Epeso 1:13 - El Nuevo Testamento en matsés

¹³ Nuqui icsambuen naid bedshunash Esuquidistuded uënëspanëdash, quequin abimbo chiaid chuibansho tantiashun Esus tantiabenondaido mibitedi nec. Adquido icsho: Umbi bëdambuen isaido ubëd tabadtequido nec, queshun ambi chuinëdacpadombuen: Cunatedi nec, quequin Nuquin Papan aton Mayan Bëda meniac mibëd iquec.

Epeso 1:13 ပူးပေါင်းရင်းမြစ်များ

Ducas 11:13

Mibitedi icsambuen naquido icquimbi min bacuë tantiaquin bëdambocquid menequid mibi nec. Adquid icnuc Nuquin Papa icsaisambo abuc tabadquid icquin: Min Mayan Bëdamboshëcquid ubi mene, quequin abi chuisho tantiashun mibi menendac, quepanëdash Esus.

Ducas 24:49

Aden chuibantequid icnuc ubi tantiaquido icsho: Cun Pan mibitedi: Menenu, caid aton Mayan Bëda chomendambi. Aidi mibitedi nadatiambocquin nabanmequid abucuësh choeque. Aid mibitedi meniabicnuc Edusaden yacnobi tabadquin aidi cainta, capanëdash Esusën.

Uanën dada uaid 1:17

Ëndenquimboshë Nuquin Papan: Naden nata, quequin Chiaid Moises dada uamepampic. Padnuen Esuquidistunuidtsëqui Nuquin Papan bëdambuen iste tantiamequin: Nadquio Nuquin Papa iquec, quequin matses abimbo tantiamepondash.

Uanën dada uaid 14:26

Cun Pa yacno nidshun umbi: Nuquin Mayan aido dayun uanuen aidobëd tabadmenuna, Papa, cac Cun Pan Aton Mayan Bëda mibëd tabadmendac. Adoac umbi nabanondaidbëta umbi chuibanondaidtedimbo mibi bëdambuen tantiameuaindac.

Uanën dada uaid 15:26

Adshumbic padpiden chiec: Umbi Cun Pa yacno nidshun: Matses dayun uaquid Nuquin Mayan bëdambo icmianquid ubi tantiaquidobëd tabadmenuna, Papa, cac: Ai, queshun Cun Pan chomiac mibëd tabadquin abimbo chuiquin ubi tantiamequiendac.

Uanën dada uaid 3:33

Aden aidën chiac tantiaquidombien: Nuquin Papa muesambo nec, quequin tantiendac.

Uanën dada uaid 6:27

Peteuidtsëqui tantiaquin pete bednuen naquidquio mibi nec. Aidquio chodquetequid neque. Chodquetiapimbo icquid tantiaquin bëdambuen nata. Aden nash Nuquin Papabëd ënëdenquio yec tabadtequid mibi yantsiandac. Nuquin Papan: Umbi chomiaidquio yec Matsesën Tishaid neque. Ismenu, quequin Aidën namiacpadombuen mibi ismequin nadatiambocquin nabanombi, quepondash Esus.

Hechos 1:4

Aden shubu dadpen icquid Edusaden yacnoshon ambi: Ubi chuibenneta, caidobëd tabadquimbi Esusën nadopanëdash: Edusaden yacno tabadquin umbi chiannebued Cun Pan Aton Mayan Bëda mibitedi menetequid caimbudta.

Hechos 13:26

Tantia. Cun matses isadaidbo Abadauanën tsiuecquidobëta Nuquin Papa tantiaquido matses utsibo icsho mibitedi chuinu. Nuquitedi icsambuen naid bedshunash abided cuidadec Esuquidistu uënëspanëdash. Aid tantiaquid icsho abi yacno nuquitedi tabadmendac.

