Hechos 3:14 - El Nuevo Testamento en matsés

¹⁴ Esus icsaisa yec bëdamboshëcquid nec, quequin utsin tantianubi aid bunenquio icquin: Chieshëmënec cuessunnianquid quënën tsadunaid chicquin Esusded cuidta, quequin mibitedishun chuipondac.

Hechos 3:14 ပူးပေါင်းရင်းမြစ်များ

Mateo 27:20

Adnubien Esus chieshënquido Nuquin Papa ismequin nëish iua cuessunneshun pichicaquidon chuiquidobëtan isadaidbon chuiquid tsësiobon ambo tabadquido chuibudpanëdash. Pidaton: ¿Mitsicquidimbi puduenmepe? cac: Badabas puduenmequimbi Esus uënës uame, quequin chuidoneta, cac: Ai, adoendambi, quecuededpanëdash.

Madcos 1:24

Nasaded yacnocquid Esus caid ¿atotsi quec nëmbo cho? ¿Ubipadquidtedi nibëdquio icmenuecta cho? Umbi isaidquio mibi nec. Nuquin Papan bëdambuen isaidquio yec Icsaisambo mibi nec, quepanëdash.

Madcos 15:11

Adnubien Nuquin Papa ismequin nëish iua cuessunneshun pichicaquidon chuiquidon ambo tabadquido chuiquin: ¿Adambi Esus nidmepe? quequin Pidaton chiac: Padi. Badabas chicquin puduenmeta, quequin chuidoneta, quequin chuipanëdash. Adoac aden chuibededpanëdash.

Madcos 15:7

Adoaid ictednenubi quënën tsadunmenëdaid Badabas cuëmëdquid icpanëdash. Aidi utsibobëtan Doma yacnocquidobëd icte bunenquio icquin cuessunnianquid icsho issun bedmeshun quënën tsadunmenëdaid nepanëdash.

Ducas 1:35

Adsho tantiashumbien: Nuquin Papan Mayan Bëda budshun mibi usundomiac mimbi bacuë tishendac. Aden Nadatiambocquidën naidënquio usundomiaid icquin mimbi tishendac. Aden tishaid icsho: Nuquin Papa Nadatiambocquidën Madombo yec bëdamboshëcquidquio nec, utsibon cabededendac.

Ducas 23:25

Pidaton: Matses cuessunnequid icsho quënën tsadunaid Badabas chicquin puduenmeshumbic Esus cueste napotiaidën dectanquin uënës uatan, capanëdash Pidaton aidon chiacpaden chuiquin.

Uanën dada uaid 16:10

Adembidi: Esus bëdambuen naquid nec, quequin tantiamendac. Adquid yec ubi Cun Pa yacno nidacsho mimbi ubi isenquio iquendac.

Uanën dada uaid 18:40

Padpidembuec cumapenec cuëdcuededec: Padenquio. Esus chiquenquiocquin Badabas cuëmëdquid chicquin puduenmeta, quecuededpanëdash. Matses cuessunnequin ampequid yec Badabas icsambocquid icsho quënën tsadunaid icnuc adcuededpanëdash.

Hechos 13:28

Esusën icsambuen naid nibëdec, Pidaton cashobi: Icsambocquid neque. Aid uënës uametiadquidi mibi nec, quepanëdash isadaidbo Pidato chiec.

Hechos 2:27

Ënenquio icquin umbi chiacpadombuen naquidquio nec, queshun mimbi ubi uënës uacsho cun dada chodcamenquio icquin ubi uincuenmendac.

Hechos 22:14

Adsho isash Ananias: Nuquin tsusedpabon Papa campid Nuquin Papan ambi tantiacpaden: Naden nata, quequin chuiquin mibi tantiamendac. Adembidi ambi Chomiaid Esus Nuquin Papan: Naden nac bëdambo ictsiash, quequin naquidquio mibi ismendac. Aidën chuisho mimbi tantiendac.

Hechos 4:27

Aden chiaid mimbi Dabid dada uamiampicpadembi nëbi Edusaden yacno isadaidpembon chuiquid daëd Edodesbëd Ponsio Pidato aton matsesbëd icnubi isadaidbo chedo iccuededquin Mimbi Chomiaid icsaisambo Esus mimbi Mesias icmiaid chieshënquin uënës uamenuec onqueuapanëdash.

Hechos 5:28

Esus chuibennenda, caqui Esus chuibanquin Edusaden yacnocquidtedi mimbi tantiamebanec. Adoquimbi: Chuiquidon Esus chieshënquin uënës uamepondash, quequin mimbi umbi naid chuibanec, quepanëdash.

Hechos 7:52

¿Nuquin Papan oncamiaido nuquin tsusedpabon mëyanenquioda icpampic? Adembidi: Nuquin Papan Chomiaid icsaisambo choendac, quequin chuibanquido tsusedpabon cuessun secapampic. Aidon nampicpadembidi Nuquin Papan Chomiaidquio icshobi mibitedishun chieshënquin uënës uamepondac.

Codinto 2 5:21

Ambi cuidtiadquidi nuqui icnubi Esuquidistu icsambuen naisa icshobi Nuquin Papan abided cuidmepanëdash: Cun Mado tantiaquidotedi icsambuen naisabimbuecnuc bëdambuen isembi, queshun.

Santiaco 5:6

Mibitedishun icsambuen nabi icquidobi: Mibitedi cuessunnenu, cac uidëntiapimbo icsho mimbi cuessun secamepoc.

Petedo 1 3:18

Chieshënquin natiamiaqui Esuquidistu mëyadquiec nuqui icsaid bedshunec abided cuidadec abentsequi uënëspondash. Aidi icsaisambo iquequi icsambuen naquido tantiec mëyadbudec uënëspondash: Ma Nuquin Papa yacno tabadtequido icpanu, quiash. Adec aton dada icsabudec uënësambi aton mayan uënësesambo icnuc aton dada uincuempanëdash.

Uan 1 2:1

Mibitedi cun bacuëbobimbuecquido icsho: Icsambuen naic tabadnushe, queshun chuiquin dada uaimbique. Isec onqueta. Nuqui icsambuen nasho issun Esuquidistun Nuquin Papan chiacpadombuen naquid icquin Nuquin Papa chiendac. Ubi tantiaquidën icsambuen naid tantienquio yec bëshunta, quequin Esuquidistun chiendac.

Esusën Uan ismiaid 3:7

Padpiden naden chuiuaposhi: Pidadedpia yacnoshon ubi chuibanquidën iste chuinu. Dada uata. Tantia, Pidadedpia yacnocquido. Icsaisambo yec abimbo chuiquidquio icquin Nuquin Papan Chomiaidën naden chuiposhi: Cun tsusedpa Dabid yampicpadquid matses namequidquio yec aid abentsëqui Nuquin Papa yacno puduedmianquid Mesias nec, utsibon: Padi, catiapimbo icnuc. Umbi shëcniaid utsin shëcnandotiapimbo iquec. Adembidi umbi shëcnandoaid utsin shëcnetiapimbo iquec.