Ebedeo 2:10 - El Nuevo Testamento en matsés

¹⁰ Aden: Cuna icmenu, quequin Nuquin Papan abitedi uaquid icquin naden tantiapanëdash: Matses cun madobëta cun champi icmeshun bëdamboshë yacno ubëdi tabadmendambi, quepanëdash. Adshumbic ambi tantiacpadembidi: Esuquidistu matsesmeshun natiamiaqui icsambuen naisa yec abided cuidadec uënësacsho uincuenmeshun ubi yacno matses ubëd tabadmequid icmendambi, capanëdash.

Ebedeo 2:10 ပူးပေါင်းရင်းမြစ်များ

Ducas 13:32

Adoaquien: Edodes Antipas bëdi chëshëbimbuen ompoquin abi bunaidquio bedquid nec. Aid yacno nidshun Umbi Chiaid naden chuita: Nëbi podobitsi icsa dapuduenmeshumbi utsibo nënquido bëdanmebanembi. Adoshombic Nuquin Papan tantiacpadënquiobi abadiadshun nainendambi, quequin Edodes Antipas chuita.

Ducas 2:14

Nuquin Papa abucquio tabadquid yec bëdamboshë iquec. Nuquin Papan bëdambuen isaido matses ma bëdambuec tabadpanuna, quec cuëdëmpanëdash.

Ducas 24:26

Nuquin Papa yacnouësh abitedishun icbombo ictequid abuc niduabicnuc Nuquin Papan tantiacpadombuen matsesën Ambi Chomiaid Quidistu mëyanquin uënës uaindac ¿quequin chiaid tantiamboda icco? quepanëdash Esus.

Ducas 24:46

Nuquin Papan chuiquin dada uamiampid nad iquec: Nuquin Papan Chomiaid Quidistu Mesias caidbidi matsesën mëyanquin uënës uaqui daëdec ushash uincuenendac, quequin chuipampic.

Uanën dada uaid 11:52

Aden Caipasën chuinëdaid tantiaquin umbitsen chuinu. Tantia. ¿Isadaidbouidtsëqui cuidmenquio icnuecta Esus abided cuidadec uënëstiondash? Padenquio. Matses utsibontsen abi tantiaquido yansho Nuquin Papan: Cun mado nec. Cun champi nec, caido icsho abëdi tabadmenuec Esus abided cuidadec uënëspondash, quequin tantiembi.

Uanën dada uaid 19:30

Adoac uba chinaid paë uaid mucambo icquid chishquin actanequien: Cun Pan chiacpadombuen nainquiombi, quetanequi tëdquëdbudec Esus uënëspondash.

Hechos 3:15

Aden mibitedishun Esus uënës uamepondac. Aiduidtsëqui Nuquin Papabëd matses tabadmequid icsho uënës uamiacshobien Nuquin Papan uincuenmepaccondash. Aden uincuenmiacsho ubitedishun ispondambi.

Hechos 5:31

Aden uincuenmeshun aton dayun abiucquio tsadmequin abitedishun Icbombo icmeshun abi yacno matses puduedmequidquio Esus icmepanëdash. Aden nabanaid tantiash isadaidbo ma aidquio tantiaquid icpanuna. Adsho issun ma aidon icsambuen naid tantienquio yec Nuquin Papa bëshumpanuna.

Doma 11:36

Nuquin Papan abitedi uapampic. Aidtedi atona nec. Ambi uaid abitedi iquec. Ambi uaidtedi ambi dayun uaidquio nec. Adquid icsho: Nuquin Papa bëdamboshë iquec, canuna ënenquio icquin. Amen.

Doma 9:23

Nuquin Papan matses bëdambuen iste bunquin icsaisambo yec bëdamboshëcquid icquin nuqui tantiamete bunec. Nuquin Papa nuqui tantiec uënësquiocquid icquin ambi ëndenquimbo nacnenampicno bëdamboshë yacno tabadmendac.

Codinto 1 2:7

Umbi tantiaid chienquio icquin Nuquin Papan bëdambuen tantiamiac ambi matses tantiamenquio icpampidi chuibanec nebi. Nidaid uabi yec ëndenquimboshë: Umbi tantiacpadënquio Esus tantiaquido bëdamboshë yacno ubëdi tabadmendambi, quequin chiampidquio chuibanec nebi.

