27 ᐌᓴ ᒥᓯᐌ ᐁ ᐃᑕᔑᔦᒃ ᑳ ᑮ ᓯᑲᐊᑖᑲᐎᔦᒃ ᙭ᑎᒃ ᑭ ᑮ ᐳᔅᑎᔥᑲᐙᐗᐤ ᙭᙮
ᒫᑲ ᐅᑖᐎᒪᐤ ᑮ ᐃᑌᐤ ᐅᑦ ᐊᑐᔅᑫᓛᑲᓇ, ᐅᑕ ᐯᑖᒃ ᒥᔭᐗᒋ ᒥᓨᔑᒃ ᐊᑯᐅᓐ, ᐳᔅᑎᔥᑲᒧᑎᓕᒃ ᒫᑲ; ᑭᑲᒧᐃᒃ ᒫᑲ ᐅᒋᒌᒃ ᑖᐱᒋᒉᐱᓱᓐ, ᓀᔥᑕ ᐳᔅᑕᔅᑭᓯᓇᐃᒃ ᐅᓯᑎᒃ:
ᐃᔅᐱ ᒫᑲ ᑳ ᓯᑲᐊᑕᐙᑲᓂᐎᑦ, ᓀᔥᑕ ᒥᓯᐌ ᑳ ᐃᑕᔑᑦ, ᓂ ᑮ ᐸᑯᓭᓕᒥᑯᓈᓐ, ᐁ ᐃᑗᑦ, ᑮᔥᐱᓐ ᑳ ᐃᑌᓕᒥᐌᑴ ᐁ ᔮᒀᒥᔅᑕᐗᒃ ᐅᑎᐯᓕᒋᑫᐤ, ᐯᒋ ᐱᑐᑫᒃ ᓂᑭᒃ, ᐁᑯᑕ ᒫᑲ ᑕᔑᑫᒃ᙮ ᓂ ᑮ ᔕᑯᒋᒥᑯᓈᓐ ᒫᑲ᙮
ᐁᑯ ᐱᑕᕐ ᑳ ᐃᑖᑦ, ᒥᒋᓚᐌᔦᓕᑕᒪᒃ, ᐁᑯᔑ ᑭ ᑳ ᓯᑲᐊᑖᑲᐎᓇᐗᐤ ᒫᑲ ᒥᓯᐌ ᑕᑐ ᐁ ᐃᑕᔑᔦᒃ ᐅᑦ ᐃᔑᓂᑳᓱᐎᓂᒃ ᐊᓇ ᒋᓴᔅ ᙭, ᑭᒋ ᐅᒋ ᐌᐯᓕᒋᑳᑌᑭ ᑭ ᒪᒋᑣᐎᓂᐗᐗ, ᑭ ᑳ ᒥᓕᑲᐎᓈᐗᐤ ᒫᑲ ᑳ ᐸᓓᑭᓯᑦ ᐊᒑᒃ᙮
(ᐌᓴ ᓇᒪᐎᓚ ᐁᔥᑾ ᐅᒋ ᐅᑎᑎᑯᐗᒃ ᐊᐌᓂᑳᓇᒃ ᐁ ᐃᑕᔑᒋᒃ: ᐱᑯ ᐁ ᑮ ᓯᑲᐊᑕᐙᑲᓂᐎᒋᒃ ᐅᑦ ᐃᔑᓂᒫᓱᐎᓂᓕᒃ ᐅᑎᐯᓕᒋᑫᐤ ᒋᓴᔅ᙮)
ᑣᔦᒃ ᒫᑲ ᑮ ᐸᑭᑎᓂᓕᐗ ᐅᔅᑭᔑᑯᒃ ᐅᒋ ᑫᒀᓐ ᑖᐱᔅᑯᒡ ᐗᓚᐊᑳᔭᒃ ᐁ ᐃᔑᓇᑾᓂᓕᑭ; ᑣᔦᒃ ᑮ ᐙᐱᐤ ᒫᑲ, ᓀᔥᑕ ᑮ ᐸᓯᑯ ᓀᔥᑕ ᑮ ᓯᑲᐊᑕᐙᑲᓂᐎᐤ᙮
