Petedo 2 2:4 - El Nuevo Testamento en matsés

⁴ Ëndenquimboshë nidaid uabi icnuc Nuquin Papabëd icquidon utsin utsinquien: Umbiquien abitedi namenu, quequin abi dëniacte bunsho issun Nuquin Papan inchëshquio yacno nidmeshun uidënuaquin bëtashpampic. Iuecshun abitedi cuidte uëshën chian annëdënquiacno nësecanumbi nabono, queshun adopampic.

Petedo 2 2:4 ပူးပေါင်းရင်းမြစ်များ

Mateo 25:41

Adoshombic Abitedishun Icbombo icquin ubi tantiesabo yec cun copioc tabadquidotsen naden chiendambi: Nuquin Papan cuidtequido icquin mibi icsaid ënte bunenquio icbuedo mibitedi neque. Nuquin Papan Mayan Icsa Satanasbëta podobitsi icsabo cuidacno ënëdenquio yec chian annëdënquiacno nid, caindambi.

Mateo 8:29

Aidon podobitsi icsabon oncamiacpadombuen cumapenec cuëdquin Esus naden chuipanëdash: ¿Atotsi ubitedi canuec ne? ¿Nuquin Papan Madombo icquin ubi natiamequin cuidnuecta cho? ¿Nuquin Papan abitedi cuidte uëshë choabi icnubida ubitedi cuide? capanëdash podobitsi icsabon oncamiac.

Madcos 5:7

Adsho issun aid dapuduedaid chuiquin Esusën: Dapuduen, caqui podobitsi icsa cumapenec cuëdec: ¿Atotsi ubi canuec ne? Mimbi namiaidpenquio nebi. Esus, nadatiambocquid Nuquin Papan Madombo icquin ubi cumapenquien mëyanenda, quepanëdash podobitsi icsa dapuduedaid Esus chiec.

Ducas 10:18

Adoaquien Esusën: Umbi nadatiambocquin namiac mibitedishun podobitsi icsa dadpen dapuduenmebedednubi Mayan Icsa Satanas abucuësh abu bedquetanacbimbuec badedquio paëdsho isombi.

Ducas 8:31

Adashic: Mibi nadatiambocquid neque. Mëyadmequin ënenquio icquin cuidtequid yacno ubitedi nidmenda, quiashic

Uanën dada uaid 8:44

Min papabimbuecquid Mayan Icsa Satanas nec. Aid bunacpadenuidi nate bunquid yec aidën mado mibitedi nec. Ëndenquimboshë Nuquin Papan tauambuen matses uambi Mayan Icsa Satanas cuessunnianquidquio yampampic. Adquid iquec Nuquin Papan chiacpadombuen namenquio yec chieshëmënec cumapenec muaquidquio nec. Aton padibi icquid yec bëdambuen chuimenquio icquin matses muamequidquio nec.

Doma 11:21

Isadaidbon Esus tantienquio icsho Nuquin Papan bëdambuen istiapimbo icpanëdash. Adembidi matses utsibo icquin mimbi Esus tantienquio icsho Nuquin Papan mibitedi bëdambuen istiapimbo icuaindac.

Doma 8:32

Nuquin Papan nuqui tantiaquin aton Madombo cudasenquio icquin nuqui cuidmenquio icnuen aton Madoded cuidmequin uënës uamepanëdash. Adshumbic aid tantiasho nuqui bëdambuen isquin uënësacsho Aton Madobëd tabadmequin abitedi menendac.

Petedo 2 2:11

Padnuen Nuquin Papabëd icquido nadatiambocquid icquimbi muaquin chuibanquido icsambuen chuishuntiapimbo iquec. Aden dadpen tantiaquido icnubi aid udictsëcquio cumapenen tantiaquidquio icquin Nuquin Papabëd icquidon: Aido baded cuid, Papa, cainquio iquec.

Petedo 2 2:5

Adshumbic iuecquio ictanquin matses abitedishun Ambi Chiaid niacniacquec icsambuec tabadsho issun nidaid abichobi acte mabudadmequin Nuquin Papan cuidquin matses abitedi nibëdanmepampic. Padnuen Noe: Bëdambuec tabad, quequin Ambi Chiaid chuibanquid icsho Noebëta matses 7tedpactsëc Nuquin Papan cuidenquio icpampic.

Petedo 2 2:9

Adembidi nëbi abi tantiaquid icsho Nuquin Papan cuidenquio iquendac. Utsibon chieshënaqui chieshtoenquio icquin abi tantiasho bëdambo icmendac. Padnuen icsambuen naic tabadquido cuidquid icquimbi matses abitedi cuidte uëshëmbi cuidnun nanu, quequin Nuquin Papan nëbi cuidenquio iquec.

Uan 1 3:8

Padnuen ënenquiocquin icsambuen nabanquido Mayan Icsa Satanasën namiaido nec. Ënden Nuquin Papan abitedi uabi icnubi Mayan Icsa Satanasën tauaquin icsambuen nampid yequi abi icsambuen namequid nec. Aidën namiaido matses icsho isash Nuquin Papan iuabo icmequin Mayan Icsa Satanas bedshunnuec Nuquin Papan Madombo Esus chopanëdash.

Udas 1:13

Aido acte dapa cumapenec bocquec tëccuasquequidën cuëmano nushanuaquin icsa uacbimbuen icsambuen naquido nec. Aido uispa chënquebuedi bënnudacbimbuen bëdambuen tantiamenquiocquido nec. Adec muasho cuidquin Nuquin Papan puduentiapimbo yec inchëshquimboshë yacno nidmendac.

Udas 1:6

Adecbidi Nuquin Papabëd icquidobi Aidën Chiaid niac niacte buncuenash Nuquin Papabëd icte bunenquio yampampic. Adsho issun aidotedi puduentiapimbo yec inchëshquioshë yacno nidmequin Nuquin Papan bëtashpampic. Mibitedi icsamboshë iquec, queshun abitedi cuidte uëshën cuidquionombi adopampic.

Esusën Uan ismiaid 20:10

Adshumbic aido muaquin icsambuen namequidtsen Mayan Icsa Satanas bedshun aben icquid tapa acte ëquëducuësh chondaidbëta nidaid shëcuënuësh chondaid ënden nësecaondacnombobidi ënëdenquio yec chian annëdënquequid icsamboshë annuadquid yacno Mayan Icsa Satanastsen nënendac. Adoac ënëdenquio yec mëyadec aido tabadendac, quequin ismeposhi.