Ebedeo 10:10 - El Nuevo Testamento en matsés

¹⁰ Adoac Nuquin Papa bunacpaden: Ma matsesën ubi uënës uanu, quiash padpidec uënësenquio icnush abentsequi abided cuidadec Nuquin Papa matses cuidmenquio icnuec Esuquidistu uënëspanëdash. Aid tantiaquido icsho issun Nuquin Papan: Cuna nec, caido yec aton iuabo nuqui nendac.

Ebedeo 10:10 ပူးပေါင်းရင်းမြစ်များ

Uanën dada uaid 17:19

Nëido tantiaquiec nëbimbobini mimbi chiacpadec ubided cuidadec uënësendac. Adombuembidi ma nëidon mimbi chiacpadombuen nanu, quiash mibi tantiaquidombo icmenuec adebi, quepondash Esus Nuquin Papa chiec.

Uanën dada uaid 19:34

Adotanquimbic: Uënësabi icnushe, queshun: Esus uënësmequiobono, quetanquin sondadon cudan podo ansequin Esus uinte masepondash. Adoac intacbëd acte nuambo chididiquepondash.

Uanën dada uaid 6:51

Aid petebimbuecquidquio yec abucuësh chondaid nebi. Cun nami piash matses uënëstiapimbo icquid yanendac. Adquidquio matses icmenuec ubided cuidadquin cun nami menendambi, quepondash Esus.

Codinto 1 1:30

Adquid icnuc Nuquin Papanuidtsëqui tantiamiac mibitedi Esuquidistubëd abentsëc yacbimbuec tabadquido nec. Adembidi aidëmbi nuquitedi bëdambuenshë tantiaquid icmequin abimbo chuiquid icmec. Adoshon icsambuen naisabimbuecnuc Esusën Nuquin Papa nuqui bëdambuen ismec. Adoaid yec Esuquidistubëd bëdambocquid icsho cuidenquio ictequid Nuquin Papa yacno tabadtequido nuqui nendac. Esus abided cuidadaid icnuc Nuquin Papan nuqui cuidenquio iquendac,

Codinto 1 6:11

Ënden mibitedi utsi utsiec adquido iccondaidi nëbi abi tantiaquido yansho issun acten mentoaido iquec. Adembidi mibitedi Nuquin Papan bëdamboshëcquid icmequin Nuquin Icbo Esuquidistu tantiaquid icsho mibi isaisabimbuecnuc bëdambuen isec. Adembidi Nuquin Papan aton Mayan meniaido mibitedi nendac.

Epeso 5:2

Nuqui tantiaquidquio Esuquidistu nec. Adquid icnuc utsibobëd tantiananec tabadta. Nuquitedi tantiaquidquio yec abided cuidadec uënëspanëdash. Adec abi uënësaid nuadte bëda shëdtequid pichicacbimbuen nasho isash Nuquin Papa: Bëdambo iquec, quepanëdash.

Epeso 5:26

Adec abided cuidadec uënëssun: Ubi tantiaquido bëdamboshëcquid icmenu, queshun ambi Chiaid tantiamequin abi tantiaquido acten mentoadmendac.

Ebedeo 10:12

Esuquidistuen Nuquin Papa matses bëdambuen ismenuec abided cuidadec abentsequi uënësash padpidec cuidadec uënëstiapimbo iquec. Adec uënësash uincuenash aton Papa yacnombo nidash aidën dayun abiucquio tsadtuidpanëdash.

Ebedeo 10:14

Adec abided cuidadec abentsequi uënësquin abi tantiaquido Nuquin Papa bëdambuen ismequin icsaisabimbuecnuc icmequin uënëstiapimbo ictequido icmepanëdash.

Ebedeo 10:20

Esus uënësnuc Nuquin Papa tabadte shubu dapa yacno utsi puduedenquio ictequid yacno dectanaid dashcute dapa abucuësh budec abitiombi canchedbudcuempanëdash. Adec uënësbuedi abi icquin aidënuidtsëqui chuca uaquin utsi yacbimbuecnuc icmiac Nuquin Papa chiannequid nuquitedi nendac.

Ebedeo 10:29

Aden Moisesën chiampid niacquid cuidampid icnuc Nuquin Papan Aton Mado matsesën tantienquio yansho ¿cumapenen cuidenquioda icpatsiash? Aidon Nuquin Papan Mado Esus tintincacbimbuen chieshënec. Esus uënësaid caic: Matses yec abembi uënësaid nepanëdash, quepec. Adembidi aton intac nua chiuidec abided cuidadec uënësaid Esus tantiasho bëdambuen isquin bëdambuec tabadmendambi, quequin Nuquin Papan Chiaid chuca chieshënec. Adembidi Nuquin Papan Mayan Bëda matses bëdambuen iste bunquid icsambuen chuishunuaic.

Ebedeo 10:5

Padnuen Esuquidistu nidaidënshun tishac caniash Nuquin Papa chiec: Mibi bëdambuen ismenuen matsesën nëish iua cuessunneshun pichicatebëta ambi menete utsi iste bunenquio mibi iquec, Papa. Adec bunenquio icquin mimbi tantiacpadombuen matsesën tishaid nebi, Papa.

Ebedeo 13:12

Adembidi shubu dadpen icquid tsicatiaid umanuc matses tabadenquio yacno Esus buanshun uënësuac aton intac chididiquec uënëspanëdash. Adec uënësaid tantiaquido icsho icsaisabimbuecnuc bëdambuen isquin Nuquin Papan: Cun matses nec, caido nuqui nendac.

