Ebedeo 12:22 - El Nuevo Testamento en matsés

²² Padnuen mibitedi dacuëdenquio yec Macuësh Sion cashumbic Edusaden Bëdambocquid abuc icquidën Nuquin Papa uënëstiapimbocquid tabadacno choacbimbuecquido mibi nec. Ambo Nuquin Papabëd icquido tambantiapimbo yec dadpenquioshë nadec onquec: Nuquin Papa bëdamboshë iquec, quec cuëdëncuededec tabadec.

Ebedeo 12:22 ပူးပေါင်းရင်းမြစ်များ

Mateo 16:16

Simon Petedon: Quidistu Mesias caid Nuquin Papa uënëstiapimbocquidën Chomiaidquio yec Aidën Madombo mibi nec, caombi, capondash.

Mateo 5:35

Adembidi nidaid cuënquin: Abimbo chuinu, quequin chienda. Nuquin Papan tincaid neque. Adembidi Edusaden cuënquin: Abimbo chuinu, quequin chienda. Edusaden yacnoshon Nuquin Papan Chomiaidën bëdambuen namendac, quequin chiaid neque.

Doma 11:26

Adoshombic Nuquin Papan isadaidbo bëdambuen isquin abi yacno tabadtequid icmendac. Adquid naden chuiquin Nuquin Papan dada uamiampid iquec: Isadaidbon icsambuen naidtedi bedshunshun bëdambuen isquid nebi, quec Edusaden yacnouësh choendac.

Doma 9:26

Nadentsen ashunquiobidi Nuquin Papan matses utsibo chiaid Oseasën dada uapampic: Mibitedi umbi: Cun matses, cacmaido nec. Adquid icbuedi Nuquin Papa uënëstiapimbocquidën: Cun mado nec. Cun champi nec, caido iquendac, quequin chuiquin Oseasën dada uapampic.

Cadasia 4:26

Padnuen abuc icquid Edusadembimbuecquid yec Sada iuaidpenquio nec. Adquid icnuc nuquitedi Sadan mado iuapenquio yacbimbuecquido yec ambo nuqui tabadendac.

Epeso 2:19

Adquid iquec mibitedi isadaidpembo icbuedi nëbi Nuquin Papan Cun matses caido yanash ënden Nuquin Papan Cun matses canëdaidobëd tabadtequido mibitedi nendac. Nuquin Papan shubun icquidobimbuecquido mibi nec.

Pidipos 3:20

Padnuen nuquitedi Nuquin Papabëd abuc tabadtequido nendac. Abi yacno buannuec abucuësh abi yacno tabadmianquid Nuquin Icbo Esuquidistu chosho isnuen cainec nuqui tabadec.

Tesadonica 1 1:9

Ambocquidombien ambo nidacsho ubitedi mimbi naid chioshi naden: Ambi papa canun ambi nacnenaidtedi aidon tantienquio yanac caosh. Adshumbic: Matses uaquid Nuquin Papambo uënëstiapimbocquid neque. Aidën chiacpadombuen nanuen aid tantiembi, quequin mimbi naidtedi tantiashun aidon chioshi.

Timoteo 2 4:18

Padpiden chieshëmënquidon: Chieshtomenu, casho Nuquin Icbon nac chieshtoenquio ictsiabi. Nuquin Icbombidi abi yacno ambi namiacno abuc abëdi ubi tabadmendac, queshun: Nuquin Icbo bëdamboshë iquec, caimbi ënenquio icquin. Amen.

Ebedeo 10:31

Nuquin Papa uënëstiapimbocquid yec matses tibocamequid icquin icsambuen naquido cuidquidquio dacuëdampamboshë iquec.

Ebedeo 11:10

Nadembidi Abadauanën tantiapampic: Abi yacnoshon Nuquin Papan ambi tantiacpadombuen chimeshadtiapimbo icnuc shubu uaquin dadpen nacnenaidën tabadebi, quequin tantiaquin cainquid nepampic.

Ebedeo 11:16

Adenquio yec: Nuquin Papa yacno bëdamboshë yacno tabadte bunquiebi, quesho tantiashun: Cun matses nec. Aidon Papa nebi, quequin chuishun abi yacno abëd tabadte Nuquin Papan icmiaid shubu dadpen icquid abi iquec.

Ebedeo 13:14

Adquid icnuc nëid nidaidën ënëdenquio yec nuqui tabadte nibëdec. Adquid nibëdnuc nibënacbimbuen Nuquin Papabëd tabadtequid cainquido nuqui nendac.