ᒫᑲ ᐳᔅᑎᔥᑳᒃ ᐅᑎᐯᓕᒋᑫᐤ ᒋᓴᔅ ᙭, ᐁᑳᐎᓚ ᒫᑲ ᐙᔦᔥ ᐃᑌᓕᑕᒧᒃ ᐎᔮᓯᐎᐤ, ᑭᑕ ᑎᐱᑐᑕᒣᒃ ᐁ ᐃᔑ ᓇᑕᐌᓕᑕᒧᒪᑲᒃ᙮
ᐋᐳᒋᑲ ᐅᒀᔭᔅᑭᑖᑎᓯᐎᓐ ᑭᒋᒪᓂᑐ ᐁ ᑖᐺᔦᓕᒫᑲᓂᐎᑦ ᒋᓴᔅ ᙭ ᒥᓯᐌ ᑫ ᐋᔮᒋᒃ ᓀᔥᑕ ᑫ ᓛᔑᐸᓕᔅᑖᑯᒋᒃ ᒥᓯᐌ ᐊᓂᑭ ᑳ ᑖᐺᑕᑭᒃ; ᐌᓴ ᓇᒪᐎᓚ ᐊᐌᓇ ᐱᑐᔐᓕᒪᐤ:
ᒥᓯᐌ ᐁ ᐃᑕᓯᒋᒃ ᒫᑲ ᐁ ᑮ ᓯᑲᐋᑕᐙᑲᓂᐎᒋᒃ ᒧᓯᓴ ᐅᑦ ᐋᔭᒥᐋᐎᓂᓕᒃ ᐗᔅᑯᒃ ᓀᔥᑕ ᑭᒋᑲᒦᒃ;
ᐌᓴ ᐯᔭᒃ ᐊᒑᒃ ᐅᒋ ᒥᓯᐌ ᐁ ᐃᑕᔑᔭᒃ ᑭ ᓯᑲᐊᑖᑲᐎᓈᓇᐤ ᐯᔭᒃ ᒥᔭᐎᒃ, ᑮᔥᐱᓐ ᒎᐎᐗᑴ ᓀᔥᑕᐱᑯ ᒉᓐᑖᐃᓕᐗᑴ, ᑮᔥᐱᓐ ᐃᐋᐎᑳᓂᐗᑴ, ᓀᔥᑕᐱᑯ ᑌᐯᓕᒥᑎᓱᐗᑴ; ᓀᔥᑕ ᒥᓯᐌ ᑭ ᑮ ᒥᓂᒀᑕᒧᐃᑲᐎᓈᓇᐤ ᐯᔦᑯ ᐊᒑᑯᒃ ᐃᔑ᙮
ᓀᔥᑕ ᑭᒋ ᐳᔅᑎᔥᑲᒣᒃ ᐅᔥᑭ ᐃᓕᓕᐎᐎᓐ ᑳ ᐅᔑᑖᓂᐗᒃ ᑭᒋ ᓇᔅᐱᑖᑯᓐ ᑭᒋᒪᓂᑐ ᑲᔭᔅᑭᑖᑎᓯᐎᓂᒃ ᓀᔥᑕ ᑖᐺ ᐸᓓᑭᓯᐎᓂᒃ᙮
ᓀᔥᑕ ᐁ ᑮ ᐳᔅᑎᔥᑲᐌᒃ ᐅᔥᑭ ᐃᓕᓕᐤ, ᑳ ᐅᔥᑭᐋᑲᓂᐎᑦ ᑭᔅᑫᓕᑕᒧᐎᓂᒃ, ᐅᑦ ᐃᔑᓈᑯᓯᐎᓂᓕᒃ ᐊᓂᐃ ᑳ ᑮ ᐅᔑᐃᑯᑦ;
ᐊᓂᒪ ᑳ ᓇᔅᐱᑕᒧᒪᑲᒃ ᓯᑲᐋᑖᑫᐎᓐ ᐊᓄᒡ ᓀᔥᑕ ᑳ ᐱᒫᒋᐃᑯᔭᒃ, (ᓇᒪᐎᓚ ᐁ ᐌᐱᓂᑳᑌᒃ ᐎᔮᓯᐎ ᐎᓂᓯᐎᓐ, ᒫᑲ ᐁ ᓇᔥᑴᐗᔑᐃᐌᒪᑲᒃ ᒥᓗ ᒥᑐᓀᓕᒋᑲᓐ ᐅᑎᔥᑲᐤ ᑭᒋᒪᓂᑐ,) ᐅ ᐗᓂᔥᑲᐎᓐ ᐅᒋ ᒋᓴᔅ ᙭:
