Mateo 10:22 - El Nuevo Testamento en matsés

²² Esus tantiaquid nec, queshun matses dadpenshun mibitedi chieshënendac. Adoaqui chieshtoenquio icquin ubi tantiasho Nuquin Papan abi yacno mibi tabadmendac.

Mateo 10:22 ပူးပေါင်းရင်းမြစ်များ

Mateo 10:39

Matses ambibi tantiaiduidi naic tabadquid uënësash Nuquin Papa yacno puduedtiapimbo iquendac. Padnuen ubi tantiaquin umbi chiacpadombuen nasho chieshënquin cuessunniacsho Nuquin Papan abi yacno tabadmendac, quequin Esusën chuipondash.

Mateo 24:13

Adquido icnubi chieshtoenquio icquin ubi tantiaquido icsho Nuquin Papa yacno tabadmendambi.

Mateo 24:9

Adashic abi onquec: Umbi chiacpadquio yannuc chieshëmënquidon ubi tantiaquid icsho mibitedi bedshun utsi utsien mëyanmendac. Utsi utsien cuessunnemendac. Aden nidaid utsi utsiec yacno tabadquido dadpenshun ubi tantiaquido icsho chieshënquiendac.

Mateo 5:11

Ubi tantiaquido icsho utsibon chieshënquin icsambuen chuishunsho abëd tabadmenuen Nuquin Papan mibitedi bëdambo icmendac. Adembidi mibi mëyansho issun bëdambo icmendac. Adembidi: Aido icsambo iquec, quequin mibi mua uashobi Nuquin Papan mibitedi bëdambo icmendac.

Madcos 13:13

Esus tantiaquid nec, queshun matses dadpenshunquio mibitedi chieshënendac. Adoaqui chieshtoenquio icquin ubi tantiaquid icsho Nuquin Papa yacno tabadmendambi.

Ducas 21:17

Aden nidaid utsi utsiec yacno tabadquido dadpenshun ubi tantiaquido icsho chieshënquiendac.

Ducas 6:22

Matsesën Tishaid Esus tantiaquid nec, queshun utsibon mibitedi chieshënquin icsambuen chuishunquin mamënshunendac. Adembidi: Icsambocquid nec, queshun mibitedi cuenmendac. Adoaid icshobi Nuquin Papan mibitedi bëdambo icmendac.

Ducas 8:15

Pete ëshë utsi nidaid bëdambo yacno paëdaidbimbuecquid nad iquec. Nuquin Papan Chiaid chuibansho tantiaquioshon ambi tantiabued bëshunenquio icquin tantiadonec bëdambuec tabadquin utsi tantiamequin chuibanquidquio nendac. Adquid natiamiantequid chonoc chieshtoenquio icquin utsibo ënenquio icquin chuibanendac. Adquidën chuibanac ubi tantiaquid dadpenquio yanendac, quepanëdash Esus abëd icquido chiec.

Uanën dada uaid 17:14

Mimbi chiaidquio nëido chuibanombi. Aden umbi chuibanac ubi tantiaquid icsho ubi chieshënquidon nëidotsen chieshënendac, Papa.

Uanën dada uaid 7:7

Mibitedi ubi tantiesabon chieshëntiapimbo iquec. Ubien chieshënondash. Nuquin Papan Chiaid niac niacquin mimbi icsambuen naic, umbi cac chieshënondashi.

Hechos 9:16

Aden ubi chuibennesho: Mibi natiambo icnuc mëyantequid iquendac, quequin Saudo tantiamendambi, quepanëdash Esus.

Doma 2:7

Abi tantiec bëdambuec tabadsho issun mabi Nuquin Papan: Mibi bëdambo iquec, canu, quiash abëd tabadte bunec ambi chiacpadec bëdambuec tabadquid uënësacsho Nuquin Papan ënëdenquiocnoc abëdi tabadmendac.

Codinto 2 4:11

Adembi Esuquidistu chuibansho chieshënquin uënës uatsiashi, quequin tantiaquimbi abi chuibennec nebi. Esusën ubëd icquin chieshtomenquio icquin dayacquio icmiac chuibansho utsibon adembidi tantiabededec.

Cadasia 6:9

Umbi aden chuisho tantiashun chieshtoenquiocquin bëdambuen naic tabadta. Adec tabadsho issun ambi tantiacpadën Nuquin Papan nuqui bëdambo icmequin menendac.

