Ebedeo 9:26 - El Nuevo Testamento en matsés

²⁶ Matsesën nacbimbuen naic taecquiobi abitedi uash matsesën icsambuen naid bedshunash abided cuidadec baded badedquiec Esuquidistu uënëstsempanëdash. Adenquio yec matsesën icsambuen naidtedi bedshunash abided cuidadec abentsecquiobi uënëspanëdash, nëid nidaid nibëdanmete anoentsëqui yannubi.

Ebedeo 9:26 ပူးပေါင်းရင်းမြစ်များ

Mateo 13:39

Adquid icnuc uasin ëshë icsambo icquid sequidbimbuecquid Mayan Icsa Satanas nec. Aidën namiac matses icsambo icquidon ubi tantiaquidobëd tabadquin icsambuen nametiadquio iquendac. Adsho badedi cuidenquio icquin Nuquin Papan cuidte uëshë choabi icnuc matses icsambo icquidobëd bëdambocquido abi tabadmendambi. Adec tabadsho ambi tantiacpadën Nuquin Papan namiac abëd icquidon ubi tantiaquido beduanendac.

Mateo 13:40

Icsambo icquid caniacsho tacuesquin tsindoshon nëdëncacbimbuen Nuquin Papan cuidte uëshëmbi icsambo icquido cuidendac.

Mateo 25:34

Adshumbic Abitedishun Icbombo icquin abiuc icquido ubi tantiaquido naden chiendambi: Cun Pan mibi bëdambo icmiaido neque. Ubëdi tabadec cho. Matses uabi yec ëndenquimboshë mibitedi caic: Aido ubi tantiaquido icmeshun ubëdi bëdamboshë yacno tabadmendambi, quequin Cun Pan tantiamiaido yec ambi namiacno ubëdi bëdambuec tabadec cho, caindambi, quepondash Esus.

Uanën dada uaid 1:29

Badiadshun padpiden Uanën matses acten mentobanuapondash. Aden mentobannubien Esus chopondash. Chosho isashien Uan mentoquid nadpondash: Is. Nuquin Papan Chomiaid yec obecabimbuecquid choeque. Aidi matsesën icsambuen naid bedshunec abided cuidadec uënësendac.

Uanën dada uaid 17:24

Mimbi ubi tantiaquido icmiaido nuqui tabadacnombo tabadmeta, Papa. Abitedimbo uabi icquin mimbi: Umbi tantiaidquio mibi neque. Nuquibi nanuna, Mado, mimbi cac bëchamauanquiec bëdamboshë yec tabadtennecpadequi mibëd tabadsho ma ubi tantiaquidon isnu, queshun: Mibi yacno tabadmeta, quequin mibi chiec nebi, Papa

Codinto 1 10:11

Nuquin tsusedpabo icsambuec tabadsho aden cuidpampic, quequin umbi chuibued tantiaquin: Aidon nabanampicpadombuen icsambuen naic tabadsho Nuquin Papan abitedi cuidte uëshën cuidnushe, quiash: Ma bëdambuec tabadnu, quequin nuquitedi tantiamete icsho Nuquin Papan chuiquin dada uamiampid mibi chuibanombi.

Cadasia 4:1

Tantia. Padpiden chuinu. Atona dadpen dayun uaquidën nadoquid. Ubi uënësan cun madon cuna abitedi bedendac. Bacuë icquimbi cun madon cuna bedtiapimbo iquec. Canishumbien cuna abitedi bedendac, quequin aton papan chuiquid. Adashic aton papa uënësan caniabi yec utsibon iuabimbuec aton mado iquec.

Epeso 1:10

Aden ambi tantiampicpaden Nuquin Papan abuc icquidobëta nidaidën icquido abitedi tsidadmeshun aidon Icbo Chuiquid Tapa abentsëcquiobi Esuquidistu icmendac.

Epeso 5:2

Nuqui tantiaquidquio Esuquidistu nec. Adquid icnuc utsibobëd tantiananec tabadta. Nuquitedi tantiaquidquio yec abided cuidadec uënëspanëdash. Adec abi uënësaid nuadte bëda shëdtequid pichicacbimbuen nasho isash Nuquin Papa: Bëdambo iquec, quepanëdash.

