Epeso 3:19 - El Nuevo Testamento en matsés

¹⁹ Adembidi ënenquio icquin matses tantiaquidquio Esus nec, quequin matsesën tantiatiapimbo iquec. Adquid icnuc ubi Esus tantiamequin mimbi nacpadombuen utsibo Esus tantiaquidquio icmeta, quequin Nuquin Papa chiannembi.

Epeso 3:19 ပူးပေါင်းရင်းမြစ်များ

Mateo 5:6

Petebëta acte bunquiacbimbuec ambi chiacpadec bëdambuec tabadte bunquid Nuquin Papan bëdambuen nashunquin bëdambo icmendac.

Uanën dada uaid 1:16

Uanën chiacpadquid icquin abi tantiaquido Nuquin Papan bëdambuen isaido icmeshun adenuidi Nuquin Papa nuqui bëdambuen ismec.

Uanën dada uaid 17:3

Matsesën: Abipadquid utsi nibëdnuc Nuquin Papa abentsëcquiobi iquec. Adembidi Ambi Chomiondaidquio Esuquidistu nec, quequin tantiasho nuquibëd ënëdenquio yec tabadtequido icmendambi, Papa.

Doma 8:35

Esuquidistun tantiaido icsho ¿tsuntsin nuquitedi Esusbëd cuëshëdmepec? ¿Natiamiac mëyadsho issunda Esuquidistun nuquitedi tantienquio icquin cuëshëdmepec? Padenquio. ¿Natiec tabadshoda Esuquidistun nuquitedi tantienquio icpec? Padenquio. Utsibon chieshënaid icsho bëdambuen isquinc pete nibëdnuc bunsho bëdambuen isquinc dashcute nibëdsho bëdambuen isquinc: Badedquio uënëstsiabi, quec dacuëdec tabadsho bëdambuen isquinc chieshëmënquidon: Badedquio cuessunnenu, casho bëdambuen isquinc caquin Esuquidistun ënenquio icquin nuqui tantiec.

Doma 8:39

abuc nidacsho cuëshëdmenquio icquinc, nidaid ëquëducquio nidacsho cuëshëdmenquio icquinc, Nuquin Papan uaid utsi abitedishun cuëshëdmenquio icquinc nuqui caindac. Nuquin Papan nuquitedi bëdambuen tantiaido icsho ënenquio icquin Nuquin Icbo Esuquidistun nuquitedi cuëshëdmenquio iquendac.

Codinto 2 5:14

Esuquidistun tantiaid icquin ënenquio icquin naden chuibanquid nebi. Matses abitedi tantiec abided cuidadec Esuquidistu abentsëqui uënëspanëdash. Adquid icnuc uënësacbimbuen aid tantiaquid icquin nuqui bunaid nainquio iquendac, quequin nuqui tantiec.

Cadasia 2:20

Esusbëd uënësacbimbuen umbi icsambuen nabanaid ënondambi. Nëbi Esusbëd cuëshëdenquio yec bëdambuec tabadebi. Ubi tantiaquiec ubi cuidmenquio icnuec Nuquin Papan Mado abided cuidadec Esuquidistu uënëspanëdash, quequin tantiashoeni Aidëmbi nëbi bëdambuec tabadquid icmec.

Epeso 3:18

Mibi tantiaquido utsibobëd tantiananmeta. Adoac Esusën abi tantiaquidotedi ënenquio icquin tantiaquiec, quequin ma tantianu. Tantiananquidombo icmeta, quequin Nuquin Papa chiannembi.

Epeso 5:2

Nuqui tantiaquidquio Esuquidistu nec. Adquid icnuc utsibobëd tantiananec tabadta. Nuquitedi tantiaquidquio yec abided cuidadec uënëspanëdash. Adec abi uënësaid nuadte bëda shëdtequid pichicacbimbuen nasho isash Nuquin Papa: Bëdambo iquec, quepanëdash.

Epeso 5:25

Aton bënë icquin min chido tantiaquiota. Esuquidistu abi tantiaquido tantiaquiec abided cuidadec uënësacbimbuen tantiaquiota.

Pidipos 1:7

Adquid yanshun ubi chieshënenquio icquin mimbi ubi tantiaquiec. Adsho mibitsen tantiaquiembi. Nëbi quënën tsadunondac abi tsadebi. Aden quënën tsadunaqui Nuquin Papan Chiaid Bëda chuibanquin tantiamiac: Abimbo caic, queshun ma tantiabennu, quequin chuibanembi. Adembidi chuiquid tapabo tantiamequin chuidenniondambi. Adquid icsho mibitedishun ubi tantiaquin mimbi ubi nashunoc.

Pidipos 4:7

Aden Abi chiannesho Aidëmbi mibi natiamenquio icquin bëdambo icmendac. Adoac bëdambuec tabadsho isash utsibo: ¿Mitsipadec bëdambo yampash? quetsiash. Adecbidi mibitsen: ¿Mitsipadequini bëdambo yampo? quetsiac. Adash: Nuquin Papa ubi nashunquidquio yec ubi cudasquidquio nec, quequin Esuquidistu tantiec natienquio yec bëdambuec mibi tabadendac.

Codosas 1:10

Aden Nuquin Papan abi bunacpaden nate mibi tantiamiac mibitedi utsibobëd nashunnanec bëdambuec tabadendac. Adshun: Nadquio Nuquin Papa iquec, quequin bëdiactsëc tantiabuedi canidoacbimbuen bëdambuen tantiaquidquio yanendac. Adsho isash: Bëdambo iquebi, quendac Nuquin Icbo Esus.

Petedo 1 1:8

Aden mimbi isacmaidi Esuquidistu tantiaquido mibitedi nec. Nëbi aid isambo icquimbi mimbi tantiaquiec. Adash utsibon tantiatiapimbo icnuc mibi cumapenquiec cuishonquendac.

Petedo 2 3:18

Aid tantiasho nuqui bëdambuen isec, quequin Nuquin Icbo Esuquidistu tantiabenshun ambi chiaid daëdpactsëc tantiabuedi dadpen tantiabenash tabadquin Esus tantiaquionona. Adshun: Nibëdantiapimboquid yec Mibi Bëdamboshëcquid nec, canuna ënenquio icquin. Amen. Aidted chuiquin dada uaombi.