Madcos 16:16 - El Nuevo Testamento en matsés

¹⁶ Aden chuisho tantiaquid: Ubi cuidenquio icnuen Esusded Nuquin Papan cuidpanëdash. Adoaid tantiaquin: Umbi icsambuen naid ënnu, quequin ismequin acten mentomequid icsho Nuquin Papan abi yacno puduedmendac. Ubi tantiesain Nuquin Papan abi yacno puduedmenquio icquin cuidendac.

Madcos 16:16 ပူးပေါင်းရင်းမြစ်များ

Mateo 28:19

Nidaid utsi utsiec yacno nidshun ubi tantiaquido icmenuen matses abitedi Umbi Chiaid chuibenneta. Adoac ubi tantiabensho acten mentoquin: Nëid Esus tantiabenshun Nuquin Papatsen tantiaquid nec. Nëidbëd Aton Mayan Bëda tabadec, quequin utsibo ismequin acten mentobanta.

Madcos 1:15

Nuquin Papan chiampicpadquid ambi namiacno iuedanquid nëmbobi iqueque. Mimbi icsambuen naid ënshun Chiaid Bëda tantiash bëdambuec tabadta, quequin Esusën chuibampanëdash.

Ducas 8:12

Secac podquied nantan paëdaidbimbuecquid nad iquec. Nuquin Papan Chiaid tantiashumbi bëdambuen tantienquiocsho Mayan Icsa Satanasën: Nuquin Papa tantiabenash aid yacno tabadnushe, queshun tantiamenquio icquin badedi bëshunmendac.

Uanën dada uaid 20:31

Naden tantiaquin dada uaombi: Nuquin Papan Chomiaid yec Quidistu Nuquin Papan Madombo Esus nec, quequin aiduidtsëqui tantiash ma Nuquin Papa yacno ënëdenquio yec abëd tabadtequido icpanu, quequin aidtedi dada uaombi.

Uanën dada uaid 3:36

Adoaid Aton Mado tantiaquido icsho Nuquin Papan abi yacno tabadmendac. Padnuen aton mado tantiesabo icsho Nuquin Papan abi yacno tabadmenquio icquin mëyadtequid yacno nidmequin cuidquiendac, quequin Uanën chuipanëdash.

Uanën dada uaid 3:5

Adsho tantiashumbien Esusën: Mibi abimbo chuinu. Tantia. Nuquin Papan Mayanën tantiamiac chuca uadec acten mentoadabicquid yec Nuquin Papan namiacno puduedtiapimbo iquendac.

Uanën dada uaid 5:24

Tantia. Mibi chuinu. Umbi chiaid tantiaquidën ubi chomiondaid cun Pa tantiaquid icsho cuidenquio icquin ubëdi tabadmendambi. Cuidtequid icbuedi ubi tantiabenash ubëdi tabadtequid yanendac, quepondash Esus.

Uanën dada uaid 6:29

Nuquin Papan chiacpadombuen nate bunquin Aidën Chomiaidquio tantiata, quepondash Esus.

Uanën dada uaid 6:35

Adshobien Esusën: Ubiuidtsëqui petebimbuecquid icquin matses bëdambo icmequid nebi. Ubi tantiaquid icsho pete pemetanquin acte acmiac bundoenquio yacbimbuecnuc bëdambo icmendambi.

Uanën dada uaid 6:40

Cun Pa bunacpaden ubi tantiaquido uënësacsho uincuenmete uëshën uincuenmeshun Cun Pabëd ubi tabadacnombo ënëdenquiocnoc tabadmendambi, quepondash Esus ambi pemebuedo chiec.

Uanën dada uaid 8:24

Adquid icsho ubi tantienquio yec uënësacsho Nuquin Papan ambi icsambuen naquid cuidacno nidmendac, quequin tantiaquin: Icsambuen naquid icsho Nuquin Papan bëdambuen isambobi mibi uënësendac, quequin mibi chiombi, quepondash Esus.

Hechos 10:43

Adembidi Nuquin Papan oncamiaidon Esus tantiaquin: Nuquin Papan Chomiaid Quidistu Mesias iquendac, quequin chuiquin dada uapampic. Aden chiampid icnuc aid tantiashouidtsëqui ambi icsambuen naid tantienquio yec Nuquin Papa bëshunendac, quequin chiampid iquec, quepanëdash Petedo Codnedion shubun iccuededquido tantiamequin chiec.