Ebedeo 3:14

Tauambuen nuqui Esus tantiabenondacpadombuen chieshtoenquio icquin tantiec uënësabi yacpadembi ënenquio icquin tantiaquido yec Esusbëd tabadtequido nuqui nendac.

Ebedeo 6:11

Adecbidi utsibobëd tantiananec tabadquin chieshtoenquio icquin Esus tantiec mibitedi bëdambuec tabadac bëdambo ictsiash. Adec tabadash: Esus tantiaquid yec Nuquin Papa yacno tabadtequid nebi, quequin mimbi cainquin tantiacpadec aid yacno mibi tabadendac.

Santiaco 1:12

Adecbidi natiamiantequid icnuc Nuquin Papan Chiaid niaquenquio yec chieshtoenquio icquin abi tantiaquid icsho Nuquin Papan bëdambo icmendac. Adoshombic ambi chiampicpadombuen: Bëdamboshëcquid menequin Umbi chiaid niaquenquio yec mibi ubi tantiaquiec tabadoque. Ubëd ënëdenquio yec tabadtequid mibi icmenu, caindac Nuquin Papan abi tantiaquido chuiquin.

Uan 1 3:13

Tantia, cun utsibo, umbi tantiaido icsho mibi chuinu. Nuquin Papa tantiesabon Esus tantiaquid icsho mibi chieshënendac. Adoac: ¿Atotsi queshun ubi chieshëmpec? quequin tantienda.

Esusën Uan ismiaid 2:10

Aidon ubi mëyantsiash, quec dacuëdec natienda. Mayan Icsa Satanasën: ¿Ada Esus tantiaquido chieshtoenquio ictsiashe? Tannu, quequin namiacpadombuen chieshëmënquidon mibitedi utsi utsien quënën tsadunendac. Adoac 9tedec ushec mibitedi natiec mëyadendac. Puduenabi yec chieshtoenda. Ubi tantiaquido icsho: Cuessunnenu, cac dacuëdenda. Aidon cuessunniacsho bëdamboshë icquid meniacbimbuen ubëdi tabadmendambi padpidec uënëstiapimbo icnuc.

Esusën Uan ismiaid 2:17

Nëbi ubi tantiaquido utsibotsen chuinu. Umbi chuibocpadombuembidi cun Mayanën mibitsen tantiametsiashe. Bëdambuen tantiate bunquin umbi chuibued tantiata. Mayan Icsa Satanasën: Icsamenu, caqui chieshtoenquio icquin ubi tantiasho issun: Ma penu, queshun ompoampidi mana caid menendambi. Adoshombic cuënote ushumbocquidën abi cuëmëdquid icnubi cuëmëdquid chuca uaquin cuënquin aid cuënoten dada uatanquin menendambi. Ma umbi menebuedënuidtsëqui isnu, quequin adoendambi, quequin umbi chuibued dada uata, quequin Esusën chuiposhi.

Esusën Uan ismiaid 2:26

Mayan Icsa Satanasën: Icsamenu, caqui chieshtoenquio icquin ubi ënenquio icquin tantiaquin umbi chiacpadombuen naquidombo icsho ubëta chuiquid tapa icmendambi. Adoac ubëtan matses utsibo abitedimbo namendac.

Esusën Uan ismiaid 2:3

Adembidi utsibon chieshënquin natiamiaqui chieshtoenquio icquin Umbi Chiaidbëta Umbi naid mimbi chuibanoc.

Esusën Uan ismiaid 2:7

Nëbi ubi tantiaquido utsibotsen chuinu. Umbi chuibocpadombuen cun Mayanën mibitsen tantiametsiashe. Bëdambuen tantiate bunquin Umbi Chiaid tantiata. Mayan Icsa Satanasën: Icsamenu, caqui chieshtoenquio icquin ubi tantiasho ubëdi tabadmendambi. Nuquin Papa bëdamboshëcquid yacno nitsinaid cute bacuë uënëstiapimbo icmetequid chemendambi, quequin umbi chuibued dada uata, quequin Esusën chuiposhi.

Esusën Uan ismiaid 3:21

Mayan Icsa Satanasën: Icsamenu, caqui chieshtoenquio icquin ubi tantiaquid icsho ubëd tabadmequin ubëtambi chuiquid icmequin ubëdi chuiquid tapan tsadte dapan tsadmendambi. Adoacbimbuec chieshtoenquio icquin Cun Pan chiaidtedi naquin nainash aidbëdi tabadquin aidbëtambi abitedishun icbombo nebi.