Petedo 1 4:13 - El Nuevo Testamento en matsés

¹³ Esuquidistu chieshënquin natiamenëdacpadombuembidi aid tantiaquido icsho ubitsen natiamec, quiash cuishonqueta. Abi yacno ubi buannuec nadatiambocquid yec Cun Icbo Esus padpidec choec, quiash aidbëd cuishonquequionosh bëdambuec tabadta.

Petedo 1 4:13 ပူးပေါင်းရင်းမြစ်များ

Mateo 16:27

Matsesën Tishaid yec Nuquin Papa yacnouësh cun Pabëd icquidobëd bëchamauanquiec choshon Nuquin Papan abitedishun Icbo icmiaid icquin matses cuidte chiendambi. Nuquin Papa tantiec bëdambuec tabadquid icsho aidbëd tabadmequimbi Nuquin Papa tantienquio yec icsambuen naic tabadquido icsho natiamequin cuidendambi.

Mateo 25:21

icbon: Ai, cun iua bëdambocquid mibi nec. Umbi daëdpactsëc meniondaidi daëd uaquin umbi chiacpadombuen mimbi bëdambuen nac. Nëbi dadpen namequid icta. Ubëd cuishonquec tabadec cho, caposh.

Mateo 25:23

icbon: Ai, cun iua bëdambocquid mibi nec. Umbi chiacpadombuen naquin mimbi cuna daëduaque. Nëbi mibitsen dadpen namequid icta. Mibitsen ubëd cuishonquec tabadec cho, caposh.

Mateo 25:31

Adshumbic Esusën padpiden abi chote chuiuapondash: Matsesën Tishaid yec abi yacnouësh abëd icquidobëd choec: Abitedishun Icbombueni nec, quiash bëchamauampambuec choequi cun tsadte dapa bëdamboshëcquidën tsadtoquin abitedimbo ismendambi.

Mateo 25:34

Adshumbic Abitedishun Icbombo icquin abiuc icquido ubi tantiaquido naden chiendambi: Cun Pan mibi bëdambo icmiaido neque. Ubëdi tabadec cho. Matses uabi yec ëndenquimboshë mibitedi caic: Aido ubi tantiaquido icmeshun ubëdi bëdamboshë yacno tabadmendambi, quequin Cun Pan tantiamiaido yec ambi namiacno ubëdi bëdambuec tabadec cho, caindambi, quepondash Esus.

Mateo 5:12

Aden utsibon chieshënaqui chieshtoenquio yec cuishonqueta. Adembidi ënden min tsusedpabo Nuquin Papan oncamiaidon chuibansho issun chieshënquin utsibon cuessunnepampic. Aden nampid icnuc utsibon chieshënac: Ubi bëdambuen isquin uënësacsho abuc abëdi tabadmequin ubi bëdamboshëcquid menendac, quiash cuishonqueta, quequin Esusën chuipanëdash.

Madcos 8:38

Esus tantiaquid yec ambi chiaid tantiaquid nebi, quequid icquimbi ubi tantiesabo icsambuec tabadquido dacuëdënquin ubi caic: Aid tantiaquid nebi, catiapimbocquid icsho isash nadendabi. Matsesën Tishaid icshobi Nuquin Papa nadatiambocquidquio icquin abitedishun Icbombo icmiac Cun Pabëd icquido bëdamboshëcquidobëd choshon nidaidënshun umbitsen: Nëid ubi tantiaquid nec, cauatiapimbo iquendabi, quepanëdash Esus.

Ducas 17:30

Aden chiashic: Umbi chuibocpadquiec matses icsambuecshë tabadendac. Adnubini Matsesën Tishaid yec chouaindac.

Hechos 16:25

Adoaquien inchësh poctsenquio Pabadobëd Sidas Nuquin Papa chiec onquepanëdash. Adecbidi Nuquin Papan naid chiec cuëdëmpanëdash. Adec cuëdënsho quënën tsadunaid utsibon tantianubi

Hechos 5:41

Puduenmiac: Nuquin Papan namiacpaden Esus chuibansho mëyanac bëdambo iquebi, quec cuishonquecuededpanëdash.

