Petedo 2 3:7 - El Nuevo Testamento en matsés

⁷ Aden ambi uampid abubëd nidaid nëbi icquid ambi tantiacpadën Nuquin Papan naindac. Ambi icsambo icquido abitedi cuidte uëshën nëdëncaquin nibëdanmenumbi nëbi dayunuaic. Adembidi matses abitedi Ambi Chiaid niac niacquido nëdëncaquin nibëdanmendac.

Petedo 2 3:7 ပူးပေါင်းရင်းမြစ်များ

Mateo 10:15

Mimbi adosho issun abitedimbo cuidte uëshëmbi Nuquin Papan aido cumapenquien cuidendac. Ëndenquimbo shubu dadpen icquid Sodoma yacnocquidobëta Comoda yacnocquidotedi cuidquin Nuquin Papan uesquin uënës uapampic. Aid daëd yacnocquido bëdiactsëc cuidshun mimbi chuibansho tantienquio icquidoen cumapenquien cuidendac, quepondash Esus abëd icquido chiec.

Mateo 11:22

Nuquin Papan abitedimbo cuidte uëshëmbi: Nadatiambo icquin nabanquin ismiacmaido nec, queshun Tido yacnocquidobëta Sidon yacnocquido bëdiactsëc cuidendac. Adoshombic: Nadatiambo icquin nabanquin ismiaqui mibitedi tantienquio icquido nec, queshun Codasin yacnocquidobëta Betsaida yacnocquido cumapenquien cuidendac.

Mateo 11:24

Nuquin Papan matses abitedi cuidte uëshëmbi: Nadatiambocquin nabanquin ismiacmaido nec, queshun Sodoma yacnocquido bëdiactsëc cuidendac. Nuquin Papan Chomiaid icquin umbi ismebuedo Capednaun yacnocquidoen cumapenec sidquenuc cuidendac, quequin abi tantiesabo chuiquin Esusën chushcapanëdash.

Mateo 12:36

Ambi cuidte uëshëmbi Nuquin Papan: ¿Ada bëdambuen tantiaquin chiec onquedennio? quequin matses abitedi chuimendac.

Mateo 24:35

Abubëd nidaid nibëdanendac. Padnuen Umbi Chiaid nibëdantiapimbo icquid icnuc umbi chuibocpadquio iquendac, quepondash Esus.

Mateo 25:41

Adoshombic Abitedishun Icbombo icquin ubi tantiesabo yec cun copioc tabadquidotsen naden chiendambi: Nuquin Papan cuidtequido icquin mibi icsaid ënte bunenquio icbuedo mibitedi neque. Nuquin Papan Mayan Icsa Satanasbëta podobitsi icsabo cuidacno ënëdenquio yec chian annëdënquiacno nid, caindambi.

Madcos 6:11

Mibi iuedenquio icquin mimbi chuibansho tantiate bunenquiocsho isash nidanneta. Adec nidnumbi: Nëmbo icquido Nuquin Papa tantiesabo yec icsaquidombo icsho Nuquin Papan cuidtequidombo mibitedi nec, quequin ismec nidaid putu tabesqueta, capanëdash Esusën abëd icquido chuiquin.

Uanën dada uaid 12:48

Ubi tantiate bunenquio icquin Umbi Chiaid niac niacsho ambi abitedimbo cuidte uëshëmbi umbi chuibocpadombuen ubi tantiesabo Cun Pan cuidendac.

Doma 2:5

Aden: Nuquin Papan Chiaid niac niacbuedëmbi ënta, caqui: Padi Umbi naiduidi naic bëdambo iquebi, queshun Nuquin Papa tantiate bunenquio icquin aidën chiaid niac niacquin icsambuenuidi naic mibi tabadec. Adquid icsho Nuquin Papan matsesën naidtedi chuibante uëshëmbi mimbi icsambuen naidtedi chuibanshun nëishënshun Nuquin Papan mibitedi cuidquiendac.

Codinto 1 3:13

Adshumbic iuecshun matses cuidte uëshëmbi choshon Ambi Chiaid chuibanquido abitedi chuibanmendac. Aid uëshëmbi: ¿Ada bëdambo iqueque? Isnu, queshun ambi nacnenaid pichicaquin tanacbimbuen ambi bëdambuen naidbëta ambi icsambuen naid chuimendac.

Pidipos 1:28

Mibi chieshënquidon chieshënac natienda. Nuquin Papan mibi chieshënquido uënësacsho chian annëdënquiacno nësecaindac. Ambi chiacpadombuen Esus tantiec uënësashien mibitedi Nuquin Papa yacno tabadendac.

Tesadonica 2 2:3

Aden muaquin chiaid tantiash: Abimbuen cachitec, quequin tantienda. ¿Nuquin Icbobada chopadic? Padenquio. Icsamboshëcquidoba choendac. Nuquin Papa caidën chiaid tantiatiapimbo iquebi, quec matses icsambuec tabadnubien Nuquin Papa chieshënquidquio icsamboshë icquidba choash matses abitedishun chuiquid tapa iquendac. Aid Nuquin Papan cuidtequidquio nendac.

