Petedo 1 2:5 - El Nuevo Testamento en matsés

⁵ Aden Esus tantiaquido yec buintad tsasimbocquid yacbimbuecquido mibitedi nec. Adquid icsho Nuquin Papan aton shubun tabadtequido mibitedi icmendac. Adoac: Nuquin Papa bëdamboshë iqueque. Aidën chiacpadombuenuidi nate bunebi, queshun Esuquidistu uidtsëqui tantiec bëdambuec tabadquid mibi yanendac. Adsho isash nuadte bëda pichicasho shëdacbimbuec: Bëdambo iquec, quependac Nuquin Papa.

Petedo 1 2:5 ပူးပေါင်းရင်းမြစ်များ

Doma 12:1

Tantia, cun utsibo, Nuquin Papan cuidte bunenquio icquin bëdambuen isaido icsho mibitedi chuinu. Abi bunaidquio obeca bëdambocquid pichicaquin ismiacbimbuen: Umbi nate bunaid nainquiocquin mimbi nate bunaid bunebi, Icbo, quequin Nuquin Papa chianneta. Aden chiannec Esus tantiec iccuededtequid nendac.

Doma 15:16

Nuquin Papan adquid icmiac Esuquidistun naid chuibennequidquio icquin matses utsibo nashunquin aidën bëdambuen iste chuibenniombi. Adoac Nuquin Papa ismequin nuadte bëda pichicacbimbuecquido icsho Nuquin Papan Mayan Bëdan aido bëdambuen tabadmendac.

Codinto 1 3:16

Mibitedi Nuquin Papa tabadte shubu nec. Adquid icnuc: Nuquin Papan Mayan ubëd iquec, quequin ¿tantienquioda mimbi icpe?

Codinto 1 3:9

Nuquin Papa nashunquid icquin Esuquidistu chuibennequid Apodobëd nebi. Adquid icnubi umbi tied dëdshun nitsinaidbimbuecquido mibitedi nec. Adecbidi Nuquin Papana umbi shubu uaidbimbuecquidbidi mibitedi neuaic.

Codinto 1 6:19

Nuquin Papan aton Mayan meniaido mibitedi nec. Adoaido yec Nuquin Papa tabadte shubu mibi nec. Adquid icnuc: Nuquin Papan Mayan Bëda ubëd tabadec, quequin ¿tantienquioda mimbi icpe? Mibibi: Cun dadan icbo nebi, quetiapimbo mibitedi iquec.

Codinto 2 6:16

¿Matsesën ambibi nacnenshun papa caid tantiaquidta aton Mayan Nuquin Papan meniaid icpadic? Padenquio. Abi tantiaquid yec abi tabadtequid nuquibi nec. Adec Nuquin Papa uënëstiapimbocquidbëd tabadtequido nuqui nec. Nuquin Papan dada uamiampid nad iquec: Ubi tantiaquidobëd iquendabi. Aidobëd capuendabi. Aidon Papa caid nendabi. Aido cun matses nendac, quepampic Nuquin Papa.

Cadasia 6:10

Adotequid icnuc bëdambuec tabadquin Esus tantiaquidobëta utsibo bëdambuen isquin nashunnuna. Adecbidi Esus tantiaquido yec tantiananquiec nashunnanquionona.

Pidipos 1:11

Adec mibitedi Esuquidistu tantiec bëdambuec tabadsho isash: Bëdambocquido nec, quetsiash utsibo. Adash: Aido bëdambuec tabadmequid yec Nuquin Papa bëdamboshëcquid nec, quendac, quequin mibitedi tantiaquin Nuquin Papa chiannembi.

Pidipos 2:17

Bëdambo mibi iquec, Nuquin Papan mabi canu, queshun Esus tantiaquin bëdambuen nabanta. Utsibo nashunquin chieshtoenquio icquin chuibanta. Aden bëdambo nuadtequid Nuquin Papa shëdmiacbimbuen mimbi chuibanaid chuisho tantiec tsadsho ubi caic: Cuessunnenu, cac bëdambo ictsiabi. Aido bëdambo iquec, quiash mibitedi tantiec ubi cuishonquenubi adecbidi cuishonqueta.

Pidipos 4:18

Utsi utsien bedshumbenneshun mimbi bëmiaid Epapadoditon bëacsho bedondambi. Aidtedi bedash bëdambo iquebi. Nuquin Papa bëdambo iquec, camenuen nuadte bëda bëdambo nuadnuc pichicacbimbuen mimbi bëmiaccondac.

Codosas 3:17

Aden nabanec tabadquin: Cun Icbo Esus nec, quequin tantiaquin aidën chiacpadombuen nabanta. Adec tabadquin: Mimbi tantiampicpadombuen Esuquidistun tantiamiaid yec bëdambo iquebi, Papa, quequin Nuquin Papa chianneta.

Timoteo 1 3:15

Esus tantiaquido iccuededquin nadoquid, quequin Pabadon chiacpadombuen nanuna, cata. Nuquin Papambo uënëstiapimbocquidtsen tantiaquido nuqui nec. Aid tantiaquido icquin Nuquin Papan Chiaid utsi uaquin chienquio icquin aid abimbo chuiquid icquin ambi chiacpadombuen naquid nuqui nendac, quequin chuita.

