Tito 1:2 - El Nuevo Testamento en matsés

² Nuquin Papa muesambo nec. Adquid yec ëndenquimboshë nidaid uabi yequi onquec: Umbi chiacpadombuen Esuquidistu tantiaquido icsho ënenquiocquin ubëdi tabadmendambi, quequin ambi chiampicpadombuen ma nëidon tantianu, queshun Esuquidistu chuibennequidquio icmiondashi.

Tito 1:2 ပူးပေါင်းရင်းမြစ်များ

Mateo 25:34

Adshumbic Abitedishun Icbombo icquin abiuc icquido ubi tantiaquido naden chiendambi: Cun Pan mibi bëdambo icmiaido neque. Ubëdi tabadec cho. Matses uabi yec ëndenquimboshë mibitedi caic: Aido ubi tantiaquido icmeshun ubëdi bëdamboshë yacno tabadmendambi, quequin Cun Pan tantiamiaido yec ambi namiacno ubëdi bëdambuec tabadec cho, caindambi, quepondash Esus.

Mateo 25:46

Adoac aido icsambuec tabadquido ënenquio icquin cuidacnombo nidnubi bëdambuec tabadquido Nuquin Papa yacno ënëdenquio yec tabadendac, quequin Esusën chuipondash.

Madcos 10:17

Aden chianec auëshquio puduanec podquiedën nidnubien dada abentsëc titinquianec choquin bëquedtanec dannëshën sebudash tsadquin: Chuibanquid yec bëdambocquidquio mibi neque. En ubi chui. Nuquin Papa yacno ënëdenquio yec tabadnuen ¿atotsimbi nape? capanëdash chobuedën Esus chuiquin.

Madcos 10:30

Nuquin Papan aidën nianaidtedi daëd uaquin 100 ted udictsëc dadpenquioshë menendac. Aton shubu yec aton utsibo yec aton chibi chedo yec aton tita yec aton bacuëbo yec aton tied yec quenuc dadpen menendac. Adquid icnubi mibi chieshënquidbidi icuaindac. Iuecash ënëdenquio yec Nuquin Papa yacno mibi tabadendac, quepanëdash.

Uanën dada uaid 10:28

Aido uënësacsho Nuquin Papa yacno tabadmendambi padpidec uënëstiapimbo icnuc. Uënësabi icsho bëdambuen dayun uaindambi. Umbi adosho icsamianquidën: Iuanu, quequin ubi bedshuntiapimbo iquendac.

Uanën dada uaid 17:2

Mimbi icmiacpadec abitedishun Icbo icquin mimbi ubi tantiamiaidotedi matses nuquibëd ënëdenquio yec tabadtequido icmendambi, Papa.

Uanën dada uaid 17:24

Mimbi ubi tantiaquido icmiaido nuqui tabadacnombo tabadmeta, Papa. Abitedimbo uabi icquin mimbi: Umbi tantiaidquio mibi neque. Nuquibi nanuna, Mado, mimbi cac bëchamauanquiec bëdamboshë yec tabadtennecpadequi mibëd tabadsho ma ubi tantiaquidon isnu, queshun: Mibi yacno tabadmeta, quequin mibi chiec nebi, Papa

Uanën dada uaid 5:39

Mibitedi nadpec. Nuquin Papan Chiaid nuquin tsusedpabon dada uampid tantiaquidquio nebi. Aid isbanquid yec Nuquin Papabëd ënëdenquio yec tabadtequid nebi, mibi quepec. Ma ubimbo chuiquin Nuquin Papan dada uamiampid neyoc.

Uanën dada uaid 6:54

Padnuen cun nami pequinc cun intac acquinc cash Nuquin Papabëd ënëdenquio yec tabadtequid mibi iquendac. Adquid icsho ubëdi tabadmenuen uënësaido uincuenmete uëshënquio uincuenmendambi.

Uanën dada uaid 6:68

Simon Petedon: Padenquio, Icbo. ¿Tsudabëd icnundambi mibi niannuc? Mibi padquid utsi nibëdec. Mimbiuidtsëquien: Ubi tantiaquid bëdambuen isquin uënësacsho uincuenmeshun ënëdenquio yec ubëd tabadmendambi, quequin mimbi chuipoc.

Hechos 15:18

Nuquin Icbon ambi ëndenquimboshë tantiampicpadombuen chiaid nec, quepampic Nuquin Papan oncamiaid, quequin Santiacon chuipanëdash.

Doma 1:2

Ëndenquimboshë Nuquin Papan aton Mado chote chuiquin ambi oncamiaido dada uamepampic.

Doma 16:25

Nuquin Papa Bëdamboshë iquec, canuna. Umbi Esuquidistu chuibanac tantiabensho Nuquin Papan mibitedi chieshtoenquio icmiac umbi chuibambued Esus tantiec tabadta. Nuquin Papa ëndenquimboshë abitedi uabi yec: Iuecshun naindambi, quequin ambi matses tantiamenquio icpampidi mibi Esus tantiamiac.

Doma 2:7

Abi tantiec bëdambuec tabadsho issun mabi Nuquin Papan: Mibi bëdambo iquec, canu, quiash abëd tabadte bunec ambi chiacpadec bëdambuec tabadquid uënësacsho Nuquin Papan ënëdenquiocnoc abëdi tabadmendac.

Doma 5:2

Abi tantiaquido icsho nuquitedi cuidmenquio icnuec abided cuidadec Esuquidistu uënëspanëdash, quequin nuquitedi tantiec. Aid tantiashouidtsëqui Nuquin Papan bëdamboshë yacno abëdi nuqui tabadmendac, quec chieshtoenquio yec nuqui cuishonquec.

Doma 5:21

Tauaquin matsesën icsambuen nasho cuidac uënëstequidouidquio yampampic. Adsho issun matses bëdambuen isnuen Nuquin Papan Ambi Chiaid niaquesambo Esusded cuidmepanëdash. Nëbi Nuquin Icbo Esuquidistu uidtsëqui tantiasho Nuquin Papan nuquitedi icsaisabimbuecnuc bëdambuen isquin ënëdenquio icnuc abëdi tabadmendac.

Doma 5:4

Aden chieshtoenquio icquin Esus tantiasho Nuquin Papan nuqui bëdambuen isquin: Bëdambo iquec, caindac. Adoac: Uënësacsho uincuenmeshun abi yacno tabadmendac ambi chiampicpadombuen, quequin nuquitedi cainec.

Doma 6:23

Icsambuen naic tabadec uënësacsho Nuquin Papan ënenquio icquin cuidacno nësecaindac. Padnuen Nuquin Icbo Esuquidistubëd abentsëc yacbimbuec tabadquid icsho Nuquin Papan ënenquiocquin abëdi tabadmendac.

Codosas 1:27

Aden Nuquin Papan ambi matses tantiamenquio icpampidi bëdamboshëcquid Esuquidistu Isadaidpembo tantiamebempanëdash. Adoac Esuquidistu tantiaquido yansho issun Nuquin Papan cun matses caido yec bëdamboshëcquid yacno aidbëd tabadtequid nebi, quequin tantiaquin cainec tabadendac.

Tesadonica 1 2:15

Isadaidbombidi Nuquin Papan oncamiaido cuessun secapampic. Adembidi Nuquin Icbo Esus uënës uamepondash. Adombuembidi chieshënquin aton nidaidënshun cuenmepondashi. Adembidi chieshënquin mibi yacnoshontsen ubitedi cuenmeuapondash. Adsho Nuquin Papan bëdambuen istiapimbo yaido icquin matses chieshënquido nec.

Tesadonica 1 5:8

Padnuen nuquitedi Esus tantiec bëdambuec tabadquido nec. Adquid icquin nuqui icsambuen nate bunaid nainquio icnuna. Sondado: Shocosh tsasimbo icquid shictonquenu. Sicsenushe, quiacbimbuec icnuna. Mayan Icsa Satanasën Esus tantiamenquio icnushe. Esus tantiaquioquin matsestsen tantiaquionona. Adecbidi sondado: Masenushe. Shocosh tsasimbo icquid mauete mauenu, quiacbimbuecbidi icnuna. Mayan Icsa Satanasën icsambuen tantiamequin chieshtomenushe. Esus tantiasho cuidenquio icquin Nuquin Papan abi yacno ubi tabadmendac, quequin tantiec bëdambuec tabadnuna.

Timoteo 1 6:12

Utsibon chieshënaqui chieshtoenquio icquin Esus tantiaquiec bëdambo icta. Uënësash Nuquin Papabëd ënëdenquio yec tabadnuec adta. Nuquin Papan: Cun Mado Esus tantiaquiec uënësacsho ubëdi tabadmendambi, queshun Nuquin Papan tantiamiac mimbi Esus tantiabempondac. Adshumbic: Nuquin Papan Mado Esus tantiaquiembi, quequin matses dadpen mimbi tantiamepondac.

Timoteo 1 6:19

Aden naic tabadsho: Mimbi bëdambuen naoque. Ubëdi tabadmequin mibi bëdambo icmendambi, Nuquin Papa camenuen adota. Adash uënësacsho Nuquin Papan abëdi mibi tabadmendac padpidec uënëstiapimbo icnuc, quequin atona dadpen dayun uaquid chuita.

Timoteo 2 1:1

Pabado nebi. Nuquin Papan tantiacpadombuen Esuquidistun: Ubi chuibenneta, caidquio nebi. Ambi chiampicpadombuen aton Mado Esuquidistu tantiaquid uënësacsho Nuquin Papan abëdi tabadmendac, quequin Esus chuibennequidquio nebi.

Timoteo 2 1:9

Nuquin Papan: Cuna nec, quequin aton Mado Esus tantiamiaido icquin adonona. ¿Nuqui bëdambuec tabadshoda Nuquin Papan nuqui bëdambuen isbempondash? Padenquio. Ëndenquimboshë nidaidbëta matses uabi yequi Nuquin Papa: Umbi chiaid niac niacquin icsambuen naquidëmbi cun Mado Esuquidistu tantiasho cuidenquio iquendambi, quequin ambi chiampicpadombuen nuqui Esus tantiaquid icmiac.

Timoteo 2 2:10

Aden chuibannubi Nuquin Papan ambi tantiamiaidtedi Esuquidistu tantiamendac. Aid tantiaquido uënësacsho cuidenquio icquin abëdi tabadmendac, quequin tantiec quënën tsadunondaid yequi chieshtoenquio iquebi.

Timoteo 2 2:13

Matses icquin Nuquin Papan chiacpadombuen natiapimbo nuqui icnubi Esusien aidën chiacpadombuen naquidquio nec. Adquid icquin ambibi chiaid niaquesambo nec, quequin chuipampic.

Timoteo 2 2:15

Mimbi bëdambuen naoc, Nuquin Papa camenuen bëdambuen nata dacuëdenquio icquin. Umbi naid ma Nuquin Papan isnu, queshun adota. Ambi chiaid bëdambuen isban isbanshun chieshtoenquio icquin Nuquin Papan Chiaidquio chuibanta, mado.

Tito 2:13

Cun Icbo Esuquidistu ubi Nuquin Papa cuidmenquiocquid bëdamboshëcquid chote uëshë chonoc cuishonquendabi, quequin caimbudec bëdambuec tabadta, quequin chuiquin tantiameuata.

Tito 2:7

Bëdambuec tabadquin tantiamequin ismenu, quiash bëdambuec tabadta. Adembidi icsainquio yec bëdambuec tabadquin ismeta. Adembidi mamënshunmenquio icquin bëdambuen chuiquin tantiameta.

Tito 3:7

Adec aton Mayan Bëda nuquibëd icsho issun: Cuidenquio icquin bëdambuen isquin bëdambocquid icmeshun aidtedi ubëdi tabadmendambi, quequin Nuquin Papan tantiec, quequin ënëdenquio yec abëd tabadte nuqui cainec.

Uan 1 2:25

Adquid icsho Esuquidistun: Ubëd abuc ënëdenquio yec tabadte iquendac, quequin chiondacpadec nuqui tabadendac.

Uan 1 5:20

Nadembidi nuqui tantiec. Nuquin Papan Madombo choshon chuibanec: Nuquin Papambo nadquio iquec, quequin tantiamepondash. Adash: Esuquidistu Nuquin Papan mado Nuquin Papapadquidbëd abentsëc yacbimbuec nuquitedi iquec. Aidi Aton Papapadquid icquin abi tantiaquido icsho Nuquin Papa yacno ënëdenquiocnoc tabadmendac, quequimbidi nuqui tantiec.

Udas 1:21

Ënenquio icquin Nuquin Papan ubi tantiec, quequin tantiaquiota. Abi chote uëshën Nuquin Icbo Esuquidistu chosho isnuen aid cainec tabadnuna. Aidëmbi nuquitedi cuidte bunenquio icquin abi tantiameshun ënëdenquio icnuc abëdi tabadmendac.

Esusën Uan ismiaid 13:8

Bëdi dapabimbuecquid acte ëquëducuësh chobued chuiquid tapa icsho matses abitedishunquio: Nadatiambocquid yec bëdambo iquec, quequin tantiabededendac. Ëndenquimboshë matses uabi icquin Nuquin Papan tantiampicpadec abided cuidadec uënësaid Obecabimbuecquid tantiesabo nendac. Adquido yec Nuquin Papan: Ubëdi tabadtequido nec, quequin abi cuëmëdquid dadauate dapan dada uamiambo icquido nec, quequin aden ismeposhi.

Esusën Uan ismiaid 17:8

Mimbi isbued bëdi dapabimbuecquid ënden ictennedi nëbi nibëdequi iuecash aidquiobidi abi tabadaid nidaid shëcuë ëquëducuësh padpidec choendac. Adacsho iuecshun cuidquin nibëdanmequiendac. Aden nibëdanmiabi icnubi ëndenquimbo nidaid uabi Nuquin Papan tantiampicpaden abëd tabadmetequido aton cuëmëdquid dadauate dapan dada uaid icnubi utsibo aton cuëmëdquid aid dada uaten dada uambo icquido nidaidën tabadquido tantiadempambo yec tabadendac aid bëdi dapabimbuecquid isash, queposh Nuquin Papabëd icquid.