Codinto 1 8:6

Adquid icnubi nuquitedi: Papa, quequin tantiaid Nuquin Papa abentsëcquiobi iquec. Aidi abitedimbo uaquidquio nec. Aidën tantiacpadequi nuquitedi abi tabadec. Adecbidi nuqui Cun Icbo caid Esuquidistu abentsëcquiobi iquec. Aidënuidtsëqui abitedimbo uashun adembidi nuquitedi uapampic.

Codinto 2 3:18

Adquid icnuc: Umbi icsambuen naid bedshunash Esuquidistuded cuidadpanëdash, quequin tantiabenash Esusbimbuec bëdambocquid nuquitedi yanendac. Adsho aidënquiobi icsambuen naisa icquin abipadquid nuqui meniac aton Mayanën nuqui bëdamboshëcquid icmebanendac.

Codinto 2 4:17

Nuqui natiamiaidtedi ënëdendac. Natiamiaid icbuedi Nuquin Papa yacno tabadec bëdamboshë nuqui iquendac. Uënësesa yanash ënëdenquio yec tabadendabi, quequin nuqui tantiec.

Codinto 2 5:18

Nuquin Papan ambi tantiacpaden namiaido nec. Esuquidistunuidtsëqui Nuquin Papa matses bëdambuen ismec. Adquid icquin ubi bëdambuen ismequin umbi Nuquin Papa bëdambuen ismete chuibenneta, caid nebi.

Codinto 2 6:18

Mibitedishun Papa caid nendabi. Adquid icquin: Mibitedi umbi: Cun mado nec. Cun champi nec, caido iquendac, quec Nuquin Papa nadatiambocquid, quequin chuiquin dada uapampic.

Cadasia 3:26

Aden Esuquidistu tantiaquido yec mibitedi Nuquin Papan bacuëbo nec.

Epeso 2:7

Iuecshun utsibon Nuquin Papan aden naid icsho issun: Nuquin Papa bëdambocquid yec matses tantiaquidquio icquin Esuquidistu tantiasho bëdambuen isec, ma capanuna.

Epeso 3:10

Adembidi nëbi chuibenniac matses dadpen Esuquidistu tantiaquido yanacsho issun Nuquin Papabëd icquidobëtan abuc icquid Mayan Icsa Satanasën iuabo abitedishun naden tantiendac: Nuquin Papan abitedi tantiaquidquio icquin Esuquidistu tantiaquid dadpen yanmiac, quequin tantiendac.

Codosas 3:4

Adoaido yec Esuquidistu padpidec choshon abi yacno buanshun abipadquid icmiac mibitsen bëchamauanquiec iquendac.

Timoteo 2 2:10

Aden chuibannubi Nuquin Papan ambi tantiamiaidtedi Esuquidistu tantiamendac. Aid tantiaquido uënësacsho cuidenquio icquin abëdi tabadmendac, quequin tantiec quënën tsadunondaid yequi chieshtoenquio iquebi.

Ebedeo 12:2

Esuquidistu tantiaquionona. Aidëmbi Nuquin Papa tantiameshun abi bëdambuen tantiamequioquin nuqui bëdambuec tabadmequid icquin bëdambocquido icmendac. Aidi nadec onquepanëdash: Cuishonquequin ubi yacno matses iuedembi, quiash matsesacsho icsambuen naquidbimbuecnuc cuidquin mëyanquin ubi cueste napotiaidën dectanendac, quiash dacuëdenquio yec uënësacsho uincuenmiac nidash aton tsadte dapan Nuquin Papa tsadacno aidën dayun abiucquio abitedishun Icbombo yec tsadtuidpanëdash.

Ebedeo 6:20

Adec Esuquidistu ënden Nuquin Papa yacno bëyucanec nidshun abi tantiaquido abi yacno tabadmenuen Nuquin Papa ënenquio icquin bëdambuen ismequid yec nëish iua cuessunneshun pichicaquidon chuiquid tapabimbuecquid yampanëdash. Adquid yec Medquisedecpadquid nibëdantiapimbocquid nepanëdash.

