Madcos 13:9 - El Nuevo Testamento en matsés

⁹ Adquid yannuc ista, cacbimbuen bëdambuen tantiec tabadta. Mibi bedshun: Icsambocquid neque. Cuidta, quequin chuiquido menenun mibi buanendac. Adembidi bedshun Nuquin Papan Chiaid chuibante shubuno buanacsho chuiquido cuesmequin mëyanmendac. Adembidi bedshun isadaidpembon chuiquid cobednadodbëd aidon chuiquid tapambo yacno buanac umbi nabanaid mimbi aido chuibanendac.

Madcos 13:9 ပူးပေါင်းရင်းမြစ်များ

Mateo 5:22

Nadquidotsen cuidtequido nec, quequin chuinu. Tantia. Aton matsesbëd nëishnanash baded bëdanenquio icquid icsho Nuquin Papan cuidtequid nendac. Utsibic chieshëmënec icsambuec chuishumënquido isadaidbon chuiquidon cuidtequid nendac. Utsibic aton matses chieshënquin cuessunnemete bunquin: Shëpi, caquin icsambuen chuishunquido Nuquin Papan chian annëdënquequid nësecaquin cuidtequid nendac.

Madcos 1:44

Nidquin: Aidën bëdanmioshi, quequin utsibo chuibanenda. Naden nata. Edusaden yacno nidash Nuquin Papa tabadte shubu dapa yacno nidec daquënë uaidën puduedta. Ambo puduedshun Moisesën chiampicpadombuen Nuquin Papa ismequin nëish iua cuessunneshun pichicaquido isme. Adoshombic oshpodcobimbuecquid daëd bedshun meneta. Adoac: Bëdanac, mibi caindac, capanëdash Esusën.

Madcos 13:5

Adoaquien Esusën: Tantia. Mibi chuinu. Muaquidoba choshon chuisho tantiash: Abimbuen cachitec, quec mua uade, tantiaquiec tabadta.

Madcos 13:8

Adec matses utsi dadpen icquidobëd nidaid utsi utsiec yacnocquid matses utsibo cuesnanendac. Nidaid utsi utsiec yacno pete nibëdnuc bunquiote iquendac. Nidaid utsi utsiec yacno nidaid cumapenec ishcudtednendac. Adsho issun chido bacuë nëncuenacbimbuec nëbi matses abitedi natiametequid yanec, quequin tantiata, quepanëdash Esus.

Madcos 6:11

Mibi iuedenquio icquin mimbi chuibansho tantiate bunenquiocsho isash nidanneta. Adec nidnumbi: Nëmbo icquido Nuquin Papa tantiesabo yec icsaquidombo icsho Nuquin Papan cuidtequidombo mibitedi nec, quequin ismec nidaid putu tabesqueta, capanëdash Esusën abëd icquido chuiquin.

Ducas 9:5

Mibi nidacnoshon mibi iuedenquiocsho isash auëshquio nidnun naden nata. Nëmbo icquido Nuquin Papa tantiesabo yec icsaquidombo icsho Nuquin Papan cuidtequidombo mibitedi nec, quequin ismec nidaid putu tabesqueta, capanëdash Esusën abëd icquido chuiquin.

Uanën dada uaid 15:20

Iuan aton icbo dëniactiapimbo icquid, quequin umbi chuibued tantiata. Aden umbi Chiaid icnuc ubi chieshëmbocpadombuembidi mibitsen chieshënuaindac. Adembidi umbi chiacpadombuen naquidën mimbi chiacpadombuentsen naindac.

Uanën dada uaid 16:2

Mibi chieshënquidon: Nuquin Papan Chiaid chuibante shubun puduedenda, quequin shubu dadpen icquid utsi utsiec yacnoshon mibi cuenmendac. Adombuembidi mibi chieshënquin utsi utsien cuessun secash: Nuquin Papa nashunquin Esus tantiaquido cuessun secaombi, quependac.

