Hechos 17:11 - El Nuevo Testamento en matsés

¹¹ Ashunquiotsen: Nuquin Papan Chomiaid Quidistu caid Esus niondash, quequin tantiamenuen Nuquin Papan Chiampid Pabadon chuibansho ambocquido isadaidbo Tesadonica yacnocquidon tantiacpadempenquio bëdambocquid icquin: ¿Abimbobida chuibanoshe? Tantiabono, queshun Nuquin Papan chuiquin dada uamiampid isban isbampanëdash Bedea yacnocquidon.

Hechos 17:11 ပူးပေါင်းရင်းမြစ်များ

Mateo 13:23

Padnuen pete ëshë utsi nidaid bëdambo yacno secac paëdaidbimbuecquid nad iquec: Nuquin Papan Chiaid chuibansho tantiaquioshon ambi tantiabued bëshunenquio icquin tantiec bëdambuec tabadquid nendac. Adquidën chuibanac ubi tantiaquid 100ted yanendac. Utsin chuibanaquic 60ted yanendac. Utsin chuibanaquic 30ted yanendac, quequin abi tantiabente Esusën chuipondash.

Ducas 1:2

Aidon Esuquidistun tauain naidbëtabi ambi naid utsitedi isbanquidon ambi: Chuibenneta, caidon chuibanacpaden dada uaidtedi nec.

Ducas 11:3

Bunmianenquio icquin badiadquidën badiadquidënquien cun pete icmeta, Papa.

Ducas 16:29

Adoaquien: Nuquin Papan Chiaid Moisesën dada uampidbëta Nuquin Papan oncamiampidon dada uaid issun ma aidon chiacpaden min utsibon tantiashun napanuna, quequin Abadauanën chuiposh.

Ducas 24:44

Aden petanec: Mibëd icquimbi naden chuibanombi: Nuquin Papan umbi nate chuiquin Moises dada uamiampicpadombuen naquinc Nuquin Papan ambi oncamiaido dada uamiampicpadombuen naquinc Cuëdënte dada uampicpadombuen naquinc caquin Nuquin Papan chiampictedi nabanembi, quequin chuibanombi, quepanëdash abëd icquido tantiamenuen chiec.

Uanën dada uaid 3:21

Nuquin Papan chiacpadec tabadquidombien ubi chieshënenquio iquendac. Adquidon Nuquin Papan namiacpadec bëdambuec tabadquin ismiac: Ma utsibon umbi bëdambuen naid tantiapanu, quiash ubi tantiate bunendac, quepanëdash Esus.

Uanën dada uaid 5:39

Mibitedi nadpec. Nuquin Papan Chiaid nuquin tsusedpabon dada uampid tantiaquidquio nebi. Aid isbanquid yec Nuquin Papabëd ënëdenquio yec tabadtequid nebi, mibi quepec. Ma ubimbo chuiquin Nuquin Papan dada uamiampid neyoc.

Hechos 10:33

Aden chiac: Petedo bedtan, quequin umbi namiaido nidmiombi. Adoac bëdambocquid yec cacuidanenquio yec badedquio mibi choac. Adec mibi choacsho isash bëdambo iquebi. Nuquin Papan isnubi nëbi ambi tantiamiacpaden mimbi chuibansho tantiec ubitedi tabadnu, quepanëdash Codnedio Petedo chiec.

Hechos 11:1

Adnubien Udea yacnoshon Esus chuibennequidobëtan Esus tantiaquid utsibon naden chuisho tantiapanëdash: Isadaidpembobi Esus tantiaquido yanac caosh, quequin chuisho tantiapanëdash.

Hechos 17:1

Pidipos yacnouësh puduanec nidequi Pabadobëd Sidas shubu dadpen icquid Ampipodis datambidanec nidec shubu dadpen icquid Apodonia caidtsen datambidanec shubu dadpen icquid Tesadonica yacno nidpanëdash. Ambobi isadaidbon Nuquin Papan Chiaid chuibante shubu iquec, quesho tantiash ambo tabadpanëdash.

Hechos 2:41

Aden chuisho tantiash: Abimbo caic, quequin tantiaquido utsi utsiec yampanëdash. Aid uëshëmbi dadpenquioshë 3midted Esus tantiaquido yampanëdash. Adquid yansho issun acten mentobampanëdash. Adoac Esus tantiaquido utsibobëd iccuededpanëdash.

Tesadonica 1 1:6

Aden tantiaquid yec ubi Nuquin Icbo yacpadec chieshtoenquio icsho isash mibitsen chieshtoenquio iccondac. Umbi Nuquin Papan Chiaid chuibanac Nuquin Papan Mayan Bëdan namiacpadec cuishonquequin mimbi Esus tantiabenondac utsibon chieshënquin natiamequionobi.

Tesadonica 1 2:13

Aden Nuquin Papan Chiaidquio umbi chuibanac: Ambembi chiaidpenquio chuibanosh. Ma Nuquin Papan Chiaidquio Pabadon chuibamboc, mibitedi quianondac. Ai, aden Nuquin Papan Chiaidquio tantiash Esus tantiaquido yanash aidquiobidi chuisho tantiash mibi bëdambo yanec. Adec mibitedi bëdambuec tabadaid tantiaquin Nuquin Papa naden chiannembi: Tesadonica yacnocquido bëdambuec tabadmequid yec mibi bëdamboshë iquec, Papa, quequin Nuquin Papa chiannembi.

Tesadonica 2 2:10

Adec icsauidequi tabadquid yec cumapenec muaquin ismedednesho isash: Abimbo caic, quependac Esus tantiesabo Nuquin Papan ënenquio icquin cuidtequido yec. Aidon Esus chuibanquidën: Nuquin Papa yacno tabadte iquec, quequin abimbo chuisho pamumëdacbimbuen tantiatiapimbo icquin ambembi muaquin chiaiduidtsëqui tantiendac.

Santiaco 1:21

Icsambuen naic tabadtequid dadpenquio icnuc mimbi icsambuen tantiacpaden naidtedi ënquiota. Aden: Ënnu, quiash: Icsambuen naombique. Mimbi chiaid tantianu. Ubi bëdambuen tantiame, queshun Nuquin Papan Chiaid chuibansho tantiata. Aden chiaid Nuquin Papabëd nuqui tabadmetembo nendac.

Petedo 1 2:2

Adenquio yec tishac chucactsëc bacuëmpi shuma chishte bunquiacbimbuec Nuquin Papan Chiaid iste bunquiota. Bëdiactsëc tantiabuedi canidoacbimbuen aid isban isbanquin aidën chiacpadombuen natiadquio yanec Esus tantiaquidquio yanec aidbëd tabadtequid ictsiabi, queshun Nuquin Papan Chiaid isbanquiota.