APOOCADIISI 5:6 - Wanaadi A'deddu

⁶ Yaawä inchoncomo antawäiñe weneeaqueene Oweeja nnedö’cä, jiidi, amiiñä’caajä nönge. Cajiichaana mudei yö’tä töwö cönä’jaacä, ñanno aacäicheea’como amoode’na’como dö’täiñe mmaja. Yeetai cönä’jaacä aacä amoojato, aacä amoojato mmaja chäänudu. Yää chäänudu na aacä amoojato’como Epíiditu cu’tädö, tameedä nono weichö wa’cä Wanaadi nanontädö naatoodö.

APOOCADIISI 5:6 ပူးပေါင်းရင်းမြစ်များ

DUUCA 1:69

Töwö cuntui Cäwaanacaaneichomo jäduujato, ñäädä dhanoonö Dawí wä’jimmä’tädö dea.

JUAN 1:29

Yää jenamma naadöje Juan cöneeneaacä Jesuuquidiito töwwadäädä yeejödö. Töwö Juan cönä’döaacä yaawä: —Eneetäcä, määdhä ñäädä Oweeja nnedö’cä nöngato, Wanaadi nanontädö, tameedä soto cone’nadiiyöcoomo coccanei.

JUAN 1:36

Yää ai Jesuuquidiito weja’dätäädö eneea’jäcä Juan cönä’döaacä: —Eneetäcä, määdhä ñäädä Oweeja nnedö’cä nöngato, Wanaadi nanontädö; quee.

DOSECHO 8:32

Edä Wanaadi a’deddu imennaajä töwö cöna’de’taacä: Töwö cönaatadoojoi emaadö wetä oweeja adäädö töweiye naichöje; äucwätä’da töwö cönä’jaacä, tö’jotö töcaadawä oweeja ecaadaucwa’da töweiye naichöje mmaja.

APOOCADIISI 1:4

Öwö Juan, äwwadäädäiñe wimenna, änwanno Aasiya ñancomo quedeiyentecoomo, aacä amoojato ajaatadööcomo naadö. Aashichaato, täncanoode’da aweicho’como mmaja äwwäiñe yei’she wa, Wanaadi nutuudu, ñäädä eduuwa naadö, jenaadä cönä’ja’dö dea, äcuude na’dedö dea, ñanno aacä amoojato’como Epíiditu nutuudu mmaja, ñanno Wanaadi mudei o’wawä naatoodö,

APOOCADIISI 12:11

Ñanno cöjimmotoncomo tämentäneichomo’jödö cöne’jodheinchaicho Oweeja nnedö’cä wääma’jödö que, dha’deddu ecammajäätödö que mmaja. Tönwanno töwäämadööcomo onnontä’da cönä’ja’to tämaadöcoomo jonaane.

APOOCADIISI 13:8

Tameedä nono de’woncomo ñäädä odoocojaato cönwa’deme’ca’to, tameedä ñanno edä nono tödö’jödö jonnoto’jödöödä weichojo jajeedai’chädö jäcä chäätöcoomo ’je’da naadö. Yää weichojo jajeedai’chädö edhaajäje na ñäädä Oweeja nnedö’cä, cönäätämaajoichö.

APOOCADIISI 14:1

Yää ’jeje wene’maaquene yaawä; weneeaqueene Oweeja nnedö’cä, jiidi, Siyon ’jödö de’wä. Chääjadä cönä’ja’to shootoi, 144 miide. Oweeja nnedö’cä eetö tömennä cönä’jaacä ijaawäiñe, Yuumö eetö mmaja.

APOOCADIISI 17:14

Tönwanno newäänä’taato’de Oweeja nnedö’cä jadä. Töwö Oweeja nnedö’cä ne’jodheinchaato’de, cajiichaanacoomo Cajiichaanaichomooje töweijäcä, ädhaamo Edhaajotoncomooje töweijäcä mmaja. A’dejja’como ñanno Oweeja nnedö’cä jadoncomo, Wanaadi neichö mmaja, chäänönga’como mmaja; quee cönä’döaacä amoode öwwä.