Hechos 21:11

Adec choshon Pabadon tsipante bedshun Pabado tatanetanquin mëtanetanec Acabo nadpondash: Nuquin Papan Mayan Bëdan naden chioshibique. Tantia. Chuinu. Umbi chuibocpadombuen isadaidbon Edusaden yacno tabadquidon nëid tsipante icbo bedshun tatanetanquin mëtaneshun buanshun isadaidpembo menendac, quepondash Acabo Pabado chiec.

Hechos 7:54

Adec Esteban onquesho tantiash isadaidbon chuiquido shëta chëquëdëshquequiec nëishquioshon chieshënquin chushcapanëdash.

Hechos 9:16

Aden ubi chuibennesho: Mibi natiambo icnuc mëyantequid iquendac, quequin Saudo tantiamendambi, quepanëdash Esus.

Pidipos 1:29

Esus tantiaquido icsho natiamiaqui mibitedi bëdambo iquendac. Adecbidi Esuquidistu tantiec bëdambo icuaindac.

Tesadonica 2 1:5

Adec chieshtoenquiocquid icquin nuquitedi naden tantiec. Ubi chieshtomenquio icquid abitedishun naid tantiaquidquio nec. Adquid icquin icsambo icquido cuidquimbi bëdambocquido Nuquin Papan bëdambuen isec, quequin nuqui tantiec. Adec chieshtoenquio icquin Esus tantiasho utsibon chieshënquin natiamiaid icsho Nuquin Papan: Aido umbi namiacnombo chomeshun ubëdi tabadmendambi, caindac.

Uan 2 1:8

Ista. Adquidën chuibansho tantienda. Bëdambuen nasho Nuquin Papan nuqui bëdambuen nashunendac, quequin umbi mibitedi chuibambued tantienquio yannushe, queshun aden aidon chuibansho tantienquio icquin: Nuquin Papan abëd tabadmequin ubi bëdamboshëcquid menetequid iquendac, quequin tantiata.

Esusën Uan ismiaid 1:9

Esusbëd iccondaidquio Uan nebi. Mibëtan Esus tantiaquid yec min utsi nebi. Esus tantiaquid icsho Nuquin Papan namiaido yec aidbëd tabadtequido nuqui nec. Esus tantiasho mibi natiamequin chieshënacpadembidi Esus tantiesabon chieshëmpondashi. Adoaqui Esusën namiacpadec chieshtoenquio icquin abi Esus chuibenniondambi. Adsho issun Esus chieshënquidon quënën tsadunacbimbuen cuenmenquio icnuen acte dapa mad caid nidaid nacnëdquid tapa Padmos caidën tsadunondac abi tsadec nebi.

Esusën Uan ismiaid 2:10

Aidon ubi mëyantsiash, quec dacuëdec natienda. Mayan Icsa Satanasën: ¿Ada Esus tantiaquido chieshtoenquio ictsiashe? Tannu, quequin namiacpadombuen chieshëmënquidon mibitedi utsi utsien quënën tsadunendac. Adoac 9tedec ushec mibitedi natiec mëyadendac. Puduenabi yec chieshtoenda. Ubi tantiaquido icsho: Cuessunnenu, cac dacuëdenda. Aidon cuessunniacsho bëdamboshë icquid meniacbimbuen ubëdi tabadmendambi padpidec uënëstiapimbo icnuc.

Esusën Uan ismiaid 2:13

Mibi yacno Mayan Icsa Satanasën iuabo dadpen icnubi ubi tantiec mibi chieshtoenquio iquec. Ënden Mayan Icsa Satanasën namiac mibi yacnoshon chieshëmënquidon ubi chuibanquid Antipas caid cuessunnepondash. Aidën chieshtoenquio icquin umbi naid chuibansho cuessunniambi adembidi chieshtoenquio icquin mimbi ubi tantiaquiopec. Aden mimbi bëdambuen naid tantiembi.