Epeso 1:20 - El Nuevo Testamento en matsés

²⁰ Esuquidistu uënësacsho uincuenmeshun abi yacno abuc indoshon min dayun abiucquio mimbi tsadumpanëdac.

Epeso 1:20 ပူးပေါင်းရင်းမြစ်များ

Mateo 26:64

Esusën: Ai, mimbi chiaidquiobi nebi. Tantia. Mibitedi chuinu. Matsesën Tishaid yec abuc niduash Nadatiambocquidën dayun abiucquio tsadsho mimbi isendac. Adembidi abucuësh abu ushu yacno ubi chouasho mibitedishun isendac, quepanëdash Esus.

Mateo 28:18

Adsho issun Esusën anoentsëqui choquin naden ubitedi chuipondash: Ubipadquid utsi nibëdec. Nuquin Papan abitedishun Icbombo icmequin abuc icquidobëta nidaidën icquidotedi namequidquio icmioshibique.

Madcos 14:62

Adoaquien Esus: Ai, aidi nebi. Matsesën Tishaid yec abuc niduashic Nadatiambocquidën dayun abiucquio tsadsho mibitedishun isendac. Adashic abucuësh abu ushun ubi chouasho mibitedishun isendac, quepanëdash Esus.

Madcos 16:19

Aden chuibanquin ënshobi abuc indoac Nuquin Papan dayun abiucquio Esus tsadtuidpanëdash.

Uanën dada uaid 10:18

Matsesën ambembi ubi uënës uatiapimbo ictsiash. Umbi tantiacpadquiequi matsesën uënës uadendabi. Adecbidi nadatiambocquid yec ubibi uincuenuaindabi. Adec Cun Pan chuibocpadec iquendabi, quepondash Esus.

Uanën dada uaid 10:30

Cun Pabëd abentsëc yacbimbuecquid yec aid padquidquiobidi nebi, quepondash Esus.

Hechos 10:40

Aden uënës uaqui daëdec ushash uincuenshun: Uincuenobi, quequin Esusën ismepondashi.

Hechos 26:8

Cun matses isadaidbon ¿atotsi queshun: Nuquin Papan uënësaido uincuenmendac, quequin chiaid tantienquio mibitedishun icpe?

Hechos 4:10

Tantia, isadaidbotedi, nëid dada caputiapimbocquid Esuquidistu Nasaded yacno iccondaidën nadatiambocquin bëdanmiaid nec. Aidi mibitedishun cueste napotiaidën dectanquin uënës uamiacsho Nuquin Papan uincuenmiaidën bëdanmiac nëid caputiapimbocbuedi nëbi nidtoash capusho mimbi isec.

Hechos 5:31

Aden uincuenmeshun aton dayun abiucquio tsadmequin abitedishun Icbombo icmeshun abi yacno matses puduedmequidquio Esus icmepanëdash. Aden nabanaid tantiash isadaidbo ma aidquio tantiaquid icpanuna. Adsho issun ma aidon icsambuen naid tantienquio yec Nuquin Papa bëshumpanuna.

Doma 1:4

Aidi abipadquid yec icsambuen naisa yec uënës uacsho Nuquin Papan uincuenmeshun ambi namiacpadombuen aton Mayanën aton Mado Esuquidistu nadatiambocquid icmepanëdash.

Doma 8:34

Adquid icshoda ¿Utsibon: Aido natiamequin cuidquin Nuquin Papa nibëdacno nidmenu, queshunda naic? Padenquio. Esuquidistu abided cuidadec uënësacsho uincuenmepanëdash. Aidëmbi nëbi Nuquin Papan dayun abiucquio tsadquin nuquitedi tantiaquin: Aid bëdambuen ista, quequin Nuquin Papa chiannec.

Epeso 1:3

Nuquin Icbo Esuquidistun Papa Nuquin Papa bëdamboshëcquid nec. Adquid icquin Esus tantiaquid icsho abëd abuc bëdambuec tabadacpadquidquio nuquitedi icmiac, quequin: Nuquin Papa bëdambocquid nec, canuna.

Pidipos 3:10

Aden tantiabenshun Esuquidistu tantiate bunquiebi. Nadatiambocquid icquin Nuquin Papan uincuenmiac nadatiambocquidbidi icquin Esusën bëdambuen tabadmetsiashi, quec Esus tantiate bunquiebi. Nuquin Papan chiacpadombuen nasho natiamequin mëyanac Esus uënëspanëdash. Adombuembidi Nuquin Papan namiacpadombuen nasho mëyanquin cuessunniac bëdambo ictsiabi.