Doma 5:3

Nadectsen nuquitedi cuishonquec: Abi tantiaquido icsho utsibon chieshënquin natiamiaqui bëdiactsëc tantiactsëcbuedi chieshtoenquio yec tantiaquidquio yanebi, quectsen nuquitedi cuishonquendac.

Doma 8:17

Cun mado nec. Cun champi nec, queshun nëbi Nuquin Papan ambi chiampicpadombuen bëdambuen isquin uënësacsho abëdi tabadmequin nuqui bëdamboshë icmendac. Adoaid yec Esuquidistubëd nuqui tabadendac. Esuquidistu mëyanquin natiamequin mëyadmequiopanëdash. Adembidi chieshënquin natiamequin nuqui mëyadmendac. Adoaid yec iuecpactsëc yash Esuquidistubëd bëdamboshë yacno tabadsho: Mibi bëdambo iquec, quequin Nuquin Papan chiendac.

Doma 8:18

Aden Nuquin Papa yacno bëdamboshë icte cainec tabadquin nuqui nidaidën natiec tabadaiduidi ma nuqui tantiatiapimbo iqueyoc.

Codinto 2 1:5

Esuquidistu chieshënquin natiamenëdacpadombuembidi nuquitedi Esus tantiaquido icsho natiamendac. Aden natiamiaid icsho adembidi Esuquidistunuidtsëqui nuquitedi bëdambo icmendac: Ma utsibo natiamiaid icsho bëdambo icmenu, queshun.

Codinto 2 1:7

Utsin natiamiaid icquimbi chieshtoenquio icquin abi Esus tantiec, quequin mibitedi tantiec tabadebi. Ubitedi natiamequin chieshënacpadembidi mibitedi chieshënquin natiamesho issun Nuquin Papan nuquitedi bëdambo icmequin chieshtoenquio icmendac, quequin tantiembi.

Codinto 2 4:10

Ubi nidacnoshombi Esus mëyanquin uënës uanëdacpaden mëyanquin uënës uatsen uënës uatsenshobi Esusën bëdambo icmedennioshi. Adoacsho issun: Uënësash uincuennëdaid Esusën bëdambo icmequin dayacquio icmedenniaid nec, quequin utsibon isbededebi.

Codinto 2 4:17

Nuqui natiamiaidtedi ënëdendac. Natiamiaid icbuedi Nuquin Papa yacno tabadec bëdamboshë nuqui iquendac. Uënësesa yanash ënëdenquio yec tabadendabi, quequin nuqui tantiec.

Pidipos 3:10

Aden tantiabenshun Esuquidistu tantiate bunquiebi. Nadatiambocquid icquin Nuquin Papan uincuenmiac nadatiambocquidbidi icquin Esusën bëdambuen tabadmetsiashi, quec Esus tantiate bunquiebi. Nuquin Papan chiacpadombuen nasho natiamequin mëyanac Esus uënëspanëdash. Adombuembidi Nuquin Papan namiacpadombuen nasho mëyanquin cuessunniac bëdambo ictsiabi.

Codosas 1:24

Nëbi mibitedi tantiaquin Esus chuibansho natiamequin mëyanondashi, quec cuishonquec bëdambo iquebi. Ambia chuibansho matsesën Esuquidistu mëyampanëdash. Nëbi Esus tantiaquido mëyantebidi iquendac, quequin Nuquin Papan tantiacpadombuen Esus natiamequin mëyannëdacbimbuen mëyanondashi, quec bëdambo iquebi.

Timoteo 2 2:12

Aden chieshënquin natiamiaqui chieshtoenquio icquin abi tantiec uënësacsho Esusën ambi namiacno tabadmendac. Esus tantiaquidpenquio nebi, quequid icsho: Adembidi Umbi tantiacmaido nec, quequin Esusën Nuquin Papa chiendac.

