Epeso 6:12 - El Nuevo Testamento en matsés

¹² Matses isadacpadquidpenquiobëd cuesnanacbimbuecquido nuquitedi nec. Mayan Icsa Satanasën iuabo isadesabëd cuesnanacbimbuen nuquitedi naic. Aidtedi abuc tabadec. Aidotedi nidaidënshun nadatiambocquin nabanquidquio yec: Abitedishun chuiquid tapa nebi, quequin icsambuen namequin iuanu, quequid aido nendac.

Epeso 6:12 ပူးပေါင်းရင်းမြစ်များ

Mateo 16:17

Adsho tantiashun Esusën: Nuquin Papan bëdambuen tantiamiac aden mimbi bëdambuen chioc, Simon. Onasën mado Simon caid yec matses mibi nec. Adquid icquimbi matsesën tantiaid chienquio icquin abucshun Cun Pan tantiamiaidquio icquin mimbi abimbo chioc.

Ducas 13:24

Nuquin Papa yacno puduedtequid shëcuë pistsëcquio iquendac. Aidëmpinquio puduednun Nuquin Papa tantiec bëdambuec tabadta. Utsibo dadpen puduedte bunequi ambi tantiaid utsi icnuc tsucusec puduedtiapimbo iquendac.

Ducas 22:53

Mambi badiadquidën badiadquidënquien Nuquin Papa tabadte shubu dapa daquënë uaidën puduedtednequin matses tantiamequin chuibanshobi ma mimbi ubi bedmenquio icpaboc. Mimbi ubi bedte uëshë nëidquiobi nec. Mayan Icsa Satanasën tantiamiacpaden utsibo ismenquio icquin inchëshëmbi mimbi ubi bedec, quepanëdash Esus.

Uanën dada uaid 12:31

Nëbi abi tantiesabo Nuquin Papan cuidtequido yanendac. Adembidi matses dadpenquio icsambuen namequid Mayan Icsa Satanas chedo Nuquin Papan cuenmetequid yanendac.

Uanën dada uaid 14:30

Nëbi mibi utsi dadpen chuibantiapimbo iquebi. Ubi tantiesabon icbo Mayan Icsa Satanas ubi bedmec choec. Ambembi aidën ubi dëniacquin uënës uametiapimbo ictsiash.

Uanën dada uaid 16:11

Adembidi tantiamiac: Matses dadpenquio iuaquid Mayan Icsa Satanas Nuquin Papan cuidendac, quequin matsesën tantiendac, quepondash Esus.

Hechos 26:18

Aden chuibanac utsin utsinquien pashuacbimbuec icbuedombi tantiendac. Icsambuen naquid nebi, quequin tantienquio icbuedëmbi: Icsambuen naquid nebique. Ubi icsaid tantienquio yec bëshunta, Papa, quendac adquid. Mayan icsa Satanasën iua icbuedi Nuquin Papan bacuëbo yanendac. Adquid yansho ambi icsambuen naid ënmiac Nuquin Papan bëdambo icmiaid ubi tantiaquid utsibobëd iquendac, quequin Esusën chuipondashi.

Doma 8:38

Naden ënenquio icquin tantiembi. Nuquitedi Nuquin Papan ënenquio icquin tantiaido icsho nadquidtedishun cuëshëdmenquio iquec. Uënësmequin cuëshëdmenquio icquinc, uënësabicsho cuëshëdmenquio icquinc, Nuquin Papabëd icquidombi cuëshëdmenquio icquinc, podobitsi icsabon aton chuiquid tapabëtan cuëshëdmenquio icquinc nëbi icquidon cuëshëdmenquio icquinc, iuecash icquidon cuëshëdmenquio icquinc,

Codinto 1 15:50

Tantia, cun utsibo. Matses yec dada namibëd intacchoquid icnuc Nuquin Papan namiacno tabadtiapimbo iquendac. Uënësash aton dada chodquetequid icnuc Nuquin Papa yacno tabadtiapimbo iquendac.

Codinto 2 11:14

¿Aidouidtsëquida muaquid nepec? Aido tantiamequid Mayan Icsa Satanas nec. Aidi Nuquin Papabëd icquidquio bëchamauanquiec isadacbimbuecquid nec.

