Petedo 2 2:14 - El Nuevo Testamento en matsés

¹⁴ Muaquido iquec utsin chido isash cumapenec chudte bumpec. Nuquin Papan Chiaid niacniacquin abi icsaid ënenquio iquec. Adquid icquin Esus tantiactsëcquido utsi tantiamequin icsamepec. Abi bunacpadombuen muaquin piucquid dadpen bedte bunquido yec icsamboshëcquido nec.

Petedo 2 2:14 ပူးပေါင်းရင်းမြစ်များ

Mateo 12:34

Ma mibitedi nisibimbuecquido neyoc. Adquido icquin ¿Mitsipaden bëdambuen tantiaquin mimbi chuibampe? Ma mimbi icsambuen tantiaquin utsibo icsambuen chuishumboc.

Mateo 23:14

Moisesën chiampid tantiamequidobëd padiseobo bëdambocquido danmianquido yec icsambocquido icsho Nuquin Papan cuidtequidombo mibitedi nendac. Muaquin nianten shubu bedshunquido mibitedi nec. Nuquin Papa tantiaquidquio danmenuen utsibo tantiamequinuidi cumapenec cuëdquin Nuquin Papa chiacbimbuen mimbi chiannepec. Aid abimbo mimbi chienquio iquec. Adquid icsho issun Nuquin Papan mibi cumapenquien cuidtequidombo nendac.

Mateo 25:41

Adoshombic Abitedishun Icbombo icquin ubi tantiesabo yec cun copioc tabadquidotsen naden chiendambi: Nuquin Papan cuidtequido icquin mibi icsaid ënte bunenquio icbuedo mibitedi neque. Nuquin Papan Mayan Icsa Satanasbëta podobitsi icsabo cuidacno ënëdenquio yec chian annëdënquiacno nid, caindambi.

Mateo 5:28

Aden chiaid niac niacquin icsambuen naquid icnubi nadquidbidi icsambo icuaic. Aton chidopenquio isec: Uid chudtiadquio icchitebi, quequin otacquio tantiaquin isequi adecbidi matses icsapec.

Madcos 13:22

Adquid uëshë icnuc: Nuquin Papan Chomiaid Quidistu nebi, quec muaquid utsi utsiec yanendac. Adecbidi: Nuquin Papan oncamiaid nebi, quec muaquid utsi utsiec iquendac. Aidon: Ubi tantiaquid icmenu, quequin Nuquin Papan tantiamiaido chieshënquimbi nadatiambocquin nabanquin ismendac. Adosho issun Nuquin Papan tantiamiaidonquiobi utsin utsinquien ubi tantienquio ictsenendac.

Uanën dada uaid 5:44

Matses: Mibi bëdambo iquec, cameteuidi bunquin Nuquin Papambo mibitedishun tantienquio iquec. Aden Nuquin Papa: Mibi bëdambo iquec, mimbi cametiapimbo iquec, quepondash Esus.

Doma 16:18

Nuquin Icbo Esuquidistun chiacpadombuen nainquio icquin aidon: Umbi chiaid tantiata, quequin abi bunaidquio namequin muaquin Esus tantiabentsëcquid icsambuen namec.

Codinto 1 11:19

Adec cuësh cuëshëdquid mibi yacno icac bëdambo ictsiash. Adec utsi utsiec cuëshëdsho issun mimbi naden tantiatsiac. Cuësh cuëshëdenquiocquid icsho issun: Chieshtoenquio icquin Esus tantiaquidombo nec, quequin mimbi tantiatsiac.

Epeso 2:3

Ënden Esus tantiesa yec icsambuen naidbëta icsambuen tantiaidtedi tantiaquin nabanec nuquitedi tabadpondac. Adec tabadquin nuqui bunacpadombuen nabanquin Ambi Chiaid niacniacsho issun Nuquin Papan nëishënshun: Cumapenen cuidembi, caido nuquitedi icpondac.

Epeso 4:14

Adec tabadquido yec bacuëmpin utsi utsien tantiacpaden tantiaquidpenquio nuqui nendac. Cunquequidën ëquë ëquëen tsidunacbimbuen muaquidon utsi utsien chuibansho tantiash badedquio: Abimbo caic, quec mua uadec. Aido icsambuen tantiaquido icquin chuisho tantienquio iquendac.

Codosas 2:18

Nuquin Papabëd icquido tantiaquid utsibon: Ubien bëdamboshëcquid nec, quesa nebi, quequin muaquin chuisho tantienda. Ushquin isacbimbuen isombi, quequin muaquin chuisho adembidi tantienda. Adembidi: Ubien dadpen tantiaquidquio nec, quequin chuisho tantienda. Aidon: Umbi tantiacpaden nainquio yec mibi icsambo iquec, quequin icsambuen chuisho tantienda.

Santiaco 1:8

Adquid: Nëbi Nuquin Papan ubi nashuntsiash, quebuedi badedquio: Ubi nashunenquio ictsiash, quequin utsi utsien tantiec bëdambuec tabadtiapimbocquid nec.

Petedo 2 2:18

Adec muaquido bëdambuec onquiacbimbuec ambembi chiec onquec. Utsin chiaid tantienquio icquin ambi tantiaiduidi naden chiec: Mibi bunacpaden mimbitsen: Nata, cac Esus tantiactsëcquin Nuquin Papan Chiaid naquin ambi icsambuen naid ënuidbuedi padpidembuec icsaindac. Aton chidopenquio isec chudte bunquin ambi icsambuen naid ënte bunenquio iquec. Chido dada utsi chudmete bunquid chudmequin icsambuen namec. Adquidotedi Nuquin Papan cuidtequidombo nec.

Petedo 2 2:3

Muaquidon chuisho tantienda. Aidon piucquid cumapenec bunquin aid dadpen bedquimbi ambembi chiaidquio mibitedi chiec. Muasho tantiashun ambi ëndenquimboshë tantiampicpadombuen aido cumapenen Nuquin Papan cuidtequidombo nendac.

Petedo 2 3:16

Umbi chuibuedbidi chuiquin Pabadon dada uadednepaccondash. Aidën dada uaid utsi utsiec baded tantiadenquio iquec. Adsho issun utsibon tantesauatsëcquidën: Esus tantiaquidën nadoquid, quequin abimbo tantienquio icquin Nuquin Papan Chiaidbëta Nuquin Papan tantiamiac Pabadon chiaidquio tantienquio icquin icsambuen chuibanec. Adquid Nuquin Papan cuidpatsiash.

Uan 1 2:16

Nuquin Papa tantiesabo icquin Aidën chiacpadombuen naisa nec. Adquid icquin abi bunacpadombuenuidi icsambuen nate bunquido nec. Utsina isash aid bedte cumapenec bunquido nec. Aden ambi bedaid caic: Umbi dadpen bedbued cuna dadpen icnuc bëdambo iquebi, quequido nec.

Udas 1:11

Aido cuidtequido icsho tantiac uënësquioshë iquec. Cain campidbimbuecquid aido nec. Nuquin Papan Chiaid niacniacquin abi bunaid naiqui icsaic. Aido piucquid dadpen bedteuidi bunquido yec Badan caidbimbuecquido nec. Adembidi Nuquin Papan Ambi Chiaid niacniacsho Code uënësmepampic.

Esusën Uan ismiaid 12:9

Aden cuenmiaquien matses tabadacno nidaidën nisi dapabimbuecquid aton iuabobëdi budbudposh. Aidi ëndenquimboshë icpampid Mayan Icsa cashumbic Satanas quequin cuënaid neposh. Aidëmbi nëbi matses abitedimbo mua uaquin icsamequin iuate bunquiec.