Hechos 13:46

Adoaquien dacuëdenquio yec Pabadobëd Bednabe: Mibitedi cun matses icsho Nuquin Papan Chiaid mibitediba chuibannu, quebuedëmbi tantiate bunenquio icsho issun mibitedi chuibanenquio iquembi. Tantiesabo yec Nuquin Papabëd ënëdenquio yec tabadte bunesabidi icnuc isadaidpembo yacno nidshun Esus chuibanembi.

Hechos 2:38

Adoaquien Petedon: Mimbi icsambuen naid ënshun: Esus cun Icbombo nec, quequin abimbo tantiaquin acten mentometa: Ma umbi icsambuen naid tantienquio yec Nuquin Papa bëshunnu, queshun. Adoacsho aton Mayan Bëda mibi menendac.

Hechos 2:41

Aden chuisho tantiash: Abimbo caic, quequin tantiaquido utsi utsiec yampanëdash. Aid uëshëmbi dadpenquioshë 3midted Esus tantiaquido yampanëdash. Adquid yansho issun acten mentobampanëdash. Adoac Esus tantiaquido utsibobëd iccuededpanëdash.

Hechos 22:16

quequin chuishumbic: ¿Atotsi cainec tsadec ne? Esus tantiabenquin mimbi icsambuen naid chuita. Ma mimbi icsambuen naid tantienquio yec Nuquin Papa bëshunnu. Aden chuitanquin: Nëbi Esus tantiaquid nebi, quequin utsibo ismequin acten mentometa, capondashi Ananiasën.

Doma 3:6

Nuquin Papa muesambo nec. Muaquid yec: Matses icsambuen naquido cuidenquio iquembi, quetsempanëdash.

Doma 4:24

Nuquitsen Nuquin Papan ambi bëdambuen iste tantiamenuen aden dada uamepampic. Nuquin Icbo Esus uënësacsho uincuenmiaid tantiasho Nuquin Papan nuquitsen bëdambuen isec.

Tesadonica 2 1:8

Icsambuen naisambo yec matses cuidquidquio nebi, quec choshon Nuquin Papa tantiesabo cuidendac. Nuquin Icbo Esus tantiasho Nuquin Papan mibi bëdambuen istsiash, quequin chuibanac aid tantiesabotsen Esusën cuidendac.

Tesadonica 2 2:12

Aden Ambi Chiaidquio tantiatiapimbo icquin aid niacniaquec icsambuen nateuidi bunsho Nuquin Papan cuidquiendac.

Petedo 1 1:21

Aden abi tantiasho Esuquidistunuidtsëqui Nuquin Papa mibitedi tantiamec. Adoac mimbi naden tantiec: Esus uënësacsho uincuenmeshun abëdi tabadmequin abitedishun Icbombo Nuquin Papan icmepanëdash. Ambi tantiacpadombuen naquidquio Nuquin Papa nec, quequin mimbi tantiec.

Petedo 1 3:21

Aid acte cubudnëdaid tantiaquin acten mentomete nec, quequin nuqui tantiec. Nëbi nuqui bëdambuen isquin mënchicaido icquin acten mentomec. ¿Nuquin dadan icquid bëchish ucquinda nuqui acten mentomedi? Padenquio. Nuquitedi acten mentomec Nuquin Papa naden chuiquin: Umbi icsambuen nabanaidtedi bëchish ucacbimbuen mibi tantiembique. Ubi bëdambuen ista, quequin acten mentomec. Aden abi tantiasho Nuquin Papan uincuenmenëdaid icquin Esuquidistun nuqui cuidmenquio iquec.

Esusën Uan ismiaid 20:15

Ambobi abi tantiesabo yec aton cuëmëdquid abëd tabadmetequid dadauate dapan dada uabicquid icsho Nuquin Papan cuidquin nësecaposh.

Esusën Uan ismiaid 21:8

Adoshombic nadquidtedi cuidendambi. Nëidic dacuëdquin ubi tantiauidbuedo. Nëidic Esus tantiesabo abitedi. Nëidic chieshëmënquido. Nëidic chieshëmënec cuessunnianquido. Nëidic aton dada utsibëdi chichudnanquido. Nëidic chido daëd dachudnanquido. Nëidic aton chidopenquio chudquido. Nëidic aton bënëpenquio chudmequido. Nëidic nënëchoquido. Nëidic ambibi nacnenaidi papa caquin tantiaquido. Nëidic mua uanquido. Aidotedi chian dapa ënëdenquio yec annëdënquequid icsamboshë nuadquid asupede caid padpidec uënëste caid yacno nësecaindambi, queposh.