Ebedeo 12:23 - El Nuevo Testamento en matsés

²³ Adec tabadnuc abi yacno choash Esus tantiaquidotedi Nuquin Papan: Cun bacuë bëyucquido nec, quequin tantiaquiacbimbuen tantiaidombo yec abi yacno iccuededquido isec anoentsëqui choacbimbuecquido mibi nec. Aido Nuquin Papa yacnoshon abi cuëmëdquid dada uac. Adembidi Nuquin Papa abitedishun naid tantiaquid icquin: Nëid bëdambuen naquid nec. Nëid icsambuen naquid nec, caquid yacno choacbimbuecquido mibi nec. Adecbidi abi tantiaquid bëdambocquido ënden uënësaido Nuquin Papan bëdambuec tabadquidouidquio icmiaido yacno choacbimbuecquido mibi nec.

Ebedeo 12:23 ပူးပေါင်းရင်းမြစ်များ

Ducas 10:20

Aden mimbi chiacpadec podobitsi icsa dapuduensho isash: Bëdambo iquebi, quec cuishonquenda. Adenquio yec: Nuquin Papa yacno ubi cuëmëdquid ënden dada uaid icnuc abi yacno ubi puduedte iquec, quequin tantiec: Bëdambo iquebi, quec cuishonqueta, capanëdash Esusën.

Uanën dada uaid 5:27

Adembidi Matsesën Tishaid icshobi matses icsambuen naquido cuidte chuiquid icmiondashi.

Hechos 20:28

Nëbi nidebique. Ubi nidan chieshtoenquio icquin Esus tantiec bëdambuec tabadta. Adembidi mimbi chuibanaido Esus tantiaquido chuiquin: Chieshtoenda. Esus tantiec bëdambuec tabadta, cadednequin bëdambuen chuibanta. Nuquin Papan Mayan Bëdan aido chuibanquid mibitedi icmioshe. Adota. Aido Nuquin Papa yacno tabadmenuec Esuquidistu abided cuidadec intac mëyanec uënëspanëdash.

Codinto 1 13:12

Nëbi isnanten bëisadquin isac isadentsëcquio yacbimbuen Nuquin Papa nuquitedi bëdiactsëc tantiatsec. Iuecshun Nuquin Papambo nuquitedi bëistuidendac. Aid tantiaquin isenquiocquimbi nëbi Ambi Chiaid tantiembi. Aden tantiabuedi uëshë utsimbi ambi ubi tantiamebocpadombuembidi Nuquin Papa bëistuidquin tantiendambi.

Codinto 1 15:49

Nidaid putu bedshun matses uaid isadacbimbuec isadquido nuquitedi nec. Adecbidi Nuquin Papan abucshun chomiaid isadacbimbuec nuquitedi isadendac.

Codinto 1 15:54

Adtequid chuiquin Nuquin Papan dada uamiampid nad iquec: Chieshëmënquid dëniacquin cuessunniacbimbuen Uënëstequid nibëdanmendac.

Codinto 2 5:8

Aden tantiec bëdambo iquebi. Dada chodquetequid icquimbi: Badedquio chodquesa icmepashuni. Cun Icbobëd tabadec nidnu, quequintsen nuqui tantiec.

Epeso 1:22

Abitedishun: Cun Icbo, caidquio Esuquidistu nec. Abi dëniactiapimbo icquid nibëdec. Adquid yec abi tantiaquidotedishun Icbombo Esuquidistu nec. Abi tantiaquidotedi atona nec. Aidotedi aton dadabimbuecquid nec. Aido namequid yec mapibimbuecquid Esus nec. Aidëmbi abi tantiaquido tantiaquin bëdambuen namebanec.

Pidipos 4:3

Tantia, cun utsi. Ubëtan Esus chuibanondaid icsho mibitsen chuinu. Aid chido daëd chuiquin: Bëdambuec tabadta, cata. Utsibon chieshënnubi aid daëdshun Esusën naid chuibennesho ubi nashunondashe. Adembidi Quedemententsen ubëtan chuibanondash. Adembidi utsibontsen ubëtan chuibanondash. Adquid icsho aido Nuquin Papan: Ubëd tabadtequido nec, quequin aton cuëmëdquid Nuquin Papa yacno tabadtequid dadauate dapan dada uaido nec.

Codosas 1:12

Mimbi bëdambocquid icmebanac icsambocquid nibëdacno mimbi namiacno uëshëmboshë yacno mibi tantiaquid utsibobëd mibëdi tabadendabi, quequin tantiec: Nuquin Papa bëdambo iquec, quec cuishonquendac, Papa, quequin Nuquin Papa chiannembi.

Codosas 1:24

Nëbi mibitedi tantiaquin Esus chuibansho natiamequin mëyanondashi, quec cuishonquec bëdambo iquebi. Ambia chuibansho matsesën Esuquidistu mëyampanëdash. Nëbi Esus tantiaquido mëyantebidi iquendac, quequin Nuquin Papan tantiacpadombuen Esus natiamequin mëyannëdacbimbuen mëyanondashi, quec bëdambo iquebi.