Petedo 1 1:13

Aden umbi chuibued tantiashun Esus tantiaquido icquin bëdambuen chiaidquio tantiata. Mibi icsate bunacpadec icsainquio yec tabadta. Nuquin Papa bëdamboshëcquid icquin abi yacno tabadmenuen: Bedtan, cac Esuquidistun chouashun abi tantiaquido beduanendac, quequin ënenquio icquin tantiata.

Petedo 1 2:21

Tantia, mibitedi chuinu. Icsambuen nambo icshobi Esuquidistu chieshënquin natiamiac mibitedi tantiec mëyamëdpondash. Ma umbi adomiaid tantiasho chieshënquin natiamiaqui ma chieshtoenquio icnu, queshun Nuquin Papan mibi Esus tantiamepanëdash.

Petedo 1 5:1

Tantia. Esus tantiaquidon chuiquido icsho mibitedi chuinu. Mibi padquid Esus tantiaquidon chuiquid nebi. Mëyanquioquin Esuquidistu natiamequin uënës uasho isondambi. Aidi abitedishun Icbo iquec padpidec nidaidën chouashun bëdamboshë yacno ubi tabadmendac, quiash bëdambo iquebi.

Petedo 1 5:10

Aden utsibon chieshënquin natiamiaido yec iuec iuecpactsëc mibitedi mëyadec tabadendac. Adec tabadsho Nuquin Papan bëdamboshëcquid icmequin dayacquiocquid yacbimbuecnuc chieshtoenquio icquid mibi icmendac. Adembidi nuqui tantiaquidquio icquin ambi Esus tantiamiaido icsho abi yacno buanshun nuqui bëdamboshëcquid icmiac ënëdenquio yec Esuquidistubëd daëdash abentsëc yacbimbuecnuc tabadmendac.

Udas 1:24

Nuquin Papa abentsëcquiobi iquec. Abi tantiasho dayun uaquin nuqui icsamenquio iquendac. Adshumbic: Icsambocquid mibi nec, utsibo quetiapimbo icnuc bëdambocquid icmeshun bëdamboshë yacno abëdi nuqui tabadmendac. Adoac nuqui cuishonquequiendac. Adquid tantiaquin nadonona. Abipadquid utsi nibëdnuc Nuquin Papa abentsëcquiobi iquec. Nuquin Icbo Esuquidistuded cuidshun abi tantiaquido cuidenquio icquid Nuquin Papa nec. Abitedishun Icbombo icquin nadatiambocquin nabanquidquio Nuquin Papa nec. Abitedishun Icbombo icquin abitedimbo namequidquio nec. Aidi ëndenquimboshë yampidi nëbi nibëdantiapimbocquid yec abi iquec. Adquid icsho: Mibi bëdamboshë iquec, canuna ënenquio icquin, Amen. Aidted chuiquin dada uaombi.

Esusën Uan ismiaid 1:7

Esuquidistu abu ushu yacno choendac. Adec chosho matses abitedishunquio isendac. Aden cun matsesën ambi mëyanquin uënës uameshun ambi podo ansebuedquio Esus chosho isendac. Padtemboshë, ashibi cuidpec, quetanec abi cuidte tantiec dacuëdec natiaquiec shubiendac. Esus tantiesabo utsibotsen adecbidi abi cuidte tantiec natiaquiec sedenquec shubiquiendac. Adtequidquio iquendac. Amen.

Esusën Uan ismiaid 1:9

Esusbëd iccondaidquio Uan nebi. Mibëtan Esus tantiaquid yec min utsi nebi. Esus tantiaquid icsho Nuquin Papan namiaido yec aidbëd tabadtequido nuqui nec. Esus tantiasho mibi natiamequin chieshënacpadembidi Esus tantiesabon chieshëmpondashi. Adoaqui Esusën namiacpadec chieshtoenquio icquin abi Esus chuibenniondambi. Adsho issun Esus chieshënquidon quënën tsadunacbimbuen cuenmenquio icnuen acte dapa mad caid nidaid nacnëdquid tapa Padmos caidën tsadunondac abi tsadec nebi.