Codinto 2 4:4

Ad icnuc: Nuquin Papapadquidquiobidi bëdamboshëcquid Esuquidistu nec, quequin chuibansho tantiaquido icnushe, queshun icsambuen namianquid icquin Mayan Icsa Satanasën pamunacbimbuen utsi utsien tantiamenquio iquec.

Cadasia 1:16

Esusën naid Chiaid Bëda isadaidpembo chuibenneta, caimbi, quequin ambi tantiampicpadombuen Nuquin Papan tantiamiondashi. Adoac: Esusën naid chuibanquido: ¿Atotsimbi nëbi nape? quequin chuitanambo iccondambi.

Epeso 1:21

Aden tsadunquin Nuquin Papan podobitsi icsabo cumapenen tantiaquin matses nabanmequidobëtan podobitsi icsabon icbo Mayan Icsa Satanasën Icbombo icmepanëdash. Adembidi nëbi icquidobëtan iuecash icquidon Icbombo Esuquidistu mimbi icmeuapanëdash.

Epeso 1:3

Nuquin Icbo Esuquidistun Papa Nuquin Papa bëdamboshëcquid nec. Adquid icquin Esus tantiaquid icsho abëd abuc bëdambuec tabadacpadquidquio nuquitedi icmiac, quequin: Nuquin Papa bëdambocquid nec, canuna.

Epeso 2:2

Adquid icquin Nuquin Papa tantiesabon nacpadombuen mimbi icsambuen nabampondac. Adombuembidi podobitsi icsabon chuiquid tapa Mayan Icsa Satanas bunacpadombuen nabampondac. Aidëmbi Nuquin Papan Chiaid niacmequin icsambuen nate matses bunmec.

Epeso 3:10

Adembidi nëbi chuibenniac matses dadpen Esuquidistu tantiaquido yanacsho issun Nuquin Papabëd icquidobëtan abuc icquid Mayan Icsa Satanasën iuabo abitedishun naden tantiendac: Nuquin Papan abitedi tantiaquidquio icquin Esuquidistu tantiaquid dadpen yanmiac, quequin tantiendac.

Codosas 1:13

Ënden Mayan Icsa Satanasën iuaquin namiaido yec inchëshquio yacno tabadacbimbuec tabadsho Nuquin Papan nuqui mënchicpondash. Aden mënchicshun ambi tantiaidquio aton Mado Esuquidistun namiaido nuqui icmiondash.

Codosas 2:15

Adec uënësacsho uincuenmequin Nuquin Papan Mayan Icsa Satanas aton iuabobëta dëniacmequin Esuquidistu abitedishun Icbombo icmepanëdash. Adoac cuesnanquin dëniacquin bedash bëyucquio nidmiacbimbuen Esuquidistun Nuquin Papa ismepanëdash.

Timoteo 2 2:5

Ma nuquin matses titinquequidquio. ¿Mitsipadquio icpec? Aton uidën tanec aton matsesën chiaction abia titinquec chosho: Uidënquio titinquiosh, queshun mauete menequid. Ambi chiaction titinquiabi icsho mauete menenquio icquid.

Ebedeo 12:1

Aden Nuquin Papa tantiaquidombo yec uënësampidën dacuenadec tabadquin isacbimbuec nuqui tabadec. Aidon nampid tantiaquin Nuquin Papa tantiate bunquioquin: Cun dashcute iuëmbocquid chictanec cumapenec titinquetannu, quiacbimbuen nuqui icsambuen nabanaid ënnuna. Adembidi dayacquiocquin Nuquin Papan chiacpaden nabanec tabadnuna.

Ebedeo 12:4

Mimbi icsambuen naid ënnuec mëyadec intac nua chiuidec mibitedi uënësabi iqueque. Chieshtoenquio icquin Esus tantiata.

Petedo 1 3:22

Aidi uincuenash abuc nidash Nuquin Papan dayun abiucquio tsadtuidpanëdash. Adash abitedishun Icbombo yampanëdash. Nuquin Papabëd icquidon chuiquid tapabëtan Mayan Icsa Satanasbëtan aton iua podobitsi icsabon chuiquid tapa icquin ambi chiacpadombuen abitedi namendac. Adquido icbuedombi abitedishun Icbombo icsho aidën chiacpadombuen naindac.