Ebedeo 12:18 - El Nuevo Testamento en matsés

¹⁸ Ënden: Nuquin Papabëd onquenu, queshun nuquin tsusedpabon nampicpadombuen mibitedishun nambo iquec. Aido ambi isaid macuësh tapa yacno chopampic. Aid macuësh nuamboshë nëdënquedopampic. Adec nëdënquenubi cuencuempambo yec inchëshquio icnubi cunquequid tapatsen icpampic.

Ebedeo 12:18 ပူးပေါင်းရင်းမြစ်များ

Doma 6:14

Nuquin Papan: Naden nata, quequin chuiquin Moises dada uamiampidtedi tantiaquin nabanondaidi mibitedishun aidën chiacpadombuen natiapimbocquin abi tantiasho Nuquin Papan bëdambuen isendac. Aden bëdambuen isquin tantiac icsambuen naic tabadte bunenquio mibitedi yanendac.

Doma 8:15

¿Nuquin Papan Mayanënda mibitedi icsambocquidën iuabimbuecnuc dacuëdmepec? Padenquio. Mibitedi dacuëdmenquio iquec. Aidëmbi namiac mibitedi Nuquin Papan: Cun mado nec, Cun champi nec, caindac. Aidën tantiamiacpadombuen Nuquin Papa chuiquin: Papa papa, quequin nuqui chiannec.

Codinto 2 3:7

Nuquin Papan: Naden nata, quequin cuënoten dada uaquin chiacpadombuenuidi nainquio icquid cuidtequid matses nendac, quequin chuiquin dada uaid meniac Moisesën bëtantete bëchamauanquiec chënquec macuësh budpampic. Budsho isadaidbon bëistiapimbo icpampic. Adec chënquebuedi badedquio chënquenquio yantequidi nepampic.

Codinto 2 3:9

Umbi: Naden nata, quequin chiaid niacquid cuidtequid nendac, quequin dada uaid Nuquin Papan meniac imbudshun Moisesën aton matses ënëdenquiocnoc Nuquin Papabëd tabadmetiapimbo icpampic. Adquid icnubien matsesën icsambuen naid bedshunash icsambuen naisa yequi abided cuidadec uënësaid tantiaquido icsaisabimbuecnuc Nuquin Papan bëdambuen isaido nec, quequin chiaid bëdamboshë iquec.

Timoteo 2 1:7

¿Nuquin Papan aton Mayan nuquibëd icmiacta nuqui natia dacuëdpe? Padenquio. Nadatiambocquin nabanquid nuquibëd icquin nuqui cuesambo icmec. Adembidi Nuquin Papan Mayan Bëdan tantiamiac nuqui utsibobëd tantiananec bëdambuec tabadec. Adembidi nuqui icsambuen nate bunaid namenquio icquin nuqui bëdambuec tabadmec.