Hechos 2:33

Aidi uincuenash nidacsho Nuquin Papan aton dayun abiucquio tsadtomepanëdash. Ambo nidacsho Nuquin Papan Aton Mayan Bëda menepanëdash. Adoac ambi chiannebocpadombuen Esusën aton Mayan Bëda ubitedi menebanac onquete utsin utsinquiec onquesho nëbi mibitedishun tantiec.

Doma 1:16

Esusën naid Chiaid Bëda nadatiambocquin Nuquin Papan tantiametequid nec, quequin chuibanac: Abimbo caic, quequin tantiaquido Nuquin Papa yacno tabadendac. Adquid icnuc Esusën naid dacuëdenquio icquin chuibennec nebi. Aden abia chuibanac: Abimbo caic, quequin tantiaquido isadaidbo icnuc adembidi tantiaquido matses utsibo icsho Nuquin Papan abëd tabadmendac.

Doma 4:11

Adoshon Abadauanën: Abi tantiasho Nuquin Papan ubi bëdambuen isec icsambuen naisabimbuecnuc, quequin tantiaquin Nuquin Papan chiacpadombuen naquin shui dëbid dëtemepampic. Adoaid yec Abadauan Nuquin Papa tantiaquidtedishun papabimbuecquid nepanëdash. Shui dëbid dëtemiacmaidombi abi tantiasho Nuquin Papan adembidi bëdambuen isec icsambuen naisabimbuecnuc.

Doma 6:17

Ënden mimbi icsambuen naid ëntiapimbo yec mibitedi tabadpondac. Adec tabadsho Esus abided cuidadaid chuibanac: Abimbo caic, queshun tantiabenash aidën chiacpadec mibitedi bëdambuec tabadcuenondac. Aden namec mibi bëdambo iquec, quequin Nuquin Papa chiombi.

Codinto 2 1:22

Adembidi: Cuna nec, quequin aton Mayan Nuquin Papan meniaid nuquibëd tabadec. Adoaid yec aidbëd tabadtequid nebi, quequin tantiamenuen Nuquin Papan aton Mayan meniac.

Codinto 2 6:7

Nuquin Papa nadatiambocquidën namiac Ambi Chiaid abimbo chuibanec bëdambo iquebi. Natiamiantequid icnubi: Ma utsibon ambi icsambuen naid ëmpanu, queshun ënenquio icquin abimbo chuibanec nebi. Utsibon: Icsambuen naquid Pabado nec, caqui adembidi Nuquin Papan chiacpadombuen nabanembi.

Cadasia 3:14

Adec matses abitedimbo abi tantiaquido icmenuec uënëspanëdash. Aden ambi Abadauan chiampicpadombuen napampic. Nëbi Esuquidistu tantiasho isadaidpembo ambi chiampicpadombuen bëdambo icmequin aton Mayan menec.

Epeso 4:21

Esuquidistun naid chuibansho mimbi tantiapanëdac. Aid tantiaquid nebi, quesho tantiashun Esuquidistu chuibanquidon abimbo tantiamequin chuibampanëdash. Aidën chiacpadec ma bëdambuec tabadnu, quequin mibi Esus chuipanëdash.

Epeso 4:30

Nuquin Papan Aton Mayan Bëda mibi meniaid icsambuen naquin uënësquio icmenda. Cuna nec, queshun dada uatanquin siacbimbuen Nuquin Papan Aton Mayan Bëda mibitedi meniac. Nuquin Papan ambi tantiaid uëshëmbi ubi icsambuen naisambo icmequin abi yacno tabadmendac, quequin ma tantianu, queshun Aton Mayan Bëda meniaid mibëd iqueque. Bëdambuen chuita.

Tesadonica 1 2:13

Aden Nuquin Papan Chiaidquio umbi chuibanac: Ambembi chiaidpenquio chuibanosh. Ma Nuquin Papan Chiaidquio Pabadon chuibamboc, mibitedi quianondac. Ai, aden Nuquin Papan Chiaidquio tantiash Esus tantiaquido yanash aidquiobidi chuisho tantiash mibi bëdambo yanec. Adec mibitedi bëdambuec tabadaid tantiaquin Nuquin Papa naden chiannembi: Tesadonica yacnocquido bëdambuec tabadmequid yec mibi bëdamboshë iquec, Papa, quequin Nuquin Papa chiannembi.

