2 CODINTIYO 6:10 - Wanaadi A'deddu

¹⁰ wentumje ñaa weichaame mmaja, ta’cwaiñe dea ñaa weneene; tönsomaaque’da ñaa weichaame jooje anejjacoomo ñaa ninshoma’taato. A’ca’como nönge ñaa weichaame tameedä ñää wwä na.

2 CODINTIYO 6:10 ပူးပေါင်းရင်းမြစ်များ

MATEO 5:12

Adha’cwainchatääcä’de yaawä; ä’wa’dätääcä’dede, adheejemaato’como jooje yeijäcä caju ña. Mädääje dea tömmaminchaiñe töweiye cönä’ja’to odhoowajoodo’como Wanaadi wa’deuwödö ecammannamo.

MATEO 5:4

“Ta’cwaiñe eijai ñaato ñanno töwaamo’como; tönwanno nä’wa’däjaato’de.

DUUCA 6:21

“Ta’cwaiñe eijai maato änwanno ämiije määnetäänedö; änwanno äwwäiñe aashichaato nä’tua’de, ämjummadööcomo wa’cä. “Ta’cwaiñe eijai maato änwanno töwaamo’como; änwanno adha’seuwato’de yaawä.

JUAN 16:22

Mädääje mmaja änwanno, eduuwa mma wentumje maato. Öwö maneeneaato’dede äcuude; yaawä ta’cwaiñe maato’de. Anejja adhenwajiiñajaiñe’da na’de yaawä adha’cwaniiyöcoomo que.

DOSECHO 16:25

Yaawä yo’tawääne Paudo, Siida mmaja Wanaadi wwä cöna’deuwa’to; cöneecanta’ña’to dea. Anejjacoomo jedeeso cöneeta’to yeecanta’ñädööcomo.

DOSECHO 3:6

Yaawä Peedhodo cönä’döaacä chäwwä: —Jödaata ’je’da öwwä na, oodo ’je’da mmaja. Yaawääne’, öwwä naadö mmaane wu’a äwwä. Jesuuquidiito Naasade ñano eetö joi edääje wä’döa äwwä: Aanöncä owoojoimadööje mma; quee cönä’döaacä Peedhodo.

DOSECHO 5:41

Ñanno anonta’como cöntonto yaawä täcamma’jonnamo jonnoiñe. Tönwanno ta’cwaiñe cönä’ja’to Jesuuquidiito ecamjödö jo’tädööje töwäntunamjödööcomo weijäcä, Wanaadi woije dea.

DOMAANO 11:12

Yää chäänönge’da iisadaaediita wei’jocoomo aashichaatoje cönä’dhe’maichö naane’ tameedä soto jäcäiñe; yeejucca’jocoomo aashichaatoje cönä’dhe’mai chea judhíojöncomo jäcäiñe. Töwaacö’je mma yeeconeeca’comjäcä.

DOMAANO 12:15

Ta’cwaiñe eichäcä ta’cwaiña’como jadä; wentumja’como jadä mmaane töwaamo daja aamotääcäde.

DOMAANO 15:13

Ñäädä Wanaadi, cönwomoocödööcomo u’neije na; töwö adha’cwaniiyöcoomo nu’a, täncanoode’da aweicho’como mmaja, täcamjödö jäcäinchädä. Yaawä Epíiditu Santo woije wo’womo’nä ’je eijai maato.

DOMAANO 8:32

Wanaadi cöwwäiñe Tönnedö jadä’jödöödä aneewontä’da cöneiyacä; tu’eene cuntui cöjääcäinchädäiñe töwäämaamöje. ¿Aaquene mmaja tameedä anejja cöwwäiñe äntu’da eijai ñai Tönnedöödä cuntuiñe’ ?

DOMAANO 9:2

Jooje wentumje wäänene; weiñäje yeewanö jäcä cone’da wäänene dea jimmä jäcäinchädäiñe.

1 CODINTIYO 1:5

Quidiito jadä aweichomjäcä tameedä Wanaadi nutuudu aashichaato äwwäiñe na, awa’deuto’como, tösejjeque aweicho’como mmaja.

2 CODINTIYO 2:4

Jooje wentumje weichö que yää äwwadäädäiñe wadoojoneedö wimennäne; yeewanö jäcä cone’da wä’jaaquene, töwaamoone. Wentumje ayöödöjooto’comooje’da yää wimennäne, jooje ajummatäiñe weichö odhoowanääcäiñe yeichö wetääne.

2 CODINTIYO 4:15

Tameedä mädä äjääcäinchädäiñe na; yaawä Wanaadi nutuudu aashichaato jooje yeejanga’jäcä jooje mmaja naato’de Wanaadi wwä aashicha töwa’deuwaamo; aashicha wa’deutojooje Wanaadi na’de yaawä.

2 CODINTIYO 4:7

Mädä aashichaato ñaa wwä u’ajä na ädiiñä nono döaajä aca ewöötö’taajä töweiye naichöje, owaanäcä yeichö wetä Wanaadi jäduudu aashichaatoje yeichö, ñaa jäduuduje’daane.

2 CODINTIYO 8:9

Odhoowanääcäiñe aashicha Cädhaajotoncomo Jesuuquidiito nödö’jödö. Tameedä töwwä yei’jödö weichaame töwö äjääcäinchädäiñe a’cato nönge cönä’döjoi, tameedä äwwäiñe töweiye yeichö wetä yaawä töwö a’cato nönge yä’döjo’jödö que.

EUJEESIYO 3:16

Wanaadi wwä we’ca’a töwwä aashichaato naadö que odo’tadööcomo wejäädu’totoojo Epíiditu Santo ai, ñäädä Wanaadi jonnoto we’ajä.

EUJEESIYO 3:8

Tameedä Wanaadi sotoi o’näiñe wa; yääje yeichaame Wanaadi mädä taadawaajui cuntui öwwä, judhíojöncomo wwäiñe ecammajäätödö wetä öwwä Quidiito nödöödö aashichaato, yäätonno ’jemjönö.

JIDIIPENSE 2:17

Öwö ta’cwaiñe dea eijai wa saaquidiijiisiyo nönge töwä’tueemöje weichaame, yää saaquidiijiisiyo ännödööcomo de’wä mmaja, ecamjödö que tönnöe määnetäänedö. Adhaacoodaaneiñe ta’cwaiñe eijai wa.

JIDIIPENSE 4:4

Cajiichaana nutuudu que ta’cwaiñe eichäcä yeichöje. Yääje mmaja wä’döa dea, ta’cwaiñe eichäcä.

CODOOSENSE 1:24

Mädä äjääcäinchädäiñe wäntunamjödö cone’da yöödö’da na. Eduuwa öwö daja woneeja dea Quidiito wäntunamjö’jödö, chääjö jäcäinchädä, ñanno quedeiyentecoomo.

CODOOSENSE 3:16

Ätö’tajäätödööcomo acaadä Quidiito a’deddu tödöötäcä; yäätä ejannä’catääcä. Ajimmotoncomo owaanomaatäcä, yäätuujatääcäde tameedä asejjedööcomo que. Adheewanööcomo jäcä aashicha Wanaadi jäcä ätö’tajä’ancädäiñe adheecanta’ñätääcä saadomo jäcä, anejja wecanta’ñotoojo jäcä mmaja, ätö’tajäätödööcomo ai mmaja.

1 TEESADOONISENSE 1:6

Änwanno mä’dötääne ñaa cu’jä’nenaamoje, Cädhaajotoncomo Jesuuquidiito cu’jä’nenaamoje mmaja. Änwanno adha’cwaniiyöcoomo Epíiditu Santo nutuudu que aashicha metaatäne Wanaadi a’deddu, ijo’tädööje jooje äwäntunaanö’taameiñe.

1 TEESADOONISENSE 5:16

Ta’cwaiñe eichäcä yeichöje.

1 TIIMOTEO 4:8

A’dhatooje mma töweiye nai edä nono de’wono tödöödö jäcä wäämu’canä. Wanaadi nödöödö mmaane yää e’jodhe na, eduuwa weichojooje yeijäcä, äcuude weichojooje yeijäcä mmaja.

1 TIIMOTEO 6:18

Ñanno tönsomaaca’como yäätuujacooto, aashichaato tödöiyeto; aashichaato tödöödö queene ninshomaata’ña’to. Tamääne’da nei’ña’tode, u’coijeene.

EEWEDEO 10:34

Änwanno wentumje töneene mä’ja’quene ñanno jedeesoja’como. Anejjacoomo wwäiñe ännöjäätödööcomo que adhenwajiiñataame cone’da ä’döjo’da töweiye mä’ja’quene, odhoowanääcäiñe yeijäcä caju ña äwwäiñe aashichaato jaiñoone töweiye yeichö, töwaatamemjönööne.

SANTIYAACO 2:5

Etaatäcä, jimmä umjummadö. Ñanno edä nono de’wono que tönsomaaquemjöncomo Wanaadi cöneicho jooje ecamjödö chäwwäiñe töweiyaamoje. Ñanno Wanaadi sotoije naato’de, tujummannamo weicho’como ñeecamma’jödö nönge dea.

1 PEEDHODO 4:13

Ta’cwaiñe mmaane eichäcä Jesuuquidiito wäntunamjödö jimmäje aweijäcäiñe, ta’cwaiñe meichäiyede yaawä aashicha töweichö eneejodaawä chäwwä.

APOOCADIISI 2:9

Yoowanääcä na tameedä ännödö, yeetunu eneedö äwwä, tönsomaaque’da aweichö mmaja, Wanaadi nödöödö jäcä tönsomaaque aweichaame jooje. Yoowanääcä na adheementädö ñanno judhíoja’como wätä’tädö wwäiñe, judhíoje’da töweichaameiñe, Caajuushawa sotoiñe.

APOOCADIISI 21:7

Ñäädä e’jodheinchanei’jödö wwä nä’tua’de tameedä mädä aashichaato. Öwö wa’de Yaanadiiyöje; töwö na’de önnedööje.