Ebedeo 2:11

Aden matses bëdambo icmequid Esuquidistun Papa ambi bëdambo icmiaidon Papabidi nendac. Adec Nuquin Papan Madombo icquin Esusën dacuëdenquio icquin: Cun Pabëd ictequid cun utsibobëd nec, caindac.

Ebedeo 2:14

Matses yec namibëd intacchoquid nuquitedi nec. Adecbidi Esus namibëd intacchoquid matses yanash naden nanuec uënëspanëdash. Mayan Icsa Satanas matses uënës uaquid icsho dëniacshun aden namenquio iquembi, quiash Esuquidistu matsesash uënëspanëdash.

Ebedeo 5:7

Esuquidistu matsesash nidaidën tabadec: Ubi uënës uamequin mëyanquiendac, quequin tantiec shubiquioquin naden chuidonepanëdash: Nadatiambocquid icquin ubi uënës uamenda, Papa, quequin chuidoniaqui: Ai, quenquio icsho Aton Madon naden chiec: Papa, mimbi chiacpadombuen naindambi, quequin abi chuisho tantiashun aton Papan adombuen namepanëdash.

Ebedeo 7:27

Adonën tsiuecquidon Nuquin Papa matses bëdambuen ismenuen nëish iua cuessunneshun pichicaquidon chuiquid tapan nacpadombuen Esusën nainquio icpanëdash. Adonën tsiuecquidombien badiadquidën badiadquidënquien nëish iua cuessunneshun pichicadennepanëdash. Ambi icsambuen naidba Nuquin Papa bëshunmenuen pichicashumbic aton matsesën icsambuen naidtsen bëshunmenuen pichicauapanëdash. Padnuen Esuquidistu matsesën icsambuen naidtedi bedshunash abided cuidadec abentsecquiobi uënëspanëdash padpidec uënësenquio icnuec.

Ebedeo 9:12

Matsesën nëish iua cuessunneshun intac bedshun buanec Nuquin Papa tabadte shubu uashunaid quënë bëdamboshëcquidën puduedenquio Esuquidistu icpanëdash. Aidi matsesën icsambuen naid bedshunash abided cuidadec uënësacsho cudan siac aton intac chiuidash Nuquin Papa yacnombo aid ismec puduedpanëdash. Adec abentsequi puduedshun abi tantiaquido nuqui icsho ënenquio icquin Nuquin Papa bëdambuen ismequin nuqui icsambuen naidtedi bëshunmec.

Ebedeo 9:14

Esusën intaquëmbien Nuquin Papa yacnombo matses puduedmetequidquio nec. Nuquin Papan Mayan Bëda uënësesambo icquin dayacquio icmiac Esuquidistu icsambuen naisambo yequi matsesën icsambuen naid bedshunec abided cuidadec uënëspanëdash. Adec uënësaid icnuc nëbi naden nuqui tantiec: Umbi icsambuen naidtedi tantienquio yec bëshunquin ambi cuidtequid icbuedi Esusën mënchicaid icsho Nuquin Papan ubi cuidenquio iquec, quequin nuqui tantiec. Nuquin Papa uënëstiapimbocquidën namiaid icmenuec adec Esus uënëspanëdash.

Ebedeo 9:26

Matsesën nacbimbuen naic taecquiobi abitedi uash matsesën icsambuen naid bedshunash abided cuidadec baded badedquiec Esuquidistu uënëstsempanëdash. Adenquio yec matsesën icsambuen naidtedi bedshunash abided cuidadec abentsecquiobi uënëspanëdash, nëid nidaid nibëdanmete anoentsëqui yannubi.

Ebedeo 9:28

Adecbidi matsesën icsambuen naidtedi bedshunash abided cuidadec Esus abentsequi uënëspanëdash. Adashic aidquiobidi padpidembuec nidaidën chouaindac. Matsesën icsambuen naidtedi bedshunash padpidec uënësnu, quenquio yec abi cainquidotedi abi yacno tabadmenuen bedec chouaindac.

Petedo 1 2:24

Esuquidistu nuqui icsaid bedshunash abided cuidadec cueste napotiaidën diadec uënëspondash. Nuquitedi icsaquido icbuedi ma icsaid ënash bëdambuec tabadnu, quiash uënëspondash. Adecbidi abi tantiaquido bëdambuen isnuec Esuquidistu mëyamëdpondash.

Petedo 1 3:18

Chieshënquin natiamiaqui Esuquidistu mëyadquiec nuqui icsaid bedshunec abided cuidadec abentsequi uënëspondash. Aidi icsaisambo iquequi icsambuen naquido tantiec mëyadbudec uënëspondash: Ma Nuquin Papa yacno tabadtequido icpanu, quiash. Adec aton dada icsabudec uënësambi aton mayan uënësesambo icnuc aton dada uincuempanëdash.

Uan 1 5:6

Esuquidistu nidaidën choacsho: Nuquin Papan Madombo nec, quequin tantiamenuen Uan acten mentoanquidën acten mentopanëdash. Adembidi tantiamenuec cueste napotiaidën dectanac intac chididiquec uënëspanëdash. Adsho issun Nuquin Papan Mayanën: Aid Nuquin Papan Madombo nec, quequin chiaid abimbo nec.