APOOCADIISI 21:22

Wanaadi weichojo amääajä ’je’da weneeaqueene yää jata, ñäädä Cajiichaana Wanaadi jäduujato maaje yeijäcä, Oweeja nnedö’cä mmaja.

APOOCADIISI 21:23

Yää jataawä shii niyeijodö tujunne’da na’de, nuunä niyeijodö tujunne’da mmaja, Wanaadi nnataadö yeijoneije yeijäcä. Oweeja nnedö’cä dhawaadöje na’de.

APOOCADIISI 22:1

Yaawä ñäädä amoode öwwä cöneenejoi weichojo tunai’chädö, Wanaadi mudei dö’tonnoto weja’cadö, Oweeja nnedö’cä mudei dö’tonnoto mmaja. Yää tuna cönä’jaacä acuuwena; ta’dawaane cönääneaacä, widiiqui töweiye naichö wa’cä.

APOOCADIISI 22:3

A’que na’de cone’da täcammaamö. Yäätä na’de Wanaadi mudei, Oweeja nnedö’cä mudei mmaja; shootoi niya’deme’caato’de.

APOOCADIISI 4:8

Ñanno aacäicheea’como amoode’na’como cönä’ja’to ta’denqueiñe, chääwaadäiñe tooni amoojato dhajä’saichomo. Dhajä’saichomo jäcä cönä’jaacä chäänuduucomo, jooje, ye’wä mmaja, dho’nä mmaja. Etaajö’da cönä’ja’to töweecanta’ñädööcomo, ano, cöijai’jödöödä. Edääje cöneecanta’ña’to: Aashichaato, aashichaato, aashichaato, Cajiichaana Wanaadi jäduujato, ñäädä jenaadä cönä’ja’dö, eduuwa naadö dea, äcuude na’dedö dea; quee cöneecanta’ña’to.

APOOCADIISI 5:11

Wene’maaquene yaawä; jooja’como amoode a’dedducoomo wetaaquene, ñanno mude awoodhecääcä cönä’ja’todö, aacäicheea’como amoode’na’como awoodhecääcäiñe mmaja, inchoncomo awoodhecääcäiñe mmaja. Jooje cönä’ja’to ñanno amoode, wanna, ime’cu’tädööcomo cho’na’da.

APOOCADIISI 5:12

Töcä’de cöna’deuwa’to; edääje cönä’döa’to: Ñäädä mma mä’dä Aashichaato, Oweeja nnedö’cä, ñäädä cönäämajoichö. Töwö ñäädä jäduujatooje tä’täämö, tönsomaacatooje tä’täämö mmaja, töseedujä’natooje täcammaamö mmaja. Ñäädä mma töwö tameedä tödööjaicho. Töwö na aashicha tödööto’me, o’jodhaatoje tä’täämöje mmaja, aashicha wa’deutojooje mmaja; quee cönä’döa’to.

APOOCADIISI 5:13

Yääje mma yaawä tameedä Wanaadi namoode’nädö wa’deuwödööcomo wetaaquennea, caju ñancomo mmaja, nono de’woncomo mmaja, co’dhejeiñancomo mmaja, dama ’cwaca naatoodö mmaja, tameedä. Tönwanno cönä’döa’to: Mä’dä mude de’wä shuucu naadö, mä’dä Oweeja nnedö’cä mmaja, aashicha wa’deutojooje naato, aashicha tödööto’me mmaja, o’jodhaatoje tä’täämöje mmaja, jäduujatooje täcammaamöje mmaja, yeichöödäje; quee cönä’döa’to.

APOOCADIISI 5:14

Ñanno aacäicheea’como amoode’na’como cönä’döa’to yaawä: —Mädääje na; quee. Ñanno tooni sotooto de’wä aacäicheea’como inchoncomo tä’mudhe cönä’döicho yaawä; cönwa’deme’ca’to ñäädä Yeichöödoto.

APOOCADIISI 6:16

Tönwanno cönä’döa’to jöö wwä, täju wwä mmaja: —Adheejuccacä ñaa de’cäi, ñaa nejoonöje, aneene’da ñaa eiye mude de’wä naadö jedö, Oweeja nnedö’cä wwä ñaa wätä’maminchajo’node; quee cönä’döa’to.