Ebedeo 3:6

Padnuen Esuquidistu Nuquin Papan Madombo nec. Adquid icquin aton Papan shubun icquido namequid nec. Aden aton shubun icquido dayun uacbimbuen nuqui dayun uaindac. Adoac aidën shubun icquidbimbuecquid nebi, queshun chieshtoenquio icquin Nuquin Papan chiacpadombuen nuqui naindac. Aden naquido icsho abi yacno nuqui tabadmendac, quiash cuishonquequin abi cainquido Esusën dayun uaindac.

Petedo 1 2:9

Padnuen mibitedi Nuquin Papan: Cun matses nec, caido nec. Adquid icquin Nuquin Papa bëdambuen ismenuen nëish iua pichicaquidbimbuecquido mibitedi nec. Nuquin Papan chiacpadombuenuidi nate bunebi, quequin aid nashunquin: Nadquio Nuquin Papa iquec, quequin chuiquido mibi nec. Adquido yec Nuquin Papan iuabo mibitedi nec. Adquid icsho Ambi: Cun matses caido yec bëdamboshëcquido nec. Ënden Nuquin Papa tantiesa yec icsamboshë iccondaidi nëbi: Nuquin Papa bëdamboshë iquec, quequin paposhquiacbimbuecnuc tantiamequin mibitedi abi chuibanquido icmepondash.

Petedo 1 4:11

¿Ada Nuquin Papan ambi Chiaid chuibanquid mibi icmiac? Adquid icmiaid icquin Nuquin Papan Chiaidquio chuibanta. ¿Ada Nuquin Papan mibëtan Esus tantiaquid utsibo nashunquid mibi icmiac? Adquid icmiaid icquin: Nuquin Papan tantiamiacpadombuen utsi nashunquiembi, queshun nashunta. Mimbi adosho isash ma utsibo: Abi namequid Nuquin Papa bëdamboshë iquec. Ambi tantiaid Esuquidistu bëdamboshëcquidbidi yec abitedishun Icbombo nec. Adquid yec nadatiambocquidquio nec, ma quenu, queshun ënenquio icquin tantiata. Amen.

Petedo 1 4:17

Nuquin Papan matsesën naidtedi tantiaquin cuidte uëshë nëbi yannuc Esus tantiaquid icquimbi icsambuen naquid icsho mibi natiamendac. Adsho issun chieshëmënquidën natiamiac umbi tantiacpadombuen ambi icsambuen naid ëntsiash, queshun mibitedi Nuquin Papan: Natiamenda, cainquio iquec. Aden abi tantiaquidoba natiametequid icquin ¿abi tantiesabo icquin Esusën naid Chiaid Bëda niacniacquid icsho bëdiactsëcta cuidpec? Cumapenquien Nuquin Papan cuidendac.

Esusën Uan ismiaid 1:6

Abi tantiasho issun Esuquidistun namiaido yec nëish iua cuessunneshun pichicaquidon nacbimbuen Nuquin Papa nashunquido nuqui nendac. Nuqui adomequid icsho: Esus bëdamboshëcquid nec. Abitedishun Icbombo icquin abitedimbo namequidquio nec, quequin ma ënenquio icquin tantiapanuna. Amen.

Esusën Uan ismiaid 20:6

Aden tauaquin uincuenmiaido bëdambo yec cuishonquec: Nëbi ubi chian annëdënquiacno nënenquio iquendac. Adoac ubi padpidec uënëste nibëdquiendac, quequin chiec cuëdëmposh. Adec nëish iua cuessunneshun pichicaquidobimbuec icquin: Esuquidistubëd Nuquin Papa bëdamboshë iquec, canuna, quequin chiannequido neposh. Aden seta midtedi matanmequin Esusbëtambi utsibo bëdambuen namendac, quequin ismeposhi.

Esusën Uan ismiaid 3:12

Mayan Icsa Satanasën: Icsamenu, caqui chieshtoenquio icquin ubi tantiasho ubëdi tabadmendambi. Aden chieshtoenquio icquin ubi tantiaquido utsibo abitedi Nuquin Papa tabadte shubu dapa yacno iuedendambi. Buintad nitsinaid chiquidtiapimbo yacbimbuecnuc cun shubun icquido mibi icmendambi auëshquio cuentiapimbo icnuc. Adoshon mibitedi: Cuna nec, quequin Nuquin Papan cuëmëdquid min dadan dada uaindambi. Adembidi Nuquin Papa yacnouësh abucuësh budtequid shubu dadpen icquid Edusaden chuca caid yacno tabadtequidombo nec, quequin min dadan aid cuëmëdquid dada uaindambi. Ubi cuëmëdquid chuca adembidi min dadan dada uaindambi.

Esusën Uan ismiaid 5:10

Adoac mimbi namiaido yanshun mibi tabadte shubunshun mibi nashunenquio icbuedombi mibi nashunendac. Adembidi nëish iua cuessunneshun pichicaquidobimbuec yanshun: Mibi bëdamboshë iquec, Papa, cadedcadedendac. Mimbi tantiacpadën nidaidën icquidtedishun chuiquid tapabo mimbi icmendac, quec cuëdëncuededposh.