Timoteo 2 2:15

Mimbi bëdambuen naoc, Nuquin Papa camenuen bëdambuen nata dacuëdenquio icquin. Umbi naid ma Nuquin Papan isnu, queshun adota. Ambi chiaid bëdambuen isban isbanshun chieshtoenquio icquin Nuquin Papan Chiaidquio chuibanta, mado.

Timoteo 2 2:19

Padnuen shubu uanun buintad nitsinacbimbuecquid Nuquin Papan Chiaidquio nec. Aidi Esus tantiaquido uidënquio icmete nec. Ambi dada uamequin chiampid nad iquec: Abi tantiaquido Nuquin Icbon tantiec. Adquid icnuc abi tantiaquidon: Cun Icbo nec, queshun ambi icsambuen naid ënendac, quequin chuipampic.

Timoteo 2 3:15

Ënden bacuëmpi icquimbi Nuquin Papan Chiaidquio min matsesën chuibansho mimbi tantianëdac. Adshun: Aton Mado Esus tantiaquid uënësacsho abëdi Nuquin Papan tabadmendac, quequin mimbi tantiabennëdac. Aden Nuquin Papan bëdambuen isquin cuidenquiocte tantiametembo Nuquin Papan Chiaid nendac.

Tito 2:11

Matses abitedimbo bëdambuen iste bunquid icquin Nuquin Papan: Ubëd tabadtequid icmenu, quequin matsesën icsambuen naid bedshunash cuidadtequid icmenu, queshun Esuquidistu chomepanëdash.

Ebedeo 2:3

¿Nëbi icquido nuquitsen Nuquin Papa matses cuidmenquio icquin bëdambuen ismete chiaid chuisho tantiate bunenquiocsho cuidenquioda icpatsiash? Nuquin Papa yacno tabadmianquid nebi, quequin aton Madonquio Esusëmba chiac adombuembidi aidën chuibansho tantianëdaidontsen: Abimbo iquec, queshun ubitedi chuiuapondashi.

Santiaco 1:18

Chiaid Bëda Esusën naid abimbo chuibansho tantiashun ubi tantiabenquido chuca uaquin: Cun bacuëbo nec. Ëbëd tabadtequid nec, caindambi, quequin Nuquin Papan tantiapampic. Ambi matses uaidotedi chienquio icquin abi tantiaquidouidtsëqui tantiaquin aden chuipampic.

Santiaco 1:21

Icsambuen naic tabadtequid dadpenquio icnuc mimbi icsambuen tantiacpaden naidtedi ënquiota. Aden: Ënnu, quiash: Icsambuen naombique. Mimbi chiaid tantianu. Ubi bëdambuen tantiame, queshun Nuquin Papan Chiaid chuibansho tantiata. Aden chiaid Nuquin Papabëd nuqui tabadmetembo nendac.

Petedo 1 2:10

Ënden mibitedi Nuquin Papan: Cun matses nec, cainquio icpondash. Adquid iccondaidi nëbi Nuquin Papan: Cun matses caido mibitedi nec. Ënden Nuquin Papan mibi bëdambuen istiapimbo icpanëdash. Adobuedëmbi nëbi mibitedi tantiaquin Nuquin Papan mibi bëdambuen isec.

Esusën Uan ismiaid 7:2

Adnubien Nuquin Papabëd icquid Ambi budmiaid uëshë choacmiuësh choposh. Nuquin Papa uënëstiapimbocquidën abi tantiaquido cudasmenuen dada uaquin ambi bësebante sanamposh. Aidën: Nidaidbëta acte dapa icsa uamenda, quequin cumapenec cuëdquin Nuquin Papabëd icquido utsi 4ted icquido chuituidposh: