Timoteo 1 6:9 - El Nuevo Testamento en matsés

⁹ Padnuen piucquid dadpen bedshun dayun uate bunquin badedi chieshtoquin Esus tantienquio yantsiash. Adshun Mayan Icsa Satanasën tantiamiacpaden abi bunaiduidquio bednuen mëmunenquio icquin icsambuen nabantsiash. Aden Nuquin Papan Chiaid niacniacquin icsambuen naic quenenash adenuidi naic uënësash mëyadtequid yacno nidendac.

Timoteo 1 6:9 ပူးပေါင်းရင်းမြစ်များ

Mateo 13:22

Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi dadpen tantiaiduidi tantiec chieshtoendac. Utsibic ambi bedteuidi tantiaquin nabanec abibi mua uadec chieshtoshon tantienquio yanuaindac. Adquido Nuquin Papan Chiaid tantiesabo yanshun bëdambuec tabadaid utsibo tantiamenquiocquid yanendac. Adquid nisanquidën bëtinac bacuëtiapimbo yacbimbuecquido nec.

Mateo 19:22

Adoaquien cania: Cuna dadpenquio icquid uesquin menetiapimbo iquebi, quiash uënësquio icquin Esusën chiacpadombuen natiapimbo yec nidpondash.

Mateo 26:15

Nidshumbic chuituidpanëdash: Utsibo ismenquio icquin mibiuidtsëqui Esus bedmenu. ¿Tedtsi piucquid ubi menetsia? caquien badedi bedtanquin shocosh ushu nacnenaid piucquid 30ted menepanëdash.

Mateo 6:19

Adshumbic padpiden Esusën naden chuibampanëdash: Mimbi nidaidënshun bedaid dayun uateuidi tantienda. Dayun uatequid nadquid nec. Chodquetequid yec macun pequin icsa uatequid yec shënibudtequid yec utsibon ampeshuntequid yec quec nibëdantequid neque. Adquiduidi tantienda.

Ducas 12:21

Aden chiashic: Atonauidi tantiaquin dadpen tsindoquidtedi Nuquin Papan chiacpaden naisa yec atona nianec uënësash Nuquin Papa yacno puduedtiapimbo iquendac, quepanëdash Esus.

Hechos 8:20

Adoaquien Petedon: ¿Piucquid menecta mibi Nuquin Papan namiaid icpe? Aden mimbi tantianuc chian annëdënquiacno ma mibëdi min piucquid cuidadtequid icpanu.

Epeso 4:22

Aden chuibanac Esus tantiabenash ënden mibi tabadnëdacpadec tabadenda. Icsambuen naquid iquequi: Bëdambocquid nebi, quec mibibi mua uadnëdacpadec tabadenda.

Timoteo 1 1:9

¿Bëdambuen naquidouidtsëqui chuiquinda Nuquin Papan Moises dada uamepampic? Padenquio. Naden icsambuen naquido chuiquimbien adopampic. Nëidic aton chuiquidën chiaid niac niacquido. Nëidic Nuquin Papan Chiaid niac niacquido. Nëidic Nuquin Papa tantiesabo. Nëidic Nuquin Papabëta abi tantiaquido mamënshunquido. Nëidic amëbi cuessunnequido. Nëidic anibi cuessunnequido. Nëidic utsibo cuessunnequido.

Timoteo 1 3:7

Adembidi chuibanquid icmenuen Esus tantiesabon: Bëdambocquid nec, casho tantiata. Icsambocquid nec, caid chuibanquid icmenda. Adquid icmiac icsambuen nasho Esus tantiesabon mamënshuntsiash. Adquid Mayan Icsa Satanasën badedi icsametsiashe. Icsambo icquid nec, caid: Esus chuibanquid icta, cainda.

Timoteo 1 6:10

Adec piucquid natiambo bunquidon aid bednuen baded badedquien icsambuen nadednendac. Adquido: Esus tantiembi, quebuedobi padenquio yanash natiec tabadendac.

Timoteo 1 6:17

Atona dadpen dayun uaquido naden chuita, mado. Cuna dadpenquioshë icnuc ubiuidtsëqui bëdambo iquebi, quenda. Nibëdantiapimbo icquid danquin mimbi dayun uaiduidtsëqui tantienda. Nuquin Papambo tantiaquiota. Aidëmbi matses bëdambo icmenuen atona dadpen bedmec, quequin chuita.

Timoteo 2 2:26

Aden Nuquin Papan Ambi Chiaidquio tantiamiac Esus tantienquio icbuedëmbi Esus tantiabenshun abi iuaquid Mayan Icsa Satanasën icsambuen namiacpadombuen nabuedëmbi ënendac.

Tito 2:12

Aden chomiac Esusën Nuquin Papan chiacpadombuen naic abided cuidadaid icnuc nuqui icsambuen naidbëta Esus tantiesabon icsambuen nate bunaid ënte tantiamec. Adoac nëbi bëdambuen tantiaquid icquin: Naden naic bëdambocquid ictsiabi, queshun bëdambuen naquid nuqui nec. Adembidi: Aden naquin icsambuen natsiambi, quequin nainquio icquin Nuquin Papan tantiamiacpadombuen naic bëdambuec tabadquid nuqui nendac.

Petedo 2 2:3

Muaquidon chuisho tantienda. Aidon piucquid cumapenec bunquin aid dadpen bedquimbi ambembi chiaidquio mibitedi chiec. Muasho tantiashun ambi ëndenquimboshë tantiampicpadombuen aido cumapenen Nuquin Papan cuidtequidombo nendac.

Udas 1:11

Aido cuidtequido icsho tantiac uënësquioshë iquec. Cain campidbimbuecquid aido nec. Nuquin Papan Chiaid niacniacquin abi bunaid naiqui icsaic. Aido piucquid dadpen bedteuidi bunquido yec Badan caidbimbuecquido nec. Adembidi Nuquin Papan Ambi Chiaid niacniacsho Code uënësmepampic.