Ebedeo 3:12

Tantia, cun utsibo. Bëdambuen tantiec tabadta. Uënëstiapimbocquid yec Nuquin Papa abi iqueque. Nëbi aidën chiacpadombuen nanuna, quebuedi: Tantiesa yanshun icsambuen naic cuëshëdchitomane, queshun ënenquio icquin Esus tantiaquiota.

Ebedeo 9:14

Esusën intaquëmbien Nuquin Papa yacnombo matses puduedmetequidquio nec. Nuquin Papan Mayan Bëda uënësesambo icquin dayacquio icmiac Esuquidistu icsambuen naisambo yequi matsesën icsambuen naid bedshunec abided cuidadec uënëspanëdash. Adec uënësaid icnuc nëbi naden nuqui tantiec: Umbi icsambuen naidtedi tantienquio yec bëshunquin ambi cuidtequid icbuedi Esusën mënchicaid icsho Nuquin Papan ubi cuidenquio iquec, quequin nuqui tantiec. Nuquin Papa uënëstiapimbocquidën namiaid icmenuec adec Esus uënëspanëdash.

Udas 1:14

Adquido icsho cun tsusedpa Enoc caidën chuipampic. Aidi abia matses uaid Adanën madon baban tishmiaidën baba Enoc nepampic. Aidëmbi naden chuipampic: Nuquin Papabëd icquido dadpenquioshë tamëdtiapimbo icquido Nuquin Icbobëd chosho issun

Esusën Uan ismiaid 14:1

Adoshombic padpiden ismiac Obecabimbuecquid macuësh tapa Sion caid mannanënquio nidtosho ispombi. Aidbëd abi tantiaquido dadpenquio 144 midted tabadposh. Cuna nec, quequin cudasquin Obecabimbuecquidën cuëmëdquidbëta aton Papan cuëmëdquid dada uaquin bësebanaido neposh.

Esusën Uan ismiaid 21:10

Adshumbic Nuquin Papan Mayanën ushquin isacbimbuecnuc naden ismeposhi. Nuquin Papabëd icquidën ubi buanquin ismeposhi. Aden buanshun macuësh tapa abucquiocquid mannanënquio tsadumposhi. Adoac ashunquio isac abucuësh shubu dadpen icquid bëdamboshë isadquid Nuquin Papa yacnouësh budposh. Aidi Edusaden chuca nec, caposh.

Esusën Uan ismiaid 21:2

Adnubien bëdamboshë isadquid shubu dadpen icquid Edusaden chuca caid Nuquin Papa yacnoësh abucuësh budsho ispombi. Aidi chidon: Ma ubi bednu, quequid dada bedmequin cuishoncamiacbimbuec bëdamboshë isadposh.

Esusën Uan ismiaid 22:19

Adembidi umbi dada uabued nactiacbimbuen abitedi chienquio icsho issun umbi chuibocpadombuen Nuquin Papan cute bacuë uënëstiapimbo icmetequid mibi chemenquio ictsiashe. Adembidi abi tabadaid shubu dadpen icquid bëdamboshëcquid yacno abëdi tabadmenquio mibi ictsiashe. Aden nainda.

Esusën Uan ismiaid 3:12

Mayan Icsa Satanasën: Icsamenu, caqui chieshtoenquio icquin ubi tantiasho ubëdi tabadmendambi. Aden chieshtoenquio icquin ubi tantiaquido utsibo abitedi Nuquin Papa tabadte shubu dapa yacno iuedendambi. Buintad nitsinaid chiquidtiapimbo yacbimbuecnuc cun shubun icquido mibi icmendambi auëshquio cuentiapimbo icnuc. Adoshon mibitedi: Cuna nec, quequin Nuquin Papan cuëmëdquid min dadan dada uaindambi. Adembidi Nuquin Papa yacnouësh abucuësh budtequid shubu dadpen icquid Edusaden chuca caid yacno tabadtequidombo nec, quequin min dadan aid cuëmëdquid dada uaindambi. Ubi cuëmëdquid chuca adembidi min dadan dada uaindambi.

Esusën Uan ismiaid 7:2

Adnubien Nuquin Papabëd icquid Ambi budmiaid uëshë choacmiuësh choposh. Nuquin Papa uënëstiapimbocquidën abi tantiaquido cudasmenuen dada uaquin ambi bësebante sanamposh. Aidën: Nidaidbëta acte dapa icsa uamenda, quequin cumapenec cuëdquin Nuquin Papabëd icquido utsi 4ted icquido chuituidposh: