ᓂᑯᓯᔅ; ᐌᓴ ᑮᔥᑶᐤ, ᓈᔅᐱᒡ ᐁ ᐎᓴᑫᓕᑕᒃ: ᐌᓴ ᒥᒉᑡᐤ ᒪᒎᔅᑌᐸᓕᐤ, ᒥᒉᑡᐤ ᓀᔥᑕ ᐸᑲᔅᑕᐌᐸᓕᐤ᙮
ᑮ ᐯᒋ ᐎᒋᓂᑕᒋᐌᒣᐤ ᒫᑲ, ᓀᔥᑕ ᒪᔥᑫᑯᒃ ᑮ ᓂᐸᐎᐤ, ᓀᔥᑕ ᑳ ᒫᒪᐎᔭᑎᓕᒋ ᐅ ᑭᔅᑭᓄᐊᒪᐙᑲᓇ, ᓀᔥᑕ ᓈᔅᐱᒡ ᒥᔮᒪᐎᒥᒉᑎᒋᒃ ᐃᓕᓕᐗᒃ ᒥᓯᐌ ᐁᔅᐱᔖᒃ ᒎᑎᐊᐃᒃ ᐅᒋ, ᓀᔥᑕ ᒋᕉᓴᓚᒥᒃ, ᓀᔥᑕ ᐎᓂᐯᑯᒃ ᔑᔓᒡ ᑖᐃᕐ ᓀᔥᑕ ᓵᐃᑕᓐ ᐅᒋ, ᑳ ᐯᒋ ᑕᑯᔑᑭᒃ ᑭᒋ ᐯᑕᐙᒋᒃ ᓀᔥᑕ ᑭᒋ ᒥᓇᐙᒋᐋᑲᓂᐎᒋᒃ ᐅᑦ ᐃᑖᔅᐱᓀᐎᓂᐙᐗ᙮
ᒥᓯᐌ ᒥᔭᒪᐎᒥᒉᑎᒋᒃ ᐃᓕᓕᐗᒃ ᒫᑲ ᑮ ᑯᒋ ᓵᒥᓀᐗᒃ: ᐌᓴ ᐎᔮᐎᒃ ᑮ ᐅᒋᐸᓕᓕᐤ ᑲᔥᑭᐅᐎᓐ, ᒥᓯᐌ ᑳ ᒥᓇᐙᒋᐃᑯᒋᒃ᙮
ᑮ ᐯᒋ ᑕᑯᔑᓋᒃ ᓀᔥᑕ ᒥᒉᑦ ᐃᓕᓕᐗᒃ ᐊᓐᑕ ᒋᕉᓴᓚᒥᒃ ᐊᓂᐃ ᐃᑖᐎᓐ ᐅᒋ ᐙᔅᑲ ᑳ ᐃᑖᑾᑭ, ᐁ ᐯᔑᐙᒋᒃ ᑳ ᐋᑯᓯᓕᒋ ᐃᓕᓕᐗ, ᓀᔥᑕ ᐊᓂᐃ ᑳ ᑲᒀᑕᑭᐃᑰᓕᒋ ᑳ ᐎᓕᐱᓯᓕᒋ ᐊᒑᒀ: ᒥᓯᐌ ᐁ ᐃᑖᓯᒋᒃ ᒫᑲ ᑮ ᒥᓇᐙᒋᐊᑳᓂᐎᐗᒃ᙮