Tito 2:14

Nuqui cainaid nuqui icsambuen naidtedi bedshunec abided cuidadec Esus uënëspanëdash. Adec uënësaid tantiaquid yansho: Cun matses caido yec bëdambuec tabadquid nendac, quequin chiaid tantiameta, Tito.

Ebedeo 1:2

Nëbien abipadquidquio tsiuec choshon Nuquin Papan chiacpadombuen aton Madonquio chuibampanëdash. Aidëmbi aton Papabëtan abuc icquidtedbëta nidaidën icquidtedi uapampic. Adshumbic Nuquin Papan ambi uaidtedishun Icbombo icmepampic.

Ebedeo 10:10

Adoac Nuquin Papa bunacpaden: Ma matsesën ubi uënës uanu, quiash padpidec uënësenquio icnush abentsequi abided cuidadec Nuquin Papa matses cuidmenquio icnuec Esuquidistu uënëspanëdash. Aid tantiaquido icsho issun Nuquin Papan: Cuna nec, caido yec aton iuabo nuqui nendac.

Ebedeo 10:12

Esuquidistuen Nuquin Papa matses bëdambuen ismenuec abided cuidadec abentsequi uënësash padpidec cuidadec uënëstiapimbo iquec. Adec uënësash uincuenash aton Papa yacnombo nidash aidën dayun abiucquio tsadtuidpanëdash.

Ebedeo 10:26

Nuqui icsambuen naid bedshunash abided cuidadec Esuquidistu uënëspanëdash, quequin abimbo chiaid chuibanac aid tantiabuedi: Adequi icsaic tabadnu, quequid: Nuquin Papa ubi bëdambuen ismetequid utsi iquec, quetiapimbo iquec.

Ebedeo 10:4

Aden baca bënëbëta cabada bënë cuessunnetanquin aidën intac bedshun daseccaidën matsesën icsambuen naid bedshuntiapimbo iquec.

Ebedeo 4:3

Aden Ambi Chiaid tantiashumbi nuquin tsusedpabon nainquiocsho isash nëishash Nuquin Papa nadpampic: Umbi chiondacno tabadmenquio iquembi. Ambo ubi abitedi uaquin nainash tabadacbimbuec cuesnanenquio yec bëdambuec mibi tabadtsenoc, quequin chushcaquin Nuquin Papan chuipampic. Nëbi Ambi Chiaid tantiaquido natienquio yec aidbëdi tabadtequido nuqui nendac. Nuquin Papabëd bëdambuec tabadte abi iquec. Nidaidbëta abu uaquin 6tedec ushquin nainash 7icquidën nacnenenquio yec Nuquin Papa tsadtopampic.

Ebedeo 7:27

Adonën tsiuecquidon Nuquin Papa matses bëdambuen ismenuen nëish iua cuessunneshun pichicaquidon chuiquid tapan nacpadombuen Esusën nainquio icpanëdash. Adonën tsiuecquidombien badiadquidën badiadquidënquien nëish iua cuessunneshun pichicadennepanëdash. Ambi icsambuen naidba Nuquin Papa bëshunmenuen pichicashumbic aton matsesën icsambuen naidtsen bëshunmenuen pichicauapanëdash. Padnuen Esuquidistu matsesën icsambuen naidtedi bedshunash abided cuidadec abentsecquiobi uënëspanëdash padpidec uënësenquio icnuec.

Ebedeo 9:12

Matsesën nëish iua cuessunneshun intac bedshun buanec Nuquin Papa tabadte shubu uashunaid quënë bëdamboshëcquidën puduedenquio Esuquidistu icpanëdash. Aidi matsesën icsambuen naid bedshunash abided cuidadec uënësacsho cudan siac aton intac chiuidash Nuquin Papa yacnombo aid ismec puduedpanëdash. Adec abentsequi puduedshun abi tantiaquido nuqui icsho ënenquio icquin Nuquin Papa bëdambuen ismequin nuqui icsambuen naidtedi bëshunmec.