Timoteo 1 6:9

Padnuen piucquid dadpen bedshun dayun uate bunquin badedi chieshtoquin Esus tantienquio yantsiash. Adshun Mayan Icsa Satanasën tantiamiacpaden abi bunaiduidquio bednuen mëmunenquio icquin icsambuen nabantsiash. Aden Nuquin Papan Chiaid niacniacquin icsambuen naic quenenash adenuidi naic uënësash mëyadtequid yacno nidendac.

Ebedeo 12:29

Nadatiambocquid yec cute nëdënquequin abitedi nibëdquiecnuc pichicaquidbimbuecquid Nuquin Papa neque. Aidquio tantianuna.

Petedo 2 2:9

Adembidi nëbi abi tantiaquid icsho Nuquin Papan cuidenquio iquendac. Utsibon chieshënaqui chieshtoenquio icquin abi tantiasho bëdambo icmendac. Padnuen icsambuen naic tabadquido cuidquid icquimbi matses abitedi cuidte uëshëmbi cuidnun nanu, quequin Nuquin Papan nëbi cuidenquio iquec.

Petedo 2 3:10

Adnubien matses: Nëbi choec, quenquio icnubi Esus badedquio choendac. ¿Nëid uëshëmbi ampequidën cuna bedec choec, quequinda tantiapec? Padenquio. Adacbimbuec: Nëbi choec, quequin tantienquio icnubi Esus choendac. Choshon acquimbuen toncac abitedi nibëdanendac. Uispa yec inchëshën uëshë yec badiadën uëshë yec quec icbuedi nibëdquiecnuc nëdëncaindac. Nidaid abichobimbo nëdënquenuc aidën icquidtedi pichiquendac nibëdquio yec.

Petedo 2 3:12

Adombuen abitedimbo nibëdquionoc nëdëncaindac, queshun bëdambuec tabadquin utsibo tantiamequin ambi naid chuibanec mibitedi bëdambuec tabadta. Esus choan Nuquin Papan cuidquin ambi uaid abubëta nidaid nibëdanmequimbi aidën icquidtedi pichicaquin nibëdanmendac.

Uan 1 4:17

Esus tantiaquid yec utsibobëd tantiananquidquio yec nuquitedi: Esuquidistun nacpadombuen nidaidënshun naquid nebi, quequin tantiaquid icquin Nuquin Papan cuidte uëshë dacuëdënenquio nuqui iquendac.

Udas 1:7

Adecbidi shubu dadpen icquid Sodoma yacnocquidobëd Comoda yacnocquido chido piucquid bedec chudadquid dadpen icpampic. Adecbidi aton chidopenquio chudquid dada dadpen icpampic. Adecbidi chido aton bënëpenquio chudmequid icnubi aton dada utsibëdi chichudnanquido icpampic. Adecbidi shubu dadpen icquid utsi utsiec anoentsëc icquido icsambuecbidi tabaduapampic. Adec tabadsho issun cuidquin Nuquin Papan natiamequin uesquin nëdëncapampic. Aden cuidampid tantiaquin: Icsambuen naquidotedi chian annëdënquiacno nësecaquin cuidquidquio Nuquin Papa nec, quequin nuqui tantiec.

Esusën Uan ismiaid 17:11

Bëdi dapabimbuecquidën mapi 7ted icquid ënden ictennedi nëbi nibëdec. Uënësnëdaidi choashic umbi ismebued acte ëquëducuësh chobuedquiobidi padpidec chuiquid tapa icsamboshëcquidquio 8 icquid aid nendac. Adquid icquin umbi chuibued chuiquid tapabo 7tedshun namiacbimbuen aton matses icsambuenshë tabadmendac. Adosho issun iuecshun cuidquin nibëdanmequiendac.

Esusën Uan ismiaid 17:8

Mimbi isbued bëdi dapabimbuecquid ënden ictennedi nëbi nibëdequi iuecash aidquiobidi abi tabadaid nidaid shëcuë ëquëducuësh padpidec choendac. Adacsho iuecshun cuidquin nibëdanmequiendac. Aden nibëdanmiabi icnubi ëndenquimbo nidaid uabi Nuquin Papan tantiampicpaden abëd tabadmetequido aton cuëmëdquid dadauate dapan dada uaid icnubi utsibo aton cuëmëdquid aid dada uaten dada uambo icquido nidaidën tabadquido tantiadempambo yec tabadendac aid bëdi dapabimbuecquid isash, queposh Nuquin Papabëd icquid.

Esusën Uan ismiaid 20:11

Adshumbic padpiden matses cuidte ismeposhi. Aden ismiac tsadte tapa ushumboshë icquidën Nuquin Papa tsadsho ispombi. Icsambuen naquido cuidquidquio yec dacuëdampambuec Nuquin Papa isadnuc abubëdi nidaid abichobi nibëdquio yamposh, padpidec isadtiapimbo yec.

Esusën Uan ismiaid 21:1

Aden ismeboshombic padpiden ismeuac abubëd nidaid chucambo icsho ispombi. Abubëdi nidaid shëni nibëdnuc adecbidi acte dapa mad caidtsen nibëdquio icposh.