Tesadonica 1 3:5 - El Nuevo Testamento en matsés

⁵ Umbi istanenquio yac utsin chieshënac ¿adecbidida Tesadonica yacnocquido chieshtoenquio icpatsiashba? quequinuidtsëqui tantiec tsadtiapimbo iquebique. Istan, caondambi Timoteo chuiquin. Ubitedi adometsiash, quequin tantienquio icshobi: Icsamequin tannu, quequid Mayan Icsa Satanasën namiac chieshtoshon Esus tantienquio yanacsho isash abembi chonoadquin chuibanondambi, quequin tantiamane, queshun: ¿Ada umbi chuibanac Esus tantiabenondaido bëdambuec tabadeque? Istan, caondambi Timoteo chuiquin.

Tesadonica 1 3:5 ပူးပေါင်းရင်းမြစ်များ

Mateo 4:3

Adec bunec tsadshobien Mayan Icsa Satanasën istuidpanëdash. Aden istuidtanquimbien: Nuquin Papan madombo icquin penun nëid cuënotebi: Pete icta, cata, capanëdash.

Hechos 15:36

Adashic iuecash Pabado Bednabe caic: Capucuennequin Nuquin Papan Chiaid nuqui chuibenniac Esus tantiaquid yanondaido ¿mitsipadec tabadeque? Isbennenu nid, capanëdash.

Codinto 1 7:5

Adquid icnuc min bënën: Chudnu, cac: Padi, cainda. Adembidi min chidon: Ubi chud, cac: Padi, cainda. Adbuedi: Nëidtedec ushquimbien Nuquin Papa chuitiad, queshun nainquio yec tabadta. Aidtedec ushquin padenquiocshon iuen mëmuntiapimbocsho issun Mayan Icsa Satanasën icsambuen namenushe, quiash min chidobëd padpidec icuata.

Codinto 2 2:11

Aden nainquiocsho issun nuqui chieshënquid Mayan Icsa Satanasën nuquitedi icsa uabudnushe, queshun ambi icsambuen naid ëmbued bëdambuen isquin puduedmeta.

Codinto 2 6:1

Nëbi ubitedi Nuquin Papan: Umbi Chiaid chuibenneta, caido nebi. Adquid icquin: Nuquin Papa matses bëdambuen ismenuen Esusded cuidpanëdash, quequin Nuquin Papan Chiaid umbi chiac pamumëdacbimbuec tantiate bunenquio yec tabadenda.

Cadasia 2:2

Adec Nuquin Papan tantiamiacpadec ambo nidshun Esus tantiaquido iccuededacno puduedshun umbi isadaidpembo Esusën naid Chiaid Bëda chuibennebued chuibanondambi. Adshumbic aidon chuiquid tapabo caidouidtsëqui umbi nabambuedtedimbo chuibanondambi. Aden chiambo icnuc utsibon: Pabadon icsambuen chieque. Tantienda, cac tantiashun Esus tantienquio yannushe, queshun chuibanondambi.

Cadasia 4:11

Mibitedi caic: Icsambuen naic tabadosh, utsibo quesho tantiash: Esus chuibanec abembi chonoadondabi, quiash dacuëdebi.

Epeso 4:14

Adec tabadquido yec bacuëmpin utsi utsien tantiacpaden tantiaquidpenquio nuqui nendac. Cunquequidën ëquë ëquëen tsidunacbimbuen muaquidon utsi utsien chuibansho tantiash badedquio: Abimbo caic, quec mua uadec. Aido icsambuen tantiaquido icquin chuisho tantienquio iquendac.

Pidipos 2:16

Adash chieshtoenquio icquin umbi chuibambued tantiaquin: Esuquidistu nidaidën padpidec choaid uëshëmbi mibitedi isec: Bëdambuen naondambi. Adoac Esus tantiec: Aidbëd iquendabi, quecuededendac. Adecbidi capucuennec chonoadquin ambembi chuibenniambo iccondambi, quequin tantiendambi.

Pidipos 2:19

Abi tantiaquid icsho Nuquin Icbo Esusën tantiamiac Timoteo mibi yacno nëbi nidmete bunebi. ¿Mitsipadec aido tabadeque? Istan, quequin nidmembi. Adoac mibitedi istanshun chuituidac cuishonquec bëdambo ictsiabi.

Tesadonica 1 2:1

Cun utsibo, mibitedi yacno tauambuec abembi mibi isec nidambo iccondambi. Adenquio icquin umbi Esus chuibansho mimbi tantiabenondac.

Tesadonica 1 3:6

Adoac mibi tabadacno istanec choshon nëbi Timoteon mimbi nabanaid naden chuituidoshi: Esus tantiaquido yec utsibobëd tantiananquiec tabadosh, quequin chuiposhi Timoteon. Adashic: Pabado chedo bëdambo iccondash. Aido padpiden iste bunebi, quiosh Tesadonica yacnocquido, queposh Timoteo. Adecbidi mibitedi istante bunquiebi.