Ebedeo 9:14

Esusën intaquëmbien Nuquin Papa yacnombo matses puduedmetequidquio nec. Nuquin Papan Mayan Bëda uënësesambo icquin dayacquio icmiac Esuquidistu icsambuen naisambo yequi matsesën icsambuen naid bedshunec abided cuidadec uënëspanëdash. Adec uënësaid icnuc nëbi naden nuqui tantiec: Umbi icsambuen naidtedi tantienquio yec bëshunquin ambi cuidtequid icbuedi Esusën mënchicaid icsho Nuquin Papan ubi cuidenquio iquec, quequin nuqui tantiec. Nuquin Papa uënëstiapimbocquidën namiaid icmenuec adec Esus uënëspanëdash.

Petedo 1 1:20

Ëndenquimboshë abitedi uabi yequi Nuquin Papa nadpampic: Umbi tantiacpadën matsesash matses cuidmenquio icnuec mibided cuidadec mibi uënësendac, quequin Esuquidistu chuipampic. Aden ambi chiampicpadombuen cuidadmeshun nëbi Esus tantiasho mibitedi bëdambuen isec.

Petedo 1 2:24

Esuquidistu nuqui icsaid bedshunash abided cuidadec cueste napotiaidën diadec uënëspondash. Nuquitedi icsaquido icbuedi ma icsaid ënash bëdambuec tabadnu, quiash uënëspondash. Adecbidi abi tantiaquido bëdambuen isnuec Esuquidistu mëyamëdpondash.

Petedo 1 3:18

Chieshënquin natiamiaqui Esuquidistu mëyadquiec nuqui icsaid bedshunec abided cuidadec abentsequi uënëspondash. Aidi icsaisambo iquequi icsambuen naquido tantiec mëyadbudec uënëspondash: Ma Nuquin Papa yacno tabadtequido icpanu, quiash. Adec aton dada icsabudec uënësambi aton mayan uënësesambo icnuc aton dada uincuempanëdash.

Petedo 1 4:7

Tantia, mibitedi chuinu. Nuquin Papan abitedi cuidte uëshë nëbi yanec, queshun mimbi icsambuen naid ënash bëdambuec tabadquin ënenquio icquin Nuquin Papa chianneta.

Uan 1 3:5

Adquid icnuc Esuquidistu matsesash nuqui icsambuen nabanaidtedi bedshunec abided cuidadec uënëspanëdash, quequin mibitedishun tantiec. Adembidi icsambuen naisambo Esuquidistu nec, quequin mibitedishun tantiauaic.

Uan 1 3:8

Padnuen ënenquiocquin icsambuen nabanquido Mayan Icsa Satanasën namiaido nec. Ënden Nuquin Papan abitedi uabi icnubi Mayan Icsa Satanasën tauaquin icsambuen nampid yequi abi icsambuen namequid nec. Aidën namiaido matses icsho isash Nuquin Papan iuabo icmequin Mayan Icsa Satanas bedshunnuec Nuquin Papan Madombo Esus chopanëdash.

Esusën Uan ismiaid 13:8

Bëdi dapabimbuecquid acte ëquëducuësh chobued chuiquid tapa icsho matses abitedishunquio: Nadatiambocquid yec bëdambo iquec, quequin tantiabededendac. Ëndenquimboshë matses uabi icquin Nuquin Papan tantiampicpadec abided cuidadec uënësaid Obecabimbuecquid tantiesabo nendac. Adquido yec Nuquin Papan: Ubëdi tabadtequido nec, quequin abi cuëmëdquid dadauate dapan dada uamiambo icquido nec, quequin aden ismeposhi.

Esusën Uan ismiaid 17:8

Mimbi isbued bëdi dapabimbuecquid ënden ictennedi nëbi nibëdequi iuecash aidquiobidi abi tabadaid nidaid shëcuë ëquëducuësh padpidec choendac. Adacsho iuecshun cuidquin nibëdanmequiendac. Aden nibëdanmiabi icnubi ëndenquimbo nidaid uabi Nuquin Papan tantiampicpaden abëd tabadmetequido aton cuëmëdquid dadauate dapan dada uaid icnubi utsibo aton cuëmëdquid aid dada uaten dada uambo icquido nidaidën tabadquido tantiadempambo yec tabadendac aid bëdi dapabimbuecquid isash, queposh Nuquin Papabëd icquid.