Santiaco 1:12 - El Nuevo Testamento en matsés

¹² Adecbidi natiamiantequid icnuc Nuquin Papan Chiaid niaquenquio yec chieshtoenquio icquin abi tantiaquid icsho Nuquin Papan bëdambo icmendac. Adoshombic ambi chiampicpadombuen: Bëdamboshëcquid menequin Umbi chiaid niaquenquio yec mibi ubi tantiaquiec tabadoque. Ubëd ënëdenquio yec tabadtequid mibi icmenu, caindac Nuquin Papan abi tantiaquido chuiquin.

Santiaco 1:12 ပူးပေါင်းရင်းမြစ်များ

Mateo 10:22

Esus tantiaquid nec, queshun matses dadpenshun mibitedi chieshënendac. Adoaqui chieshtoenquio icquin ubi tantiasho Nuquin Papan abi yacno mibi tabadmendac.

Mateo 25:34

Adshumbic Abitedishun Icbombo icquin abiuc icquido ubi tantiaquido naden chiendambi: Cun Pan mibi bëdambo icmiaido neque. Ubëdi tabadec cho. Matses uabi yec ëndenquimboshë mibitedi caic: Aido ubi tantiaquido icmeshun ubëdi bëdamboshë yacno tabadmendambi, quequin Cun Pan tantiamiaido yec ambi namiacno ubëdi bëdambuec tabadec cho, caindambi, quepondash Esus.

Ducas 6:22

Matsesën Tishaid Esus tantiaquid nec, queshun utsibon mibitedi chieshënquin icsambuen chuishunquin mamënshunendac. Adembidi: Icsambocquid nec, queshun mibitedi cuenmendac. Adoaid icshobi Nuquin Papan mibitedi bëdambo icmendac.

Doma 5:4

Aden chieshtoenquio icquin Esus tantiasho Nuquin Papan nuqui bëdambuen isquin: Bëdambo iquec, caindac. Adoac: Uënësacsho uincuenmeshun abi yacno tabadmendac ambi chiampicpadombuen, quequin nuquitedi cainec.

Doma 8:28

Nuqui naden tantiec. Ambi tantiampicpadombuen abi tantiaquido bëdambo icmete bunquin Nuquin Papan bëdambuen nashunec. Aido ambi tantiampicpadombuen tantiamebenquin: Nuquibi icnuc cho, caquin cuënaido nec.

Codinto 1 2:9

Nuquin Papan chuiquin dada uamiampid nad iquec: Nuquin Papan abi tantiaquido tabadmenun nacnenaid iquec. Aidi matsesën tantiacmaid isquin: Nadquio iccosh, quequin chuitiapimbo iquec, quequin chuipampic.

Codinto 1 8:3

Padnuen abi tantiaquidon abi tantiaquiosho Nuquin Papan aido tantiaquiec.

Codinto 1 9:25

Utsi utsiec tsidadash mamëncuededtequid icnuc: Bëdiactsëc titinquemane, queshun dada icsambo icmiantequid nainquiocquin isuidec tabadec. Mamënquin dëniacsho bëdamboshëcquid meniaid bedte abi bunaid badedquio chodquetequid nec. Padnuen nuquitedi bëdamboshëcquid menetequid chodquetemaidquio bednuec chonoadec Esus tantiaquido nec.

Timoteo 2 2:15

Mimbi bëdambuen naoc, Nuquin Papa camenuen bëdambuen nata dacuëdenquio icquin. Umbi naid ma Nuquin Papan isnu, queshun adota. Ambi chiaid bëdambuen isban isbanshun chieshtoenquio icquin Nuquin Papan Chiaidquio chuibanta, mado.

Timoteo 2 4:8

Adec tabadec uënësacshobini matsesën naid abitedimbo tantiaquin cuidnun chuiquid icquin Nuquin Icbobëtan Nuquin Papan: Umbi chiacpadec mibi bëdambuec tabadoque. Ubi yacno ubëdi tabadmequin chuiquidën mauete bëdamboshëcquid meniacbimbuen mibi bëdamboshë icmendambi, caindac. Abi chote uëshën choshon aden Nuquin Icbon ubi chiendac. Adembidi abi chosho iste bunquioquin abi cainquidotedi Nuquin Icbon bëdamboshë icmequin abëdi tabadmendac.

Ebedeo 10:32

Tantia. Cun utsibo. Mibitedi chuinu. Esuquidistu tantiaquido mibitedi yanacsho chieshënquin natiamiaqui chieshtoenquio icquin Esus tantiec mibi bëdambuec tabadondaid bëshunenquio icquin tantiata.

Ebedeo 11:17

Min mado Isaquën tsiuecquido dadpenquioshë iquendac, quequin Nuquin Papan Chiaid abimbo iquec, quequin Abadauanën tantiaquiopampic. Aden abi tantiaquidquio icsho: ¿Umbi Chiaid tantiaquidquiobida Abadauan neque? Isnu, queshun: Min mado abentsëcquidi Isac cuessunneshun ubi tantiaquin pichicatan, Nuquin Papan cac pichicanuen Abadauanën aton mado seshunetsempampic.

Ebedeo 12:5

Naden chiaid mibitedi bëshunac: Cun bacuëbo nec, quequin Nuquin Papan bëdambuen chiaid chuiquin dada uampid mibi bëshunaid nad iqueque. Tantia: Mimbi icsambuen nasho issun Nuquin Papan: Aden nainda, quequin tantiamiac chieshenda. Adembidi: Icsambuen tantiaquin mimbi nabaneque. Bëdambuen tantiaquin nata, cac chieshtoenquio yec dayacquio yec bëdambuec tabadta.

Ebedeo 6:15

Aden chuisho tantiashun chieshtoenquio icquin cainec Abadauan: Nuquin Papan ambi chiacpadombuen naindac, quequin abi tantiasho Nuquin Papan nashumpampic.

Santiaco 2:5

Tantia, cun utsibo. Umbi tantiaido icsho mibitedi chuinu. Atona nibëdquido icsho Nuquin Papan abi tantiaquido icmequin ambi namiaidquio icmiac. Nuquin Papa bëdambocquid icquin ma ubi nashunnu, quequin ma tantianu. Adoac aid tantiaquido yec: Nuquin Papan ambi chiampicpadombuen bëdambuen isquin uënësacsho abi yacno abëdi tabadmequin abi tantiaquido icsho ubi bëdamboshë icmendac, ma quenu, quequin ambi namiaidquio nendac.

Santiaco 5:11

Natiamiantequid icnuc chieshtoenquio yec cuishonquec tabadsho issun Nuquin Papan bëdambo icmendac, quequin nuquitedi tantiec. Natiamiantequid dadpen icnubi chieshtoenquiocquid Obo icpampic. Adquid icsho issun daëd uaquin Nuquin Icbon nashunquin meneuapampic, quequin chiampid mibitedishun tantiec. Matses cuidte bunenquiocquid yec uënësquio icquin tantiaquin nashunquidquio Nuquin Icbo nec, quequin mimbi tantiec.

Petedo 1 3:14

Adec bëdambuec tabadsho issun icsambo icquidën natiamequin mëyanacsho mibitedi Nuquin Papan mibi bëdambo icmetsiashe. Utsibo dacuëdënec natiec tabadenda.

Petedo 1 4:13

Esuquidistu chieshënquin natiamenëdacpadombuembidi aid tantiaquido icsho ubitsen natiamec, quiash cuishonqueta. Abi yacno ubi buannuec nadatiambocquid yec Cun Icbo Esus padpidec choec, quiash aidbëd cuishonquequionosh bëdambuec tabadta.

Petedo 1 4:14

Esuquidistu tantiaquid nec, queshun chieshënquin icsambuen chuishunshobi Nuquin Papan mibi bëdambo icmendac. Adoshon Nuquin Papan aton Mayan Bëdamboshëcquid mibëd cuëshëdmenquio icquin tabadmendac.

Petedo 1 5:10

Aden utsibon chieshënquin natiamiaido yec iuec iuecpactsëc mibitedi mëyadec tabadendac. Adec tabadsho Nuquin Papan bëdamboshëcquid icmequin dayacquiocquid yacbimbuecnuc chieshtoenquio icquid mibi icmendac. Adembidi nuqui tantiaquidquio icquin ambi Esus tantiamiaido icsho abi yacno buanshun nuqui bëdamboshëcquid icmiac ënëdenquio yec Esuquidistubëd daëdash abentsëc yacbimbuecnuc tabadmendac.

Petedo 1 5:4

Aden Esus tantiaquido chuibanquidën bëdambuen nabannubien aton Chuiquid Tapambo yec Nuquin Icbon nidaidën padpidec chouashun utsibo ismequin: Mimbi bëdambuen nabanoc, queshun chunidtiapimbo ictequid shocosh mauete bëdamboshëcquid mibitedi menendac.

Uan 1 4:19

Nuqui tantiaquidquio icquin Nuquin Papan tantiamiac aid tantiaquid yec utsibobëd tantiananquidombo nuquitedi nendac.

Esusën Uan ismiaid 2:10

Aidon ubi mëyantsiash, quec dacuëdec natienda. Mayan Icsa Satanasën: ¿Ada Esus tantiaquido chieshtoenquio ictsiashe? Tannu, quequin namiacpadombuen chieshëmënquidon mibitedi utsi utsien quënën tsadunendac. Adoac 9tedec ushec mibitedi natiec mëyadendac. Puduenabi yec chieshtoenda. Ubi tantiaquido icsho: Cuessunnenu, cac dacuëdenda. Aidon cuessunniacsho bëdamboshë icquid meniacbimbuen ubëdi tabadmendambi padpidec uënëstiapimbo icnuc.

Esusën Uan ismiaid 3:19

Mimbi icsambuen naic, quequin aton papan aton bacuë ënmiacbimbuen ubi tantiaquidon icsambuen nasho issun: Ambi icsambuen naid ënmenu, quequin natiambo icmembique. Nuquin Papabëta ubi padpidembuen tantiabenuaquin mimbi icsambuen naid ënash bëdambuec tabadta.

Esusën Uan ismiaid 3:21

Mayan Icsa Satanasën: Icsamenu, caqui chieshtoenquio icquin ubi tantiaquid icsho ubëd tabadmequin ubëtambi chuiquid icmequin ubëdi chuiquid tapan tsadte dapan tsadmendambi. Adoacbimbuec chieshtoenquio icquin Cun Pan chiaidtedi naquin nainash aidbëdi tabadquin aidbëtambi abitedishun icbombo nebi.