Codosas 1:16

Abubëta nidaid uashun aidën icquidtedi uanuna, queshun Nuquin Papabëtan aidëmbi abitedimbo uapampic. Matsesën isaidbëta matsesën istiapimbocquidtedi Esuquidistun uapampic. Nuquin Papabëd icquidotedi ambi uampidquiobidi nec. Adembidi Mayan Icsa Satanas aton iuabobëta ambi uampidbidi nec. Aidotedi bëdambocquidobëd icsambocquid utsi utsiec chuiquid tapambo yantequid uapampic. Matsesteditsen Esuquidistun uaido nec. Aidotedishun Icbo Esuquidistu nec.

Codosas 3:1

Esus tantiaquid icquin naden tantiata. Nuquin Papan Esuquidistubëta uincuenmiacbimbuen chuca uaid nebi. Adquid yanshun abuc Esuquidistu Nuquin Papan dayunquio abiuc tsadquin ambi namiacno ubitsen tabadtequid nebi, quequin aidquio tantiec bëdambuec tabadta.

Ebedeo 1:3

Aidi aton Papapadquiobidi bëdamboshëcquidquio yec bëchamauanquiecquid nadatiambocquid neuaic. Aidëmbi nadatiambocquin Nuquin Papabëtan ambi tantiacpadombuen ambi uaid abitedimbo abi icmec nibëdantiapimbocnoc. Aidi matsesën icsambuen naid bedshunquin Nuquin Papa matses bëdambuen ismenuec abided cuidadec uënësashic abuc nidash Nuquin Papan dayun abiucquio tsadtuidpanëdash.

Ebedeo 10:12

Esuquidistuen Nuquin Papa matses bëdambuen ismenuec abided cuidadec abentsequi uënësash padpidec cuidadec uënëstiapimbo iquec. Adec uënësash uincuenash aton Papa yacnombo nidash aidën dayun abiucquio tsadtuidpanëdash.

Ebedeo 13:20

Bëdambuec tabadmianquid icquin Nuquin Papan aton Mado Esus matsesacsho matsesën uënës uaid icsho uincuenmiac nëish iua obeca abi dayun uacbimbuen abi tantiaquidtedi dayun uaquid yampanëdash. Abi tantiaquido caic: Aido bëdambuen isendambi, quequin chiaid ucudtiapimbo ictequid nec, quequin aton intac ismequin ënenquio icquin abi tantiaquido Nuquin Papa bëdambuen ismendac.

Ebedeo 2:9

Naden tantianuna. Nuquin Papabëd icquido cumapenen tantiaquin nabanquido icnuc Esusien Nuquin Papan matsesmeshun iuec iuecpactsen daëdpactsëc nabanquid icmiaqui Nuquin Papa matses bëdambuen ismenuen abitedi cuidmenquiocnuec abided cuidadec uënëspanëdash. Aden Nuquin Papan matses tantiaquidquio icquin cuidmepanëdash. Adec mëyadec abided cuidadaid icsho issun Nuquin Papan: Mibi bëdamboshë iquec. Nëbi mibi abitedishun Icbombo icmendambi, caindac.

Petedo 1 1:3

Nuquin Papa, Nuquin Icbo Esuquidistun Papa, bëdamboshë iquec, canuna naden tantiaquin: Icsambuen naquido cuidte bunenquio icquin uincuenmequin chuca nuqui icmenuen Nuquin Papan abided cuidadec uënësaid Esus nuqui tantiamiondash. Adoac nuqui naden tantiec: Esuquidistu uënësacsho chococac uincuenash padpidec uënëstiapimbo iquendac. Adembidi Esus tantiec uënësacsho uincuenmeshun Nuquin Papan abi yacno nuqui tabadmendac padpidec uënëstiapimbo icnuc.

Esusën Uan ismiaid 1:17

Adec dacuëdampambuecsho istanequini aton tayumbi uënësacbimbuec uebudpaccoc. Adshobini aton mëdante abiucshun camishquin naden chuiposhi: Dacuëdenda. Ëndenquimboshë nidaid uabi yec icpampidi nebi. Adquid iquec nibëdantiapimbo icquidquio nebi.