Ebedeo 7:26

Aden nuqui bëdambuen ismequid chuiquid tapa uënësenquio ictequid Esus adquid yanan nuqui bëdamboshë iquec. Aidi bëdamboshëcquid icquin icsambuen naisambo nec. Matses icsambuen naquido nibëdacno Nuquin Papa yacnoshon abitedishun: Cun Icbombo yec mibi bëdamboshëcquid nec, capec.

Ebedeo 7:28

Moisesën chiampicpadombuen Nuquin Papa bëdambuen ismenuen nëish iua cuessunneshun pichicaquidon chuiquid tapa matses icsambuen naquidobi icmepampic. Ëndenquimbo Nuquin Papan: Naden ubi bëdambuen ismequid tapa icmeta, quequin Moises chuipampic. Adoshombic iuecshun Nuquin Papan: Muesambo icquid icquin abimbo caimbi. Cun Mado ënenquio icquin matses ubi bëdambuen ismequid icmendambi. Adoac Abi tantiaquidon icsambuen naid bëshunmequid icsho Nuquin Papan ambi tantiacpadombuen icsambuen naisambo icmepanëdash ënëdtiapimbo icnuc.

Petedo 1 1:12

Naden Nuquin Papan tantiamepampic: Mibitedi nibëdanan umbi chuibued umbi cun matses caid icsho utsibon isendac, quequin Esus chote chuipampic. Aden chiampicpadec choshon Esusën chuibampondash. Adembidi nëbi Nuquin Papan abucshun chomiac aton Mayan Bëdan nadatiambocquin tantiamiacpadombuen Esus chuibennequidon aidën naid mibitedi chuibampanëdash. Aden chuibanaid icnuc Nuquin Papabëd icquidotsen Esusën naid tantiate buncuededec.

Petedo 1 5:1

Tantia. Esus tantiaquidon chuiquido icsho mibitedi chuinu. Mibi padquid Esus tantiaquidon chuiquid nebi. Mëyanquioquin Esuquidistu natiamequin uënës uasho isondambi. Aidi abitedishun Icbo iquec padpidec nidaidën chouashun bëdamboshë yacno ubi tabadmendac, quiash bëdambo iquebi.

Petedo 1 5:10

Aden utsibon chieshënquin natiamiaido yec iuec iuecpactsëc mibitedi mëyadec tabadendac. Adec tabadsho Nuquin Papan bëdamboshëcquid icmequin dayacquiocquid yacbimbuecnuc chieshtoenquio icquid mibi icmendac. Adembidi nuqui tantiaquidquio icquin ambi Esus tantiamiaido icsho abi yacno buanshun nuqui bëdamboshëcquid icmiac ënëdenquio yec Esuquidistubëd daëdash abentsëc yacbimbuecnuc tabadmendac.

Esusën Uan ismiaid 4:11

Mibi bëdamboshë iquec, Papa. Adembidi abitedishun mibi: Bëdambo iquec, capashun. Abitedishun Icbombo mibiuidtsëqui nec. Chuiquid tapambo abentsëcquiobi mibi nec. Nadatiambo icquin nabanquidquio icquin mimbi abitedimbo uapampic. Mimbi tantiacpadombuen mimbiuidtsëcquiobi abitedi uapampic. Adoac mimbi tantiacpadequi mimbi uaido nibëdanambo abi iquec, Papa, quec tsësiobo cuëdëncuededposh.

Esusën Uan ismiaid 7:9

Aden ismeboshombic padpiden Nuquin Papa yacnombo ismeuaposhi. Adoac isaquien matses dadpenquioshë tamëdtiapimbo yec nëidtedi tabadposh. Nëidic nidaid utsi utsiec yacno tabadquido. Nëidic matses utsi utsiecquido. Nëidic onquete utsin utsinquiec onquequido. Nëidic shubu daëdpactsëcquid utsi utsiec yacnocquido. Aidtedi Obecabimbuecquid tantiaquido neposh. Aido Nuquin Papabëta Obecabimbuecquid bëisec tabadposh. Abëdi tabadmequin Nuquin Papan icsaisa icmiaido yec dashcute ushumbo icquiduidquio dasiuidcuededposh. Cun matsesën chuiquid tapa ismiacbimbuen: Nuquin Papa bëdamboshë iqueque. Ismenu, quequin niste podobiecquid sananquin uic uiccabededposh.