Timoteo 1 3:5

¿Aden aton chidobëta aton bacuëbo bëdambuen namenquio icquinda Esus tantiaquid iccuededquido bëdambuen namepatsiash? Padenquio ictsiash.

Ebedeo 11:4

Ëndenquimbo Abedën Nuquin Papa tantiaquin: Mibi bunacpadombuen cun nëish iua cuessunneshun pichicanu, quequin bëdambuen chuishun pichicasho issun Nuquin Papan bëdambuen isaidquio Abed icpampic. Aton buchi Cainien ambi chiacpadombuen nainquiocquin tiedën icquid pichicasho issun Nuquin Papan icsambuen isaid icpampic. Abed uënësampid icnubi Abedën Nuquin Papa tantiaquioquin nampid chiannetequidquio abi iquec.

Ebedeo 11:40

Aden Nuquin Papan aido tantiaquimbi ambi chiampicpadombuen meniambo icpampic. Aido ënden icquido uënësampidobëtabi nuquitedi bëdamboshëcquido icmequin icsambuen naisabo icmendac.

Ebedeo 2:12

Nuquin Papan chuiquin dada uamequin chuimiacpadec nadecbidi Esus onquendac aton Papa chiec: Mimbi naid chuiquin cun utsibo tantiamembi, Papa. Aidobëd tabadequi mibi tantiec cuëdënebi. Nuquin Papa bëdambo iquec, quec cuëdënebi, quependac.

Ebedeo 9:27

Adecbidi nidaidën tabadquidtedi uënëste uëshë abentsëc iquendac. Uënësacsho uincuemiac matsesën ambi naidtedi chuisho Nuquin Papan tantiendac. Adshumbic Esus tantiaquido cuidenquiocquimbi abi tantiesabo cuidendac.

Santiaco 1:18

Chiaid Bëda Esusën naid abimbo chuibansho tantiashun ubi tantiabenquido chuca uaquin: Cun bacuëbo nec. Ëbëd tabadtequid nec, caindambi, quequin Nuquin Papan tantiapampic. Ambi matses uaidotedi chienquio icquin abi tantiaquidouidtsëqui tantiaquin aden chuipampic.

Petedo 1 2:23

Adquid icsho abi chieshënquidon mamënshunaqui cuidquin chushcainquio icpanëdash. Aidon natiamequin mëyanaqui: Mibitsen cuidendambi, cainquio icpanëdash. Adenquio yec nadpanëdash: Nuquin Papan matsesën naidtedi tantiaquid icquin bëdambocquido abëdi tabadmequin icsambocquido cuidquin chian annëdënquiacno ma nidmepanu, quiash chieshëmënenquio icpanëdash.

Esusën Uan ismiaid 13:8

Bëdi dapabimbuecquid acte ëquëducuësh chobued chuiquid tapa icsho matses abitedishunquio: Nadatiambocquid yec bëdambo iquec, quequin tantiabededendac. Ëndenquimboshë matses uabi icquin Nuquin Papan tantiampicpadec abided cuidadec uënësaid Obecabimbuecquid tantiesabo nendac. Adquido yec Nuquin Papan: Ubëdi tabadtequido nec, quequin abi cuëmëdquid dadauate dapan dada uamiambo icquido nec, quequin aden ismeposhi.

Esusën Uan ismiaid 14:4

Aido nidaidën tabadec: Icsamane, queshun utsibon papa canun nacnenaid tantienquiocquido neposh. Adembidi utsibon Obecabimbuecquid tantiatiapimbo icnubi aid tantiaquidombo icnëdaid neposh. Adquid icquin Obecabimbuecquid ënenquio icquin abi nidacsho tsibanquin tantiaquidombo neposh. Adnëdaid icquin nëish iua pichicaquin ismiacbimbuen Nuquin Papabëta Obecabimbuecquid cuishoncamequioposh.

Esusën Uan ismiaid 20:15

Ambobi abi tantiesabo yec aton cuëmëdquid abëd tabadmetequid dadauate dapan dada uabicquid icsho Nuquin Papan cuidquin nësecaposh.

Esusën Uan ismiaid 6:11

Adoaquien: Chiata. Iuec iuecpactsëcshun naindambi. Min utsibobimbuecquido ubi tantiaquido utsibo umbi tantiactedi chieshëmënquidon ma cuessun secabono. Adosho issun cuessun secanquido cuidendambi, quequin chuiposh. Aden chuitanquin Nuquin Papan: Ubëdi tabadmequin icsaisa mibi icmembi, queshun dashcute ënapen icquid ushumbocquid dasiuimbamposh.

Esusën Uan ismiaid 6:9

Adnubien Obecabimbuecquidën dada uaid bëbitaccaid utsitsen bedshun chicposh chicabi icquid daëdquiobi icnuc. Aid chicnubi nëish iua pichicate dapa dayun abi chieshënquidon tëtequin cuessun secanëdaido Obecabimbuecquid tantiaquido tabadsho ispombi. Aido chieshtoenquio icquin Nuquin Papan Chiaidbëta Obecabimbuecquidën naid chuibanec bëdambuec tabadsho issun cuessun secanëdaido neposh.